Jeremiah (Yermiyah): Jeremiah (Yermiyah) Chapter 47

Tanach (Hebrew): Jeremiah (Yermiyah) Chapter 47

‎1 ‏אֲשֶׁ֨ר הָיָ֧ה דְבַר־יְהוָ֛ה אֶל־יִרְמְיָ֥הוּ הַנָּבִ֖יא אֶל־פְּלִשְׁתִּ֑ים בְּטֶ֛רֶם יַכֶּ֥ה פַרְעֹ֖ה אֶת־עַזָּֽה׃ ס ‎2 ‏כֹּ֣ה׀ אָמַ֣ר יְהוָ֗ה הִנֵּה־מַ֜יִם עֹלִ֤ים מִצָּפוֹן֙ וְהָיוּ֙ לְנַ֣חַל שׁוֹטֵ֔ף וְיִשְׁטְפוּ֙ אֶ֣רֶץ וּמְלוֹאָ֔הּ עִ֖יר וְיֹ֣שְׁבֵי בָ֑הּ וְזָֽעֲקוּ֙ הָֽאָדָ֔ם וְהֵילִ֕ל כֹּ֖ל יוֹשֵׁ֥ב הָאָֽרֶץ׃ ‎3 ‏מִקּ֗וֹל שַֽׁעֲטַת֙ פַּרְס֣וֹת אַבִּירָ֔יו מֵרַ֣עַשׁ לְרִכְבּ֔וֹ הֲמ֖וֹן גַּלְגִּלָּ֑יו לֹֽא־הִפְנ֤וּ אָבוֹת֙ אֶל־בָּנִ֔ים מֵֽרִפְי֖וֹן יָדָֽיִם׃ ‎4 ‏עַל־הַיּ֗וֹם הַבָּא֙ לִשְׁד֣וֹד אֶת־כָּל־פְּלִשְׁתִּ֔ים לְהַכְרִ֤ית לְצֹר֙ וּלְצִיד֔וֹן כֹּ֖ל שָׂרִ֣יד עֹזֵ֑ר כִּֽי־שֹׁדֵ֤ד יְהוָה֙ אֶת־פְּלִשְׁתִּ֔ים שְׁאֵרִ֖ית אִ֥י כַפְתּֽוֹר׃ ‎5 ‏בָּ֤אָה קָרְחָה֙ אֶל־עַזָּ֔ה נִדְמְתָ֥ה אַשְׁקְל֖וֹן שְׁאֵרִ֣ית עִמְקָ֑ם עַד־מָתַ֖י תִּתְגּוֹדָֽדִי׃ ס ‎6 ‏ה֗וֹי חֶ֚רֶב לַֽיהוָ֔ה עַד־אָ֖נָה לֹ֣א תִשְׁקֹ֑טִי הֵאָֽסְפִי֙ אַל־תַּעְרֵ֔ךְ הֵרָגְעִ֖י וָדֹֽמִּי׃ ‎7 ‏אֵ֣יךְ תִּשְׁקֹ֔טִי וַֽיהוָ֖ה צִוָּה־לָ֑הּ אֶֽל־אַשְׁקְל֛וֹן וְאֶל־ח֥וֹף הַיָּ֖ם שָׁ֥ם יְעָדָֽהּ׃ ס

1 ’ăšer hāyâ ḏəḇar-yəhwâ ’el-yirəməyâû hannāḇî’ ’el-pəlišətîm bəṭerem yakeh farə‘ōh ’eṯ-‘azzâ: s 2 kōh| ’āmar yəhwâ hinnēh-mayim ‘ōlîm miṣṣāfwōn wəhāyû lənaḥal šwōṭēf wəyišəṭəfû ’ereṣ ûməlwō’āh ‘îr wəyōšəḇê ḇāh wəzā‘ăqû hā’āḏām wəhêlil kōl ywōšēḇ hā’āreṣ: 3 miqqwōl ša‘ăṭaṯ parəswōṯ ’abîrāyw mēra‘aš ləriḵəbwō hămwōn galəgillāyw lō’-hifənû ’āḇwōṯ ’el-bānîm mērifəywōn yāḏāyim: 4 ‘al-hayywōm habā’ lišəḏwōḏ ’eṯ-kāl-pəlišətîm ləhaḵərîṯ ləṣōr ûləṣîḏwōn kōl śārîḏ ‘ōzēr kî-šōḏēḏ yəhwâ ’eṯ-pəlišətîm šə’ērîṯ ’î ḵafətwōr: 5 bā’â qārəḥâ ’el-‘azzâ niḏəməṯâ ’ašəqəlwōn šə’ērîṯ ‘iməqām ‘aḏ-māṯay tiṯəgwōḏāḏî: s 6 hwōy ḥereḇ layhwâ ‘aḏ-’ānâ lō’ ṯišəqōṭî hē’āsəfî ’al-ta‘ərēḵə hērāḡə‘î wāḏōmmî: 7 ’êḵə tišəqōṭî wayhwâ ṣiûâ-lāh ’el-’ašəqəlwōn wə’el-ḥwōf hayyām šām yə‘āḏāh: s