Isaiah (Yisheyah): Isaiah (Yisheyah) Chapter 32

Tanach (Hebrew): Isaiah (Yisheyah) Chapter 32

‎1 ‏הֵ֥ן לְצֶ֖דֶק יִמְלָךְ־מֶ֑לֶךְ וּלְשָׂרִ֖ים לְמִשְׁפָּ֥ט יָשֹֽׂרוּ׃ ‎2 ‏וְהָיָה־אִ֥ישׁ כְּמַֽחֲבֵא־ר֖וּחַ וְסֵ֣תֶר זָ֑רֶם כְּפַלְגֵי־מַ֣יִם בְּצָי֔וֹן כְּצֵ֥ל סֶֽלַע־כָּבֵ֖ד בְּאֶ֥רֶץ עֲיֵפָֽה׃ ‎3 ‏וְלֹ֥א תִשְׁעֶ֖ינָה עֵינֵ֣י רֹאִ֑ים וְאָזְנֵ֥י שֹׁמְעִ֖ים תִּקְשַֽׁבְנָה׃ ‎4 ‏וּלְבַ֥ב נִמְהָרִ֖ים יָבִ֣ין לָדָ֑עַת וּלְשׁ֣וֹן עִלְּגִ֔ים תְּמַהֵ֖ר לְדַבֵּ֥ר צָחֽוֹת׃ ‎5 ‏לֹֽא־יִקָּרֵ֥א ע֛וֹד לְנָבָ֖ל נָדִ֑יב וּלְכִילַ֕י לֹ֥א יֵֽאָמֵ֖ר שֽׁוֹעַ׃ ‎6 ‏כִּ֤י נָבָל֙ נְבָלָ֣ה יְדַבֵּ֔ר וְלִבּ֖וֹ יַעֲשֶׂה־אָ֑וֶן לַעֲשׂ֣וֹת חֹ֗נֶף וּלְדַבֵּ֤ר אֶל־יְהוָה֙ תּוֹעָ֔ה לְהָרִיק֙ נֶ֣פֶשׁ רָעֵ֔ב וּמַשְׁקֶ֥ה צָמֵ֖א יַחְסִֽיר׃ ‎7 ‏וְכֵלַ֖י כֵּלָ֣יו רָעִ֑ים ה֚וּא זִמּ֣וֹת יָעָ֔ץ לְחַבֵּ֤ל ענוים עֲנִיִּים֙ בְּאִמְרֵי־שֶׁ֔קֶר וּבְדַבֵּ֥ר אֶבְי֖וֹן מִשְׁפָּֽט׃ ‎8 ‏וְנָדִ֖יב נְדִיב֣וֹת יָעָ֑ץ וְה֖וּא עַל־נְדִיב֥וֹת יָקֽוּם׃ פ ‎9 ‏נָשִׁים֙ שַֽׁאֲנַנּ֔וֹת קֹ֖מְנָה שְׁמַ֣עְנָה קוֹלִ֑י בָּנוֹת֙ בֹּֽטח֔וֹת הַאְזֵ֖נָּה אִמְרָתִֽי׃ ‎10 ‏יָמִים֙ עַל־שָׁנָ֔ה תִּרְגַּ֖זְנָה בֹּֽטְח֑וֹת כִּ֚י כָּלָ֣ה בָצִ֔יר אֹ֖סֶף בְּלִ֥י יָבֽוֹא׃ ‎11 ‏חִרְדוּ֙ שַֽׁאֲנַנּ֔וֹת רְגָ֖זָה בֹּֽטְח֑וֹת פְּשֹׁ֣טָֽה וְעֹ֔רָה וַחֲג֖וֹרָה עַל־חֲלָצָֽיִם׃ ‎12 ‏עַל־שָׁדַ֖יִם סֹֽפְדִ֑ים עַל־שְׂדֵי־חֶ֕מֶד עַל־גֶּ֖פֶן פֹּרִיָּֽה׃ ‎13 ‏עַ֚ל אַדְמַ֣ת עַמִּ֔י ק֥וֹץ שָׁמִ֖יר תַּֽעֲלֶ֑ה כִּ֚י עַל־כָּל־בָּתֵּ֣י מָשׂ֔וֹשׂ קִרְיָ֖ה עַלִּיזָֽה׃ ‎14 ‏כִּֽי־אַרְמ֣וֹן נֻטָּ֔שׁ הֲמ֥וֹן עִ֖יר עֻזָּ֑ב עֹ֣פֶל וָבַ֜חַן הָיָ֨ה בְעַ֤ד מְעָרוֹת֙ עַד־עוֹלָ֔ם מְשׂ֥וֹשׂ פְּרָאִ֖ים מִרְעֵ֥ה עֲדָרִֽים׃ ‎15 ‏עַד־יֵ֨עָרֶ֥ה עָלֵ֛ינוּ ר֖וּחַ מִמָּר֑וֹם וְהָיָ֤ה מִדְבָּר֙ לַכַּרְמֶ֔ל וכרמל וְהַכַּרְמֶ֖ל לַיַּ֥עַר יֵחָשֵֽׁב׃ ‎16 ‏וְשָׁכַ֥ן בַּמִּדְבָּ֖ר מִשְׁפָּ֑ט וּצְדָקָ֖ה בַּכַּרְמֶ֥ל תֵּשֵֽׁב׃ ‎17 ‏וְהָיָ֛ה מַעֲשֵׂ֥ה הַצְּדָקָ֖ה שָׁל֑וֹם וַֽעֲבֹדַת֙ הַצְּדָקָ֔ה הַשְׁקֵ֥ט וָבֶ֖טַח עַד־עוֹלָֽם׃ ‎18 ‏וְיָשַׁ֥ב עַמִּ֖י בִּנְוֵ֣ה שָׁל֑וֹם וּֽבְמִשְׁכְּנוֹת֙ מִבְטַחִ֔ים וּבִמְנוּחֹ֖ת שַׁאֲנַנּֽוֹת׃ ‎19 ‏וּבָרַ֖ד בְּרֶ֣דֶת הַיָּ֑עַר וּבַשִּׁפְלָ֖ה תִּשְׁפַּ֥ל הָעִֽיר׃ ‎20 ‏אַשְׁרֵיכֶ֕ם זֹרְעֵ֖י עַל־כָּל־מָ֑יִם מְשַׁלְּחֵ֥י רֶֽגֶל־הַשּׁ֖וֹר וְהַחֲמֽוֹר׃ ס

1 hēn ləṣeḏeq yiməlāḵə-meleḵə ûləśārîm ləmišəpāṭ yāśōrû: 2 wəhāyâ-’îš kəmaḥăḇē’-rûḥa wəsēṯer zārem kəfaləḡê-mayim bəṣāywōn kəṣēl sela‘-kāḇēḏ bə’ereṣ ‘ăyēfâ: 3 wəlō’ ṯišə‘eynâ ‘ênê rō’îm wə’āzənê šōmə‘îm tiqəšaḇənâ: 4 ûləḇaḇ niməhārîm yāḇîn lāḏā‘aṯ ûləšwōn ‘illəḡîm təmahēr ləḏabēr ṣāḥwōṯ: 5 lō’-yiqqārē’ ‘wōḏ lənāḇāl nāḏîḇ ûləḵîlay lō’ yē’āmēr šwō‘a: 6 kî nāḇāl nəḇālâ yəḏabēr wəlibwō ya‘ăśeh-’āwen la‘ăśwōṯ ḥōnef ûləḏabēr ’el-yəhwâ twō‘â ləhārîq nefeš rā‘ēḇ ûmašəqeh ṣāmē’ yaḥəsîr: 7 wəḵēlay kēlāyw rā‘îm hû’ zimmwōṯ yā‘āṣ ləḥabēl ‘ănāwîm ‘ănîyîm bə’imərê-šeqer ûḇəḏabēr ’eḇəywōn mišəpāṭ: 8 wənāḏîḇ nəḏîḇwōṯ yā‘āṣ wəhû’ ‘al-nəḏîḇwōṯ yāqûm: f 9 nāšîm ša’ănannwōṯ qōmənâ šəma‘ənâ qwōlî bānwōṯ bōṭḥwōṯ ha’əzēnnâ ’imərāṯî: 10 yāmîm ‘al-šānâ tirəgazənâ bōṭəḥwōṯ kî kālâ ḇāṣîr ’ōsef bəlî yāḇwō’: 11 ḥirəḏû ša’ănannwōṯ rəḡāzâ bōṭəḥwōṯ pəšōṭâ wə‘ōrâ waḥăḡwōrâ ‘al-ḥălāṣāyim: 12 ‘al-šāḏayim sōfəḏîm ‘al-śəḏê-ḥemeḏ ‘al-gefen pōrîyâ: 13 ‘al ’aḏəmaṯ ‘ammî qwōṣ šāmîr ta‘ăleh kî ‘al-kāl-bātê māśwōś qirəyâ ‘allîzâ: 14 kî-’arəmwōn nuṭṭāš hămwōn ‘îr ‘uzzāḇ ‘ōfel wāḇaḥan hāyâ ḇə‘aḏ mə‘ārwōṯ ‘aḏ-‘wōlām məśwōś pərā’îm mirə‘ēh ‘ăḏārîm: 15 ‘aḏ-yē‘āreh ‘ālênû rûḥa mimmārwōm wəhāyâ miḏəbār lakarəmel wəḵarəmel wəhakarəmel layya‘ar yēḥāšēḇ: 16 wəšāḵan bammiḏəbār mišəpāṭ ûṣəḏāqâ bakarəmel tēšēḇ: 17 wəhāyâ ma‘ăśēh haṣṣəḏāqâ šālwōm wa‘ăḇōḏaṯ haṣṣəḏāqâ hašəqēṭ wāḇeṭaḥ ‘aḏ-‘wōlām: 18 wəyāšaḇ ‘ammî binəwēh šālwōm ûḇəmišəkənwōṯ miḇəṭaḥîm ûḇimənûḥōṯ ša’ănannwōṯ: 19 ûḇāraḏ bəreḏeṯ hayyā‘ar ûḇaššifəlâ tišəpal hā‘îr: 20 ’ašərêḵem zōrə‘ê ‘al-kāl-māyim məšalləḥê reḡel-haššwōr wəhaḥămwōr: s