Ezekiel (Yechezqel): Ezekiel (Yechezqel) Chapter 26

Tanach (Hebrew): Ezekiel (Yechezqel) Chapter 26

‎1 ‏וַיְהִ֛י בְּעַשְׁתֵּֽי־עֶשְׂרֵ֥ה שָׁנָ֖ה בְּאֶחָ֣ד לַחֹ֑דֶשׁ הָיָ֥ה דְבַר־יְהוָ֖ה אֵלַ֥י לֵאמֹֽר׃ ‎2 ‏בֶּן־אָדָ֗ם יַ֠עַן אֲשֶׁר־אָ֨מְרָה צֹּ֤ר עַל־יְרוּשָׁלִַ֙ם֙ הֶאָ֔ח נִשְׁבְּרָ֛ה דַּלְת֥וֹת הָעַמִּ֖ים נָסֵ֣בָּה אֵלָ֑י אִמָּלְאָ֖ה הָחֳרָֽבָה׃ ‎3 ‏לָכֵ֗ן כֹּ֤ה אָמַר֙ אֲדֹנָ֣י יְהוִ֔ה הִנְנִ֥י עָלַ֖יִךְ צֹ֑ר וְהַעֲלֵיתִ֤י עָלַ֙יִךְ֙ גּוֹיִ֣ם רַבִּ֔ים כְּהַעֲל֥וֹת הַיָּ֖ם לְגַלָּֽיו׃ ‎4 ‏וְשִׁחֲת֞וּ חֹמ֣וֹת צֹ֗ר וְהָֽרְסוּ֙ מִגְדָּלֶ֔יהָ וְסִֽחֵיתִ֥י עֲפָרָ֖הּ מִמֶּ֑נָּה וְנָתַתִּ֥י אוֹתָ֖הּ לִצְחִ֥יחַ סָֽלַע׃ ‎5 ‏מִשְׁטַ֨ח חֲרָמִ֤ים תִּֽהְיֶה֙ בְּת֣וֹךְ הַיָּ֔ם כִּ֚י אֲנִ֣י דִבַּ֔רְתִּי נְאֻ֖ם אֲדֹנָ֣י יְהוִ֑ה וְהָיְתָ֥ה לְבַ֖ז לַגּוֹיִֽם׃ ‎6 ‏וּבְנוֹתֶ֙יהָ֙ אֲשֶׁ֣ר בַּשָּׂדֶ֔ה בַּחֶ֖רֶב תֵּהָרַ֑גְנָה וְיָדְע֖וּ כִּי־אֲנִ֥י יְהוָֽה׃ פ ‎7 ‏כִּ֣י כֹ֤ה אָמַר֙ אֲדֹנָ֣י יְהוִ֔ה הִנְנִ֧י מֵבִ֣יא אֶל־צֹ֗ר נְבוּכַדְרֶאצַּ֧ר מֶֽלֶךְ־בָּבֶ֛ל מִצָּפ֖וֹן מֶ֣לֶךְ מְלָכִ֑ים בְּס֛וּס וּבְרֶ֥כֶב וּבְפָרָשִׁ֖ים וְקָהָ֥ל וְעַם־רָֽב׃ ‎8 ‏בְּנוֹתַ֥יִךְ בַּשָּׂדֶ֖ה בַּחֶ֣רֶב יַהֲרֹ֑ג וְנָתַ֨ן עָלַ֜יִךְ דָּיֵ֗ק וְשָׁפַ֤ךְ עָלַ֙יִךְ֙ סֹֽלְלָ֔ה וְהֵקִ֥ים עָלַ֖יִךְ צִנָּֽה׃ ‎9 ‏וּמְחִ֣י קָֽבָלּ֔וֹ יִתֵּ֖ן בְּחֹֽמוֹתָ֑יִךְ וּמִ֨גְדְּלֹתַ֔יִךְ יִתֹּ֖ץ בְּחַרְבוֹתָֽיו׃ ‎10 ‏מִשִּׁפְעַ֥ת סוּסָ֖יו יְכַסֵּ֣ךְ אֲבָקָ֑ם מִקּוֹל֩ פָּרַ֨שׁ וְגַלְגַּ֜ל וָרֶ֗כֶב תִּרְעַ֙שְׁנָה֙ חֽוֹמוֹתַ֔יִךְ בְּבֹאוֹ֙ בִּשְׁעָרַ֔יִךְ כִּמְבוֹאֵ֖י עִ֥יר מְבֻקָּעָֽה׃ ‎11 ‏בְּפַרְס֣וֹת סוּסָ֔יו יִרְמֹ֖ס אֶת־כָּל־חֽוּצוֹתָ֑יִךְ עַמֵּךְ֙ בַּחֶ֣רֶב יַהֲרֹ֔ג וּמַצְּב֥וֹת עֻזֵּ֖ךְ לָאָ֥רֶץ תֵּרֵֽד׃ ‎12 ‏וְשָׁלְל֣וּ חֵילֵ֗ךְ וּבָֽזְזוּ֙ רְכֻלָּתֵ֔ךְ וְהָֽרְסוּ֙ חוֹמוֹתַ֔יִךְ וּבָתֵּ֥י חֶמְדָּתֵ֖ךְ יִתֹּ֑צוּ וַאֲבָנַ֤יִךְ וְעֵצַ֙יִךְ֙ וַֽעֲפָרֵ֔ךְ בְּת֥וֹךְ מַ֖יִם יָשִֽׂימוּ׃ ‎13 ‏וְהִשְׁבַּתִּ֖י הֲמ֣וֹן שִׁירָ֑יִךְ וְק֣וֹל כִּנּוֹרַ֔יִךְ לֹ֥א יִשָּׁמַ֖ע עֽוֹד׃ ‎14 ‏וּנְתַתִּ֞יךְ לִצְחִ֣יחַ סֶ֗לַע מִשְׁטַ֤ח חֲרָמִים֙ תִּֽהְיֶ֔ה לֹ֥א תִבָּנֶ֖ה ע֑וֹד כִּ֣י אֲנִ֤י יְהוָה֙ דִּבַּ֔רְתִּי נְאֻ֖ם אֲדֹנָ֥י יְהוִֽה׃ ס ‎15 ‏כֹּ֥ה אָמַ֛ר אֲדֹנָ֥י יְהוִ֖ה לְצ֑וֹר הֲלֹ֣א׀ מִקּ֣וֹל מַפַּלְתֵּ֗ךְ בֶּאֱנֹ֨ק חָלָ֜ל בֵּהָ֤רֵֽג הֶ֙רֶג֙ בְּתוֹכֵ֔ךְ יִרְעֲשׁ֖וּ הָאִיִּֽים׃ ‎16 ‏וְֽיָרְד֞וּ מֵעַ֣ל כִּסְאוֹתָ֗ם כֹּ֚ל נְשִׂיאֵ֣י הַיָּ֔ם וְהֵסִ֙ירוּ֙ אֶת־מְעִ֣ילֵיהֶ֔ם וְאֶת־בִּגְדֵ֥י רִקְמָתָ֖ם יִפְשֹׁ֑טוּ חֲרָד֤וֹת׀ יִלְבָּ֙שׁוּ֙ עַל־הָאָ֣רֶץ יֵשֵׁ֔בוּ וְחָֽרְדוּ֙ לִרְגָעִ֔ים וְשָׁמְמ֖וּ עָלָֽיִךְ׃ ‎17 ‏וְנָשְׂא֨וּ עָלַ֤יִךְ קִינָה֙ וְאָ֣מְרוּ לָ֔ךְ אֵ֣יךְ אָבַ֔דְתְּ נוֹשֶׁ֖בֶת מִיַּמִּ֑ים הָעִ֣יר הַהֻלָּ֗לָה אֲשֶׁר֩ הָיְתָ֨ה חֲזָקָ֤ה בַיָּם֙ הִ֣יא וְיֹשְׁבֶ֔יהָ אֲשֶׁר־נָתְנ֥וּ חִתִּיתָ֖ם לְכָל־יוֹשְׁבֶֽיהָ׃ ‎18 ‏עַתָּה֙ יֶחְרְד֣וּ הָֽאִיִּ֔ן י֖וֹם מַפַּלְתֵּ֑ךְ וְנִבְהֲל֛וּ הָאִיִּ֥ים אֲשֶׁר־בַּיָּ֖ם מִצֵּאתֵֽךְ׃ ס ‎19 ‏כִּ֣י כֹ֤ה אָמַר֙ אֲדֹנָ֣י יְהוִ֔ה בְּתִתִּ֤י אֹתָךְ֙ עִ֣יר נֶחֱרֶ֔בֶת כֶּעָרִ֖ים אֲשֶׁ֣ר לֹֽא־נוֹשָׁ֑בוּ בְּהַעֲל֤וֹת עָלַ֙יִךְ֙ אֶת־תְּה֔וֹם וְכִסּ֖וּךְ הַמַּ֥יִם הָרַבִּֽים׃ ‎20 ‏וְהוֹרַדְתִּיךְ֩ אֶת־י֨וֹרְדֵי ב֜וֹר אֶל־עַ֣ם עוֹלָ֗ם וְ֠הוֹשַׁבְתִּיךְ בְּאֶ֨רֶץ תַּחְתִּיּ֜וֹת כָּחֳרָב֤וֹת מֵֽעוֹלָם֙ אֶת־י֣וֹרְדֵי ב֔וֹר לְמַ֖עַן לֹ֣א תֵשֵׁ֑בִי וְנָתַתִּ֥י צְבִ֖י בְּאֶ֥רֶץ חַיִּֽים׃ ‎21 ‏בַּלָּה֥וֹת אֶתְּנֵ֖ךְ וְאֵינֵ֑ךְ וּֽתְבֻקְשִׁ֗י וְלֹֽא־תִמָּצְאִ֥י עוֹד֙ לְעוֹלָ֔ם נְאֻ֖ם אֲדֹנָ֥י יְהוִֹֽה׃ ס

1 wayəhî bə‘ašətê-‘eśərēh šānâ bə’eḥāḏ laḥōḏeš hāyâ ḏəḇar-yəhwâ ’ēlay lē’mōr: 2 ben-’āḏām ya‘an ’ăšer-’āmərâ ṣṣōr ‘al-yərûšālaim he’āḥ nišəbərâ daləṯwōṯ hā‘ammîm nāsēbâ ’ēlāy ’immālə’â hāḥŏrāḇâ: 3 lāḵēn kōh ’āmar ’ăḏōnāy yəhwih hinənî ‘ālayiḵə ṣōr wəha‘ălêṯî ‘ālayiḵə gwōyim rabîm kəha‘ălwōṯ hayyām ləḡallāyw: 4 wəšiḥăṯû ḥōmwōṯ ṣōr wəhārəsû miḡədāleyhā wəsiḥêṯî ‘ăfārāh mimmennâ wənāṯatî ’wōṯāh liṣəḥîḥa sāla‘: 5 mišəṭaḥ ḥărāmîm tihəyeh bəṯwōḵə hayyām kî ’ănî ḏibarətî nə’um ’ăḏōnāy yəhwih wəhāyəṯâ ləḇaz lagwōyim: 6 ûḇənwōṯeyhā ’ăšer baśśāḏeh baḥereḇ tēhāraḡənâ wəyāḏə‘û kî-’ănî yəhwâ: f 7 kî ḵōh ’āmar ’ăḏōnāy yəhwih hinənî mēḇî’ ’el-ṣōr nəḇûḵaḏəre’ṣṣar meleḵə-bāḇel miṣṣāfwōn meleḵə məlāḵîm bəsûs ûḇəreḵeḇ ûḇəfārāšîm wəqâāl wə‘am-rāḇ: 8 bənwōṯayiḵə baśśāḏeh baḥereḇ yahărōḡ wənāṯan ‘ālayiḵə dāyēq wəšāfaḵə ‘ālayiḵə sōləlâ wəhēqîm ‘ālayiḵə ṣinnâ: 9 ûməḥî qāḇāllwō yitēn bəḥōmwōṯāyiḵə ûmiḡədəlōṯayiḵə yitōṣ bəḥarəḇwōṯāyw: 10 miššifə‘aṯ sûsāyw yəḵassēḵə ’ăḇāqām miqqwōl pāraš wəḡaləgal wāreḵeḇ tirə‘ašənâ ḥwōmwōṯayiḵə bəḇō’wō bišə‘ārayiḵə