Habakkuk (Chavaquq): Habakkuk (Chavaquq) Chapter 1

Tanach (Hebrew): Habakkuk (Chavaquq) Chapter 1

‎1 ‏הַמַּשָּׂא֙ אֲשֶׁ֣ר חָזָ֔ה חֲבַקּ֖וּק הַנָּבִֽיא׃ ‎2 ‏עַד־אָ֧נָה יְהוָ֛ה שִׁוַּ֖עְתִּי וְלֹ֣א תִשְׁמָ֑ע אֶזְעַ֥ק אֵלֶ֛יךָ חָמָ֖ס וְלֹ֥א תוֹשִֽׁיעַ׃ ‎3 ‏לָ֣מָּה תַרְאֵ֤נִי אָ֙וֶן֙ וְעָמָ֣ל תַּבִּ֔יט וְשֹׁ֥ד וְחָמָ֖ס לְנֶגְדִּ֑י וַיְהִ֧י רִ֦יב וּמָד֖וֹן יִשָּֽׂא׃ ‎4 ‏עַל־כֵּן֙ תָּפ֣וּג תּוֹרָ֔ה וְלֹֽא־יֵצֵ֥א לָנֶ֖צַח מִשְׁפָּ֑ט כִּ֤י רָשָׁע֙ מַכְתִּ֣יר אֶת־הַצַּדִּ֔יק עַל־כֵּ֛ן יֵצֵ֥א מִשְׁפָּ֖ט מְעֻקָּֽל׃ ‎5 ‏רְא֤וּ בַגּוֹיִם֙ וְֽהַבִּ֔יטוּ וְהִֽתַּמְּה֖וּ תְּמָ֑הוּ כִּי־פֹ֙עַל֙ פֹּעֵ֣ל בִּֽימֵיכֶ֔ם לֹ֥א תַאֲמִ֖ינוּ כִּ֥י יְסֻפָּֽר׃ ‎6 ‏כִּֽי־הִנְנִ֤י מֵקִים֙ אֶת־הַכַּשְׂדִּ֔ים הַגּ֖וֹי הַמַּ֣ר וְהַנִּמְהָ֑ר הַֽהוֹלֵךְ֙ לְמֶרְחֲבֵי־אֶ֔רֶץ לָרֶ֖שֶׁת מִשְׁכָּנ֥וֹת לֹּא־לֽוֹ׃ ‎7 ‏אָיֹ֥ם וְנוֹרָ֖א ה֑וּא מִמֶּ֕נּוּ מִשְׁפָּט֥וֹ וּשְׂאֵת֖וֹ יֵצֵֽא׃ ‎8 ‏וְקַלּ֨וּ מִנְּמֵרִ֜ים סוּסָ֗יו וְחַדּוּ֙ מִזְּאֵ֣בֵי עֶ֔רֶב וּפָ֖שׁוּ פָּֽרָשָׁ֑יו וּפָֽרָשָׁיו֙ מֵרָח֣וֹק יָבֹ֔אוּ יָעֻ֕פוּ כְּנֶ֖שֶׁר חָ֥שׁ לֶאֱכֽוֹל׃ ‎9 ‏כֻּלֹּה֙ לְחָמָ֣ס יָב֔וֹא מְגַמַּ֥ת פְּנֵיהֶ֖ם קָדִ֑ימָה וַיֶּאֱסֹ֥ף כַּח֖וֹל שֶֽׁבִי׃ ‎10 ‏וְהוּא֙ בַּמְּלָכִ֣ים יִתְקַלָּ֔ס וְרֹזְנִ֖ים מִשְׂחָ֣ק ל֑וֹ ה֚וּא לְכָל־מִבְצָ֣ר יִשְׂחָ֔ק וַיִּצְבֹּ֥ר עָפָ֖ר וַֽיִּלְכְּדָֽהּ׃ ‎11 ‏אָ֣ז חָלַ֥ף ר֛וּחַ וַֽיַּעֲבֹ֖ר וְאָשֵׁ֑ם ז֥וּ כֹח֖וֹ לֵאלֹהֽוֹ׃ ‎12 ‏הֲל֧וֹא אַתָּ֣ה מִקֶּ֗דֶם יְהוָ֧ה אֱלֹהַ֛י קְדֹשִׁ֖י לֹ֣א נָמ֑וּת יְהוָה֙ לְמִשְׁפָּ֣ט שַׂמְתּ֔וֹ וְצ֖וּר לְהוֹכִ֥יחַ יְסַדְתּֽוֹ׃ ‎13 ‏טְה֤וֹר עֵינַ֙יִם֙ מֵרְא֣וֹת רָ֔ע וְהַבִּ֥יט אֶל־עָמָ֖ל לֹ֣א תוּכָ֑ל לָ֤מָּה תַבִּיט֙ בּֽוֹגְדִ֔ים תַּחֲרִ֕ישׁ בְּבַלַּ֥ע רָשָׁ֖ע צַדִּ֥יק מִמֶּֽנּוּ׃ ‎14 ‏וַתַּעֲשֶׂ֥ה אָדָ֖ם כִּדְגֵ֣י הַיָּ֑ם כְּרֶ֖מֶשׂ לֹא־מֹשֵׁ֥ל בּֽוֹ׃ ‎15 ‏כֻּלֹּה֙ בְּחַכָּ֣ה הֵֽעֲלָ֔ה יְגֹרֵ֣הוּ בְחֶרְמ֔וֹ וְיַאַסְפֵ֖הוּ בְּמִכְמַרְתּ֑וֹ עַל־כֵּ֖ן יִשְׂמַ֥ח וְיָגִֽיל׃ ‎16 ‏עַל־כֵּן֙ יְזַבֵּ֣חַ לְחֶרְמ֔וֹ וִֽיקַטֵּ֖ר לְמִכְמַרְתּ֑וֹ כִּ֤י בָהֵ֙מָּה֙ שָׁמֵ֣ן חֶלְק֔וֹ וּמַאֲכָל֖וֹ בְּרִאָֽה׃ ‎17 ‏הַ֥עַל כֵּ֖ן יָרִ֣יק חֶרְמ֑וֹ וְתָמִ֛יד לַהֲרֹ֥ג גּוֹיִ֖ם לֹ֥א יַחְמֽוֹל׃ ס

