Sacred Texts  Bible  Index 
Polyglot  KJV  Sep  Vul 

Zechariah (Zekharyah) Index
  Previous  Next 

Tanach (Hebrew): Zechariah (Zekharyah) Chapter 12

1 ‏מַשָּׂ֥א דְבַר־יְהוָ֖ה עַל־יִשְׂרָאֵ֑ל נְאֻם־יְהוָ֗ה נֹטֶ֤ה שָׁמַ֙יִם֙ וְיֹסֵ֣ד אָ֔רֶץ וְיֹצֵ֥ר רֽוּחַ־אָדָ֖ם בְּקִרְבּֽוֹ׃ פ

2 ‏הִנֵּ֣ה אָ֠נֹכִי שָׂ֣ם אֶת־יְרוּשָׁלִַ֧ם סַף־רַ֛עַל לְכָל־הָעַמִּ֖ים סָבִ֑יב וְגַ֧ם עַל־יְהוּדָ֛ה יִֽהְיֶ֥ה בַמָּצ֖וֹר עַל־יְרוּשָׁלִָֽם׃

3 ‏וְהָיָ֣ה בַיּוֹם־הַ֠הוּא אָשִׂ֨ים אֶת־יְרוּשָׁלִַ֜ם אֶ֤בֶן מַֽעֲמָסָה֙ לְכָל־הָ֣עַמִּ֔ים כָּל־עֹמְסֶ֖יהָ שָׂר֣וֹט יִשָּׂרֵ֑טוּ וְנֶאֶסְפ֣וּ עָלֶ֔יהָ כֹּ֖ל גּוֹיֵ֥י הָאָֽרֶץ׃

4 ‏בַּיּ֨וֹם הַה֜וּא נְאֻם־יְהוָ֗ה אַכֶּ֤ה כָל־סוּס֙ בַּתִּמָּה֔וֹן וְרֹכְב֖וֹ בַּשִּׁגָּע֑וֹן וְעַל־בֵּ֤ית יְהוּדָה֙ אֶפְקַ֣ח אֶת־עֵינַ֔י וְכֹל֙ ס֣וּס הָֽעַמִּ֔ים אַכֶּ֖ה בַּֽעִוָּרֽוֹן׃

5 ‏וְאָֽמְר֛וּ אַלֻּפֵ֥י יְהוּדָ֖ה בְּלִבָּ֑ם אַמְצָ֥ה לִי֙ יֹשְׁבֵ֣י יְרוּשָׁלִַ֔ם בַּיהוָ֥ה צְבָא֖וֹת אֱלֹהֵיהֶֽם׃

6 ‏בַּיּ֣וֹם הַה֡וּא אָשִׂים֩ אֶת־אַלֻּפֵ֨י יְהוּדָ֜ה כְּֽכִיּ֧וֹר אֵ֣שׁ בְּעֵצִ֗ים וּכְלַפִּ֥יד אֵשׁ֙ בְּעָמִ֔יר וְאָ֨כְל֜וּ עַל־יָמִ֧ין וְעַל־שְׂמֹ֛אול אֶת־כָּל־הָעַמִּ֖ים סָבִ֑יב וְיָשְׁבָ֨ה יְרוּשָׁלִַ֥ם ע֛וֹד תַּחְתֶּ֖יהָ בִּירוּשָׁלִָֽם׃ פ

7 ‏וְהוֹשִׁ֧יעַ יְהוָ֛ה אֶת־אָהֳלֵ֥י יְהוּדָ֖ה בָּרִֽאשֹׁנָ֑ה לְמַ֨עַן לֹֽא־תִגְדַּ֜ל תִּפְאֶ֣רֶת בֵּית־דָּוִ֗יד וְתִפְאֶ֛רֶת יֹשֵׁ֥ב יְרוּשָׁלִַ֖ם עַל־יְהוּדָֽה׃

8 ‏בַּיּ֣וֹם הַה֗וּא יָגֵ֤ן יְהוָה֙ בְּעַד֙ יוֹשֵׁ֣ב יְרוּשָׁלִַ֔ם וְהָיָ֞ה הַנִּכְשָׁ֥ל בָּהֶ֛ם בַּיּ֥וֹם הַה֖וּא כְּדָוִ֑יד וּבֵ֤ית דָּוִיד֙ כֵּֽאלֹהִ֔ים כְּמַלְאַ֥ךְ יְהוָ֖ה לִפְנֵיהֶֽם׃

9 ‏וְהָיָ֖ה בַּיּ֣וֹם הַה֑וּא אֲבַקֵּ֗שׁ לְהַשְׁמִיד֙ אֶת־כָּל־הַגּוֹיִ֔ם הַבָּאִ֖ים עַל־יְרוּשָׁלִָֽם׃

10 ‏וְשָׁפַכְתִּי֩ עַל־בֵּ֨ית דָּוִ֜יד וְעַ֣ל׀ יוֹשֵׁ֣ב יְרוּשָׁלִַ֗ם ר֤וּחַ חֵן֙ וְתַ֣חֲנוּנִ֔ים וְהִבִּ֥יטוּ אֵלַ֖י אֵ֣ת אֲשֶׁר־דָּקָ֑רוּ וְסָפְד֣וּ עָלָ֗יו כְּמִסְפֵּד֙ עַל־הַיָּחִ֔יד וְהָמֵ֥ר עָלָ֖יו כְּהָמֵ֥ר עַֽל־הַבְּכֽוֹר׃

