Jeremiah (Yermiyah): Jeremiah (Yermiyah) Chapter 41

Tanach (Hebrew): Jeremiah (Yermiyah) Chapter 41

‎1 ‏וַיְהִ֣י׀ בַּחֹ֣דֶשׁ הַשְּׁבִיעִ֗י בָּ֣א יִשְׁמָעֵ֣אל בֶּן־נְתַנְיָ֣ה בֶן־אֱלִישָׁמָ֣ע מִזֶּ֣רַע הַ֠מְּלוּכָה וְרַבֵּ֨י הַמֶּ֜לֶךְ וַעֲשָׂרָ֨ה אֲנָשִׁ֥ים אִתּ֛וֹ אֶל־גְּדַלְיָ֥הוּ בֶן־אֲחִיקָ֖ם הַמִּצְפָּ֑תָה וַיֹּ֨אכְלוּ שָׁ֥ם לֶ֛חֶם יַחְדָּ֖ו בַּמִּצְפָּֽה׃ ‎2 ‏וַיָּקָם֩ יִשְׁמָעֵ֨אל בֶּן־נְתַנְיָ֜ה וַעֲשֶׂ֥רֶת הָאֲנָשִׁ֣ים׀ אֲשֶׁר־הָי֣וּ אִתּ֗וֹ וַ֠יַּכּוּ אֶת־גְּדַלְיָ֨הוּ בֶן־אֲחִיקָ֧ם בֶּן־שָׁפָ֛ן בַּחֶ֖רֶב וַיָּ֣מֶת אֹת֑וֹ אֲשֶׁר־הִפְקִ֥יד מֶֽלֶךְ־בָּבֶ֖ל בָּאָֽרֶץ׃ ‎3 ‏וְאֵ֣ת כָּל־הַיְּהוּדִ֗ים אֲשֶׁר־הָי֨וּ אִתּ֤וֹ אֶת־גְּדַלְיָ֙הוּ֙ בַּמִּצְפָּ֔ה וְאֶת־הַכַּשְׂדִּ֖ים אֲשֶׁ֣ר נִמְצְאוּ־שָׁ֑ם אֵ֚ת אַנְשֵׁ֣י הַמִּלְחָמָ֔ה הִכָּ֖ה יִשְׁמָעֵֽאל׃ ‎4 ‏וַיְהִ֛י בַּיּ֥וֹם הַשֵּׁנִ֖י לְהָמִ֣ית אֶת־גְּדַלְיָ֑הוּ וְאִ֖ישׁ לֹ֥א יָדָֽע׃ ‎5 ‏וַיָּבֹ֣אוּ אֲ֠נָשִׁים מִשְּׁכֶ֞ם מִשִּׁל֤וֹ וּמִשֹּֽׁמְרוֹן֙ שְׁמֹנִ֣ים אִ֔ישׁ מְגֻלְּחֵ֥י זָקָ֛ן וּקְרֻעֵ֥י בְגָדִ֖ים וּמִתְגֹּֽדְדִ֑ים וּמִנְחָ֤ה וּלְבוֹנָה֙ בְּיָדָ֔ם לְהָבִ֖יא בֵּ֥ית יְהוָֽה׃ ‎6 ‏וַ֠יֵּצֵא יִשְׁמָעֵ֨אל בֶּן־נְתַנְיָ֤ה לִקְרָאתָם֙ מִן־הַמִּצְפָּ֔ה הֹלֵ֥ךְ הָלֹ֖ךְ וּבֹכֶ֑ה וַֽיְהִי֙ כִּפְגֹ֣שׁ אֹתָ֔ם וַיֹּ֣אמֶר אֲלֵיהֶ֔ם בֹּ֖אוּ אֶל־גְּדַלְיָ֥הוּ בֶן־אֲחִיקָֽם׃ ס ‎7 ‏וַיְהִ֕י כְּבוֹאָ֖ם אֶל־תּ֣וֹךְ הָעִ֑יר וַיִּשְׁחָטֵ֞ם יִשְׁמָעֵ֤אל בֶּן־נְתַנְיָה֙ אֶל־תּ֣וֹךְ הַבּ֔וֹר ה֖וּא וְהָאֲנָשִׁ֥ים אֲשֶׁר־אִתּֽוֹ׃ ‎8 ‏וַעֲשָׂרָ֨ה אֲנָשִׁ֜ים נִמְצְאוּ־בָ֗ם וַיֹּאמְר֤וּ אֶל־יִשְׁמָעֵאל֙ אַל־תְּמִתֵ֔נוּ כִּֽי־יֶשׁ־לָ֤נוּ מַטְמֹנִים֙ בַּשָּׂדֶ֔ה חִטִּ֥ים וּשְׂעֹרִ֖ים וְשֶׁ֣מֶן וּדְבָ֑שׁ וַיֶּחְדַּ֕ל וְלֹ֥א הֱמִיתָ֖ם בְּת֥וֹךְ אֲחֵיהֶֽם׃ ‎9 ‏וְהַבּ֗וֹר אֲשֶׁר֩ הִשְׁלִ֨יךְ שָׁ֤ם יִשְׁמָעֵאל֙ אֵ֣ת׀ כָּל־פִּגְרֵ֣י הָאֲנָשִׁ֗ים אֲשֶׁ֤ר הִכָּה֙ בְּיַד־גְּדַלְיָ֔הוּ ה֗וּא אֲשֶׁ֤ר עָשָׂה֙ הַמֶּ֣לֶךְ אָסָ֔א מִפְּנֵ֖י בַּעְשָׁ֣א מֶֽלֶךְ־יִשְׂרָאֵ֑ל אֹת֗וֹ מִלֵּ֛א יִשְׁמָעֵ֥אל בֶּן־נְתַנְיָ֖הוּ חֲלָלִֽים׃ ‎10 ‏וַיִּ֣שְׁבְּ׀ יִ֠שְׁמָעֵאל אֶת־כָּל־שְׁאֵרִ֨ית הָעָ֜ם אֲשֶׁ֣ר בַּמִּצְפָּ֗ה אֶת־בְּנ֤וֹת הַמֶּ֙לֶךְ֙ וְאֶת־כָּל־הָעָם֙ הַנִּשְׁאָרִ֣ים בַּמִּצְפָּ֔ה אֲשֶׁ֣ר הִפְקִ֗יד נְבֽוּזַרְאֲדָן֙ רַב־טַבָּחִ֔ים אֶת־גְּדַלְיָ֖הוּ בֶּן־אֲחִיקָ֑ם וַיִּשְׁבֵּם֙ יִשְׁמָעֵ֣אל בֶּן־נְתַנְיָ֔ה וַיֵּ֕לֶךְ לַעֲבֹ֖ר אֶל־בְּנֵ֥י עַמּֽוֹן׃ ס ‎11 ‏וַיִּשְׁמַע֙ יוֹחָנָ֣ן בֶּן־קָרֵ֔חַ וְכָל־שָׂרֵ֥י הַחֲיָלִ֖ים אֲשֶׁ֣ר אִתּ֑וֹ אֵ֤ת כָּל־הָֽרָעָה֙ אֲשֶׁ֣ר עָשָׂ֔ה יִשְׁמָעֵ֖אל בֶּן־נְתַנְיָֽה׃ ‎12 ‏וַיִּקְחוּ֙ אֶת־כָּל־הָ֣אֲנָשִׁ֔ים וַיֵּ֣לְכ֔וּ לְהִלָּחֵ֖ם עִם־יִשְׁמָעֵ֣אל בֶּן־נְתַנְיָ֑ה וַיִּמְצְא֣וּ אֹת֔וֹ אֶל־מַ֥יִם רַבִּ֖ים אֲשֶׁ֥ר בְּגִבְעֽוֹן׃ ‎13 ‏וַיְהִ֗י כִּרְא֤וֹת כָּל־הָעָם֙ אֲשֶׁ֣ר אֶת־יִשְׁמָעֵ֔אל אֶת־יֽוֹחָנָן֙ בֶּן־קָרֵ֔חַ וְאֵ֛ת כָּל־שָׂרֵ֥י הַחֲיָלִ֖ים אֲשֶׁ֣ר אִתּ֑וֹ וַיִּשְׂמָֽחוּ׃ ‎14 ‏וַיָּסֹ֙בּוּ֙ כָּל־הָעָ֔ם אֲשֶׁר־שָׁבָ֥ה יִשְׁמָעֵ֖אל מִן־הַמִּצְפָּ֑ה וַיָּשֻׁ֙בוּ֙ וַיֵּ֣לְכ֔וּ אֶל־יֽוֹחָנָ֖ן בֶּן־קָרֵֽחַ׃ ‎15 ‏וְיִשְׁמָעֵ֣אל בֶּן־נְתַנְיָ֗ה נִמְלַט֙ בִּשְׁמֹנָ֣ה אֲנָשִׁ֔ים מִפְּנֵ֖י יֽוֹחָנָ֑ן וַיֵּ֖לֶךְ אֶל־בְּנֵ֥י עַמּֽוֹן׃ ס ‎16 ‏וַיִּקַּח֩ יוֹחָנָ֨ן בֶּן־קָרֵ֜חַ וְכָל־שָׂרֵ֧י הַחֲיָלִ֣ים אֲשֶׁר־אִתּ֗וֹ אֵ֣ת כָּל־שְׁאֵרִ֤ית הָעָם֙ אֲשֶׁ֣ר הֵ֠שִׁיב מֵאֵ֨ת יִשְׁמָעֵ֤אל בֶּן־נְתַנְיָה֙ מִן־הַמִּצְפָּ֔ה אַחַ֣ר הִכָּ֔ה אֶת־גְּדַלְיָ֖ה בֶּן־אֲחִיקָ֑ם גְּבָרִ֞ים אַנְשֵׁ֣י הַמִּלְחָמָ֗ה וְנָשִׁ֤ים וְטַף֙ וְסָ֣רִסִ֔ים אֲשֶׁ֥ר הֵשִׁ֖יב מִגִּבְעֽוֹן׃ ‎17 ‏וַיֵּלְכ֗וּ וַיֵּֽשְׁבוּ֙ בְּגֵר֣וּת כמוהם כִּמְהָ֔ם אֲשֶׁר־אֵ֖צֶל בֵּ֣ית לָ֑חֶם לָלֶ֖כֶת לָב֥וֹא מִצְרָֽיִם׃ ‎18 ‏מִפְּנֵי֙ הַכַּשְׂדִּ֔ים כִּ֥י יָרְא֖וּ מִפְּנֵיהֶ֑ם כִּֽי־הִכָּ֞ה יִשְׁמָעֵ֣אל בֶּן־נְתַנְיָ֗ה אֶת־גְּדַלְיָ֙הוּ֙ בֶּן־אֲחִיקָ֔ם אֲשֶׁר־הִפְקִ֥יד מֶֽלֶךְ־בָּבֶ֖ל בָּאָֽרֶץ׃ ס

1 wayəhî| baḥōḏeš haššəḇî‘î bā’ yišəmā‘ē’l ben-nəṯanəyâ ḇen-’ĕlîšāmā‘ mizzera‘ hamməlûḵâ wərabê hammeleḵə wa‘ăśārâ ’ănāšîm ’itwō ’el-gəḏaləyâû ḇen-’ăḥîqām hammiṣəpāṯâ wayyō’ḵəlû šām leḥem yaḥədāw bammiṣəpâ: 2 wayyāqām yišəmā‘ē’l ben-nəṯanəyâ wa‘ăśereṯ hā’ănāšîm| ’ăšer-hāyû ’itwō wayyakû ’eṯ-gəḏaləyâû ḇen-’ăḥîqām ben-šāfān baḥereḇ wayyāmeṯ ’ōṯwō ’ăšer-hifəqîḏ meleḵə-bāḇel bā’āreṣ: 3 wə’ēṯ kāl-hayyəhûḏîm ’ăšer-hāyû ’itwō ’eṯ-gəḏaləyâû bammiṣəpâ wə’eṯ-hakaśədîm ’ăšer niməṣə’û-šām ’ēṯ ’anəšê hammiləḥāmâ hikâ yišəmā‘ē’l: 4 wayəhî bayywōm haššēnî ləhāmîṯ ’eṯ-gəḏaləyâû wə’îš lō’ yāḏā‘: 5 wayyāḇō’û ’ănāšîm miššəḵem miššilwō ûmiššōmərwōn šəmōnîm ’îš məḡulləḥê zāqān ûqəru‘ê ḇəḡāḏîm ûmiṯəgōḏəḏîm ûminəḥâ ûləḇwōnâ bəyāḏām ləhāḇî’ bêṯ yəhwâ: 6 wayyēṣē’ yišəmā‘ē’l ben-nəṯanəyâ liqərā’ṯām min-hammiṣəpâ hōlēḵə hālōḵə ûḇōḵeh wayəhî kifəḡōš ’ōṯām wayyō’mer ’ălêhem bō’û ’el-gəḏaləyâû ḇen-’ăḥîqām: s 7 wayəhî kəḇwō’ām ’el-twōḵə hā‘îr wayyišəḥāṭēm yišəmā‘ē’l ben-nəṯanəyâ ’el-twōḵə habwōr hû’ wəhā’ănāšîm ’ăšer-’itwō: 8 wa‘ăśārâ ’ănāšîm niməṣə’û-ḇām wayyō’mərû ’el-yišəmā‘ē’l ’al-təmiṯēnû kî-yeš-lānû maṭəmōnîm baśśāḏeh ḥiṭṭîm ûśə‘ōrîm wəšemen ûḏəḇāš wayyeḥədal wəlō’ hĕmîṯām bəṯwōḵə ’ăḥêhem: 9 wəhabwōr ’ăšer hišəlîḵə šām yišəmā‘ē’l ’ēṯ| kāl-piḡərê hā’ănāšîm ’ăšer hikâ bəyaḏ-gəḏaləyâû hû’ ’ăšer ‘āśâ hammeleḵə ’āsā’ mipənê ba‘əšā’ meleḵə-yiśərā’ēl ’ōṯwō millē’ yišəmā‘ē’l ben-nəṯanəyâû ḥălālîm: 10 wayyišəbə| yišəmā‘ē’l ’eṯ-kāl-šə’ērîṯ hā‘ām ’ăšer bammiṣəpâ ’eṯ-bənwōṯ hammeleḵə wə’eṯ-kāl-hā‘ām hannišə’ārîm bammiṣəpâ ’ăšer hifəqîḏ nəḇûzarə’ăḏān raḇ-ṭabāḥîm ’eṯ-gəḏaləyâû ben-’ăḥîqām wayyišəbēm yišəmā‘ē’l ben-nəṯanəyâ wayyēleḵə la‘ăḇōr ’el-bənê ‘ammwōn: s 11 wayyišəma‘ ywōḥānān ben-qārēḥa wəḵāl-śārê haḥăyālîm ’ăšer ’itwō ’ēṯ kāl-hārā‘â ’ăšer ‘āśâ yišəmā‘ē’l ben-nəṯanəyâ: 12 wayyiqəḥû ’eṯ-kāl-hā’ănāšîm wayyēləḵû ləhillāḥēm ‘im-yišəmā‘ē’l ben-nəṯanəyâ wayyiməṣə’û ’ōṯwō ’el-mayim rabîm ’ăšer bəḡiḇə‘wōn: 13 wayəhî kirə’wōṯ kāl-hā‘ām ’ăšer ’eṯ-yišəmā‘ē’l ’eṯ-ywōḥānān ben-qārēḥa wə’ēṯ kāl-śārê haḥăyālîm ’ăšer ’itwō wayyiśəmāḥû: 14 wayyāsōbû kāl-hā‘ām ’ăšer-šāḇâ yišəmā‘ē’l min-hammiṣəpâ wayyāšuḇû wayyēləḵû ’el-ywōḥānān ben-qārēḥa: 15 wəyišəmā‘ē’l ben-nəṯanəyâ niməlaṭ bišəmōnâ ’ănāšîm mipənê ywōḥānān wayyēleḵə ’el-bənê ‘ammwōn: s 16 wayyiqqaḥ ywōḥānān ben-qārēḥa wəḵāl-śārê haḥăyālîm ’ăšer-’itwō ’ēṯ kāl-šə’ērîṯ hā‘ām ’ăšer hēšîḇ mē’ēṯ yišəmā‘ē’l ben-nəṯanəyâ min-hammiṣəpâ ’aḥar hikâ ’eṯ-gəḏaləyâ ben-’ăḥîqām gəḇārîm ’anəšê hammiləḥāmâ wənāšîm wəṭaf wəsārisîm ’ăšer hēšîḇ migiḇə‘wōn: 17 wayyēləḵû wayyēšəḇû bəḡērûṯ kiməwhām kiməhām ’ăšer-’ēṣel bêṯ lāḥem lāleḵeṯ lāḇwō’ miṣərāyim: 18 mipənê hakaśədîm kî yārə’û mipənêhem kî-hikâ yišəmā‘ē’l ben-nəṯanəyâ ’eṯ-gəḏaləyâû ben-’ăḥîqām ’ăšer-hifəqîḏ meleḵə-bāḇel bā’āreṣ: s