Waldere B

Verse Indeterminate Saxon

"...ce bæteran
buton ðam anum ðe ic eac hafa
on stanfate stille gehided.
Ic wat þæt hit ðohte ðeodric Widian

5

selfum onsendon, and eac sinc micel
maðma mid ði mece, monig oðres mid him
golde gegirwan (iulean genam),
þæs ðe hine of nearwum Niðhades mæg,
Welandes bearn, Widia ut forlet;

10

ðurh fifela gewe... ...ld forð onette."
Waldere mað... ...lode, wiga ellenrof,
hæfde him on handa hildefrofre,
guðbilla gripe, gyddode wordum:
"Hwæt! ðu huru wendest, wine Burgenda,

15

þæt me Hagenan hand hilde gefremede
and getwæmde ...ðewigges. Feta, gyf ðu dyrre,
æt ðus heaðuwerigan hare byrnan.
Standeð me her on eaxelum ælfheres laf,
god and geapneb, golde geweorðod,

20

ealles unscende æðelinges reaf
to habbanne, þonne hand wereð
feorhhord feondum. Ne bið fah wið me,
þonne ...... unmægas eft ongynnað,
mecum gemetað, swa ge me dydon.

25

ðeah mæg sige syllan se ðe symle byð
recon and rædfest ryh... ...a gehwilces.
Se ðe him to ðam halgan helpe gelifeð,
to gode gioce, he þær gearo findeð
gif ða earnunga ær geðenceð.

30

þonne moten wlance welan britnian,
æhtum wealdan, þæt is"