1 hammaśśā’ ’ăšer ḥāzâ ḥăḇaqqûq hannāḇî’: 2 ‘aḏ-’ānâ yəhwâ šiûa‘ətî wəlō’ ṯišəmā‘ ’ezə‘aq ’ēleyḵā ḥāmās wəlō’ ṯwōšî‘a: 3 lāmmâ ṯarə’ēnî ’āwen wə‘āmāl tabîṭ wəšōḏ wəḥāmās ləneḡədî wayəhî rîḇ ûmāḏwōn yiśśā’: 4 ‘al-kēn tāfûḡ twōrâ wəlō’-yēṣē’ lāneṣaḥ mišəpāṭ kî rāšā‘ maḵətîr ’eṯ-haṣṣadîq ‘al-kēn yēṣē’ mišəpāṭ mə‘uqqāl: 5 rə’û ḇagwōyim wəhabîṭû wəhitamməhû təmâû kî-fō‘al pō‘ēl bîmêḵem lō’ ṯa’ămînû kî yəsupār: 6 kî-hinənî mēqîm ’eṯ-hakaśədîm hagwōy hammar wəhanniməhār hahwōlēḵə ləmerəḥăḇê-’ereṣ lārešeṯ mišəkānwōṯ llō’-lwō: 7 ’āyōm wənwōrā’ hû’ mimmennû mišəpāṭwō ûśə’ēṯwō yēṣē’: 8 wəqallû minnəmērîm sûsāyw wəḥadû mizzə’ēḇê ‘ereḇ ûfāšû pārāšāyw ûfārāšāyw mērāḥwōq yāḇō’û yā‘ufû kənešer ḥāš le’ĕḵwōl: 9 kullōh ləḥāmās yāḇwō’ məḡammaṯ pənêhem qāḏîmâ wayye’ĕsōf kaḥwōl šeḇî: 10 wəhû’ bamməlāḵîm yiṯəqallās wərōzənîm miśəḥāq lwō hû’ ləḵāl-miḇəṣār yiśəḥāq wayyiṣəbōr ‘āfār wayyiləkəḏāh: 11 ’āz ḥālaf rûḥa wayya‘ăḇōr wə’āšēm zû ḵōḥwō lē’lōhwō: 12 hălwō’ ’atâ miqqeḏem yəhwâ ’ĕlōhay qəḏōšî lō’ nāmûṯ yəhwâ ləmišəpāṭ śamətwō wəṣûr ləhwōḵîḥa yəsaḏətwō: 13 ṭəhwōr ‘ênayim mērə’wōṯ rā‘ wəhabîṭ ’el-‘āmāl lō’ ṯûḵāl lāmmâ ṯabîṭ bwōḡəḏîm taḥărîš bəḇalla‘ rāšā‘ ṣadîq mimmennû: 14 wata‘ăśeh ’āḏām kiḏəḡê hayyām kəremeś lō’-mōšēl bwō: 15 kullōh bəḥakâ hē‘ălâ yəḡōrēhû ḇəḥerəmwō wəya’asəfēhû bəmiḵəmarətwō ‘al-kēn yiśəmaḥ wəyāḡîl: 16 ‘al-kēn yəzabēḥa ləḥerəmwō wîqaṭṭēr ləmiḵəmarətwō kî ḇâēmmâ šāmēn ḥeləqwō ûma’ăḵālwō bəri’â: 17 ha‘al kēn yārîq ḥerəmwō wəṯāmîḏ lahărōḡ gwōyim lō’ yaḥəmwōl: s