kiməḇwō’ê ‘îr məḇuqqā‘â: 11 bəfarəswōṯ sûsāyw yirəmōs ’eṯ-kāl-ḥûṣwōṯāyiḵə ‘ammēḵə baḥereḇ yahărōḡ ûmaṣṣəḇwōṯ ‘uzzēḵə lā’āreṣ tērēḏ: 12 wəšāləlû ḥêlēḵə ûḇāzəzû rəḵullāṯēḵə wəhārəsû ḥwōmwōṯayiḵə ûḇātê ḥemədāṯēḵə yitōṣû wa’ăḇānayiḵə wə‘ēṣayiḵə wa‘ăfārēḵə bəṯwōḵə mayim yāśîmû: 13 wəhišəbatî hămwōn šîrāyiḵə wəqwōl kinnwōrayiḵə lō’ yiššāma‘ ‘wōḏ: 14 ûnəṯatîḵə liṣəḥîḥa sela‘ mišəṭaḥ ḥărāmîm tihəyeh lō’ ṯibāneh ‘wōḏ kî ’ănî yəhwâ dibarətî nə’um ’ăḏōnāy yəhwih: s 15 kōh ’āmar ’ăḏōnāy yəhwih ləṣwōr hălō’| miqqwōl mapalətēḵə be’ĕnōq ḥālāl bēhārēḡ hereḡ bəṯwōḵēḵə yirə‘ăšû hā’îyîm: 16 wəyārəḏû mē‘al kisə’wōṯām kōl nəśî’ê hayyām wəhēsîrû ’eṯ-mə‘îlêhem wə’eṯ-biḡəḏê riqəmāṯām yifəšōṭû ḥărāḏwōṯ| yiləbāšû ‘al-hā’āreṣ yēšēḇû wəḥārəḏû lirəḡā‘îm wəšāməmû ‘ālāyiḵə: 17 wənāśə’û ‘ālayiḵə qînâ wə’āmərû lāḵə ’êḵə ’āḇaḏətə nwōšeḇeṯ mîyammîm hā‘îr hahullālâ ’ăšer hāyəṯâ ḥăzāqâ ḇayyām hî’ wəyōšəḇeyhā ’ăšer-nāṯənû ḥitîṯām ləḵāl-ywōšəḇeyhā: 18 ‘atâ yeḥərəḏû hā’îyin ywōm mapalətēḵə wəniḇəhălû hā’îyîm ’ăšer-bayyām miṣṣē’ṯēḵə: s 19 kî ḵōh ’āmar ’ăḏōnāy yəhwih bəṯitî ’ōṯāḵə ‘îr neḥĕreḇeṯ ke‘ārîm ’ăšer lō’-nwōšāḇû bəha‘ălwōṯ ‘ālayiḵə ’eṯ-təhwōm wəḵissûḵə hammayim hārabîm: 20 wəhwōraḏətîḵə ’eṯ-ywōrəḏê ḇwōr ’el-‘am ‘wōlām wəhwōšaḇətîḵə bə’ereṣ taḥətîywōṯ kāḥŏrāḇwōṯ mē‘wōlām ’eṯ-ywōrəḏê ḇwōr ləma‘an lō’ ṯēšēḇî wənāṯatî ṣəḇî bə’ereṣ ḥayyîm: 21 ballâwōṯ ’etənēḵə wə’ênēḵə ûṯəḇuqəšî wəlō’-ṯimmāṣə’î ‘wōḏ lə‘wōlām nə’um ’ăḏōnāy yəhwōih: s