Jeremiah (Yermiyah): Jeremiah (Yermiyah) Chapter 34

Tanach (Hebrew): Jeremiah (Yermiyah) Chapter 34

‎1 ‏הַדָּבָ֛ר אֲשֶׁר־הָיָ֥ה אֶֽל־יִרְמְיָ֖הוּ מֵאֵ֣ת יְהוָ֑ה וּנְבוּכַדְרֶאצַּ֣ר מֶֽלֶךְ־בָּבֶ֣ל׀ וְכָל־חֵיל֡וֹ וְכָל־מַמְלְכ֣וֹת אֶרֶץ֩ מֶמְשֶׁ֨לֶת יָד֜וֹ וְכָל־הָעַמִּ֗ים נִלְחָמִ֧ים עַל־יְרוּשָׁלִַ֛ם וְעַל־כָּל־עָרֶ֖יהָ לֵאמֹֽר׃ ‎2 ‏כֹּֽה־אָמַ֤ר יְהוָה֙ אֱלֹהֵ֣י יִשְׂרָאֵ֔ל הָלֹךְ֙ וְאָ֣מַרְתָּ֔ אֶל־צִדְקִיָּ֖הוּ מֶ֣לֶךְ יְהוּדָ֑ה וְאָמַרְתָּ֣ אֵלָ֗יו כֹּ֚ה אָמַ֣ר יְהוָ֔ה הִנְנִ֨י נֹתֵ֜ן אֶת־הָעִ֤יר הַזֹּאת֙ בְּיַ֣ד מֶֽלֶךְ־בָּבֶ֔ל וּשְׂרָפָ֖הּ בָּאֵֽשׁ׃ ‎3 ‏וְאַתָּ֗ה לֹ֚א תִמָּלֵט֙ מִיָּד֔וֹ כִּ֚י תָּפֹ֣שׂ תִּתָּפֵ֔שׂ וּבְיָד֖וֹ תִּנָּתֵ֑ן וְֽ֠עֵינֶיךָ אֶת־עֵינֵ֨י מֶֽלֶךְ־בָּבֶ֜ל תִּרְאֶ֗ינָה וּפִ֛יהוּ אֶת־פִּ֥יךָ יְדַבֵּ֖ר וּבָבֶ֥ל תָּבֽוֹא׃ ‎4 ‏אַ֚ךְ שְׁמַ֣ע דְּבַר־יְהוָ֔ה צִדְקִיָּ֖הוּ מֶ֣לֶךְ יְהוּדָ֑ה כֹּֽה־אָמַ֤ר יְהוָה֙ עָלֶ֔יךָ לֹ֥א תָמ֖וּת בֶּחָֽרֶב׃ ‎5 ‏בְּשָׁל֣וֹם תָּמ֗וּת וּֽכְמִשְׂרְפ֣וֹת אֲ֠בוֹתֶיךָ הַמְּלָכִ֨ים הָרִֽאשֹׁנִ֜ים אֲשֶׁר־הָי֣וּ לְפָנֶ֗יךָ כֵּ֚ן יִשְׂרְפוּ־לָ֔ךְ וְה֥וֹי אָד֖וֹן יִסְפְּדוּ־לָ֑ךְ כִּֽי־דָבָ֥ר אֲנִֽי־דִבַּ֖רְתִּי נְאֻם־יְהוָֽה׃ ס ‎6 ‏וַיְדַבֵּר֙ יִרְמְיָ֣הוּ הַנָּבִ֔יא אֶל־צִדְקִיָּ֖הוּ מֶ֣לֶךְ יְהוּדָ֑ה אֵ֛ת כָּל־הַדְּבָרִ֥ים הָאֵ֖לֶּה בִּירוּשָׁלִָֽם׃ ‎7 ‏וְחֵ֣יל מֶֽלֶךְ־בָּבֶ֗ל נִלְחָמִים֙ עַל־יְר֣וּשָׁלִַ֔ם וְעַ֛ל כָּל־עָרֵ֥י יְהוּדָ֖ה הַנּֽוֹתָר֑וֹת אֶל־לָכִישׁ֙ וְאֶל־עֲזֵקָ֔ה כִּ֣י הֵ֗נָּה נִשְׁאֲר֛וּ בְּעָרֵ֥י יְהוּדָ֖ה עָרֵ֥י מִבְצָֽר׃ פ ‎8 ‏הַדָּבָ֛ר אֲשֶׁר־הָיָ֥ה אֶֽל־יִרְמְיָ֖הוּ מֵאֵ֣ת יְהוָ֑ה אַחֲרֵ֡י כְּרֹת֩ הַמֶּ֨לֶךְ צִדְקִיָּ֜הוּ בְּרִ֗ית אֶת־כָּל־הָעָם֙ אֲשֶׁ֣ר בִּירֽוּשָׁלִַ֔ם לִקְרֹ֥א לָהֶ֖ם דְּרֽוֹר׃ ‎9 ‏לְ֠שַׁלַּח אִ֣ישׁ אֶת־עַבְדּ֞וֹ וְאִ֧ישׁ אֶת־שִׁפְחָת֛וֹ הָעִבְרִ֥י וְהָעִבְרִיָּ֖ה חָפְשִׁ֑ים לְבִלְתִּ֧י עֲבָד־בָּ֛ם בִּיהוּדִ֥י אָחִ֖יהוּ אִֽישׁ׃ ‎10 ‏וַיִּשְׁמְעוּ֩ כָל־הַשָּׂרִ֨ים וְכָל־הָעָ֜ם אֲשֶׁר־בָּ֣אוּ בַבְּרִ֗ית לְ֠שַׁלַּח אִ֣ישׁ אֶת־עַבְדּ֞וֹ וְאִ֤ישׁ אֶת־שִׁפְחָתוֹ֙ חָפְשִׁ֔ים לְבִלְתִּ֥י עֲבָד־בָּ֖ם ע֑וֹד וַֽיִּשְׁמְע֖וּ וַיְשַׁלֵּֽחוּ׃ ‎11 ‏וַיָּשׁ֙וּבוּ֙ אַחֲרֵי־כֵ֔ן וַיָּשִׁ֗בוּ אֶת־הָֽעֲבָדִים֙ וְאֶת־הַשְּׁפָח֔וֹת אֲשֶׁ֥ר שִׁלְּח֖וּ חָפְשִׁ֑ים ויכבישום וַֽיִּכְבְּשׁ֔וּם לַעֲבָדִ֖ים וְלִשְׁפָחֽוֹת׃ ס ‎12 ‏וַיְהִ֤י דְבַר־יְהוָה֙ אֶֽל־יִרְמְיָ֔הוּ מֵאֵ֥ת יְהוָ֖ה לֵאמֹֽר׃ ‎13 ‏כֹּֽה־אָמַ֥ר יְהוָ֖ה אֱלֹהֵ֣י יִשְׂרָאֵ֑ל אָנֹכִ֗י כָּרַ֤תִּֽי בְרִית֙ אֶת־אֲב֣וֹתֵיכֶ֔ם בְּי֨וֹם הוֹצִאִ֤י אוֹתָם֙ מֵאֶ֣רֶץ מִצְרַ֔יִם מִבֵּ֥ית עֲבָדִ֖ים לֵאמֹֽר׃ ‎14 ‏מִקֵּ֣ץ שֶׁ֣בַע שָׁנִ֡ים תְּֽשַׁלְּח֡וּ אִישׁ֩ אֶת־אָחִ֨יו הָעִבְרִ֜י אֲשֶֽׁר־יִמָּכֵ֣ר לְךָ֗ וַעֲבָֽדְךָ֙ שֵׁ֣שׁ שָׁנִ֔ים וְשִׁלַּחְתּ֥וֹ חָפְשִׁ֖י מֵֽעִמָּ֑ךְ וְלֹֽא־שָׁמְע֤וּ אֲבֽוֹתֵיכֶם֙ אֵלַ֔י וְלֹ֥א הִטּ֖וּ אֶת־אָזְנָֽם׃ ‎15 ‏וַתָּשֻׁ֨בוּ אַתֶּ֜ם הַיּ֗וֹם וַתַּעֲשׂ֤וּ אֶת־הַיָּשָׁר֙ בְּעֵינַ֔י לִקְרֹ֥א דְר֖וֹר אִ֣ישׁ לְרֵעֵ֑הוּ וַתִּכְרְת֤וּ בְרִית֙ לְפָנַ֔י בַּבַּ֕יִת אֲשֶׁר־נִקְרָ֥א שְׁמִ֖י עָלָֽיו׃ ‎16 ‏וַתָּשֻׁ֙בוּ֙ וַתְּחַלְּל֣וּ אֶת־שְׁמִ֔י וַתָּשִׁ֗בוּ אִ֤ישׁ אֶת־עַבְדּוֹ֙ וְאִ֣ישׁ אֶת־שִׁפְחָת֔וֹ אֲשֶׁר־שִׁלַּחְתֶּ֥ם חָפְשִׁ֖ים לְנַפְשָׁ֑ם