Joshua (Yehoshua): Joshua (Yehoshua) Chapter 5

Tanach (Hebrew): Joshua (Yehoshua) Chapter 5

‎1 ‏וַיְהִ֣י כִשְׁמֹ֣עַ כָּל־מַלְכֵ֣י הָאֱמֹרִ֡י אֲשֶׁר֩ בְּעֵ֨בֶר הַיַּרְדֵּ֜ן יָ֗מָּה וְכָל־מַלְכֵ֤י הַֽכְּנַעֲנִי֙ אֲשֶׁ֣ר עַל־הַיָּ֔ם אֵ֠ת אֲשֶׁר־הוֹבִ֨ישׁ יְהוָ֜ה אֶת־מֵ֧י הַיַּרְדֵּ֛ן מִפְּנֵ֥י בְנֵֽי־יִשְׂרָאֵ֖ל עַד־עברנו עָבְרָ֑ם וַיִּמַּ֣ס לְבָבָ֗ם וְלֹא־הָ֨יָה בָ֥ם עוֹד֙ ר֔וּחַ מִפְּנֵ֖י בְּנֵֽי־יִשְׂרָאֵֽל׃ ס ‎2 ‏בָּעֵ֣ת הַהִ֗יא אָמַ֤ר יְהוָה֙ אֶל־יְהוֹשֻׁ֔עַ עֲשֵׂ֥ה לְךָ֖ חַֽרְב֣וֹת צֻרִ֑ים וְשׁ֛וּב מֹ֥ל אֶת־בְּנֵֽי־יִשְׂרָאֵ֖ל שֵׁנִֽית׃ ‎3 ‏וַיַּעַשׂ־ל֥וֹ יְהוֹשֻׁ֖עַ חַֽרְב֣וֹת צֻרִ֑ים וַיָּ֙מָל֙ אֶת־בְּנֵ֣י יִשְׂרָאֵ֔ל אֶל־גִּבְעַ֖ת הָעֲרָלֽוֹת׃ ‎4 ‏וְזֶ֥ה הַדָּבָ֖ר אֲשֶׁר־מָ֣ל יְהוֹשֻׁ֑עַ כָּל־הָעָ֣ם הַיֹּצֵא֩ מִמִּצְרַ֨יִם הַזְּכָרִ֜ים כֹּ֣ל׀ אַנְשֵׁ֣י הַמִּלְחָמָ֗ה מֵ֤תוּ בַמִּדְבָּר֙ בַּדֶּ֔רֶךְ בְּצֵאתָ֖ם מִמִּצְרָֽיִם׃ ‎5 ‏כִּֽי־מֻלִ֣ים הָי֔וּ כָּל־הָעָ֖ם הַיֹּֽצְאִ֑ים וְכָל־הָ֠עָם הַיִּלֹּדִ֨ים בַּמִּדְבָּ֥ר בַּדֶּ֛רֶךְ בְּצֵאתָ֥ם מִמִּצְרַ֖יִם לֹא־מָֽלוּ׃ ‎6 ‏כִּ֣י׀ אַרְבָּעִ֣ים שָׁנָ֗ה הָלְכ֣וּ בְנֵֽי־יִשְׂרָאֵל֮ בַּמִּדְבָּר֒ עַד־תֹּ֨ם כָּל־הַגּ֜וֹי אַנְשֵׁ֤י הַמִּלְחָמָה֙ הַיֹּצְאִ֣ים מִמִּצְרַ֔יִם אֲשֶׁ֥ר לֹֽא־שָׁמְע֖וּ בְּק֣וֹל יְהוָ֑ה אֲשֶׁ֨ר נִשְׁבַּ֤ע יְהוָה֙ לָהֶ֔ם לְבִלְתִּ֞י הַרְאוֹתָ֣ם אֶת־הָאָ֗רֶץ אֲשֶׁר֩ נִשְׁבַּ֨ע יְהוָ֤ה לַֽאֲבוֹתָם֙ לָ֣תֶת לָ֔נוּ אֶ֛רֶץ זָבַ֥ת חָלָ֖ב וּדְבָֽשׁ׃ ‎7 ‏וְאֶת־בְּנֵיהֶם֙ הֵקִ֣ים תַּחְתָּ֔ם אֹתָ֖ם מָ֣ל יְהוֹשֻׁ֑עַ כִּי־עֲרֵלִ֣ים הָי֔וּ כִּ֛י לֹא־מָ֥לוּ אוֹתָ֖ם בַּדָּֽרֶךְ׃ ‎8 ‏וַיְהִ֛י כַּאֲשֶׁר־תַּ֥מּוּ כָל־הַגּ֖וֹי לְהִמּ֑וֹל וַיֵּשְׁב֥וּ תַחְתָּ֛ם בַּֽמַּחֲנֶ֖ה עַ֥ד חֲיוֹתָֽם׃ פ ‎9 ‏וַיֹּ֤אמֶר יְהוָה֙ אֶל־יְהוֹשֻׁ֔עַ הַיּ֗וֹם גַּלּ֛וֹתִי אֶת־חֶרְפַּ֥ת מִצְרַ֖יִם מֵעֲלֵיכֶ֑ם וַיִּקְרָ֞א שֵׁ֣ם הַמָּק֤וֹם הַהוּא֙ גִּלְגָּ֔ל עַ֖ד הַיּ֥וֹם הַזֶּֽה׃ ‎10 ‏וַיַּחֲנ֥וּ בְנֵֽי־יִשְׂרָאֵ֖ל בַּגִּלְגָּ֑ל וַיַּעֲשׂ֣וּ אֶת־הַפֶּ֡סַח בְּאַרְבָּעָה֩ עָשָׂ֨ר י֥וֹם לַחֹ֛דֶשׁ בָּעֶ֖רֶב בְּעַֽרְב֥וֹת יְרִיחֽוֹ׃ ‎11 ‏וַיֹּ֨אכְל֜וּ מֵעֲב֥וּר הָאָ֛רֶץ מִמָּֽחֳרַ֥ת הַפֶּ֖סַח מַצּ֣וֹת וְקָל֑וּי בְּעֶ֖צֶם הַיּ֥וֹם הַזֶּֽה׃ ‎12 ‏וַיִּשְׁבֹּ֨ת הַמָּ֜ן מִֽמָּחֳרָ֗ת בְּאָכְלָם֙ מֵעֲב֣וּר הָאָ֔רֶץ וְלֹא־הָ֥יָה ע֛וֹד לִבְנֵ֥י יִשְׂרָאֵ֖ל מָ֑ן וַיֹּאכְל֗וּ מִתְּבוּאַת֙ אֶ֣רֶץ כְּנַ֔עַן בַּשָּׁנָ֖ה הַהִֽיא׃ ס ‎13 ‏וַיְהִ֗י בִּֽהְי֣וֹת יְהוֹשֻׁעַ֮ בִּירִיחוֹ֒ וַיִּשָּׂ֤א עֵינָיו֙ וַיַּ֔רְא וְהִנֵּה־אִישׁ֙ עֹמֵ֣ד לְנֶגְדּ֔וֹ וְחַרְבּ֥וֹ שְׁלוּפָ֖ה בְּיָד֑וֹ וַיֵּ֨לֶךְ יְהוֹשֻׁ֤עַ אֵלָיו֙ וַיֹּ֣אמֶר ל֔וֹ הֲלָ֥נוּ אַתָּ֖ה אִם־לְצָרֵֽינוּ׃ ‎14 ‏וַיֹּ֣אמֶר׀ לֹ֗א כִּ֛י אֲנִ֥י שַׂר־צְבָֽא־יְהוָ֖ה עַתָּ֣ה בָ֑אתִי וַיִּפֹּל֩ יְהוֹשֻׁ֨עַ אֶל־פָּנָ֥יו אַ֙רְצָה֙ וַיִּשְׁתָּ֔חוּ וַיֹּ֣אמֶר ל֔וֹ מָ֥ה אֲדֹנִ֖י מְדַבֵּ֥ר אֶל־עַבְדּֽוֹ׃ ‎15 ‏וַיֹּאמֶר֩ שַׂר־צְבָ֨א יְהוָ֜ה אֶל־יְהוֹשֻׁ֗עַ שַׁל־נַֽעַלְךָ֙ מֵעַ֣ל רַגְלֶ֔ךָ כִּ֣י הַמָּק֗וֹם אֲשֶׁ֥ר אַתָּ֛ה עֹמֵ֥ד עָלָ֖יו קֹ֣דֶשׁ ה֑וּא וַיַּ֥עַשׂ יְהוֹשֻׁ֖עַ כֵּֽן׃

1 wayəhî ḵišəmō‘a kāl-maləḵê hā’ĕmōrî ’ăšer bə‘ēḇer hayyarədēn yāmmâ wəḵāl-maləḵê hakəna‘ănî ’ăšer ‘al-hayyām ’ēṯ ’ăšer-hwōḇîš yəhwâ ’eṯ-mê hayyarədēn mipənê ḇənê-yiśərā’ēl ‘aḏ-‘āḇərānû ‘āḇərām wayyimmas ləḇāḇām wəlō’-hāyâ ḇām ‘wōḏ rûḥa mipənê bənê-yiśərā’ēl: s 2 bā‘ēṯ hahî’ ’āmar yəhwâ ’el-yəhwōšu‘a ‘ăśēh ləḵā ḥarəḇwōṯ ṣurîm wəšûḇ mōl ’eṯ-bənê-yiśərā’ēl šēnîṯ: 3 wayya‘aś-lwō yəhwōšu‘a ḥarəḇwōṯ ṣurîm wayyāmāl ’eṯ-bənê yiśərā’ēl ’el-giḇə‘aṯ hā‘ărālwōṯ: 4 wəzeh hadāḇār ’ăšer-māl yəhwōšu‘a kāl-hā‘ām hayyōṣē’ mimmiṣərayim hazzəḵārîm kōl| ’anəšê hammiləḥāmâ mēṯû ḇammiḏəbār badereḵə bəṣē’ṯām mimmiṣərāyim: 5 kî-mulîm hāyû kāl-hā‘ām hayyōṣə’îm wəḵāl-hā‘ām hayyillōḏîm bammiḏəbār badereḵə bəṣē’ṯām mimmiṣərayim lō’-mālû: 6 kî| ’arəbā‘îm šānâ hāləḵû ḇənê-yiśərā’ēl bammiḏəbār ‘aḏ-tōm kāl-hagwōy ’anəšê hammiləḥāmâ hayyōṣə’îm mimmiṣərayim ’ăšer lō’-šāmə‘û bəqwōl yəhwâ ’ăšer nišəba‘ yəhwâ lâem ləḇilətî harə’wōṯām ’eṯ-hā’āreṣ ’ăšer nišəba‘ yəhwâ la’ăḇwōṯām lāṯeṯ lānû ’ereṣ zāḇaṯ ḥālāḇ ûḏəḇāš: 7 wə’eṯ-bənêhem hēqîm taḥətām ’ōṯām māl yəhwōšu‘a kî-‘ărēlîm hāyû kî lō’-mālû ’wōṯām badāreḵə: 8 wayəhî ka’ăšer-tammû ḵāl-hagwōy ləhimmwōl wayyēšəḇû ṯaḥətām bammaḥăneh ‘aḏ ḥăywōṯām: f 9 wayyō’mer yəhwâ ’el-yəhwōšu‘a hayywōm gallwōṯî ’eṯ-ḥerəpaṯ miṣərayim mē‘ălêḵem wayyiqərā’ šēm hammāqwōm hahû’ giləgāl ‘aḏ hayywōm hazzeh: 10 wayyaḥănû ḇənê-yiśərā’ēl bagiləgāl wayya‘ăśû ’eṯ-hapesaḥ bə’arəbā‘â ‘āśār ywōm laḥōḏeš bā‘ereḇ bə‘arəḇwōṯ yərîḥwō: 11 wayyō’ḵəlû mē‘ăḇûr hā’āreṣ mimmāḥŏraṯ hapesaḥ maṣṣwōṯ wəqālûy bə‘eṣem hayywōm hazzeh: 12 wayyišəbōṯ hammān mimmāḥŏrāṯ bə’āḵəlām mē‘ăḇûr hā’āreṣ wəlō’-hāyâ ‘wōḏ liḇənê yiśərā’ēl mān wayyō’ḵəlû mitəḇû’aṯ ’ereṣ kəna‘an baššānâ hahî’: s 13 wayəhî bihəywōṯ yəhwōšu‘a bîrîḥwō wayyiśśā’ ‘ênāyw wayyarə’ wəhinnēh-’îš ‘ōmēḏ ləneḡədwō wəḥarəbwō šəlûfâ bəyāḏwō wayyēleḵə yəhwōšu‘a ’ēlāyw wayyō’mer lwō hălānû ’atâ ’im-ləṣārênû: 14 wayyō’mer| lō’ kî ’ănî śar-ṣəḇā’-yəhwâ ‘atâ ḇā’ṯî wayyipōl yəhwōšu‘a ’el-pānāyw ’arəṣâ wayyišətāḥû wayyō’mer lwō mâ ’ăḏōnî məḏabēr ’el-‘aḇədwō: 15 wayyō’mer śar-ṣəḇā’ yəhwâ ’el-yəhwōšu‘a šal-na‘aləḵā mē‘al raḡəleḵā kî hammāqwōm ’ăšer ’atâ ‘ōmēḏ ‘ālāyw qōḏeš hû’ wayya‘aś yəhwōšu‘a kēn: