Job (Iyov): Job (Iyov) Chapter 21

Tanach (Hebrew): Job (Iyov) Chapter 21

‎1 ‏וַיַּ֥עַן אִיּ֗וֹב וַיֹּאמַֽר׃ ‎2 ‏שִׁמְע֣וּ שָׁ֭מוֹעַ מִלָּתִ֑י וּתְהִי־זֹ֝֗את תַּנְח֥וּמֹֽתֵיכֶֽם׃ ‎3 ‏שָׂ֭אוּנִי וְאָנֹכִ֣י אֲדַבֵּ֑ר וְאַחַ֖ר דַּבְּרִ֣י תַלְעִֽיג׃ ‎4 ‏הֶ֭אָנֹכִי לְאָדָ֣ם שִׂיחִ֑י וְאִם־מַ֝דּ֗וּעַ לֹא־תִקְצַ֥ר רוּחִֽי׃ ‎5 ‏פְּנוּ־אֵלַ֥י וְהָשַׁ֑מּוּ וְשִׂ֖ימוּ יָ֣ד עַל־פֶּֽה׃ ‎6 ‏וְאִם־זָכַ֥רְתִּי וְנִבְהָ֑לְתִּי וְאָחַ֥ז בְּ֝שָׂרִ֗י פַּלָּצֽוּת׃ ‎7 ‏מַדּ֣וּעַ רְשָׁעִ֣ים יִחְי֑וּ עָ֝תְק֗וּ גַּם־גָּ֥בְרוּ חָֽיִל׃ ‎8 ‏זַרְעָ֤ם נָכ֣וֹן לִפְנֵיהֶ֣ם עִמָּ֑ם וְ֝צֶאֱצָאֵיהֶ֗ם לְעֵינֵיהֶֽם׃ ‎9 ‏בָּתֵּיהֶ֣ם שָׁל֣וֹם מִפָּ֑חַד וְלֹ֤א שֵׁ֖בֶט אֱל֣וֹהַּ עֲלֵיהֶֽם׃ ‎10 ‏שׁוֹר֣וֹ עִ֭בַּר וְלֹ֣א יַגְעִ֑ל תְּפַלֵּ֥ט פָּ֝רָת֗וֹ וְלֹ֣א תְשַׁכֵּֽל׃ ‎11 ‏יְשַׁלְּח֣וּ כַ֭צֹּאן עֲוִילֵיהֶ֑ם וְ֝יַלְדֵיהֶ֗ם יְרַקֵּדֽוּן׃ ‎12 ‏יִ֭שְׂאוּ כְּתֹ֣ף וְכִנּ֑וֹר וְ֝יִשְׂמְח֗וּ לְק֣וֹל עוּגָֽב׃ ‎13 ‏יבלו יְכַלּ֣וּ בַטּ֣וֹב יְמֵיהֶ֑ם וּ֝בְרֶ֗גַע שְׁא֣וֹל יֵחָֽתּוּ׃ ‎14 ‏וַיֹּאמְר֣וּ לָ֭אֵל ס֣וּר מִמֶּ֑נּוּ וְדַ֥עַת דְּ֝רָכֶ֗יךָ לֹ֣א חָפָֽצְנוּ׃ ‎15 ‏מַה־שַׁדַּ֥י כִּֽי־נַֽעַבְדֶ֑נּוּ וּמַה־נּ֝וֹעִ֗יל כִּ֣י נִפְגַּע־בּֽוֹ׃ ‎16 ‏הֵ֤ן לֹ֣א בְיָדָ֣ם טוּבָ֑ם עֲצַ֥ת רְ֝שָׁעִ֗ים רָ֣חֲקָה מֶֽנִּי׃ ‎17 ‏כַּמָּ֤ה׀ נֵר־רְשָׁ֘עִ֤ים יִדְעָ֗ךְ וְיָבֹ֣א עָלֵ֣ימוֹ אֵידָ֑ם חֲ֝בָלִ֗ים יְחַלֵּ֥ק בְּאַפּֽוֹ׃ ‎18 ‏יִהְי֗וּ כְּתֶ֥בֶן לִפְנֵי־ר֑וּחַ וּ֝כְמֹ֗ץ גְּנָבַ֥תּוּ סוּפָֽה׃ ‎19 ‏אֱל֗וֹהַּ יִצְפֹּן־לְבָנָ֥יו אוֹנ֑וֹ יְשַׁלֵּ֖ם אֵלָ֣יו וְיֵדָֽע׃ ‎20 ‏יִרְא֣וּ עינו עֵינָ֣יו כִּיד֑וֹ וּמֵחֲמַ֖ת שַׁדַּ֣י יִשְׁתֶּֽה׃ ‎21 ‏כִּ֤י מַה־חֶפְצ֣וֹ בְּבֵית֣וֹ אַחֲרָ֑יו וּמִסְפַּ֖ר חֳדָשָׁ֣יו חֻצָּֽצוּ׃ ‎22 ‏הַלְאֵ֥ל יְלַמֶּד־דָּ֑עַת וְ֝ה֗וּא רָמִ֥ים יִשְׁפּֽוֹט׃ ‎23 ‏זֶ֗ה יָ֭מוּת בְּעֶ֣צֶם תֻּמּ֑וֹ כֻּ֝לּ֗וֹ שַׁלְאֲנַ֥ן וְשָׁלֵֽיו׃ ‎24 ‏עֲ֭טִינָיו מָלְא֣וּ חָלָ֑ב וּמֹ֖חַ עַצְמוֹתָ֣יו יְשֻׁקֶּֽה׃ ‎25 ‏וְזֶ֗ה יָ֭מוּת בְּנֶ֣פֶשׁ מָרָ֑ה וְלֹֽא־אָ֝כַ֗ל בַּטּוֹבָֽה׃ ‎26 ‏יַ֭חַד עַל־עָפָ֣ר יִשְׁכָּ֑בוּ וְ֝רִמָּ֗ה תְּכַסֶּ֥ה עֲלֵיהֶֽם׃ ‎27 ‏הֵ֣ן יָ֭דַעְתִּי מַחְשְׁבֽוֹתֵיכֶ֑ם וּ֝מְזִמּ֗וֹת עָלַ֥י תַּחְמֹֽסוּ׃ ‎28 ‏כִּ֤י תֹֽאמְר֗וּ אַיֵּ֥ה בֵית־נָדִ֑יב וְ֝אַיֵּ֗ה אֹ֤הֶל׀ מִשְׁכְּנ֬וֹת רְשָׁעִֽים׃ ‎29 ‏הֲלֹ֣א שְׁ֭אֶלְתֶּם ע֣וֹבְרֵי דָ֑רֶךְ וְ֝אֹתֹתָ֗ם לֹ֣א תְנַכֵּֽרוּ׃ ‎30 ‏כִּ֤י לְי֣וֹם אֵ֭יד יֵחָ֣שֶׂךְ רָ֑ע לְי֖וֹם עֲבָר֣וֹת יוּבָֽלוּ׃ ‎31 ‏מִֽי־יַגִּ֣יד עַל־פָּנָ֣יו דַּרְכּ֑וֹ וְהֽוּא־עָ֝שָׂ֗ה מִ֣י יְשַׁלֶּם־לֽוֹ׃ ‎32 ‏וְ֭הוּא לִקְבָר֣וֹת יוּבָ֑ל וְֽעַל־גָּדִ֥ישׁ יִשְׁקֽוֹד׃ ‎33 ‏מָֽתְקוּ־ל֗וֹ רִגְבֵ֫י נָ֥חַל וְ֭אַחֲרָיו כָּל־אָדָ֣ם יִמְשׁ֑וֹךְ וּ֝לְפָנָ֗יו אֵ֣ין מִסְפָּֽר׃ ‎34 ‏וְ֭אֵיךְ תְּנַחֲמ֣וּנִי הָ֑בֶל וּ֝תְשֽׁוּבֹתֵיכֶ֗ם נִשְׁאַר־מָֽעַל׃ ס

1 wayya‘an ’îywōḇ wayyō’mar: 2 šimə‘û šāmwō‘a millāṯî ûṯəhî-zō’ṯ tanəḥûmōṯêḵem: 3 śā’ûnî wə’ānōḵî ’ăḏabēr wə’aḥar dabərî ṯalə‘îḡ: 4 he’ānōḵî lə’āḏām śîḥî wə’im-madû‘a lō’-ṯiqəṣar rûḥî: 5 pənû-’ēlay wəhāšammû wəśîmû yāḏ ‘al-peh: 6 wə’im-zāḵarətî wəniḇəhālətî wə’āḥaz bəśārî pallāṣûṯ: 7 madû‘a rəšā‘îm yiḥəyû ‘āṯəqû gam-gāḇərû ḥāyil: 8 zarə‘ām nāḵwōn lifənêhem ‘immām wəṣe’ĕṣā’êhem lə‘ênêhem: 9 bātêhem šālwōm mipāḥaḏ wəlō’ šēḇeṭ ’ĕlwōhha ‘ălêhem: 10 šwōrwō ‘ibar wəlō’ yaḡə‘il təfallēṭ pārāṯwō wəlō’ ṯəšakēl: 11 yəšalləḥû ḵaṣṣō’n ‘ăwîlêhem wəyaləḏêhem yəraqqēḏûn: 12 yiśə’û kəṯōf wəḵinnwōr wəyiśəməḥû ləqwōl ‘ûḡāḇ: 13 yəḇallû yəḵallû ḇaṭṭwōḇ yəmêhem ûḇəreḡa‘ šə’wōl yēḥātû: 14 wayyō’mərû lā’ēl sûr mimmennû wəḏa‘aṯ dərāḵeyḵā lō’ ḥāfāṣənû: 15 mah-šaday kî-na‘aḇəḏennû ûmah-nnwō‘îl kî nifəga‘-bwō: 16 hēn lō’ ḇəyāḏām ṭûḇām ‘ăṣaṯ rəšā‘îm rāḥăqâ mennî: 17 kammâ| nēr-rəšā‘îm yiḏə‘āḵə wəyāḇō’ ‘ālêmwō ’êḏām ḥăḇālîm yəḥallēq bə’apwō: 18 yihəyû kəṯeḇen lifənê-rûḥa ûḵəmōṣ gənāḇatû sûfâ: 19 ’ĕlwōhha yiṣəpōn-ləḇānāyw ’wōnwō yəšallēm ’ēlāyw wəyēḏā‘: 20 yirə’û ‘ênāw ‘ênāyw kîḏwō ûmēḥămaṯ šaday yišəteh: 21 kî mah-ḥefəṣwō bəḇêṯwō ’aḥărāyw ûmisəpar ḥŏḏāšāyw ḥuṣṣāṣû: 22 halə’ēl yəlammeḏ-dā‘aṯ wəhû’ rāmîm yišəpwōṭ: 23 zeh yāmûṯ bə‘eṣem tummwō kullwō šalə’ănan wəšālêw: 24 ‘ăṭînāyw mālə’û ḥālāḇ ûmōḥa ‘aṣəmwōṯāyw yəšuqqeh: 25 wəzeh yāmûṯ bənefeš mārâ wəlō’-’āḵal baṭṭwōḇâ: 26 yaḥaḏ ‘al-‘āfār yišəkāḇû wərimmâ təḵasseh ‘ălêhem: 27 hēn yāḏa‘ətî maḥəšəḇwōṯêḵem ûməzimmwōṯ ‘ālay taḥəmōsû: 28 kî ṯō’mərû ’ayyēh ḇêṯ-nāḏîḇ wə’ayyēh ’ōhel| mišəkənwōṯ rəšā‘îm: 29 hălō’ šə’elətem ‘wōḇərê ḏāreḵə wə’ōṯōṯām lō’ ṯənakērû: 30 kî ləywōm ’êḏ yēḥāśeḵə rā‘ ləywōm ‘ăḇārwōṯ yûḇālû: 31 mî-yagîḏ ‘al-pānāyw darəkwō wəhû’-‘āśâ mî yəšallem-lwō: 32 wəhû’ liqəḇārwōṯ yûḇāl wə‘al-gāḏîš yišəqwōḏ: 33 māṯəqû-lwō riḡəḇê nāḥal wə’aḥărāyw kāl-’āḏām yiməšwōḵə ûləfānāyw ’ên misəpār: 34 wə’êḵə tənaḥămûnî hāḇel ûṯəšûḇōṯêḵem nišə’ar-mā‘al: s