וַתִּכְבְּשׁ֣וּ אֹתָ֔ם לִֽהְי֣וֹת לָכֶ֔ם לַעֲבָדִ֖ים וְלִשְׁפָחֽוֹת׃ ס ‎17 ‏לָכֵן֮ כֹּה־אָמַ֣ר יְהוָה֒ אַתֶּם֙ לֹֽא־שְׁמַעְתֶּ֣ם אֵלַ֔י לִקְרֹ֣א דְר֔וֹר אִ֥ישׁ לְאָחִ֖יו וְאִ֣ישׁ לְרֵעֵ֑הוּ הִנְנִ֣י קֹרֵא֩ לָכֶ֨ם דְּר֜וֹר נְאֻם־יְהוָ֗ה אֶל־הַחֶ֙רֶב֙ אֶל־הַדֶּ֣בֶר וְאֶל־הָרָעָ֔ב וְנָתַתִּ֤י אֶתְכֶם֙ לזועה לְזַעֲוָ֔ה לְכֹ֖ל מַמְלְכ֥וֹת הָאָֽרֶץ׃ ‎18 ‏וְנָתַתִּ֣י אֶת־הָאֲנָשִׁ֗ים הָעֹֽבְרִים֙ אֶת־בְּרִתִ֔י אֲשֶׁ֤ר לֹֽא־הֵקִ֙ימוּ֙ אֶת־דִּבְרֵ֣י הַבְּרִ֔ית אֲשֶׁ֥ר כָּרְת֖וּ לְפָנָ֑י הָעֵ֙גֶל֙ אֲשֶׁ֣ר כָּרְת֣וּ לִשְׁנַ֔יִם וַיַּעַבְר֖וּ בֵּ֥ין בְּתָרָֽיו׃ ‎19 ‏שָׂרֵ֨י יְהוּדָ֜ה וְשָׂרֵ֣י יְרוּשָׁלִַ֗ם הַסָּֽרִסִים֙ וְהַכֹּ֣הֲנִ֔ים וְכֹ֖ל עַ֣ם הָאָ֑רֶץ הָעֹ֣בְרִ֔ים בֵּ֖ין בִּתְרֵ֥י הָעֵֽגֶל׃ ‎20 ‏וְנָתַתִּ֤י אוֹתָם֙ בְּיַ֣ד אֹֽיְבֵיהֶ֔ם וּבְיַ֖ד מְבַקְשֵׁ֣י נַפְשָׁ֑ם וְהָיְתָ֤ה נִבְלָתָם֙ לְמַֽאֲכָ֔ל לְע֥וֹף הַשָּׁמַ֖יִם וּלְבֶהֱמַ֥ת הָאָֽרֶץ׃ ‎21 ‏וְאֶת־צִדְקִיָּ֨הוּ מֶֽלֶךְ־יְהוּדָ֜ה וְאֶת־שָׂרָ֗יו אֶתֵּן֙ בְּיַ֣ד אֹֽיְבֵיהֶ֔ם וּבְיַ֖ד מְבַקְשֵׁ֣י נַפְשָׁ֑ם וּבְיַד חֵ֚יל מֶ֣לֶךְ בָּבֶ֔ל הָעֹלִ֖ים מֵעֲלֵיכֶֽם׃ ‎22 ‏הִנְנִ֨י מְצַוֶּ֜ה נְאֻם־יְהוָ֗ה וַהֲשִׁ֨בֹתִ֜ים אֶל־הָעִ֤יר הַזֹּאת֙ וְנִלְחֲמ֣וּ עָלֶ֔יהָ וּלְכָד֖וּהָ וּשְׂרָפֻ֣הָ בָאֵ֑שׁ וְאֶת־עָרֵ֧י יְהוּדָ֛ה אֶתֵּ֥ן שְׁמָמָ֖ה מֵאֵ֥ין יֹשֵֽׁב׃ פ

1 hadāḇār ’ăšer-hāyâ ’el-yirəməyâû mē’ēṯ yəhwâ ûnəḇûḵaḏəre’ṣṣar meleḵə-bāḇel| wəḵāl-ḥêlwō wəḵāl-mamələḵwōṯ ’ereṣ meməšeleṯ yāḏwō wəḵāl-hā‘ammîm niləḥāmîm ‘al-yərûšālaim wə‘al-kāl-‘āreyhā lē’mōr: 2 kōh-’āmar yəhwâ ’ĕlōhê yiśərā’ēl hālōḵə wə’āmarətā ’el-ṣiḏəqîyâû meleḵə yəhûḏâ wə’āmarətā ’ēlāyw kōh ’āmar yəhwâ hinənî nōṯēn ’eṯ-hā‘îr hazzō’ṯ bəyaḏ meleḵə-bāḇel ûśərāfāh bā’ēš: 3 wə’atâ lō’ ṯimmālēṭ mîyāḏwō kî tāfōś titāfēś ûḇəyāḏwō tinnāṯēn wə‘êneyḵā ’eṯ-‘ênê meleḵə-bāḇel tirə’eynâ ûfîhû ’eṯ-pîḵā yəḏabēr ûḇāḇel tāḇwō’: 4 ’aḵə šəma‘ dəḇar-yəhwâ ṣiḏəqîyâû meleḵə yəhûḏâ kōh-’āmar yəhwâ ‘āleyḵā lō’ ṯāmûṯ beḥāreḇ: 5 bəšālwōm tāmûṯ ûḵəmiśərəfwōṯ ’ăḇwōṯeyḵā hamməlāḵîm hāri’šōnîm ’ăšer-hāyû ləfāneyḵā kēn yiśərəfû-lāḵə wəhwōy ’āḏwōn yisəpəḏû-lāḵə kî-ḏāḇār ’ănî-ḏibarətî nə’um-yəhwâ: s 6 wayəḏabēr yirəməyâû hannāḇî’ ’el-ṣiḏəqîyâû meleḵə yəhûḏâ ’ēṯ kāl-hadəḇārîm hā’ēlleh bîrûšālāim: 7 wəḥêl meleḵə-bāḇel niləḥāmîm ‘al-yərûšālaim wə‘al kāl-‘ārê yəhûḏâ hannwōṯārwōṯ ’el-lāḵîš wə’el-‘ăzēqâ kî hēnnâ nišə’ărû bə‘ārê yəhûḏâ ‘ārê miḇəṣār: f 8 hadāḇār ’ăšer-hāyâ ’el-yirəməyâû mē’ēṯ yəhwâ ’aḥărê kərōṯ hammeleḵə ṣiḏəqîyâû bərîṯ ’eṯ-kāl-hā‘ām ’ăšer bîrûšālaim liqərō’ lâem dərwōr: 9 ləšallaḥ ’îš ’eṯ-‘aḇədwō wə’îš ’eṯ-šifəḥāṯwō hā‘iḇərî wəhā‘iḇərîyâ ḥāfəšîm ləḇilətî ‘ăḇāḏ-bām bîhûḏî ’āḥîhû ’îš: 10 wayyišəmə‘û ḵāl-haśśārîm wəḵāl-hā‘ām ’ăšer-bā’û ḇabərîṯ ləšallaḥ ’îš ’eṯ-‘aḇədwō wə’îš ’eṯ-šifəḥāṯwō ḥāfəšîm ləḇilətî ‘ăḇāḏ-bām ‘wōḏ wayyišəmə‘û wayəšallēḥû: 11 wayyāšûḇû ’aḥărê-ḵēn wayyāšiḇû ’eṯ-hā‘ăḇāḏîm wə’eṯ-haššəfāḥwōṯ ’ăšer šilləḥû ḥāfəšîm wayyaḵəbîšûm wayyiḵəbəšûm la‘ăḇāḏîm wəlišəfāḥwōṯ: s 12 wayəhî ḏəḇar-yəhwâ ’el-yirəməyâû mē’ēṯ yəhwâ lē’mōr: 13 kōh-’āmar yəhwâ ’ĕlōhê yiśərā’ēl ’ānōḵî kāratî ḇərîṯ ’eṯ-’ăḇwōṯêḵem bəywōm hwōṣi’î ’wōṯām mē’ereṣ miṣərayim mibêṯ ‘ăḇāḏîm lē’mōr: 14 miqqēṣ šeḇa‘ šānîm təšalləḥû ’îš ’eṯ-’āḥîw hā‘iḇərî ’ăšer-yimmāḵēr ləḵā wa‘ăḇāḏəḵā šēš šānîm wəšillaḥətwō ḥāfəšî mē‘immāḵə wəlō’-šāmə‘û ’ăḇwōṯêḵem ’ēlay wəlō’ hiṭṭû ’eṯ-’āzənām: 15 watāšuḇû ’atem hayywōm wata‘ăśû ’eṯ-hayyāšār bə‘ênay liqərō’ ḏərwōr ’îš lərē‘ēhû watiḵərəṯû ḇərîṯ ləfānay babayiṯ ’ăšer-niqərā’ šəmî ‘ālāyw: 16 watāšuḇû watəḥalləlû ’eṯ-šəmî watāšiḇû ’îš ’eṯ-‘aḇədwō wə’îš ’eṯ-šifəḥāṯwō ’ăšer-šillaḥətem ḥāfəšîm lənafəšām watiḵəbəšû ’ōṯām lihəywōṯ lāḵem la‘ăḇāḏîm wəlišəfāḥwōṯ: s 17 lāḵēn kōh-’āmar yəhwâ ’atem lō’-šəma‘ətem ’ēlay liqərō’ ḏərwōr ’îš lə’āḥîw wə’îš lərē‘ēhû hinənî qōrē’ lāḵem dərwōr nə’um-yəhwâ ’el-haḥereḇ ’el-hadeḇer wə’el-hārā‘āḇ wənāṯatî ’eṯəḵem lizəwā‘â ləza‘ăwâ ləḵōl mamələḵwōṯ hā’āreṣ: 18 wənāṯatî ’eṯ-hā’ănāšîm hā‘ōḇərîm ’eṯ-bəriṯî ’ăšer lō’-hēqîmû ’eṯ-diḇərê habərîṯ ’ăšer kārəṯû ləfānāy hā‘ēḡel ’ăšer kārəṯû lišənayim wayya‘aḇərû bên bəṯārāyw: 19 śārê yəhûḏâ wəśārê yərûšālaim hassārisîm wəhakōhănîm wəḵōl ‘am hā’āreṣ hā‘ōḇərîm bên biṯərê hā‘ēḡel: 20 wənāṯatî ’wōṯām bəyaḏ ’ōyəḇêhem ûḇəyaḏ məḇaqəšê nafəšām wəhāyəṯâ niḇəlāṯām ləma’ăḵāl lə‘wōf haššāmayim ûləḇehĕmaṯ hā’āreṣ: 21 wə’eṯ-ṣiḏəqîyâû meleḵə-yəhûḏâ wə’eṯ-śārāyw ’etēn bəyaḏ ’ōyəḇêhem ûḇəyaḏ məḇaqəšê nafəšām ûḇəyaḏ ḥêl meleḵə bāḇel hā‘ōlîm mē‘ălêḵem: 22 hinənî məṣaûeh nə’um-yəhwâ wahăšiḇōṯîm ’el-hā‘îr hazzō’ṯ wəniləḥămû ‘āleyhā ûləḵāḏûhā ûśərāfuhā ḇā’ēš wə’eṯ-‘ārê yəhûḏâ ’etēn šəmāmâ mē’ên yōšēḇ: f