Job (Iyov): Job (Iyov) Chapter 23

Tanach (Hebrew): Job (Iyov) Chapter 23

‎1 ‏וַיַּ֥עַן אִיּ֗וֹב וַיֹּאמַֽר׃ ‎2 ‏גַּם־הַ֭יּוֹם מְרִ֣י שִׂחִ֑י יָ֝דִ֗י כָּבְדָ֥ה עַל־אַנְחָתִֽי׃ ‎3 ‏מִֽי־יִתֵּ֣ן יָ֭דַעְתִּי וְאֶמְצָאֵ֑הוּ אָ֝ב֗וֹא עַד־תְּכוּנָתֽוֹ׃ ‎4 ‏אֶעֶרְכָ֣ה לְפָנָ֣יו מִשְׁפָּ֑ט וּ֝פִ֗י אֲמַלֵּ֥א תוֹכָחֽוֹת׃ ‎5 ‏אֵ֭דְעָה מִלִּ֣ים יַעֲנֵ֑נִי וְ֝אָבִ֗ינָה מַה־יֹּ֥אמַר לִֽי׃ ‎6 ‏הַבְּרָב־כֹּ֖חַ יָרִ֣יב עִמָּדִ֑י לֹ֥א אַךְ־ה֝֗וּא יָשִׂ֥ם בִּֽי׃ ‎7 ‏שָׁ֗ם יָ֭שָׁר נוֹכָ֣ח עִמּ֑וֹ וַאֲפַלְּטָ֥ה לָ֝נֶ֗צַח מִשֹּׁפְטִֽי׃ ‎8 ‏הֵ֤ן קֶ֣דֶם אֶהֱלֹ֣ךְ וְאֵינֶ֑נּוּ וְ֝אָח֗וֹר וְֽלֹא־אָבִ֥ין לֽוֹ׃ ‎9 ‏שְׂמֹ֣אול בַּעֲשֹׂת֣וֹ וְלֹא־אָ֑חַז יַעְטֹ֥ף יָ֝מִ֗ין וְלֹ֣א אֶרְאֶֽה׃ ‎10 ‏כִּֽי־יָ֭דַע דֶּ֣רֶךְ עִמָּדִ֑י בְּ֝חָנַ֗נִי כַּזָּהָ֥ב אֵצֵֽא׃ ‎11 ‏בַּ֭אֲשֻׁרוֹ אָחֲזָ֣ה רַגְלִ֑י דַּרְכּ֖וֹ שָׁמַ֣רְתִּי וְלֹא־אָֽט׃ ‎12 ‏מִצְוַ֣ת שְׂ֭פָתָיו וְלֹ֣א אָמִ֑ישׁ מֵ֝חֻקִּ֗י צָפַ֥נְתִּי אִמְרֵי־פִֽיו׃ ‎13 ‏וְה֣וּא בְ֭אֶחָד וּמִ֣י יְשִׁיבֶ֑נּוּ וְנַפְשׁ֖וֹ אִוְּתָ֣ה וַיָּֽעַשׂ׃ ‎14 ‏כִּ֭י יַשְׁלִ֣ים חֻקִּ֑י וְכָהֵ֖נָּה רַבּ֣וֹת עִמּֽוֹ׃ ‎15 ‏עַל־כֵּ֭ן מִפָּנָ֣יו אֶבָּהֵ֑ל אֶ֝תְבּוֹנֵ֗ן וְאֶפְחַ֥ד מִמֶּֽנּוּ׃ ‎16 ‏וְ֭אֵל הֵרַ֣ךְ לִבִּ֑י וְ֝שַׁדַּ֗י הִבְהִילָֽנִי׃ ‎17 ‏כִּֽי־לֹ֣א נִ֭צְמַתִּי מִפְּנֵי־חֹ֑שֶׁךְ וּ֝מִפָּנַ֗י כִּסָּה־אֹֽפֶל׃

1 wayya‘an ’îywōḇ wayyō’mar: 2 gam-hayywōm mərî śiḥî yāḏî kāḇəḏâ ‘al-’anəḥāṯî: 3 mî-yitēn yāḏa‘ətî wə’eməṣā’ēhû ’āḇwō’ ‘aḏ-təḵûnāṯwō: 4 ’e‘erəḵâ ləfānāyw mišəpāṭ ûfî ’ămallē’ ṯwōḵāḥwōṯ: 5 ’ēḏə‘â millîm ya‘ănēnî wə’āḇînâ mah-yyō’mar lî: 6 habərāḇ-kōḥa yārîḇ ‘immāḏî lō’ ’aḵə-hû’ yāśim bî: 7 šām yāšār nwōḵāḥ ‘immwō wa’ăfalləṭâ lāneṣaḥ miššōfəṭî: 8 hēn qeḏem ’ehĕlōḵə wə’ênennû wə’āḥwōr wəlō’-’āḇîn lwō: 9 śəmō’wl ba‘ăśōṯwō wəlō’-’āḥaz ya‘əṭōf yāmîn wəlō’ ’erə’eh: 10 kî-yāḏa‘ dereḵə ‘immāḏî bəḥānanî kazzâāḇ ’ēṣē’: 11 ba’ăšurwō ’āḥăzâ raḡəlî darəkwō šāmarətî wəlō’-’āṭ: 12 miṣəwaṯ śəfāṯāyw wəlō’ ’āmîš mēḥuqqî ṣāfanətî ’imərê-fîw: 13 wəhû’ ḇə’eḥāḏ ûmî yəšîḇennû wənafəšwō ’iûəṯâ wayyā‘aś: 14 kî yašəlîm ḥuqqî wəḵâēnnâ rabwōṯ ‘immwō: 15 ‘al-kēn mipānāyw ’ebâēl ’eṯəbwōnēn wə’efəḥaḏ mimmennû: 16 wə’ēl hēraḵə libî wəšaday hiḇəhîlānî: 17 kî-lō’ niṣəmatî mipənê-ḥōšeḵə ûmipānay kissâ-’ōfel: