Isaiah (Yisheyah): Isaiah (Yisheyah) Chapter 35

Tanach (Hebrew): Isaiah (Yisheyah) Chapter 35

‎1 ‏יְשֻׂשׂ֥וּם מִדְבָּ֖ר וְצִיָּ֑ה וְתָגֵ֧ל עֲרָבָ֛ה וְתִפְרַ֖ח כַּחֲבַצָּֽלֶת׃ ‎2 ‏פָּרֹ֨חַ תִּפְרַ֜ח וְתָגֵ֗ל אַ֚ף גִּילַ֣ת וְרַנֵּ֔ן כְּב֤וֹד הַלְּבָנוֹן֙ נִתַּן־לָ֔הּ הֲדַ֥ר הַכַּרְמֶ֖ל וְהַשָּׁר֑וֹן הֵ֛מָּה יִרְא֥וּ כְבוֹד־יְהוָ֖ה הֲדַ֥ר אֱלֹהֵֽינוּ׃ ס ‎3 ‏חַזְּק֖וּ יָדַ֣יִם רָפ֑וֹת וּבִרְכַּ֥יִם כֹּשְׁל֖וֹת אַמֵּֽצוּ׃ ‎4 ‏אִמְרוּ֙ לְנִמְהֲרֵי־לֵ֔ב חִזְק֖וּ אַל־תִּירָ֑אוּ הִנֵּ֤ה אֱלֹֽהֵיכֶם֙ נָקָ֣ם יָב֔וֹא גְּמ֣וּל אֱלֹהִ֔ים ה֥וּא יָב֖וֹא וְיֹשַׁעֲכֶֽם׃ ‎5 ‏אָ֥ז תִּפָּקַ֖חְנָה עֵינֵ֣י עִוְרִ֑ים וְאָזְנֵ֥י חֵרְשִׁ֖ים תִּפָּתַֽחְנָה׃ ‎6 ‏אָ֣ז יְדַלֵּ֤ג כָּֽאַיָּל֙ פִּסֵּ֔חַ וְתָרֹ֖ן לְשׁ֣וֹן אִלֵּ֑ם כִּֽי־נִבְקְע֤וּ בַמִּדְבָּר֙ מַ֔יִם וּנְחָלִ֖ים בָּעֲרָבָֽה׃ ‎7 ‏וְהָיָ֤ה הַשָּׁרָב֙ לַאֲגַ֔ם וְצִמָּא֖וֹן לְמַבּ֣וּעֵי מָ֑יִם בִּנְוֵ֤ה תַנִּים֙ רִבְצָ֔הּ חָצִ֖יר לְקָנֶ֥ה וָגֹֽמֶא׃ ‎8 ‏וְהָיָה־שָׁ֞ם מַסְל֣וּל וָדֶ֗רֶךְ וְדֶ֤רֶךְ הַקֹּ֙דֶשׁ֙ יִקָּ֣רֵא לָ֔הּ לֹֽא־יַעַבְרֶ֥נּוּ טָמֵ֖א וְהוּא־לָ֑מוֹ הֹלֵ֥ךְ דֶּ֛רֶךְ וֶאֱוִילִ֖ים לֹ֥א יִתְעֽוּ׃ ‎9 ‏לֹא־יִהְיֶ֨ה שָׁ֜ם אַרְיֵ֗ה וּפְרִ֤יץ חַיּוֹת֙ בַּֽל־יַעֲלֶ֔נָּה לֹ֥א תִמָּצֵ֖א שָׁ֑ם וְהָלְכ֖וּ גְּאוּלִֽים׃ ‎10 ‏וּפְדוּיֵ֨י יְהוָ֜ה יְשֻׁב֗וּן וּבָ֤אוּ צִיּוֹן֙ בְּרִנָּ֔ה וְשִׂמְחַ֥ת עוֹלָ֖ם עַל־רֹאשָׁ֑ם שָׂשׂ֤וֹן וְשִׂמְחָה֙ יַשִּׂ֔יגוּ וְנָ֖סוּ יָג֥וֹן וַאֲנָחָֽה׃ פ

1 yəśuśûm miḏəbār wəṣîyâ wəṯāḡēl ‘ărāḇâ wəṯifəraḥ kaḥăḇaṣṣāleṯ: 2 pārōḥa tifəraḥ wəṯāḡēl ’af gîlaṯ wərannēn kəḇwōḏ halləḇānwōn nitan-lāh hăḏar hakarəmel wəhaššārwōn hēmmâ yirə’û ḵəḇwōḏ-yəhwâ hăḏar ’ĕlōhênû: s 3 ḥazzəqû yāḏayim rāfwōṯ ûḇirəkayim kōšəlwōṯ ’ammēṣû: 4 ’imərû ləniməhărê-lēḇ ḥizəqû ’al-tîrā’û hinnēh ’ĕlōhêḵem nāqām yāḇwō’ gəmûl ’ĕlōhîm hû’ yāḇwō’ wəyōša‘ăḵem: 5 ’āz tipāqaḥənâ ‘ênê ‘iwərîm wə’āzənê ḥērəšîm tipāṯaḥənâ: 6 ’āz yəḏallēḡ kā’ayyāl pissēḥa wəṯārōn ləšwōn ’illēm kî-niḇəqə‘û ḇammiḏəbār mayim ûnəḥālîm bā‘ărāḇâ: 7 wəhāyâ haššārāḇ la’ăḡam wəṣimmā’wōn ləmabû‘ê māyim binəwēh ṯannîm riḇəṣāh ḥāṣîr ləqāneh wāḡōme’: 8 wəhāyâ-šām masəlûl wāḏereḵə wəḏereḵə haqqōḏeš yiqqārē’ lāh lō’-ya‘aḇərennû ṭāmē’ wəhû’-lāmwō hōlēḵə dereḵə we’ĕwîlîm lō’ yiṯə‘û: 9 lō’-yihəyeh šām ’arəyēh ûfərîṣ ḥayywōṯ bal-ya‘ălennâ lō’ ṯimmāṣē’ šām wəhāləḵû gə’ûlîm: 10 ûfəḏûyê yəhwâ yəšuḇûn ûḇā’û ṣîywōn bərinnâ wəśiməḥaṯ ‘wōlām ‘al-rō’šām śāśwōn wəśiməḥâ yaśśîḡû wənāsû yāḡwōn wa’ănāḥâ: f