Isaiah (Yisheyah): Isaiah (Yisheyah) Chapter 39

Tanach (Hebrew): Isaiah (Yisheyah) Chapter 39

‎1 ‏בָּעֵ֣ת הַהִ֡וא שָׁלַ֡ח מְרֹדַ֣ךְ בַּ֠לְאֲדָן בֶּֽן־בַּלְאֲדָ֧ן מֶֽלֶךְ־בָּבֶ֛ל סְפָרִ֥ים וּמִנְחָ֖ה אֶל־חִזְקִיָּ֑הוּ וַיִּשְׁמַ֕ע כִּ֥י חָלָ֖ה וַֽיֶּחֱזָֽק׃ ‎2 ‏וַיִּשְׂמַ֣ח עֲלֵיהֶם֮ חִזְקִיָּהוּ֒ וַיַּרְאֵ֣ם אֶת־בֵּ֣ית נכתה נְכֹת֡וֹ אֶת־הַכֶּסֶף֩ וְאֶת־הַזָּהָ֨ב וְאֶת־הַבְּשָׂמִ֜ים וְאֵ֣ת׀ הַשֶּׁ֣מֶן הַטּ֗וֹב וְאֵת֙ כָּל־בֵּ֣ית כֵּלָ֔יו וְאֵ֛ת כָּל־אֲשֶׁ֥ר נִמְצָ֖א בְּאֹֽצְרֹתָ֑יו לֹֽא־הָיָ֣ה דָבָ֗ר אֲ֠שֶׁר לֹֽא־הֶרְאָ֧ם חִזְקִיָּ֛הוּ בְּבֵית֖וֹ וּבְכָל־מֶמְשַׁלְתּֽוֹ׃ ‎3 ‏וַיָּבֹא֙ יְשַׁעְיָ֣הוּ הַנָּבִ֔יא אֶל־הַמֶּ֖לֶךְ חִזְקִיָּ֑הוּ וַיֹּ֨אמֶר אֵלָ֜יו מָ֥ה אָמְר֣וּ׀ הָאֲנָשִׁ֣ים הָאֵ֗לֶּה וּמֵאַ֙יִן֙ יָבֹ֣אוּ אֵלֶ֔יךָ וַיֹּ֙אמֶר֙ חִזְקִיָּ֔הוּ מֵאֶ֧רֶץ רְחוֹקָ֛ה בָּ֥אוּ אֵלַ֖י מִבָּבֶֽל׃ ‎4 ‏וַיֹּ֕אמֶר מָ֥ה רָא֖וּ בְּבֵיתֶ֑ךָ וַיֹּ֣אמֶר חִזְקִיָּ֗הוּ אֵ֣ת כָּל־אֲשֶׁ֤ר בְּבֵיתִי֙ רָא֔וּ לֹֽא־הָיָ֥ה דָבָ֛ר אֲשֶׁ֥ר לֹֽא־הִרְאִיתִ֖ים בְּאוֹצְרֹתָֽי׃ ‎5 ‏וַיֹּ֥אמֶר יְשַׁעְיָ֖הוּ אֶל־חִזְקִיָּ֑הוּ שְׁמַ֖ע דְּבַר־יְהוָ֥ה צְבָאֽוֹת׃ ‎6 ‏הִנֵּה֮ יָמִ֣ים בָּאִים֒ וְנִשָּׂ֣א׀ כָּל־אֲשֶׁ֣ר בְּבֵיתֶ֗ךָ וַאֲשֶׁ֨ר אָצְר֧וּ אֲבֹתֶ֛יךָ עַד־הַיּ֥וֹם הַזֶּ֖ה בָּבֶ֑ל לֹֽא־יִוָּתֵ֥ר דָּבָ֖ר אָמַ֥ר יְהוָֽה׃ ‎7 ‏וּמִבָּנֶ֜יךָ אֲשֶׁ֨ר יֵצְא֧וּ מִמְּךָ֛ אֲשֶׁ֥ר תּוֹלִ֖יד יִקָּ֑חוּ וְהָיוּ֙ סָרִיסִ֔ים בְּהֵיכַ֖ל מֶ֥לֶךְ בָּבֶֽל׃ ‎8 ‏וַיֹּ֤אמֶר חִזְקִיָּ֙הוּ֙ אֶֽל־יְשַׁעְיָ֔הוּ ט֥וֹב דְּבַר־יְהוָ֖ה אֲשֶׁ֣ר דִּבַּ֑רְתָּ וַיֹּ֕אמֶר כִּ֥י יִהְיֶ֛ה שָׁל֥וֹם וֶאֱמֶ֖ת בְּיָמָֽי׃ פ

1 bā‘ēṯ hahiw’ šālaḥ mərōḏaḵə balə’ăḏān ben-balə’ăḏān meleḵə-bāḇel səfārîm ûminəḥâ ’el-ḥizəqîyâû wayyišəma‘ kî ḥālâ wayyeḥĕzāq: 2 wayyiśəmaḥ ‘ălêhem ḥizəqîyâû wayyarə’ēm ’eṯ-bêṯ nəḵōṯōh nəḵōṯwō ’eṯ-hakesef wə’eṯ-hazzâāḇ wə’eṯ-habəśāmîm wə’ēṯ| haššemen haṭṭwōḇ wə’ēṯ kāl-bêṯ kēlāyw wə’ēṯ kāl-’ăšer niməṣā’ bə’ōṣərōṯāyw lō’-hāyâ ḏāḇār ’ăšer lō’-herə’ām ḥizəqîyâû bəḇêṯwō ûḇəḵāl-meməšalətwō: 3 wayyāḇō’ yəša‘əyâû hannāḇî’ ’el-hammeleḵə ḥizəqîyâû wayyō’mer ’ēlāyw mâ ’āmərû| hā’ănāšîm hā’ēlleh ûmē’ayin yāḇō’û ’ēleyḵā wayyō’mer ḥizəqîyâû mē’ereṣ rəḥwōqâ bā’û ’ēlay mibāḇel: 4 wayyō’mer mâ rā’û bəḇêṯeḵā wayyō’mer ḥizəqîyâû ’ēṯ kāl-’ăšer bəḇêṯî rā’û lō’-hāyâ ḏāḇār ’ăšer lō’-hirə’îṯîm bə’wōṣərōṯāy: 5 wayyō’mer yəša‘əyâû ’el-ḥizəqîyâû šəma‘ dəḇar-yəhwâ ṣəḇā’wōṯ: 6 hinnēh yāmîm bā’îm wəniśśā’| kāl-’ăšer bəḇêṯeḵā wa’ăšer ’āṣərû ’ăḇōṯeyḵā ‘aḏ-hayywōm hazzeh bāḇel lō’-yiûāṯēr dāḇār ’āmar yəhwâ: 7 ûmibāneyḵā ’ăšer yēṣə’û mimməḵā ’ăšer twōlîḏ yiqqāḥû wəhāyû sārîsîm bəhêḵal meleḵə bāḇel: 8 wayyō’mer ḥizəqîyâû ’el-yəša‘əyâû ṭwōḇ dəḇar-yəhwâ ’ăšer dibarətā wayyō’mer kî yihəyeh šālwōm we’ĕmeṯ bəyāmāy: f