Jonah (Yonah): Jonah (Yonah) Chapter 2

Tanach (Hebrew): Jonah (Yonah) Chapter 2

‎1 ‏וַיְמַ֤ן יְהוָה֙ דָּ֣ג גָּד֔וֹל לִבְלֹ֖עַ אֶת־יוֹנָ֑ה וַיְהִ֤י יוֹנָה֙ בִּמְעֵ֣י הַדָּ֔ג שְׁלֹשָׁ֥ה יָמִ֖ים וּשְׁלֹשָׁ֥ה לֵילֽוֹת׃ ‎2 ‏וַיִּתְפַּלֵּ֣ל יוֹנָ֔ה אֶל־יְהוָ֖ה אֱלֹהָ֑יו מִמְּעֵ֖י הַדָּגָֽה׃ ‎3 ‏וַיֹּ֗אמֶר קָ֠רָאתִי מִצָּ֥רָה לִ֛י אֶל־יְהוָ֖ה וַֽיַּעֲנֵ֑נִי מִבֶּ֧טֶן שְׁא֛וֹל שִׁוַּ֖עְתִּי שָׁמַ֥עְתָּ קוֹלִֽי׃ ‎4 ‏וַתַּשְׁלִיכֵ֤נִי מְצוּלָה֙ בִּלְבַ֣ב יַמִּ֔ים וְנָהָ֖ר יְסֹבְבֵ֑נִי כָּל־מִשְׁבָּרֶ֥יךָ וְגַלֶּ֖יךָ עָלַ֥י עָבָֽרוּ׃ ‎5 ‏וַאֲנִ֣י אָמַ֔רְתִּי נִגְרַ֖שְׁתִּי מִנֶּ֣גֶד עֵינֶ֑יךָ אַ֚ךְ אוֹסִ֣יף לְהַבִּ֔יט אֶל־הֵיכַ֖ל קָדְשֶֽׁךָ׃ ‎6 ‏אֲפָפ֤וּנִי מַ֙יִם֙ עַד־נֶ֔פֶשׁ תְּה֖וֹם יְסֹבְבֵ֑נִי ס֖וּף חָב֥וּשׁ לְרֹאשִֽׁי׃ ‎7 ‏לְקִצְבֵ֤י הָרִים֙ יָרַ֔דְתִּי הָאָ֛רֶץ בְּרִחֶ֥יהָ בַעֲדִ֖י לְעוֹלָ֑ם וַתַּ֧עַל מִשַּׁ֛חַת חַיַּ֖י יְהוָ֥ה אֱלֹהָֽי׃ ‎8 ‏בְּהִתְעַטֵּ֤ף עָלַי֙ נַפְשִׁ֔י אֶת־יְהוָ֖ה זָכָ֑רְתִּי וַתָּב֤וֹא אֵלֶ֙יךָ֙ תְּפִלָּתִ֔י אֶל־הֵיכַ֖ל קָדְשֶֽׁךָ׃ ‎9 ‏מְשַׁמְּרִ֖ים הַבְלֵי־שָׁ֑וְא חַסְדָּ֖ם יַעֲזֹֽבוּ׃ ‎10 ‏וַאֲנִ֗י בְּק֤וֹל תּוֹדָה֙ אֶזְבְּחָה־לָּ֔ךְ אֲשֶׁ֥ר נָדַ֖רְתִּי אֲשַׁלֵּ֑מָה יְשׁוּעָ֖תָה לַיהוָֽה׃ ס ‎11 ‏וַיֹּ֥אמֶר יְהוָ֖ה לַדָּ֑ג וַיָּקֵ֥א אֶת־יוֹנָ֖ה אֶל־הַיַּבָּשָֽׁה׃ פ

1 wayəman yəhwâ dāḡ gāḏwōl liḇəlō‘a ’eṯ-ywōnâ wayəhî ywōnâ bimə‘ê hadāḡ šəlōšâ yāmîm ûšəlōšâ lêlwōṯ: 2 wayyiṯəpallēl ywōnâ ’el-yəhwâ ’ĕlōhāyw mimmə‘ê hadāḡâ: 3 wayyō’mer qārā’ṯî miṣṣārâ lî ’el-yəhwâ wayya‘ănēnî mibeṭen šə’wōl šiûa‘ətî šāma‘ətā qwōlî: 4 watašəlîḵēnî məṣûlâ biləḇaḇ yammîm wənâār yəsōḇəḇēnî kāl-mišəbāreyḵā wəḡalleyḵā ‘ālay ‘āḇārû: 5 wa’ănî ’āmarətî niḡərašətî minneḡeḏ ‘êneyḵā ’aḵə ’wōsîf ləhabîṭ ’el-hêḵal qāḏəšeḵā: 6 ’ăfāfûnî mayim ‘aḏ-nefeš təhwōm yəsōḇəḇēnî sûf ḥāḇûš lərō’šî: 7 ləqiṣəḇê hārîm yāraḏətî hā’āreṣ bəriḥeyhā ḇa‘ăḏî lə‘wōlām wata‘al miššaḥaṯ ḥayyay yəhwâ ’ĕlōhāy: 8 bəhiṯə‘aṭṭēf ‘ālay nafəšî ’eṯ-yəhwâ zāḵārətî watāḇwō’ ’ēleyḵā təfillāṯî ’el-hêḵal qāḏəšeḵā: 9 məšammərîm haḇəlê-šāwə’ ḥasədām ya‘ăzōḇû: 10 wa’ănî bəqwōl twōḏâ ’ezəbəḥâ-llāḵə ’ăšer nāḏarətî ’ăšallēmâ yəšû‘āṯâ layhwâ: s 11 wayyō’mer yəhwâ ladāḡ wayyāqē’ ’eṯ-ywōnâ ’el-hayyabāšâ: f