Genesis (Bereshit): Genesis (Bereshit) Chapter 11

Tanach (Hebrew): Genesis (Bereshit) Chapter 11

‎1 ‏וַֽיְהִ֥י כָל־הָאָ֖רֶץ שָׂפָ֣ה אֶחָ֑ת וּדְבָרִ֖ים אֲחָדִֽים׃ ‎2 ‏וַֽיְהִ֖י בְּנָסְעָ֣ם מִקֶּ֑דֶם וַֽיִּמְצְא֥וּ בִקְעָ֛ה בְּאֶ֥רֶץ שִׁנְעָ֖ר וַיֵּ֥שְׁבוּ שָֽׁם׃ ‎3 ‏וַיֹּאמְר֞וּ אִ֣ישׁ אֶל־רֵעֵ֗הוּ הָ֚בָה נִלְבְּנָ֣ה לְבֵנִ֔ים וְנִשְׂרְפָ֖ה לִשְׂרֵפָ֑ה וַתְּהִ֨י לָהֶ֤ם הַלְּבֵנָה֙ לְאָ֔בֶן וְהַ֣חֵמָ֔ר הָיָ֥ה לָהֶ֖ם לַחֹֽמֶר׃ ‎4 ‏וַיֹּאמְר֞וּ הָ֣בָה׀ נִבְנֶה־לָּ֣נוּ עִ֗יר וּמִגְדָּל֙ וְרֹאשׁ֣וֹ בַשָּׁמַ֔יִם וְנַֽעֲשֶׂה־לָּ֖נוּ שֵׁ֑ם פֶּן־נָפ֖וּץ עַל־פְּנֵ֥י כָל־הָאָֽרֶץ׃ ‎5 ‏וַיֵּ֣רֶד יְהוָ֔ה לִרְאֹ֥ת אֶת־הָעִ֖יר וְאֶת־הַמִּגְדָּ֑ל אֲשֶׁ֥ר בָּנ֖וּ בְּנֵ֥י הָאָדָֽם׃ ‎6 ‏וַיֹּ֣אמֶר יְהוָ֗ה הֵ֣ן עַ֤ם אֶחָד֙ וְשָׂפָ֤ה אַחַת֙ לְכֻלָּ֔ם וְזֶ֖ה הַחִלָּ֣ם לַעֲשׂ֑וֹת וְעַתָּה֙ לֹֽא־יִבָּצֵ֣ר מֵהֶ֔ם כֹּ֛ל אֲשֶׁ֥ר יָזְמ֖וּ לַֽעֲשֽׂוֹת׃ ‎7 ‏הָ֚בָה נֵֽרְדָ֔ה וְנָבְלָ֥ה שָׁ֖ם שְׂפָתָ֑ם אֲשֶׁר֙ לֹ֣א יִשְׁמְע֔וּ אִ֖ישׁ שְׂפַ֥ת רֵעֵֽהוּ׃ ‎8 ‏וַיָּ֨פֶץ יְהוָ֥ה אֹתָ֛ם מִשָּׁ֖ם עַל־פְּנֵ֣י כָל־הָאָ֑רֶץ וַֽיַּחְדְּל֖וּ לִבְנֹ֥ת הָעִֽיר׃ ‎9 ‏עַל־כֵּ֞ן קָרָ֤א שְׁמָהּ֙ בָּבֶ֔ל כִּי־שָׁ֛ם בָּלַ֥ל יְהוָ֖ה שְׂפַ֣ת כָּל־הָאָ֑רֶץ וּמִשָּׁם֙ הֱפִיצָ֣ם יְהוָ֔ה עַל־פְּנֵ֖י כָּל־הָאָֽרֶץ׃ פ ‎10 ‏אֵ֚לֶּה תּוֹלְדֹ֣ת שֵׁ֔ם שֵׁ֚ם בֶּן־מְאַ֣ת שָׁנָ֔ה וַיּ֖וֹלֶד אֶת־אַרְפַּכְשָׁ֑ד שְׁנָתַ֖יִם אַחַ֥ר הַמַּבּֽוּל׃ ‎11 ‏וַֽיְחִי־שֵׁ֗ם אַֽחֲרֵי֙ הוֹלִיד֣וֹ אֶת־אַרְפַּכְשָׁ֔ד חֲמֵ֥שׁ מֵא֖וֹת שָׁנָ֑ה וַיּ֥וֹלֶד בָּנִ֖ים וּבָנֽוֹת׃ ס ‎12 ‏וְאַרְפַּכְשַׁ֣ד חַ֔י חָמֵ֥שׁ וּשְׁלֹשִׁ֖ים שָׁנָ֑ה וַיּ֖וֹלֶד אֶת־שָֽׁלַח׃ ‎13 ‏וַֽיְחִ֣י אַרְפַּכְשַׁ֗ד אַֽחֲרֵי֙ הוֹלִיד֣וֹ אֶת־שֶׁ֔לַח שָׁלֹ֣שׁ שָׁנִ֔ים וְאַרְבַּ֥ע מֵא֖וֹת שָׁנָ֑ה וַיּ֥וֹלֶד בָּנִ֖ים