Daniel (Daniyel): Daniel (Daniyel) Chapter 12

Tanach (Hebrew): Daniel (Daniyel) Chapter 12

‎1 ‏וּבָעֵ֣ת הַהִיא֩ יַעֲמֹ֨ד מִֽיכָאֵ֜ל הַשַּׂ֣ר הַגָּד֗וֹל הָעֹמֵד֮ עַל־בְּנֵ֣י עַמֶּךָ֒ וְהָיְתָה֙ עֵ֣ת צָרָ֔ה אֲשֶׁ֤ר לֹֽא־נִהְיְתָה֙ מִֽהְי֣וֹת גּ֔וֹי עַ֖ד הָעֵ֣ת הַהִ֑יא וּבָעֵ֤ת הַהִיא֙ יִמָּלֵ֣ט עַמְּךָ֔ כָּל־הַנִּמְצָ֖א כָּת֥וּב בַּסֵּֽפֶר׃ ‎2 ‏וְרַבִּ֕ים מִיְּשֵׁנֵ֥י אַדְמַת־עָפָ֖ר יָקִ֑יצוּ אֵ֚לֶּה לְחַיֵּ֣י עוֹלָ֔ם וְאֵ֥לֶּה לַחֲרָפ֖וֹת לְדִרְא֥וֹן עוֹלָֽם׃ ס ‎3 ‏וְהַ֨מַּשְׂכִּלִ֔ים יַזְהִ֖רוּ כְּזֹ֣הַר הָרָקִ֑יעַ וּמַצְדִּיקֵי֙ הָֽרַבִּ֔ים כַּכּוֹכָבִ֖ים לְעוֹלָ֥ם וָעֶֽד׃ פ ‎4 ‏וְאַתָּ֣ה דָֽנִיֵּ֗אל סְתֹ֧ם הַדְּבָרִ֛ים וַחֲתֹ֥ם הַסֵּ֖פֶר עַד־עֵ֣ת קֵ֑ץ יְשֹׁטְט֥וּ רַבִּ֖ים וְתִרְבֶּ֥ה הַדָּֽעַת׃ ‎5 ‏וְרָאִ֙יתִי֙ אֲנִ֣י דָנִיֵּ֔אל וְהִנֵּ֛ה שְׁנַ֥יִם אֲחֵרִ֖ים עֹמְדִ֑ים אֶחָ֥ד הֵ֙נָּה֙ לִשְׂפַ֣ת הַיְאֹ֔ר וְאֶחָ֥ד הֵ֖נָּה לִשְׂפַ֥ת הַיְאֹֽר׃ ‎6 ‏וַיֹּ֗אמֶר לָאִישׁ֙ לְב֣וּשׁ הַבַּדִּ֔ים אֲשֶׁ֥ר מִמַּ֖עַל לְמֵימֵ֣י הַיְאֹ֑ר עַד־מָתַ֖י קֵ֥ץ הַפְּלָאֽוֹת׃ ‎7 ‏וָאֶשְׁמַ֞ע אֶת־הָאִ֣ישׁ׀ לְב֣וּשׁ הַבַּדִּ֗ים אֲשֶׁ֣ר מִמַּעַל֮ לְמֵימֵ֣י הַיְאֹר֒ וַיָּ֨רֶם יְמִינ֤וֹ וּשְׂמֹאלוֹ֙ אֶל־הַשָּׁמַ֔יִם וַיִּשָּׁבַ֖ע בְּחֵ֣י הָעוֹלָ֑ם כִּי֩ לְמוֹעֵ֨ד מֽוֹעֲדִ֜ים וָחֵ֗צִי וּכְכַלּ֛וֹת נַפֵּ֥ץ יַד־עַם־קֹ֖דֶשׁ תִּכְלֶ֥ינָה כָל־אֵֽלֶּה׃ ‎8 ‏וַאֲנִ֥י שָׁמַ֖עְתִּי וְלֹ֣א אָבִ֑ין וָאֹ֣מְרָ֔ה אֲדֹנִ֕י מָ֥ה אַחֲרִ֖ית אֵֽלֶּה׃ פ ‎9 ‏וַיֹּ֖אמֶר לֵ֣ךְ דָּנִיֵּ֑אל כִּֽי־סְתֻמִ֧ים וַחֲתֻמִ֛ים הַדְּבָרִ֖ים עַד־עֵ֥ת קֵֽץ׃ ‎10 ‏יִ֠תְבָּֽרֲרוּ וְיִֽתְלַבְּנ֤וּ וְיִצָּֽרְפוּ֙ רַבִּ֔ים וְהִרְשִׁ֣יעוּ רְשָׁעִ֔ים וְלֹ֥א יָבִ֖ינוּ כָּל־רְשָׁעִ֑ים וְהַמַּשְׂכִּלִ֖ים יָבִֽינוּ׃ ‎11 ‏וּמֵעֵת֙ הוּסַ֣ר הַתָּמִ֔יד וְלָתֵ֖ת שִׁקּ֣וּץ שֹׁמֵ֑ם יָמִ֕ים אֶ֖לֶף מָאתַ֥יִם וְתִשְׁעִֽים׃ ‎12 ‏אַשְׁרֵ֥י הַֽמְחַכֶּ֖ה וְיַגִּ֑יעַ לְיָמִ֕ים אֶ֕לֶף שְׁלֹ֥שׁ מֵא֖וֹת שְׁלֹשִׁ֥ים וַחֲמִשָּֽׁה׃ ‎13 ‏וְאַתָּ֖ה לֵ֣ךְ לַקֵּ֑ץ וְתָנ֛וּחַ וְתַעֲמֹ֥ד לְגֹרָלְךָ֖ לְקֵ֥ץ הַיָּמִֽין׃

1 ûḇā‘ēṯ hahî’ ya‘ămōḏ mîḵā’ēl haśśar hagāḏwōl hā‘ōmēḏ ‘al-bənê ‘ammeḵā wəhāyəṯâ ‘ēṯ ṣārâ ’ăšer lō’-nihəyəṯâ mihəywōṯ gwōy ‘aḏ hā‘ēṯ hahî’ ûḇā‘ēṯ hahî’ yimmālēṭ ‘amməḵā kāl-hanniməṣā’ kāṯûḇ bassēfer: 2 wərabîm mîyəšēnê ’aḏəmaṯ-‘āfār yāqîṣû ’ēlleh ləḥayyê ‘wōlām wə’ēlleh laḥărāfwōṯ ləḏirə’wōn ‘wōlām: s 3 wəhammaśəkilîm yazəhirû kəzōhar hārāqî‘a ûmaṣədîqê hārabîm kakwōḵāḇîm lə‘wōlām wā‘eḏ: f 4 wə’atâ ḏānîyē’l səṯōm hadəḇārîm waḥăṯōm hassēfer ‘aḏ-‘ēṯ qēṣ yəšōṭəṭû rabîm wəṯirəbeh hadā‘aṯ: 5 wərā’îṯî ’ănî ḏānîyē’l wəhinnēh šənayim ’ăḥērîm ‘ōməḏîm ’eḥāḏ hēnnâ liśəfaṯ hayə’ōr wə’eḥāḏ hēnnâ liśəfaṯ hayə’ōr: 6 wayyō’mer lā’îš ləḇûš habadîm ’ăšer mimma‘al ləmêmê hayə’ōr ‘aḏ-māṯay qēṣ hapəlā’wōṯ: 7 wā’ešəma‘ ’eṯ-hā’îš| ləḇûš habadîm ’ăšer mimma‘al ləmêmê hayə’ōr wayyārem yəmînwō ûśəmō’lwō ’el-haššāmayim wayyiššāḇa‘ bəḥê hā‘wōlām kî ləmwō‘ēḏ mwō‘ăḏîm wāḥēṣî ûḵəḵallwōṯ napēṣ yaḏ-‘am-qōḏeš tiḵəleynâ ḵāl-’ēlleh: 8 wa’ănî šāma‘ətî wəlō’ ’āḇîn wā’ōmərâ ’ăḏōnî mâ ’aḥărîṯ ’ēlleh: f 9 wayyō’mer lēḵə dānîyē’l kî-səṯumîm waḥăṯumîm hadəḇārîm ‘aḏ-‘ēṯ qēṣ: 10 yiṯəbārărû wəyiṯəlabənû wəyiṣṣārəfû rabîm wəhirəšî‘û rəšā‘îm wəlō’ yāḇînû kāl-rəšā‘îm wəhammaśəkilîm yāḇînû: 11 ûmē‘ēṯ hûsar hatāmîḏ wəlāṯēṯ šiqqûṣ šōmēm yāmîm ’elef mā’ṯayim wəṯišə‘îm: 12 ’ašərê haməḥakeh wəyagî‘a ləyāmîm ’elef šəlōš mē’wōṯ šəlōšîm waḥămiššâ: 13 wə’atâ lēḵə laqqēṣ wəṯānûḥa wəṯa‘ămōḏ ləḡōrāləḵā ləqēṣ hayyāmîn: