Ezekiel (Yechezqel): Ezekiel (Yechezqel) Chapter 47

Tanach (Hebrew): Ezekiel (Yechezqel) Chapter 47

‎1 ‏וַיְשִׁבֵנִי֮ אֶל־פֶּ֣תַח הַבַּיִת֒ וְהִנֵּה־מַ֣יִם יֹצְאִ֗ים מִתַּ֨חַת מִפְתַּ֤ן הַבַּ֙יִת֙ קָדִ֔ימָה כִּֽי־פְנֵ֥י הַבַּ֖יִת קָדִ֑ים וְהַמַּ֣יִם יֹרְדִ֗ים מִתַּ֜חַת מִכֶּ֤תֶף הַבַּ֙יִת֙ הַיְמָנִ֔ית מִנֶּ֖גֶב לַמִּזְבֵּֽחַ׃ ‎2 ‏וַיּוֹצִאֵנִי֮ דֶּֽרֶךְ־שַׁ֣עַר צָפוֹנָה֒ וַיְסִבֵּ֙נִי֙ דֶּ֣רֶךְ ח֔וּץ אֶל־שַׁ֣עַר הַח֔וּץ דֶּ֖רֶךְ הַפּוֹנֶ֣ה קָדִ֑ים וְהִנֵּה־מַ֣יִם מְפַכִּ֔ים מִן־הַכָּתֵ֖ף הַיְמָנִֽית׃ ‎3 ‏בְּצֵאת־הָאִ֥ישׁ קָדִ֖ים וְקָ֣ו בְּיָד֑וֹ וַיָּ֤מָד אֶ֙לֶף֙ בָּֽאַמָּ֔ה וַיַּעֲבִרֵ֥נִי בַמַּ֖יִם מֵ֥י אָפְסָֽיִם׃ ‎4 ‏וַיָּ֣מָד אֶ֔לֶף וַיַּעֲבִרֵ֥נִי בַמַּ֖יִם מַ֣יִם בִּרְכָּ֑יִם וַיָּ֣מָד אֶ֔לֶף וַיַּעֲבִרֵ֖נִי מֵ֥י מָתְנָֽיִם׃ ‎5 ‏וַיָּ֣מָד אֶ֔לֶף נַ֕חַל אֲשֶׁ֥ר לֹֽא־אוּכַ֖ל לַעֲבֹ֑ר כִּֽי־גָא֤וּ הַמַּ֙יִם֙ מֵ֣י שָׂ֔חוּ נַ֖חַל אֲשֶׁ֥ר לֹֽא־יֵעָבֵֽר׃ ‎6 ‏וַיֹּ֥אמֶר אֵלַ֖י הֲרָאִ֣יתָ בֶן־אָדָ֑ם וַיּוֹלִכֵ֥נִי וַיְשִׁבֵ֖נִי שְׂפַ֥ת הַנָּֽחַל׃ ‎7 ‏בְּשׁוּבֵ֕נִי וְהִנֵּה֙ אֶל־שְׂפַ֣ת הַנַּ֔חַל עֵ֖ץ רַ֣ב מְאֹ֑ד מִזֶּ֖ה וּמִזֶּֽה׃ ‎8 ‏וַיֹּ֣אמֶר אֵלַ֗י הַמַּ֤יִם הָאֵ֙לֶּה֙ יוֹצְאִ֗ים אֶל־הַגְּלִילָה֙ הַקַּדְמוֹנָ֔ה וְיָרְד֖וּ עַל־הָֽעֲרָבָ֑ה וּבָ֣אוּ הַיָּ֔מָּה אֶל־הַיָּ֥מָּה הַמּֽוּצָאִ֖ים ונרפאו וְנִרְפּ֥וּ הַמָּֽיִם׃ ‎9 ‏וְהָיָ֣ה כָל־נֶ֣פֶשׁ חַיָּ֣ה׀ אֲ‍ֽשֶׁר־יִשְׁרֹ֡ץ אֶ֣ל כָּל־אֲשֶׁר֩ יָב֨וֹא שָׁ֤ם נַחֲלַ֙יִם֙ יִֽחְיֶ֔ה וְהָיָ֥ה הַדָּגָ֖ה רַבָּ֣ה מְאֹ֑ד כִּי֩ בָ֨אוּ שָׁ֜מָּה הַמַּ֣יִם הָאֵ֗לֶּה וְיֵרָֽפְאוּ֙ וָחָ֔י כֹּ֛ל אֲשֶׁר־יָ֥בוֹא שָׁ֖מָּה הַנָּֽחַל׃ ‎10 ‏וְהָיָה֩ יעמדו עָמְד֨וּ עָלָ֜יו דַּוָּגִ֗ים מֵעֵ֥ין גֶּ֙דִי֙ וְעַד־עֵ֣ין עֶגְלַ֔יִם מִשְׁט֥וֹחַ לַֽחֲרָמִ֖ים יִהְי֑וּ לְמִינָה֙ תִּהְיֶ֣ה דְגָתָ֔ם כִּדְגַ֛ת הַיָּ֥ם הַגָּד֖וֹל רַבָּ֥ה מְאֹֽד׃ ‎11 ‏בצאתו בִּצֹּאתָ֧יו וּגְבָאָ֛יו וְלֹ֥א יֵרָפְא֖וּ לְמֶ֥לַח נִתָּֽנוּ׃ ‎12 ‏וְעַל־הַנַּ֣חַל יַעֲלֶ֣ה עַל־שְׂפָת֣וֹ מִזֶּ֣ה׀ וּמִזֶּ֣ה׀ כָּל־עֵֽץ־מַ֠אֲכָל לֹא־יִבּ֨וֹל עָלֵ֜הוּ וְלֹֽא־יִתֹּ֣ם פִּרְי֗וֹ לָֽחֳדָשָׁיו֙ יְבַכֵּ֔ר כִּ֣י מֵימָ֔יו מִן־הַמִּקְדָּ֖שׁ הֵ֣מָּה יֽוֹצְאִ֑ים והיו וְהָיָ֤ה פִרְיוֹ֙ לְמַֽאֲכָ֔ל וְעָלֵ֖הוּ לִתְרוּפָֽה׃ ס ‎13 ‏כֹּ֤ה אָמַר֙ אֲדֹנָ֣י יְהוִ֔ה גֵּ֤ה גְבוּל֙ אֲשֶׁ֣ר תִּתְנַחֲל֣וּ אֶת־הָאָ֔רֶץ לִשְׁנֵ֥י עָשָׂ֖ר שִׁבְטֵ֣י יִשְׂרָאֵ֑ל יוֹסֵ֖ף חֲבָלִֽים׃ ‎14 ‏וּנְחַלְתֶּ֤ם אוֹתָהּ֙ אִ֣ישׁ כְּאָחִ֔יו אֲשֶׁ֤ר נָשָׂ֙אתִי֙ אֶת־יָדִ֔י לְתִתָּ֖הּ לַאֲבֹֽתֵיכֶ֑ם וְנָ֨פְלָ֜ה הָאָ֧רֶץ הַזֹּ֛את לָכֶ֖ם בְּנַחֲלָֽה׃ ‎15 ‏וְזֶ֖ה גְּב֣וּל הָאָ֑רֶץ לִפְאַ֨ת צָפ֜וֹנָה מִן־הַיָּ֧ם הַגָּד֛וֹל הַדֶּ֥רֶךְ חֶתְלֹ֖ן לְב֥וֹא צְדָֽדָה׃ ‎16 ‏חֲמָ֤ת׀ בֵּר֙וֹתָה֙ סִבְרַ֔יִם אֲשֶׁר֙ בֵּין־גְּב֣וּל דַּמֶּ֔שֶׂק וּבֵ֖ין גְּב֣וּל חֲמָ֑ת חָצֵר֙ הַתִּיכ֔וֹן אֲשֶׁ֖ר אֶל־גְּב֥וּל חַוְרָֽן׃ ‎17 ‏וְהָיָ֨ה גְב֜וּל מִן־הַיָּ֗ם חֲצַ֤ר עֵינוֹן֙ גְּב֣וּל דַּמֶּ֔שֶׂק וְצָפ֥וֹן׀ צָפ֖וֹנָה וּגְב֣וּל חֲמָ֑ת וְאֵ֖ת פְּאַ֥ת צָפֽוֹן׃ ‎18 ‏וּפְאַ֣ת קָדִ֡ים מִבֵּ֣ין חַוְרָ֣ן וּמִבֵּין־דַּמֶּשֶׂק֩ וּמִבֵּ֨ין הַגִּלְעָ֜ד וּמִבֵּ֨ין אֶ֤רֶץ יִשְׂרָאֵל֙ הַיַּרְדֵּ֔ן מִגְּב֛וּל עַל־הַיָּ֥ם הַקַּדְמוֹנִ֖י תָּמֹ֑דּוּ וְאֵ֖ת פְּאַ֥ת קָדִֽימָה׃ ‎19 ‏וּפְאַת֙ נֶ֣גֶב תֵּימָ֔נָה מִתָּמָ֗ר עַד־מֵי֙ מְרִיב֣וֹת קָדֵ֔שׁ נַחֲלָ֖ה אֶל־הַיָּ֣ם הַגָּד֑וֹל וְאֵ֥ת פְּאַת־תֵּימָ֖נָה נֶֽגְבָּה׃ ‎20 ‏וּפְאַת־יָם֙ הַיָּ֣ם הַגָּד֔וֹל מִגְּב֕וּל עַד־נֹ֖כַח לְב֣וֹא חֲמָ֑ת זֹ֖את פְּאַת־יָֽם׃ ‎21 ‏וְחִלַּקְתֶּ֞ם אֶת־הָאָ֧רֶץ הַזֹּ֛את לָכֶ֖ם לְשִׁבְטֵ֥י יִשְׂרָאֵֽל׃ ‎22 ‏וְהָיָ֗ה תַּפִּ֣לוּ אוֹתָהּ֮ בְּנַחֲלָה֒ לָכֶ֗ם וּלְהַגֵּרִים֙ הַגָּרִ֣ים בְּתוֹכְכֶ֔ם אֲשֶׁר־הוֹלִ֥דוּ בָנִ֖ים בְּתֽוֹכְכֶ֑ם וְהָי֣וּ לָכֶ֗ם כְּאֶזְרָח֙ בִּבְנֵ֣י יִשְׂרָאֵ֔ל אִתְּכֶם֙ יִפְּל֣וּ בְנַחֲלָ֔ה בְּת֖וֹךְ שִׁבְטֵ֥י יִשְׂרָאֵֽל׃ ‎23 ‏וְהָיָ֣ה בַשֵּׁ֔בֶט אֲשֶׁר־גָּ֥ר הַגֵּ֖ר אִתּ֑וֹ שָׁ֚ם תִּתְּנ֣וּ נַחֲלָת֔וֹ נְאֻ֖ם אֲדֹנָ֥י יְהוִֽה׃ ס

1 wayəšiḇēnî ’el-peṯaḥ habayiṯ wəhinnēh-mayim yōṣə’îm mitaḥaṯ mifətan habayiṯ qāḏîmâ kî-fənê habayiṯ qāḏîm wəhammayim yōrəḏîm mitaḥaṯ mikeṯef habayiṯ hayəmānîṯ minneḡeḇ lammizəbēḥa: 2 wayywōṣi’ēnî dereḵə-ša‘ar ṣāfwōnâ wayəsibēnî dereḵə ḥûṣ ’el-ša‘ar haḥûṣ dereḵə hapwōneh qāḏîm wəhinnēh-mayim məfakîm min-hakāṯēf hayəmānîṯ: 3 bəṣē’ṯ-hā’îš qāḏîm wəqāw bəyāḏwō wayyāmāḏ ’elef bā’ammâ wayya‘ăḇirēnî ḇammayim mê ’āfəsāyim: 4 wayyāmāḏ ’elef wayya‘ăḇirēnî ḇammayim mayim birəkāyim wayyāmāḏ ’elef wayya‘ăḇirēnî mê māṯənāyim: 5 wayyāmāḏ ’elef naḥal ’ăšer lō’-’ûḵal la‘ăḇōr kî-ḡā’û hammayim mê śāḥû naḥal ’ăšer lō’-yē‘āḇēr: 6 wayyō’mer ’ēlay hărā’îṯā ḇen-’āḏām wayywōliḵēnî wayəšiḇēnî śəfaṯ hannāḥal: 7 bəšûḇēnî wəhinnēh ’el-śəfaṯ hannaḥal ‘ēṣ raḇ mə’ōḏ mizzeh ûmizzeh: 8 wayyō’mer ’ēlay hammayim hā’ēlleh ywōṣə’îm ’el-hagəlîlâ haqqaḏəmwōnâ wəyārəḏû ‘al-hā‘ărāḇâ ûḇā’û hayyāmmâ ’el-hayyāmmâ hammûṣā’îm wənirəpə’û wənirəpû hammāyim: 9 wəhāyâ ḵāl-nefeš ḥayyâ| ’ă‍šer-yišərōṣ ’el kāl-’ăšer yāḇwō’ šām naḥălayim yiḥəyeh wəhāyâ hadāḡâ rabâ mə’ōḏ kî ḇā’û šāmmâ hammayim hā’ēlleh wəyērāfə’û wāḥāy kōl ’ăšer-yāḇwō’ šāmmâ hannāḥal: 10 wəhāyâ ya‘aməḏû ‘āməḏû ‘ālāyw daûāḡîm mē‘ên geḏî wə‘aḏ-‘ên ‘eḡəlayim mišəṭwōḥa laḥărāmîm yihəyû ləmînâ tihəyeh ḏəḡāṯām kiḏəḡaṯ hayyām hagāḏwōl rabâ mə’ōḏ: 11 biṣṣō’ṯwō biṣṣō’ṯāyw ûḡəḇā’āyw wəlō’ yērāfə’û ləmelaḥ nitānû: 12 wə‘al-hannaḥal ya‘ăleh ‘al-śəfāṯwō mizzeh| ûmizzeh| kāl-‘ēṣ-ma’ăḵāl lō’-yibwōl ‘ālēhû wəlō’-yitōm pirəywō lāḥŏḏāšāyw yəḇakēr kî mêmāyw min-hammiqədāš hēmmâ ywōṣə’îm wəhāyû wəhāyâ firəywō ləma’ăḵāl wə‘ālēhû liṯərûfâ: s 13 kōh ’āmar ’ăḏōnāy yəhwih gēh ḡəḇûl ’ăšer tiṯənaḥălû ’eṯ-hā’āreṣ lišənê ‘āśār šiḇəṭê yiśərā’ēl ywōsēf ḥăḇālîm: 14 ûnəḥalətem ’wōṯāh ’îš kə’āḥîw ’ăšer nāśā’ṯî ’eṯ-yāḏî ləṯitāh la’ăḇōṯêḵem wənāfəlâ hā’āreṣ hazzō’ṯ lāḵem bənaḥălâ: 15 wəzeh gəḇûl hā’āreṣ lifə’aṯ ṣāfwōnâ min-hayyām hagāḏwōl hadereḵə ḥeṯəlōn ləḇwō’ ṣəḏāḏâ: 16 ḥămāṯ| bērwōṯâ siḇərayim ’ăšer bên-gəḇûl dammeśeq ûḇên gəḇûl ḥămāṯ ḥāṣēr hatîḵwōn ’ăšer ’el-gəḇûl ḥawərān: 17 wəhāyâ ḡəḇûl min-hayyām ḥăṣar ‘ênwōn gəḇûl dammeśeq wəṣāfwōn| ṣāfwōnâ ûḡəḇûl ḥămāṯ wə’ēṯ pə’aṯ ṣāfwōn: 18 ûfə’aṯ qāḏîm mibên ḥawərān ûmibên-dammeśeq ûmibên hagilə‘āḏ ûmibên ’ereṣ yiśərā’ēl hayyarədēn migəḇûl ‘al-hayyām haqqaḏəmwōnî tāmōdû wə’ēṯ pə’aṯ qāḏîmâ: 19 ûfə’aṯ neḡeḇ têmānâ mitāmār ‘aḏ-mê mərîḇwōṯ qāḏēš naḥălâ ’el-hayyām hagāḏwōl wə’ēṯ pə’aṯ-têmānâ neḡəbâ: 20 ûfə’aṯ-yām hayyām hagāḏwōl migəḇûl ‘aḏ-nōḵaḥ ləḇwō’ ḥămāṯ zō’ṯ pə’aṯ-yām: 21 wəḥillaqətem ’eṯ-hā’āreṣ hazzō’ṯ lāḵem ləšiḇəṭê yiśərā’ēl: 22 wəhāyâ tapilû ’wōṯāh bənaḥălâ lāḵem ûləhagērîm hagārîm bəṯwōḵəḵem ’ăšer-hwōliḏû ḇānîm bəṯwōḵəḵem wəhāyû lāḵem kə’ezərāḥ biḇənê yiśərā’ēl ’itəḵem yipəlû ḇənaḥălâ bəṯwōḵə šiḇəṭê yiśərā’ēl: 23 wəhāyâ ḇaššēḇeṭ ’ăšer-gār hagēr ’itwō šām titənû naḥălāṯwō nə’um ’ăḏōnāy yəhwih: s