וּבָנֽוֹת׃ ס ‎14 ‏וְשֶׁ֥לַח חַ֖י שְׁלֹשִׁ֣ים שָׁנָ֑ה וַיּ֖וֹלֶד אֶת־עֵֽבֶר׃ ‎15 ‏וַֽיְחִי־שֶׁ֗לַח אַחֲרֵי֙ הוֹלִיד֣וֹ אֶת־עֵ֔בֶר שָׁלֹ֣שׁ שָׁנִ֔ים וְאַרְבַּ֥ע מֵא֖וֹת שָׁנָ֑ה וַיּ֥וֹלֶד בָּנִ֖ים וּבָנֽוֹת׃ ס ‎16 ‏וַֽיְחִי־עֵ֕בֶר אַרְבַּ֥ע וּשְׁלֹשִׁ֖ים שָׁנָ֑ה וַיּ֖וֹלֶד אֶת־פָּֽלֶג׃ ‎17 ‏וַֽיְחִי־עֵ֗בֶר אַחֲרֵי֙ הוֹלִיד֣וֹ אֶת־פֶּ֔לֶג שְׁלֹשִׁ֣ים שָׁנָ֔ה וְאַרְבַּ֥ע מֵא֖וֹת שָׁנָ֑ה וַיּ֥וֹלֶד בָּנִ֖ים וּבָנֽוֹת׃ ס ‎18 ‏וַֽיְחִי־פֶ֖לֶג שְׁלֹשִׁ֣ים שָׁנָ֑ה וַיּ֖וֹלֶד אֶת־רְעֽוּ׃ ‎19 ‏וַֽיְחִי־פֶ֗לֶג אַחֲרֵי֙ הוֹלִיד֣וֹ אֶת־רְע֔וּ תֵּ֥שַׁע שָׁנִ֖ים וּמָאתַ֣יִם שָׁנָ֑ה וַיּ֥וֹלֶד בָּנִ֖ים וּבָנֽוֹת׃ ס ‎20 ‏וַיְחִ֣י רְע֔וּ שְׁתַּ֥יִם וּשְׁלֹשִׁ֖ים שָׁנָ֑ה וַיּ֖וֹלֶד אֶת־שְׂרֽוּג׃ ‎21 ‏וַיְחִ֣י רְע֗וּ אַחֲרֵי֙ הוֹלִיד֣וֹ אֶת־שְׂר֔וּג שֶׁ֥בַע שָׁנִ֖ים וּמָאתַ֣יִם שָׁנָ֑ה וַיּ֥וֹלֶד בָּנִ֖ים וּבָנֽוֹת׃ ס ‎22 ‏וַיְחִ֥י שְׂר֖וּג שְׁלֹשִׁ֣ים שָׁנָ֑ה וַיּ֖וֹלֶד אֶת־נָחֽוֹר׃ ‎23 ‏וַיְחִ֣י שְׂר֗וּג אַחֲרֵ֛י הוֹלִיד֥וֹ אֶת־נָח֖וֹר מָאתַ֣יִם שָׁנָ֑ה וַיּ֥וֹלֶד בָּנִ֖ים וּבָנֽוֹת׃ ס ‎24 ‏וַיְחִ֣י נָח֔וֹר תֵּ֥שַׁע וְעֶשְׂרִ֖ים שָׁנָ֑ה וַיּ֖וֹלֶד אֶת־תָּֽרַח׃ ‎25 ‏וַיְחִ֣י נָח֗וֹר אַחֲרֵי֙ הוֹלִיד֣וֹ אֶת־תֶּ֔רַח תְּשַֽׁע־עֶשְׂרֵ֥ה שָׁנָ֖ה וּמְאַ֣ת שָׁנָ֑ה וַיּ֥וֹלֶד בָּנִ֖ים וּבָנֽוֹת׃ ס ‎26 ‏וַֽיְחִי־תֶ֖רַח שִׁבְעִ֣ים שָׁנָ֑ה וַיּ֙וֹלֶד֙ אֶת־אַבְרָ֔ם אֶת־נָח֖וֹר וְאֶת־הָרָֽן׃ ‎27 ‏וְאֵ֙לֶּה֙ תּוֹלְדֹ֣ת תֶּ֔רַח תֶּ֚רַח הוֹלִ֣יד אֶת־אַבְרָ֔ם אֶת־נָח֖וֹר וְאֶת־הָרָ֑ן וְהָרָ֖ן הוֹלִ֥יד אֶת־לֽוֹט׃ ‎28 ‏וַיָּ֣מָת הָרָ֔ן עַל־פְּנֵ֖י תֶּ֣רַח אָבִ֑יו בְּאֶ֥רֶץ מוֹלַדְתּ֖וֹ בְּא֥וּר כַּשְׂדִּֽים׃ ‎29 ‏וַיִּקַּ֨ח אַבְרָ֧ם וְנָח֛וֹר לָהֶ֖ם נָשִׁ֑ים שֵׁ֤ם אֵֽשֶׁת־אַבְרָם֙ שָׂרָ֔י וְשֵׁ֤ם אֵֽשֶׁת־נָחוֹר֙ מִלְכָּ֔ה בַּת־הָרָ֥ן אֲבִֽי־מִלְכָּ֖ה וַֽאֲבִ֥י יִסְכָּֽה׃ ‎30 ‏וַתְּהִ֥י שָׂרַ֖י עֲקָרָ֑ה אֵ֥ין לָ֖הּ וָלָֽד׃ ‎31 ‏וַיִּקַּ֨ח תֶּ֜רַח אֶת־אַבְרָ֣ם בְּנ֗וֹ וְאֶת־ל֤וֹט בֶּן־הָרָן֙ בֶּן־בְּנ֔וֹ וְאֵת֙ שָׂרַ֣י כַּלָּת֔וֹ אֵ֖שֶׁת אַבְרָ֣ם בְּנ֑וֹ וַיֵּצְא֨וּ אִתָּ֜ם מֵא֣וּר כַּשְׂדִּ֗ים לָלֶ֙כֶת֙ אַ֣רְצָה כְּנַ֔עַן וַיָּבֹ֥אוּ עַד־חָרָ֖ן וַיֵּ֥שְׁבוּ שָֽׁם׃ ‎32 ‏וַיִּהְי֣וּ יְמֵי־תֶ֔רַח חָמֵ֥שׁ שָׁנִ֖ים וּמָאתַ֣יִם שָׁנָ֑ה וַיָּ֥מָת תֶּ֖רַח בְּחָרָֽן׃ ס

1 wayəhî ḵāl-hā’āreṣ śāfâ ’eḥāṯ ûḏəḇārîm ’ăḥāḏîm: 2 wayəhî bənāsə‘ām miqqeḏem wayyiməṣə’û ḇiqə‘â bə’ereṣ šinə‘ār wayyēšəḇû šām: 3 wayyō’mərû ’îš ’el-rē‘ēhû hāḇâ niləbənâ ləḇēnîm wəniśərəfâ liśərēfâ watəhî lâem halləḇēnâ lə’āḇen wəhaḥēmār hāyâ lâem laḥōmer: 4 wayyō’mərû hāḇâ| niḇəneh-llānû ‘îr ûmiḡədāl wərō’šwō ḇaššāmayim wəna‘ăśeh-llānû šēm pen-nāfûṣ ‘al-pənê ḵāl-hā’āreṣ: 5 wayyēreḏ yəhwâ lirə’ōṯ ’eṯ-hā‘îr wə’eṯ-hammiḡədāl ’ăšer bānû bənê hā’āḏām: 6 wayyō’mer yəhwâ hēn ‘am ’eḥāḏ wəśāfâ ’aḥaṯ ləḵullām wəzeh haḥillām la‘ăśwōṯ wə‘atâ lō’-yibāṣēr mēhem kōl ’ăšer yāzəmû la‘ăśwōṯ: 7 hāḇâ nērəḏâ wənāḇəlâ šām śəfāṯām ’ăšer lō’ yišəmə‘û ’îš śəfaṯ rē‘ēhû: 8 wayyāfeṣ yəhwâ ’ōṯām miššām ‘al-pənê ḵāl-hā’āreṣ wayyaḥədəlû liḇənōṯ hā‘îr: 9 ‘al-kēn qārā’ šəmāh bāḇel kî-šām bālal yəhwâ śəfaṯ kāl-hā’āreṣ ûmiššām hĕfîṣām yəhwâ ‘al-pənê kāl-hā’āreṣ: f 10 ’ēlleh twōləḏōṯ šēm šēm ben-mə’aṯ šānâ wayywōleḏ ’eṯ-’arəpaḵəšāḏ šənāṯayim ’aḥar hammabûl: 11 wayəḥî-šēm ’aḥărê hwōlîḏwō ’eṯ-’arəpaḵəšāḏ ḥămēš mē’wōṯ šānâ wayywōleḏ bānîm ûḇānwōṯ: s 12 wə’arəpaḵəšaḏ ḥay ḥāmēš ûšəlōšîm šānâ wayywōleḏ ’eṯ-šālaḥ: 13 wayəḥî ’arəpaḵəšaḏ ’aḥărê hwōlîḏwō ’eṯ-šelaḥ šālōš šānîm wə’arəba‘ mē’wōṯ šānâ wayywōleḏ bānîm ûḇānwōṯ: s 14 wəšelaḥ ḥay šəlōšîm šānâ wayywōleḏ ’eṯ-‘ēḇer: 15 wayəḥî-šelaḥ ’aḥărê hwōlîḏwō ’eṯ-‘ēḇer šālōš šānîm wə’arəba‘ mē’wōṯ šānâ wayywōleḏ bānîm ûḇānwōṯ: s 16 wayəḥî-‘ēḇer ’arəba‘ ûšəlōšîm šānâ wayywōleḏ ’eṯ-pāleḡ: 17 wayəḥî-‘ēḇer ’aḥărê hwōlîḏwō ’eṯ-peleḡ šəlōšîm šānâ wə’arəba‘ mē’wōṯ šānâ wayywōleḏ bānîm ûḇānwōṯ: s 18 wayəḥî-feleḡ šəlōšîm šānâ wayywōleḏ ’eṯ-rə‘û: 19 wayəḥî-feleḡ ’aḥărê hwōlîḏwō ’eṯ-rə‘û tēša‘ šānîm ûmā’ṯayim šānâ wayywōleḏ bānîm ûḇānwōṯ: s 20 wayəḥî rə‘û šətayim ûšəlōšîm šānâ wayywōleḏ ’eṯ-śərûḡ: 21 wayəḥî rə‘û ’aḥărê hwōlîḏwō ’eṯ-śərûḡ šeḇa‘ šānîm ûmā’ṯayim šānâ wayywōleḏ bānîm ûḇānwōṯ: s 22 wayəḥî śərûḡ šəlōšîm šānâ wayywōleḏ ’eṯ-nāḥwōr: 23 wayəḥî śərûḡ ’aḥărê hwōlîḏwō ’eṯ-nāḥwōr mā’ṯayim šānâ wayywōleḏ bānîm ûḇānwōṯ: s 24 wayəḥî nāḥwōr tēša‘ wə‘eśərîm šānâ wayywōleḏ ’eṯ-tāraḥ: 25 wayəḥî nāḥwōr ’aḥărê hwōlîḏwō ’eṯ-teraḥ təša‘-‘eśərēh šānâ ûmə’aṯ šānâ wayywōleḏ bānîm ûḇānwōṯ: s 26 wayəḥî-ṯeraḥ šiḇə‘îm šānâ wayywōleḏ ’eṯ-’aḇərām ’eṯ-nāḥwōr wə’eṯ-hārān: 27 wə’ēlleh twōləḏōṯ teraḥ teraḥ hwōlîḏ ’eṯ-’aḇərām ’eṯ-nāḥwōr wə’eṯ-hārān wəhārān hwōlîḏ ’eṯ-lwōṭ: 28 wayyāmāṯ hārān ‘al-pənê teraḥ ’āḇîw bə’ereṣ mwōlaḏətwō bə’ûr kaśədîm: 29 wayyiqqaḥ ’aḇərām wənāḥwōr lâem nāšîm šēm ’ēšeṯ-’aḇərām śārāy wəšēm ’ēšeṯ-nāḥwōr miləkâ baṯ-hārān ’ăḇî-miləkâ wa’ăḇî yisəkâ: 30 watəhî śāray ‘ăqārâ ’ên lāh wālāḏ: 31 wayyiqqaḥ teraḥ ’eṯ-’aḇərām bənwō wə’eṯ-lwōṭ ben-hārān ben-bənwō wə’ēṯ śāray kallāṯwō ’ēšeṯ ’aḇərām bənwō wayyēṣə’û ’itām mē’ûr kaśədîm lāleḵeṯ ’arəṣâ kəna‘an wayyāḇō’û ‘aḏ-ḥārān wayyēšəḇû šām: 32 wayyihəyû yəmê-ṯeraḥ ḥāmēš šānîm ûmā’ṯayim šānâ wayyāmāṯ teraḥ bəḥārān: s