Isaiah (Yisheyah): Isaiah (Yisheyah) Chapter 6

Tanach (Hebrew): Isaiah (Yisheyah) Chapter 6

‎1 ‏בִּשְׁנַת־מוֹת֙ הַמֶּ֣לֶךְ עֻזִּיָּ֔הוּ וָאֶרְאֶ֧ה אֶת־אֲדֹנָ֛י יֹשֵׁ֥ב עַל־כִּסֵּ֖א רָ֣ם וְנִשָּׂ֑א וְשׁוּלָ֖יו מְלֵאִ֥ים אֶת־הַהֵיכָֽל׃ ‎2 ‏שְׂרָפִ֨ים עֹמְדִ֤ים׀ מִמַּ֙עַל֙ ל֔וֹ שֵׁ֧שׁ כְּנָפַ֛יִם שֵׁ֥שׁ כְּנָפַ֖יִם לְאֶחָ֑ד בִּשְׁתַּ֣יִם׀ יְכַסֶּ֣ה פָנָ֗יו וּבִשְׁתַּ֛יִם יְכַסֶּ֥ה רַגְלָ֖יו וּבִשְׁתַּ֥יִם יְעוֹפֵֽף׃ ‎3 ‏וְקָרָ֨א זֶ֤ה אֶל־זֶה֙ וְאָמַ֔ר קָד֧וֹשׁ׀ קָד֛וֹשׁ קָד֖וֹשׁ יְהוָ֣ה צְבָא֑וֹת מְלֹ֥א כָל־הָאָ֖רֶץ כְּבוֹדֽוֹ׃ ‎4 ‏וַיָּנֻ֙עוּ֙ אַמּ֣וֹת הַסִּפִּ֔ים מִקּ֖וֹל הַקּוֹרֵ֑א וְהַבַּ֖יִת יִמָּלֵ֥א עָשָֽׁן׃ ‎5 ‏וָאֹמַ֞ר אֽוֹי־לִ֣י כִֽי־נִדְמֵ֗יתִי כִּ֣י אִ֤ישׁ טְמֵֽא־שְׂפָתַ֙יִם֙ אָנֹ֔כִי וּבְתוֹךְ֙ עַם־טְמֵ֣א שְׂפָתַ֔יִם אָנֹכִ֖י יוֹשֵׁ֑ב כִּ֗י אֶת־הַמֶּ֛לֶךְ יְהוָ֥ה צְבָא֖וֹת רָא֥וּ עֵינָֽי׃ ‎6 ‏וַיָּ֣עָף אֵלַ֗י אֶחָד֙ מִן־הַשְּׂרָפִ֔ים וּבְיָד֖וֹ רִצְפָּ֑ה בְּמֶ֨לְקַחַ֔יִם לָקַ֖ח מֵעַ֥ל הַמִּזְבֵּֽחַ׃ ‎7 ‏וַיַּגַּ֣ע עַל־פִּ֔י וַיֹּ֕אמֶר הִנֵּ֛ה נָגַ֥ע זֶ֖ה עַל־שְׂפָתֶ֑יךָ וְסָ֣ר עֲוֹנֶ֔ךָ וְחַטָּאתְךָ֖ תְּכֻפָּֽר׃ ‎8 ‏וָאֶשְׁמַ֞ע אֶת־ק֤וֹל אֲדֹנָי֙ אֹמֵ֔ר אֶת־מִ֥י אֶשְׁלַ֖ח וּמִ֣י יֵֽלֶךְ־לָ֑נוּ וָאֹמַ֖ר הִנְנִ֥י שְׁלָחֵֽנִי׃ ‎9 ‏וַיֹּ֕אמֶר לֵ֥ךְ וְאָמַרְתָּ֖ לָעָ֣ם הַזֶּ֑ה שִׁמְע֤וּ שָׁמ֙וֹעַ֙ וְאַל־תָּבִ֔ינוּ וּרְא֥וּ רָא֖וֹ וְאַל־תֵּדָֽעוּ׃ ‎10 ‏הַשְׁמֵן֙ לֵב־הָעָ֣ם הַזֶּ֔ה וְאָזְנָ֥יו הַכְבֵּ֖ד וְעֵינָ֣יו הָשַׁ֑ע פֶּן־יִרְאֶ֨ה בְעֵינָ֜יו וּבְאָזְנָ֣יו יִשְׁמָ֗ע וּלְבָב֥וֹ יָבִ֛ין וָשָׁ֖ב וְרָ֥פָא לֽוֹ׃ ‎11 ‏וָאֹמַ֕ר עַד־מָתַ֖י אֲדֹנָ֑י וַיֹּ֡אמֶר עַ֣ד אֲשֶׁר֩ אִם־שָׁא֨וּ עָרִ֜ים מֵאֵ֣ין יוֹשֵׁ֗ב וּבָתִּים֙ מֵאֵ֣ין אָדָ֔ם וְהָאֲדָמָ֖ה תִּשָּׁאֶ֥ה שְׁמָמָֽה׃ ‎12 ‏וְרִחַ֥ק יְהוָ֖ה אֶת־הָאָדָ֑ם וְרַבָּ֥ה הָעֲזוּבָ֖ה בְּקֶ֥רֶב הָאָֽרֶץ׃ ‎13 ‏וְע֥וֹד בָּהּ֙ עֲשִׂ֣רִיָּ֔ה וְשָׁ֖בָה וְהָיְתָ֣ה לְבָעֵ֑ר כָּאֵלָ֣ה וְכָאַלּ֗וֹן אֲשֶׁ֤ר בְּשַׁלֶּ֙כֶת֙ מַצֶּ֣בֶת בָּ֔ם זֶ֥רַע קֹ֖דֶשׁ מַצַּבְתָּֽהּ׃ פ

1 bišənaṯ-mwōṯ hammeleḵə ‘uzzîyâû wā’erə’eh ’eṯ-’ăḏōnāy yōšēḇ ‘al-kissē’ rām wəniśśā’ wəšûlāyw məlē’îm ’eṯ-hahêḵāl: 2 śərāfîm ‘ōməḏîm| mimma‘al lwō šēš kənāfayim šēš kənāfayim lə’eḥāḏ bišətayim| yəḵasseh fānāyw ûḇišətayim yəḵasseh raḡəlāyw ûḇišətayim yə‘wōfēf: 3 wəqārā’ zeh ’el-zeh wə’āmar qāḏwōš| qāḏwōš qāḏwōš yəhwâ ṣəḇā’wōṯ məlō’ ḵāl-hā’āreṣ kəḇwōḏwō: 4 wayyānu‘û ’ammwōṯ hassipîm miqqwōl haqqwōrē’ wəhabayiṯ yimmālē’ ‘āšān: 5 wā’ōmar ’wōy-lî ḵî-niḏəmêṯî kî ’îš ṭəmē’-śəfāṯayim ’ānōḵî ûḇəṯwōḵə ‘am-ṭəmē’ śəfāṯayim ’ānōḵî ywōšēḇ kî ’eṯ-hammeleḵə yəhwâ ṣəḇā’wōṯ rā’û ‘ênāy: 6 wayyā‘āf ’ēlay ’eḥāḏ min-haśśərāfîm ûḇəyāḏwō riṣəpâ bəmeləqaḥayim lāqaḥ mē‘al hammizəbēḥa: 7 wayyaga‘ ‘al-pî wayyō’mer hinnēh nāḡa‘ zeh ‘al-śəfāṯeyḵā wəsār ‘ăwōneḵā wəḥaṭṭā’ṯəḵā təḵupār: 8 wā’ešəma‘ ’eṯ-qwōl ’ăḏōnāy ’ōmēr ’eṯ-mî ’ešəlaḥ ûmî yēleḵə-lānû wā’ōmar hinənî šəlāḥēnî: 9 wayyō’mer lēḵə wə’āmarətā lā‘ām hazzeh šimə‘û šāmwō‘a wə’al-tāḇînû ûrə’û rā’wō wə’al-tēḏā‘û: 10 hašəmēn lēḇ-hā‘ām hazzeh wə’āzənāyw haḵəbēḏ wə‘ênāyw hāša‘ pen-yirə’eh ḇə‘ênāyw ûḇə’āzənāyw yišəmā‘ ûləḇāḇwō yāḇîn wāšāḇ wərāfā’ lwō: 11 wā’ōmar ‘aḏ-māṯay ’ăḏōnāy wayyō’mer ‘aḏ ’ăšer ’im-šā’û ‘ārîm mē’ên ywōšēḇ ûḇātîm mē’ên ’āḏām wəhā’ăḏāmâ tiššā’eh šəmāmâ: 12 wəriḥaq yəhwâ ’eṯ-hā’āḏām wərabâ hā‘ăzûḇâ bəqereḇ hā’āreṣ: 13 wə‘wōḏ bāh ‘ăśirîyâ wəšāḇâ wəhāyəṯâ ləḇā‘ēr kā’ēlâ wəḵā’allwōn ’ăšer bəšalleḵeṯ maṣṣeḇeṯ bām zera‘ qōḏeš maṣṣaḇətāh: f