1 Samuel (1 Shmuel): 1 Samuel (1 Shmuel) Chapter 31

Tanach (Hebrew): 1 Samuel (1 Shmuel) Chapter 31

‎1 ‏וּפְלִשְׁתִּ֖ים נִלְחָמִ֣ים בְּיִשְׂרָאֵ֑ל וַיָּנֻ֜סוּ אַנְשֵׁ֤י יִשְׂרָאֵל֙ מִפְּנֵ֣י פְלִשְׁתִּ֔ים וַיִּפְּל֥וּ חֲלָלִ֖ים בְּהַ֥ר הַגִּלְבֹּֽעַ׃ ‎2 ‏וַיַּדְבְּק֣וּ פְלִשְׁתִּ֔ים אֶת־שָׁא֖וּל וְאֶת־בָּנָ֑יו וַיַּכּ֣וּ פְלִשְׁתִּ֗ים אֶת־יְהוֹנָתָ֧ן וְאֶת־אֲבִינָדָ֛ב וְאֶת־מַלְכִּי־שׁ֖וּעַ בְּנֵ֥י שָׁאֽוּל׃ ‎3 ‏וַתִּכְבַּ֤ד הַמִּלְחָמָה֙ אֶל־שָׁא֔וּל וַיִּמְצָאֻ֥הוּ הַמּוֹרִ֖ים אֲנָשִׁ֣ים בַּקָּ֑שֶׁת וַיָּ֥חֶל מְאֹ֖ד מֵהַמּוֹרִֽים׃ ‎4 ‏וַיֹּ֣אמֶר שָׁאוּל֩ לְנֹשֵׂ֨א כֵלָ֜יו שְׁלֹ֥ף חַרְבְּךָ֣׀ וְדָקְרֵ֣נִי בָ֗הּ פֶּן־יָ֠בוֹאוּ הָעֲרֵלִ֨ים הָאֵ֤לֶּה וּדְקָרֻ֙נִי֙ וְהִתְעַלְּלוּ־בִ֔י וְלֹ֤א אָבָה֙ נֹשֵׂ֣א כֵלָ֔יו כִּ֥י יָרֵ֖א מְאֹ֑ד וַיִּקַּ֤ח שָׁאוּל֙ אֶת־הַחֶ֔רֶב וַיִּפֹּ֖ל עָלֶֽיהָ׃ ‎5 ‏וַיַּ֥רְא נֹשֵֽׂא־כֵלָ֖יו כִּ֣י מֵ֣ת שָׁא֑וּל וַיִּפֹּ֥ל גַּם־ה֛וּא עַל־חַרְבּ֖וֹ וַיָּ֥מָת עִמּֽוֹ׃ ‎6 ‏וַיָּ֣מָת שָׁא֡וּל וּשְׁלֹ֣שֶׁת בָּנָיו֩ וְנֹשֵׂ֨א כֵלָ֜יו גַּ֧ם כָּל־אֲנָשָׁ֛יו בַּיּ֥וֹם הַה֖וּא יַחְדָּֽו׃ ‎7 ‏וַיִּרְא֣וּ אַנְשֵֽׁי־יִ֠שְׂרָאֵל אֲשֶׁר־בְּעֵ֨בֶר הָעֵ֜מֶק וַאֲשֶׁ֣ר׀ בְּעֵ֣בֶר הַיַּרְדֵּ֗ן כִּֽי־נָ֙סוּ֙ אַנְשֵׁ֣י יִשְׂרָאֵ֔ל וְכִי־מֵ֖תוּ שָׁא֣וּל וּבָנָ֑יו וַיַּעַזְב֤וּ אֶת־הֶֽעָרִים֙ וַיָּנֻ֔סוּ וַיָּבֹ֣אוּ פְלִשְׁתִּ֔ים וַיֵּֽשְׁב֖וּ בָּהֶֽן׃ ס ‎8 ‏וַֽיְהִי֙ מִֽמָּחֳרָ֔ת וַיָּבֹ֣אוּ פְלִשְׁתִּ֔ים לְפַשֵּׁ֖ט אֶת־הַחֲלָלִ֑ים וַֽיִּמְצְא֤וּ אֶת־שָׁאוּל֙ וְאֶת־שְׁלֹ֣שֶׁת בָּנָ֔יו נֹפְלִ֖ים בְּהַ֥ר הַגִּלְבֹּֽעַ׃ ‎9 ‏וַֽיִּכְרְתוּ֙ אֶת־רֹאשׁ֔וֹ וַיַּפְשִׁ֖יטוּ אֶת־כֵּלָ֑יו וַיְשַׁלְּח֨וּ בְאֶֽרֶץ־פְּלִשְׁתִּ֜ים סָבִ֗יב לְבַשֵּׂ֛ר בֵּ֥ית עֲצַבֵּיהֶ֖ם וְאֶת־הָעָֽם׃ ‎10 ‏וַיָּשִׂ֙מוּ֙ אֶת־כֵּלָ֔יו בֵּ֖ית עַשְׁתָּר֑וֹת וְאֶת־גְּוִיָּתוֹ֙ תָּקְע֔וּ בְּחוֹמַ֖ת בֵּ֥ית שָֽׁן׃ ‎11 ‏וַיִּשְׁמְע֣וּ אֵלָ֔יו יֹשְׁבֵ֖י יָבֵ֣ישׁ גִּלְעָ֑ד אֵ֛ת אֲשֶׁר־עָשׂ֥וּ פְלִשְׁתִּ֖ים לְשָׁאֽוּל׃ ‎12 ‏וַיָּק֜וּמוּ כָּל־אִ֣ישׁ חַיִל֮ וַיֵּלְכ֣וּ כָל־הַלַּיְלָה֒ וַיִּקְח֞וּ אֶת־גְּוִיַּ֣ת שָׁא֗וּל וְאֵת֙ גְּוִיֹּ֣ת בָּנָ֔יו מֵחוֹמַ֖ת בֵּ֣ית שָׁ֑ן וַיָּבֹ֣אוּ יָבֵ֔שָׁה וַיִּשְׂרְפ֥וּ אֹתָ֖ם שָֽׁם׃ ‎13 ‏וַיִּקְחוּ֙ אֶת־עַצְמֹ֣תֵיהֶ֔ם וַיִּקְבְּר֥וּ תַֽחַת־הָאֶ֖שֶׁל בְּיָבֵ֑שָׁה וַיָּצֻ֖מוּ שִׁבְעַ֥ת יָמִֽים׃ פ

1 ûfəlišətîm niləḥāmîm bəyiśərā’ēl wayyānusû ’anəšê yiśərā’ēl mipənê fəlišətîm wayyipəlû ḥălālîm bəhar hagiləbō‘a: 2 wayyaḏəbəqû fəlišətîm ’eṯ-šā’ûl wə’eṯ-bānāyw wayyakû fəlišətîm ’eṯ-yəhwōnāṯān wə’eṯ-’ăḇînāḏāḇ wə’eṯ-maləkî-šû‘a bənê šā’ûl: 3 watiḵəbaḏ hammiləḥāmâ ’el-šā’ûl wayyiməṣā’uhû hammwōrîm ’ănāšîm baqqāšeṯ wayyāḥel mə’ōḏ mēhammwōrîm: 4 wayyō’mer šā’ûl lənōśē’ ḵēlāyw šəlōf ḥarəbəḵā| wəḏāqərēnî ḇāh pen-yāḇwō’û hā‘ărēlîm hā’ēlleh ûḏəqārunî wəhiṯə‘alləlû-ḇî wəlō’ ’āḇâ nōśē’ ḵēlāyw kî yārē’ mə’ōḏ wayyiqqaḥ šā’ûl ’eṯ-haḥereḇ wayyipōl ‘āleyhā: 5 wayyarə’ nōśē’-ḵēlāyw kî mēṯ šā’ûl wayyipōl gam-hû’ ‘al-ḥarəbwō wayyāmāṯ ‘immwō: 6 wayyāmāṯ šā’ûl ûšəlōšeṯ bānāyw wənōśē’ ḵēlāyw gam kāl-’ănāšāyw bayywōm hahû’ yaḥədāw: 7 wayyirə’û ’anəšê-yiśərā’ēl ’ăšer-bə‘ēḇer hā‘ēmeq wa’ăšer| bə‘ēḇer hayyarədēn kî-nāsû ’anəšê yiśərā’ēl wəḵî-mēṯû šā’ûl ûḇānāyw wayya‘azəḇû ’eṯ-he‘ārîm wayyānusû wayyāḇō’û fəlišətîm wayyēšəḇû bâen: s 8 wayəhî mimmāḥŏrāṯ wayyāḇō’û fəlišətîm ləfaššēṭ ’eṯ-haḥălālîm wayyiməṣə’û ’eṯ-šā’ûl wə’eṯ-šəlōšeṯ bānāyw nōfəlîm bəhar hagiləbō‘a: 9 wayyiḵərəṯû ’eṯ-rō’šwō wayyafəšîṭû ’eṯ-kēlāyw wayəšalləḥû ḇə’ereṣ-pəlišətîm sāḇîḇ ləḇaśśēr bêṯ ‘ăṣabêhem wə’eṯ-hā‘ām: 10 wayyāśimû ’eṯ-kēlāyw bêṯ ‘ašətārwōṯ wə’eṯ-gəwîyāṯwō tāqə‘û bəḥwōmaṯ bêṯ šān: 11 wayyišəmə‘û ’ēlāyw yōšəḇê yāḇêš gilə‘āḏ ’ēṯ ’ăšer-‘āśû fəlišətîm ləšā’ûl: 12 wayyāqûmû kāl-’îš ḥayil wayyēləḵû ḵāl-hallayəlâ wayyiqəḥû ’eṯ-gəwîyaṯ šā’ûl wə’ēṯ gəwîyōṯ bānāyw mēḥwōmaṯ bêṯ šān wayyāḇō’û yāḇēšâ wayyiśərəfû ’ōṯām šām: 13 wayyiqəḥû ’eṯ-‘aṣəmōṯêhem wayyiqəbərû ṯaḥaṯ-hā’ešel bəyāḇēšâ wayyāṣumû šiḇə‘aṯ yāmîm: f