11 ‏בַּיּ֣וֹם הַה֗וּא יִגְדַּ֤ל הַמִּסְפֵּד֙ בִּיר֣וּשָׁלִַ֔ם כְּמִסְפַּ֥ד הֲדַדְ־רִמּ֖וֹן בְּבִקְעַ֥ת מְגִדּֽוֹן׃

12 ‏וְסָפְדָ֣ה הָאָ֔רֶץ מִשְׁפָּח֥וֹת מִשְׁפָּח֖וֹת לְבָ֑ד מִשְׁפַּ֨חַת בֵּית־דָּוִ֤יד לְבָד֙ וּנְשֵׁיהֶ֣ם לְבָ֔ד מִשְׁפַּ֤חַת בֵּית־נָתָן֙ לְבָ֔ד וּנְשֵׁיהֶ֖ם לְבָֽד׃

13 ‏מִשְׁפַּ֤חַת בֵּית־לֵוִי֙ לְבָ֔ד וּנְשֵׁיהֶ֖ם לְבָ֑ד מִשְׁפַּ֤חַת הַשִּׁמְעִי֙ לְבָ֔ד וּנְשֵׁיהֶ֖ם לְבָֽד׃

14 ‏כֹּ֗ל הַמִּשְׁפָּחוֹת֙ הַנִּשְׁאָר֔וֹת מִשְׁפָּחֹ֥ת מִשְׁפָּחֹ֖ת לְבָ֑ד וּנְשֵׁיהֶ֖ם לְבָֽד׃ ס

1 maśśā’ ḏəḇar-yəhwâ ‘al-yiśərā’ēl nə’um-yəhwâ nōṭeh šāmayim wəyōsēḏ ’āreṣ wəyōṣēr rûḥa-’āḏām bəqirəbwō: f

2 hinnēh ’ānōḵî śām ’eṯ-yərûšālaim saf-ra‘al ləḵāl-hā‘ammîm sāḇîḇ wəḡam ‘al-yəhûḏâ yihəyeh ḇammāṣwōr ‘al-yərûšālāim:

3 wəhāyâ ḇayywōm-hahû’ ’āśîm ’eṯ-yərûšālaim ’eḇen ma‘ămāsâ ləḵāl-hā‘ammîm kāl-‘ōməseyhā śārwōṭ yiśśārēṭû wəne’esəfû ‘āleyhā kōl gwōyê hā’āreṣ:

4 bayywōm hahû’ nə’um-yəhwâ ’akeh ḵāl-sûs batimmâwōn wərōḵəḇwō baššigā‘wōn wə‘al-bêṯ yəhûḏâ ’efəqaḥ ’eṯ-‘ênay wəḵōl sûs hā‘ammîm ’akeh ba‘iûārwōn:

5 wə’āmərû ’allufê yəhûḏâ bəlibām ’aməṣâ lî yōšəḇê yərûšālaim bayhwâ ṣəḇā’wōṯ ’ĕlōhêhem:

6 bayywōm hahû’ ’āśîm ’eṯ-’allufê yəhûḏâ kəḵîywōr ’ēš bə‘ēṣîm ûḵəlapîḏ ’ēš bə‘āmîr wə’āḵəlû ‘al-yāmîn wə‘al-śəmō’wl ’eṯ-kāl-hā‘ammîm sāḇîḇ wəyāšəḇâ yərûšālaim ‘wōḏ taḥəteyhā bîrûšālāim: f

7 wəhwōšî‘a yəhwâ ’eṯ-’âŏlê yəhûḏâ bāri’šōnâ ləma‘an lō’-ṯiḡədal tifə’ereṯ bêṯ-dāwîḏ wəṯifə’ereṯ yōšēḇ yərûšālaim ‘al-yəhûḏâ:

8 bayywōm hahû’ yāḡēn yəhwâ bə‘aḏ ywōšēḇ yərûšālaim wəhāyâ hanniḵəšāl bâem bayywōm hahû’ kəḏāwîḏ ûḇêṯ dāwîḏ kē’lōhîm kəmalə’aḵə yəhwâ lifənêhem:

9 wəhāyâ bayywōm hahû’ ’ăḇaqqēš ləhašəmîḏ ’eṯ-kāl-hagwōyim habā’îm ‘al-yərûšālāim:

10 wəšāfaḵətî ‘al-bêṯ dāwîḏ wə‘al| ywōšēḇ yərûšālaim rûḥa ḥēn wəṯaḥănûnîm wəhibîṭû ’ēlay ’ēṯ ’ăšer-dāqārû wəsāfəḏû ‘ālāyw kəmisəpēḏ ‘al-hayyāḥîḏ wəhāmēr ‘ālāyw kəhāmēr ‘al-habəḵwōr:

11 bayywōm hahû’ yiḡədal hammisəpēḏ bîrûšālaim kəmisəpaḏ hăḏaḏə-rimmwōn bəḇiqə‘aṯ məḡidwōn:

12 wəsāfəḏâ hā’āreṣ mišəpāḥwōṯ mišəpāḥwōṯ ləḇāḏ mišəpaḥaṯ bêṯ-dāwîḏ ləḇāḏ ûnəšêhem ləḇāḏ mišəpaḥaṯ bêṯ-nāṯān ləḇāḏ ûnəšêhem ləḇāḏ:

13 mišəpaḥaṯ bêṯ-lēwî ləḇāḏ ûnəšêhem ləḇāḏ mišəpaḥaṯ haššimə‘î ləḇāḏ ûnəšêhem ləḇāḏ:

14 kōl hammišəpāḥwōṯ hannišə’ārwōṯ mišəpāḥōṯ mišəpāḥōṯ ləḇāḏ ûnəšêhem ləḇāḏ: s


Next: Zechariah (Zekharyah) Chapter 13