1 Chronicles (1 Divrey Yamim): 1 Chronicles (1 Divrey Yamim) Chapter 20

Tanach (Hebrew): 1 Chronicles (1 Divrey Yamim) Chapter 20

‎1 ‏וַיְהִ֡י לְעֵת֩ תְּשׁוּבַ֨ת הַשָּׁנָ֜ה לְעֵ֣ת׀ צֵ֣את הַמְּלָכִ֗ים וַיִּנְהַ֣ג יוֹאָב֩ אֶת־חֵ֨יל הַצָּבָ֜א וַיַּשְׁחֵ֣ת׀ אֶת־אֶ֣רֶץ בְּנֵֽי־עַמּ֗וֹן וַיָּבֹא֙ וַיָּ֣צַר אֶת־רַבָּ֔ה וְדָוִ֖יד יֹשֵׁ֣ב בִּירֽוּשָׁלִָ֑ם וַיַּ֥ךְ יוֹאָ֛ב אֶת־רַבָּ֖ה וַיֶּֽהֶרְסֶֽהָ׃ ‎2 ‏וַיִּקַּ֣ח דָּוִ֣יד אֶת־עֲטֶֽרֶת־מַלְכָּם֩ מֵעַ֨ל רֹאשׁ֜וֹ וַֽיִּמְצָאָ֣הּ׀ מִשְׁקַ֣ל כִּכַּר־זָהָ֗ב וּבָהּ֙ אֶ֣בֶן יְקָרָ֔ה וַתְּהִ֖י עַל־רֹ֣אשׁ דָּוִ֑יד וּשְׁלַ֥ל הָעִ֛יר הוֹצִ֖יא הַרְבֵּ֥ה מְאֹֽד׃ ‎3 ‏וְאֶת־הָעָ֨ם אֲשֶׁר־בָּ֜הּ הוֹצִ֗יא וַיָּ֨שַׂר בַּמְּגֵרָ֜ה וּבַחֲרִיצֵ֤י הַבַּרְזֶל֙ וּבַמְּגֵר֔וֹת וְכֵן֙ יַעֲשֶׂ֣ה דָוִ֔יד לְכֹ֖ל עָרֵ֣י בְנֵי־עַמּ֑וֹן וַיָּ֧שָׁב דָּוִ֛יד וְכָל־הָעָ֖ם יְרוּשָׁלִָֽם׃ פ ‎4 ‏וַיְהִי֙ אַחֲרֵיכֵ֔ן וַתַּעֲמֹ֧ד מִלְחָמָ֛ה בְּגֶ֖זֶר עִם־פְּלִשְׁתִּ֑ים אָ֣ז הִכָּ֞ה סִבְּכַ֣י הַחֻֽשָׁתִ֗י אֶת־סִפַּ֛י מִילִדֵ֥י הָרְפָאִ֖ים וַיִּכָּנֵֽעוּ׃ ‎5 ‏וַתְּהִי־ע֥וֹד מִלְחָמָ֖ה אֶת־פְּלִשְׁתִּ֑ים וַיַּ֞ךְ אֶלְחָנָ֣ן בֶּן־יעור יָעִ֗יר אֶת־לַחְמִי֙ אֲחִי֙ גָּלְיָ֣ת הַגִּתִּ֔י וְעֵ֣ץ חֲנִית֔וֹ כִּמְנ֖וֹר אֹרְגִֽים׃ ‎6 ‏וַתְּהִי־ע֥וֹד מִלְחָמָ֖ה בְּגַ֑ת וַיְהִ֣י׀ אִ֣ישׁ מִדָּ֗ה וְאֶצְבְּעֹתָ֤יו שֵׁשׁ־וָשֵׁשׁ֙ עֶשְׂרִ֣ים וְאַרְבַּ֔ע וְגַם־ה֖וּא נוֹלַ֥ד לְהָרָפָֽא׃ ‎7 ‏וַיְחָרֵ֖ף אֶת־יִשְׂרָאֵ֑ל וַיַּכֵּ֙הוּ֙ יְה֣וֹנָתָ֔ן בֶּן־שִׁמְעָ֖א אֲחִ֥י דָוִֽיד׃ ‎8 ‏אֵ֛ל נוּלְּד֥וּ לְהָרָפָ֖א בְּגַ֑ת וַיִּפְּל֥וּ בְיַד־דָּוִ֖יד וּבְיַד־עֲבָדָֽיו׃ פ

1 wayəhî lə‘ēṯ təšûḇaṯ haššānâ lə‘ēṯ| ṣē’ṯ hamməlāḵîm wayyinəhaḡ ywō’āḇ ’eṯ-ḥêl haṣṣāḇā’ wayyašəḥēṯ| ’eṯ-’ereṣ bənê-‘ammwōn wayyāḇō’ wayyāṣar ’eṯ-rabâ wəḏāwîḏ yōšēḇ bîrûšālāim wayyaḵə ywō’āḇ ’eṯ-rabâ wayyeherəsehā: 2 wayyiqqaḥ dāwîḏ ’eṯ-‘ăṭereṯ-maləkām mē‘al rō’šwō wayyiməṣā’āh| mišəqal kikar-zâāḇ ûḇāh ’eḇen yəqārâ watəhî ‘al-rō’š dāwîḏ ûšəlal hā‘îr hwōṣî’ harəbēh mə’ōḏ: 3 wə’eṯ-hā‘ām ’ăšer-bāh hwōṣî’ wayyāśar bamməḡērâ ûḇaḥărîṣê habarəzel ûḇamməḡērwōṯ wəḵēn ya‘ăśeh ḏāwîḏ ləḵōl ‘ārê ḇənê-‘ammwōn wayyāšāḇ dāwîḏ wəḵāl-hā‘ām yərûšālāim: f 4 wayəhî ’aḥărêḵēn wata‘ămōḏ miləḥāmâ bəḡezer ‘im-pəlišətîm ’āz hikâ sibəḵay haḥušāṯî ’eṯ-sipay mîliḏê hārəfā’îm wayyikānē‘û: 5 watəhî-‘wōḏ miləḥāmâ ’eṯ-pəlišətîm wayyaḵə ’eləḥānān ben-yā‘ûr yā‘îr ’eṯ-laḥəmî ’ăḥî gāləyāṯ hagitî wə‘ēṣ ḥănîṯwō kimənwōr ’ōrəḡîm: 6 watəhî-‘wōḏ miləḥāmâ bəḡaṯ wayəhî| ’îš midâ wə’eṣəbə‘ōṯāyw šēš-wāšēš ‘eśərîm wə’arəba‘ wəḡam-hû’ nwōlaḏ ləhārāfā’: 7 wayəḥārēf ’eṯ-yiśərā’ēl wayyakēhû yəhwōnāṯān ben-šimə‘ā’ ’ăḥî ḏāwîḏ: 8 ’ēl nûlləḏû ləhārāfā’ bəḡaṯ wayyipəlû ḇəyaḏ-dāwîḏ ûḇəyaḏ-‘ăḇāḏāyw: f