2 Chronicles (2 Divrey Yamim): 2 Chronicles (2 Divrey Yamim) Chapter 14

Tanach (Hebrew): 2 Chronicles (2 Divrey Yamim) Chapter 14

‎1 ‏וַיַּ֤עַשׂ אָסָא֙ הַטּ֣וֹב וְהַיָּשָׁ֔ר בְּעֵינֵ֖י יְהוָ֥ה אֱלֹהָֽיו׃ ‎2 ‏וַיָּ֛סַר אֶת־מִזְבְּח֥וֹת הַנֵּכָ֖ר וְהַבָּמ֑וֹת וַיְשַׁבֵּר֙ אֶת־הַמַּצֵּב֔וֹת וַיְגַדַּ֖ע אֶת־הָאֲשֵׁרִֽים׃ ‎3 ‏וַיֹּ֙אמֶר֙ לִֽיהוּדָ֔ה לִדְר֕וֹשׁ אֶת־יְהוָ֖ה אֱלֹהֵ֣י אֲבוֹתֵיהֶ֑ם וְלַעֲשׂ֖וֹת הַתּוֹרָ֥ה וְהַמִּצְוָֽה׃ ‎4 ‏וַיָּ֙סַר֙ מִכָּל־עָרֵ֣י יְהוּדָ֔ה אֶת־הַבָּמ֖וֹת וְאֶת־הַֽחַמָּנִ֑ים וַתִּשְׁקֹ֥ט הַמַּמְלָכָ֖ה לְפָנָֽיו׃ ‎5 ‏וַיִּ֛בֶן עָרֵ֥י מְצוּרָ֖ה בִּיהוּדָ֑ה כִּֽי־שָׁקְטָ֣ה הָאָ֗רֶץ וְאֵין־עִמּ֤וֹ מִלְחָמָה֙ בַּשָּׁנִ֣ים הָאֵ֔לֶּה כִּֽי־הֵנִ֥יחַ יְהוָ֖ה לֽוֹ׃ ‎6 ‏וַיֹּ֨אמֶר לִֽיהוּדָ֜ה נִבְנֶ֣ה׀ אֶת־הֶעָרִ֣ים הָאֵ֗לֶּה וְנָסֵ֨ב חוֹמָ֣ה וּמִגְדָּלִים֮ דְּלָתַ֣יִם וּבְרִיחִים֒ עוֹדֶ֨נּוּ הָאָ֜רֶץ לְפָנֵ֗ינוּ כִּ֤י דָרַ֙שְׁנוּ֙ אֶת־יְהוָ֣ה אֱלֹהֵ֔ינוּ דָּרַ֕שְׁנוּ וַיָּ֥נַֽח לָ֖נוּ מִסָּבִ֑יב וַיִּבְנ֖וּ וַיַּצְלִֽיחוּ׃ פ ‎7 ‏וַיְהִ֣י לְאָסָ֗א חַיִל֮ נֹשֵׂ֣א צִנָּ֣ה וָרֹמַח֒ מִֽיהוּדָה֙ שְׁלֹ֣שׁ מֵא֣וֹת אֶ֔לֶף סוּמִבִּנְיָמִ֗ן נֹשְׂאֵ֤י מָגֵן֙ וְדֹ֣רְכֵי קֶ֔שֶׁת מָאתַ֥יִם וּשְׁמוֹנִ֖ים אָ֑לֶף כָּל־אֵ֖לֶּה גִּבּ֥וֹרֵי חָֽיִל׃ ‎8 ‏וַיֵּצֵ֨א אֲלֵיהֶ֜ם זֶ֣רַח הַכּוּשִׁ֗י בְּחַ֙יִל֙ אֶ֣לֶף אֲלָפִ֔ים וּמַרְכָּב֖וֹת שְׁלֹ֣שׁ מֵא֑וֹת וַיָּבֹ֖א עַד־מָרֵשָֽׁה׃ ‎9 ‏וַיֵּצֵ֥א אָסָ֖א לְפָנָ֑יו וַיַּֽעַרְכוּ֙ מִלְחָמָ֔ה בְּגֵ֥יא צְפַ֖תָה לְמָרֵשָֽׁה׃ ‎10 ‏וַיִּקְרָ֨א אָסָ֜א אֶל־יְהוָ֣ה אֱלֹהָיו֮ וַיֹּאמַר֒ יְהוָ֗ה אֵֽין־עִמְּךָ֤ לַעְזוֹר֙ בֵּ֥ין רַב֙ לְאֵ֣ין כֹּ֔חַ עָזְרֵ֜נוּ יְהוָ֤ה אֱלֹהֵ֙ינוּ֙ כִּֽי־עָלֶ֣יךָ נִשְׁעַ֔נּוּ וּבְשִׁמְךָ֣ בָ֔אנוּ עַל־הֶהָמ֖וֹן הַזֶּ֑ה יְהוָ֤ה אֱלֹהֵ֙ינוּ֙ אַ֔תָּה אַל־יַעְצֹ֥ר עִמְּךָ֖ אֱנֽוֹשׁ׃ ס ‎11 ‏וַיִּגֹּ֤ף יְהוָה֙ אֶת־הַכּוּשִׁ֔ים לִפְנֵ֥י אָסָ֖א וְלִפְנֵ֣י יְהוּדָ֑ה וַיָּנֻ֖סוּ הַכּוּשִֽׁים׃ ‎12 ‏וַיִּרְדְּפֵ֨ם אָסָ֜א וְהָעָ֣ם אֲשֶׁר־עִמּוֹ֮ עַד־לִגְרָר֒ וַיִּפֹּ֤ל מִכּוּשִׁים֙ לְאֵ֣ין לָהֶ֣ם מִֽחְיָ֔ה כִּֽי־נִשְׁבְּר֥וּ לִפְנֵֽי־יְהוָ֖ה וְלִפְנֵ֣י מַחֲנֵ֑הוּ וַיִּשְׂא֥וּ שָׁלָ֖ל הַרְבֵּ֥ה מְאֹֽד׃ ‎13 ‏וַיַּכּ֗וּ אֵ֤ת כָּל־הֶֽעָרִים֙ סְבִיב֣וֹת גְּרָ֔ר כִּי־הָיָ֥ה פַֽחַד־יְהוָ֖ה עֲלֵיהֶ֑ם וַיָּבֹ֙זּוּ֙ אֶת־כָּל־הֶ֣עָרִ֔ים כִּֽי־בִזָּ֥ה רַבָּ֖ה הָיְתָ֥ה בָהֶֽם׃ ‎14 ‏וְגַם־אָהֳלֵ֥י מִקְנֶ֖ה הִכּ֑וּ וַיִּשְׁבּ֨וּ צֹ֤אן לָרֹב֙ וּגְמַלִּ֔ים וַיָּשֻׁ֖בוּ יְרוּשָׁלִָֽם׃ ס

1 wayya‘aś ’āsā’ haṭṭwōḇ wəhayyāšār bə‘ênê yəhwâ ’ĕlōhāyw: 2 wayyāsar ’eṯ-mizəbəḥwōṯ hannēḵār wəhabāmwōṯ wayəšabēr ’eṯ-hammaṣṣēḇwōṯ wayəḡada‘ ’eṯ-hā’ăšērîm: 3 wayyō’mer lîhûḏâ liḏərwōš ’eṯ-yəhwâ ’ĕlōhê ’ăḇwōṯêhem wəla‘ăśwōṯ hatwōrâ wəhammiṣəwâ: 4 wayyāsar mikāl-‘ārê yəhûḏâ ’eṯ-habāmwōṯ wə’eṯ-haḥammānîm watišəqōṭ hammaməlāḵâ ləfānāyw: 5 wayyiḇen ‘ārê məṣûrâ bîhûḏâ kî-šāqəṭâ hā’āreṣ wə’ên-‘immwō miləḥāmâ baššānîm hā’ēlleh kî-hēnîḥa yəhwâ lwō: 6 wayyō’mer lîhûḏâ niḇəneh| ’eṯ-he‘ārîm hā’ēlleh wənāsēḇ ḥwōmâ ûmiḡədālîm dəlāṯayim ûḇərîḥîm ‘wōḏennû hā’āreṣ ləfānênû kî ḏārašənû ’eṯ-yəhwâ ’ĕlōhênû dārašənû wayyānaḥ lānû missāḇîḇ wayyiḇənû wayyaṣəlîḥû: f 7 wayəhî lə’āsā’ ḥayil nōśē’ ṣinnâ wārōmaḥ mîhûḏâ šəlōš mē’wōṯ ’elef sûmibinəyāmin nōśə’ê māḡēn wəḏōrəḵê qešeṯ mā’ṯayim ûšəmwōnîm ’ālef kāl-’ēlleh gibwōrê ḥāyil: 8 wayyēṣē’ ’ălêhem zeraḥ hakûšî bəḥayil ’elef ’ălāfîm ûmarəkāḇwōṯ šəlōš mē’wōṯ wayyāḇō’ ‘aḏ-mārēšâ: 9 wayyēṣē’ ’āsā’ ləfānāyw wayya‘arəḵû miləḥāmâ bəḡê’ ṣəfaṯâ ləmārēšâ: 10 wayyiqərā’ ’āsā’ ’el-yəhwâ ’ĕlōhāyw wayyō’mar yəhwâ ’ên-‘imməḵā la‘əzwōr bên raḇ lə’ên kōḥa ‘āzərēnû yəhwâ ’ĕlōhênû kî-‘āleyḵā nišə‘annû ûḇəšiməḵā ḇā’nû ‘al-hehāmwōn hazzeh yəhwâ ’ĕlōhênû ’atâ ’al-ya‘əṣōr ‘imməḵā ’ĕnwōš: s 11 wayyigōf yəhwâ ’eṯ-hakûšîm lifənê ’āsā’ wəlifənê yəhûḏâ wayyānusû hakûšîm: 12 wayyirədəfēm ’āsā’ wəhā‘ām ’ăšer-‘immwō ‘aḏ-liḡərār wayyipōl mikûšîm lə’ên lâem miḥəyâ kî-nišəbərû lifənê-yəhwâ wəlifənê maḥănēhû wayyiśə’û šālāl harəbēh mə’ōḏ: 13 wayyakû ’ēṯ kāl-he‘ārîm səḇîḇwōṯ gərār kî-hāyâ faḥaḏ-yəhwâ ‘ălêhem wayyāḇōzzû ’eṯ-kāl-he‘ārîm kî-ḇizzâ rabâ hāyəṯâ ḇâem: 14 wəḡam-’âŏlê miqəneh hikû wayyišəbû ṣō’n lārōḇ ûḡəmallîm wayyāšuḇû yərûšālāim: s