Exodus (Shemot): Exodus (Shemot) Chapter 15

Tanach (Hebrew): Exodus (Shemot) Chapter 15

‎1 ‏אָ֣ז יָשִֽׁיר־מֹשֶׁה֩ וּבְנֵ֨י יִשְׂרָאֵ֜ל אֶת־הַשִּׁירָ֤ה הַזֹּאת֙ לַֽיהוָ֔ה וַיֹּאמְר֖וּ לֵאמֹ֑ר אָשִׁ֤ירָה לַֽיהוָה֙ כִּֽי־גָאֹ֣ה גָּאָ֔ה ס֥וּס וְרֹכְב֖וֹ רָמָ֥ה בַיָּֽם׃ ‎2 ‏עָזִּ֤י וְזִמְרָת֙ יָ֔הּ וַֽיְהִי־לִ֖י לִֽישׁוּעָ֑ה זֶ֤ה אֵלִי֙ וְאַנְוֵ֔הוּ אֱלֹהֵ֥י אָבִ֖י וַאֲרֹמְמֶֽנְהוּ׃ ‎3 ‏יְהוָ֖ה אִ֣ישׁ מִלְחָמָ֑ה יְהוָ֖ה שְׁמֽוֹ׃ ‎4 ‏מַרְכְּבֹ֥ת פַּרְעֹ֛ה וְחֵיל֖וֹ יָרָ֣ה בַיָּ֑ם וּמִבְחַ֥ר שָֽׁלִשָׁ֖יו טֻבְּע֥וּ בְיַם־סֽוּף׃ ‎5 ‏תְּהֹמֹ֖ת יְכַסְיֻ֑מוּ יָרְד֥וּ בִמְצוֹלֹ֖ת כְּמוֹ־אָֽבֶן׃ ‎6 ‏יְמִֽינְךָ֣ יְהוָ֔ה נֶאְדָּרִ֖י בַּכֹּ֑חַ יְמִֽינְךָ֥ יְהוָ֖ה תִּרְעַ֥ץ אוֹיֵֽב׃ ‎7 ‏וּבְרֹ֥ב גְּאוֹנְךָ֖ תַּהֲרֹ֣ס קָמֶ֑יךָ תְּשַׁלַּח֙ חֲרֹ֣נְךָ֔ יֹאכְלֵ֖מוֹ כַּקַּֽשׁ׃ ‎8 ‏וּבְר֤וּחַ אַפֶּ֙יךָ֙ נֶ֣עֶרְמוּ מַ֔יִם נִצְּב֥וּ כְמוֹ־נֵ֖ד נֹזְלִ֑ים קָֽפְא֥וּ תְהֹמֹ֖ת בְּלֶב־יָֽם׃ ‎9 ‏אָמַ֥ר אוֹיֵ֛ב אֶרְדֹּ֥ף אַשִּׂ֖יג אֲחַלֵּ֣ק שָׁלָ֑ל תִּמְלָאֵ֣מוֹ נַפְשִׁ֔י אָרִ֣יק חַרְבִּ֔י תּוֹרִישֵׁ֖מוֹ יָדִֽי׃ ‎10 ‏נָשַׁ֥פְתָּ בְרוּחֲךָ֖ כִּסָּ֣מוֹ יָ֑ם צָֽלֲלוּ֙ כַּֽעוֹפֶ֔רֶת בְּמַ֖יִם אַדִּירִֽים׃ ‎11 ‏מִֽי־כָמֹ֤כָה בָּֽאֵלִם֙ יְהוָ֔ה מִ֥י כָּמֹ֖כָה נֶאְדָּ֣ר בַּקֹּ֑דֶשׁ נוֹרָ֥א תְהִלֹּ֖ת עֹ֥שֵׂה פֶֽלֶא׃ ‎12 ‏נָטִ֙יתָ֙ יְמִ֣ינְךָ֔ תִּבְלָעֵ֖מוֹ אָֽרֶץ׃ ‎13 ‏נָחִ֥יתָ בְחַסְדְּךָ֖ עַם־ז֣וּ גָּאָ֑לְתָּ נֵהַ֥לְתָּ בְעָזְּךָ֖ אֶל־נְוֵ֥ה קָדְשֶֽׁךָ׃ ‎14 ‏שָֽׁמְע֥וּ עַמִּ֖ים יִרְגָּז֑וּן חִ֣יל אָחַ֔ז יֹשְׁבֵ֖י פְּלָֽשֶׁת׃ ‎15 ‏אָ֤ז נִבְהֲלוּ֙ אַלּוּפֵ֣י אֱד֔וֹם אֵילֵ֣י מוֹאָ֔ב יֹֽאחֲזֵ֖מוֹ רָ֑עַד נָמֹ֕גוּ כֹּ֖ל יֹשְׁבֵ֥י כְנָֽעַן׃ ‎16 ‏תִּפֹּ֨ל עֲלֵיהֶ֤ם אֵימָ֙תָה֙ וָפַ֔חַד בִּגְדֹ֥ל זְרוֹעֲךָ֖ יִדְּמ֣וּ כָּאָ֑בֶן עַד־יַעֲבֹ֤ר עַמְּךָ֙ יְהוָ֔ה עַֽד־יַעֲבֹ֖ר עַם־ז֥וּ קָנִֽיתָ׃ ‎17 ‏תְּבִאֵ֗מוֹ וְתִטָּעֵ֙מוֹ֙ בְּהַ֣ר נַחֲלָֽתְךָ֔ מָכ֧וֹן לְשִׁבְתְּךָ֛ פָּעַ֖לְתָּ יְהוָ֑ה מִקְּדָ֕שׁ אֲדֹנָ֖י כּוֹנְנ֥וּ יָדֶֽיךָ׃ ‎18 ‏יְהוָ֥ה׀ יִמְלֹ֖ךְ לְעֹלָ֥ם וָעֶֽד׃ ‎19 ‏כִּ֣י בָא֩ ס֨וּס פַּרְעֹ֜ה בְּרִכְבּ֤וֹ וּבְפָרָשָׁיו֙ בַּיָּ֔ם וַיָּ֧שֶׁב יְהוָ֛ה עֲלֵהֶ֖ם אֶת־מֵ֣י הַיָּ֑ם וּבְנֵ֧י יִשְׂרָאֵ֛ל הָלְכ֥וּ בַיַּבָּשָׁ֖ה בְּת֥וֹךְ הַיָּֽם׃ פ ‎20 ‏וַתִּקַּח֩ מִרְיָ֨ם הַנְּבִיאָ֜ה אֲח֧וֹת אַהֲרֹ֛ן אֶת־הַתֹּ֖ף בְּיָדָ֑הּ וַתֵּצֶ֤אןָ כָֽל־הַנָּשִׁים֙ אַחֲרֶ֔יהָ בְּתֻפִּ֖ים וּבִמְחֹלֹֽת׃ ‎21 ‏וַתַּ֥עַן לָהֶ֖ם מִרְיָ֑ם שִׁ֤ירוּ לַֽיהוָה֙ כִּֽי־גָאֹ֣ה גָּאָ֔ה ס֥וּס וְרֹכְב֖וֹ רָמָ֥ה בַיָּֽם׃ ס ‎22 ‏וַיַּסַּ֨ע מֹשֶׁ֤ה אֶת־יִשְׂרָאֵל֙ מִיַּם־ס֔וּף וַיֵּצְא֖וּ אֶל־מִדְבַּר־שׁ֑וּר וַיֵּלְכ֧וּ שְׁלֹֽשֶׁת־יָמִ֛ים בַּמִּדְבָּ֖ר וְלֹא־מָ֥צְאוּ מָֽיִם׃ ‎23 ‏וַיָּבֹ֣אוּ מָרָ֔תָה וְלֹ֣א יָֽכְל֗וּ לִשְׁתֹּ֥ת מַ֙יִם֙ מִמָּרָ֔ה כִּ֥י מָרִ֖ים הֵ֑ם עַל־כֵּ֥ן קָרָֽא־שְׁמָ֖הּ מָרָֽה׃ ‎24 ‏וַיִּלֹּ֧נוּ הָעָ֛ם עַל־מֹשֶׁ֥ה לֵּאמֹ֖ר מַה־נִּשְׁתֶּֽה׃ ‎25 ‏וַיִּצְעַ֣ק אֶל־יְהוָ֗ה וַיּוֹרֵ֤הוּ יְהוָה֙ עֵ֔ץ וַיַּשְׁלֵךְ֙ אֶל־הַמַּ֔יִם וַֽיִּמְתְּק֖וּ הַמָּ֑יִם שָׁ֣ם שָׂ֥ם ל֛וֹ חֹ֥ק וּמִשְׁפָּ֖ט וְשָׁ֥ם נִסָּֽהוּ׃ ‎26 ‏וַיֹּאמֶר֩ אִם־שָׁמ֨וֹעַ תִּשְׁמַ֜ע לְק֣וֹל׀ יְהוָ֣ה אֱלֹהֶ֗יךָ וְהַיָּשָׁ֤ר בְּעֵינָיו֙ תַּעֲשֶׂ֔ה וְהַֽאֲזַנְתָּ֙ לְמִצְוֹתָ֔יו וְשָׁמַרְתָּ֖ כָּל־חֻקָּ֑יו כָּֽל־הַמַּֽחֲלָ֞ה אֲשֶׁר־שַׂ֤מְתִּי בְמִצְרַ֙יִם֙ לֹא־אָשִׂ֣ים עָלֶ֔יךָ כִּ֛י אֲנִ֥י יְהוָ֖ה רֹפְאֶֽךָ׃ ס ‎27 ‏וַיָּבֹ֣אוּ אֵילִ֔מָה וְשָׁ֗ם שְׁתֵּ֥ים עֶשְׂרֵ֛ה עֵינֹ֥ת מַ֖יִם וְשִׁבְעִ֣ים תְּמָרִ֑ים וַיַּחֲנוּ־שָׁ֖ם עַל־הַמָּֽיִם׃

1 ’āz yāšîr-mōšeh ûḇənê yiśərā’ēl ’eṯ-haššîrâ hazzō’ṯ layhwâ wayyō’mərû lē’mōr ’āšîrâ layhwâ kî-ḡā’ōh gā’â sûs wərōḵəḇwō rāmâ ḇayyām: 2 ‘āzzî wəzimərāṯ yāh wayəhî-lî lîšû‘â zeh ’ēlî wə’anəwēhû ’ĕlōhê ’āḇî wa’ărōməmenəhû: 3 yəhwâ ’îš miləḥāmâ yəhwâ šəmwō: 4 marəkəḇōṯ parə‘ōh wəḥêlwō yārâ ḇayyām ûmiḇəḥar šālišāyw ṭubə‘û ḇəyam-sûf: 5 təhōmōṯ yəḵasəyumû yārəḏû ḇiməṣwōlōṯ kəmwō-’āḇen: 6 yəmînəḵā yəhwâ ne’ədārî bakōḥa yəmînəḵā yəhwâ tirə‘aṣ ’wōyēḇ: 7 ûḇərōḇ gə’wōnəḵā tahărōs qāmeyḵā təšallaḥ ḥărōnəḵā yō’ḵəlēmwō kaqqaš: 8 ûḇərûḥa ’apeyḵā ne‘erəmû mayim niṣṣəḇû ḵəmwō-nēḏ nōzəlîm qāfə’û ṯəhōmōṯ bəleḇ-yām: 9 ’āmar ’wōyēḇ ’erədōf ’aśśîḡ ’ăḥallēq šālāl timəlā’ēmwō nafəšî ’ārîq ḥarəbî twōrîšēmwō yāḏî: 10 nāšafətā ḇərûḥăḵā kissāmwō yām ṣālălû ka‘wōfereṯ bəmayim ’adîrîm: 11 mî-ḵāmōḵâ bā’ēlim yəhwâ mî kāmōḵâ ne’ədār baqqōḏeš nwōrā’ ṯəhillōṯ ‘ōśēh fele’: 12 nāṭîṯā yəmînəḵā tiḇəlā‘ēmwō ’āreṣ: 13 nāḥîṯā ḇəḥasədəḵā ‘am-zû gā’ālətā nēhalətā ḇə‘āzzəḵā ’el-nəwēh qāḏəšeḵā: 14 šāmə‘û ‘ammîm yirəgāzûn ḥîl ’āḥaz yōšəḇê pəlāšeṯ: 15 ’āz niḇəhălû ’allûfê ’ĕḏwōm ’êlê mwō’āḇ yō’ḥăzēmwō rā‘aḏ nāmōḡû kōl yōšəḇê ḵənā‘an: 16 tipōl ‘ălêhem ’êmāṯâ wāfaḥaḏ biḡəḏōl zərwō‘ăḵā yidəmû kā’āḇen ‘aḏ-ya‘ăḇōr ‘amməḵā yəhwâ ‘aḏ-ya‘ăḇōr ‘am-zû qānîṯā: 17 təḇi’ēmwō wəṯiṭṭā‘ēmwō bəhar naḥălāṯəḵā māḵwōn ləšiḇətəḵā pā‘alətā yəhwâ miqqəḏāš ’ăḏōnāy kwōnənû yāḏeyḵā: 18 yəhwâ| yiməlōḵə lə‘ōlām wā‘eḏ: 19 kî ḇā’ sûs parə‘ōh bəriḵəbwō ûḇəfārāšāyw bayyām wayyāšeḇ yəhwâ ‘ălēhem ’eṯ-mê hayyām ûḇənê yiśərā’ēl hāləḵû ḇayyabāšâ bəṯwōḵə hayyām: f 20 watiqqaḥ mirəyām hannəḇî’â ’ăḥwōṯ ’ahărōn ’eṯ-hatōf bəyāḏāh watēṣe’nā ḵāl-hannāšîm ’aḥăreyhā bəṯupîm ûḇiməḥōlōṯ: 21 wata‘an lâem mirəyām šîrû layhwâ kî-ḡā’ōh gā’â sûs wərōḵəḇwō rāmâ ḇayyām: s 22 wayyassa‘ mōšeh ’eṯ-yiśərā’ēl mîyam-sûf wayyēṣə’û ’el-miḏəbar-šûr wayyēləḵû šəlōšeṯ-yāmîm bammiḏəbār wəlō’-māṣə’û māyim: 23 wayyāḇō’û mārāṯâ wəlō’ yāḵəlû lišətōṯ mayim mimmārâ kî mārîm hēm ‘al-kēn qārā’-šəmāh mārâ: 24 wayyillōnû hā‘ām ‘al-mōšeh llē’mōr mah-nnišəteh: 25 wayyiṣə‘aq ’el-yəhwâ wayywōrēhû yəhwâ ‘ēṣ wayyašəlēḵə ’el-hammayim wayyimətəqû hammāyim šām śām lwō ḥōq ûmišəpāṭ wəšām nissâû: 26 wayyō’mer ’im-šāmwō‘a tišəma‘ ləqwōl| yəhwâ ’ĕlōheyḵā wəhayyāšār bə‘ênāyw ta‘ăśeh wəha’ăzanətā ləmiṣəwōṯāyw wəšāmarətā kāl-ḥuqqāyw kāl-hammaḥălâ ’ăšer-śamətî ḇəmiṣərayim lō’-’āśîm ‘āleyḵā kî ’ănî yəhwâ rōfə’eḵā: s 27 wayyāḇō’û ’êlimâ wəšām šətêm ‘eśərēh ‘ênōṯ mayim wəšiḇə‘îm təmārîm wayyaḥănû-šām ‘al-hammāyim: