‎1 ‏וּשְׁלֹמֹ֗ה הָיָ֤ה מוֹשֵׁל֙ בְּכָל־הַמַּמְלָכ֔וֹת מִן־הַנָּהָר֙ אֶ֣רֶץ פְּלִשְׁתִּ֔ים וְעַ֖ד גְּב֣וּל מִצְרָ֑יִם מַגִּשִׁ֥ים מִנְחָ֛ה וְעֹבְדִ֥ים אֶת־שְׁלֹמֹ֖ה כָּל־יְמֵ֥י חַיָּֽיו׃ פ

‎2 ‏וַיְהִ֥י לֶֽחֶם־שְׁלֹמֹ֖ה לְי֣וֹם אֶחָ֑ד שְׁלֹשִׁ֥ים כֹּר֙ סֹ֔לֶת וְשִׁשִּׁ֥ים כֹּ֖ר קָֽמַח׃

‎3 ‏עֲשָׂרָ֨ה בָקָ֜ר בְּרִאִ֗ים וְעֶשְׂרִ֥ים בָּקָ֛ר רְעִ֖י וּמֵ֣אָה צֹ֑אן לְ֠בַד מֵֽאַיָּ֤ל וּצְבִי֙ וְיַחְמ֔וּר וּבַרְבֻּרִ֖ים אֲבוּסִֽים׃

‎4 ‏כִּי־ה֞וּא רֹדֶ֣ה׀ בְּכָל־עֵ֣בֶר הַנָּהָ֗ר מִתִּפְסַח֙ וְעַד־עַזָּ֔ה בְּכָל־מַלְכֵ֖י עֵ֣בֶר הַנָּהָ֑ר וְשָׁל֗וֹם הָ֥יָה ל֛וֹ מִכָּל־עֲבָרָ֖יו מִסָּבִֽיב׃

‎5 ‏וַיֵּשֶׁב֩ יְהוּדָ֨ה וְיִשְׂרָאֵ֜ל לָבֶ֗טַח אִ֣ישׁ תַּ֤חַת גַּפְנוֹ֙ וְתַ֣חַת תְּאֵֽנָת֔וֹ מִדָּ֖ן וְעַד־בְּאֵ֣ר שָׁ֑בַע כֹּ֖ל יְמֵ֥י שְׁלֹמֹֽה׃ ס

‎6 ‏וַיְהִ֣י לִשְׁלֹמֹ֗ה אַרְבָּעִ֥ים אֶ֛לֶף אֻרְוֹ֥ת סוּסִ֖ים לְמֶרְכָּב֑וֹ וּשְׁנֵים־עָשָׂ֥ר אֶ֖לֶף פָּרָשִֽׁים׃

‎7 ‏וְכִלְכְּלוּ֩ הַנִּצָּבִ֨ים הָאֵ֜לֶּה אֶת־הַמֶּ֣לֶךְ שְׁלֹמֹ֗ה וְאֵ֧ת כָּל־הַקָּרֵ֛ב אֶל־שֻׁלְחַ֥ן הַמֶּֽלֶךְ־שְׁלֹמֹ֖ה אִ֣ישׁ חָדְשׁ֑וֹ לֹ֥א יְעַדְּר֖וּ דָּבָֽר׃

‎8 ‏וְהַשְּׂעֹרִ֣ים וְהַתֶּ֔בֶן לַסּוּסִ֖ים וְלָרָ֑כֶשׁ יָבִ֗אוּ אֶל־הַמָּקוֹם֙ אֲשֶׁ֣ר יִֽהְיֶה־שָּׁ֔ם אִ֖ישׁ כְּמִשְׁפָּטֽוֹ׃ ס

‎9 ‏וַיִּתֵּן֩ אֱלֹהִ֨ים חָכְמָ֧ה לִשְׁלֹמֹ֛ה וּתְבוּנָ֖ה הַרְבֵּ֣ה מְאֹ֑ד וְרֹ֣חַב לֵ֔ב כַּח֕וֹל אֲשֶׁ֖ר עַל־שְׂפַ֥ת הַיָּֽם׃

‎10 ‏וַתֵּ֙רֶב֙ חָכְמַ֣ת שְׁלֹמֹ֔ה מֵֽחָכְמַ֖ת כָּל־בְּנֵי־קֶ֑דֶם וּמִכֹּ֖ל חָכְמַ֥ת מִצְרָֽיִם׃

‎11 ‏וַיֶּחְכַּם֮ מִכָּל־הָֽאָדָם֒ מֵאֵיתָ֣ן הָאֶזְרָחִ֗י וְהֵימָ֧ן וְכַלְכֹּ֛ל וְדַרְדַּ֖ע בְּנֵ֣י מָח֑וֹל וַיְהִֽי־שְׁמ֥וֹ בְכָֽל־הַגּוֹיִ֖ם סָבִֽיב׃

‎12 ‏וַיְדַבֵּ֕ר שְׁלֹ֥שֶׁת אֲלָפִ֖ים מָשָׁ֑ל וַיְהִ֥י שִׁיר֖וֹ חֲמִשָּׁ֥ה וָאָֽלֶף׃

‎13 ‏וַיְדַבֵּר֮ עַל־הָֽעֵצִים֒ מִן־הָאֶ֙רֶז֙ אֲשֶׁ֣ר בַּלְּבָנ֔וֹן וְעַד֙ הָאֵז֔וֹב אֲשֶׁ֥ר יֹצֵ֖א בַּקִּ֑יר וַיְדַבֵּר֙ עַל־הַבְּהֵמָ֣ה וְעַל־הָע֔וֹף וְעַל־הָרֶ֖מֶשׂ וְעַל־הַדָּגִֽים׃

‎14 ‏וַיָּבֹ֙אוּ֙ מִכָּל־הָ֣עַמִּ֔ים לִשְׁמֹ֕עַ אֵ֖ת חָכְמַ֣ת שְׁלֹמֹ֑ה מֵאֵת֙ כָּל־מַלְכֵ֣י הָאָ֔רֶץ אֲשֶׁ֥ר שָׁמְע֖וּ אֶת־חָכְמָתֽוֹ׃ ס

‎15 ‏וַ֠יִּשְׁלַח חִירָ֨ם מֶֽלֶךְ־צ֤וֹר אֶת־עֲבָדָיו֙ אֶל־שְׁלֹמֹ֔ה כִּ֣י שָׁמַ֔ע כִּ֥י אֹת֛וֹ מָשְׁח֥וּ לְמֶ֖לֶךְ תַּ֣חַת אָבִ֑יהוּ כִּ֣י אֹהֵ֗ב הָיָ֥ה חִירָ֛ם לְדָוִ֖ד כָּל־הַיָּמִֽים׃ ס

‎16 ‏וַיִּשְׁלַ֣ח שְׁלֹמֹ֔ה אֶל־חִירָ֖ם לֵאמֹֽר׃

‎17 ‏אַתָּ֨ה יָדַ֜עְתָּ אֶת־דָּוִ֣ד אָבִ֗י כִּ֣י לֹ֤א יָכֹל֙ לִבְנ֣וֹת בַּ֗יִת לְשֵׁם֙ יְהוָ֣ה אֱלֹהָ֔יו מִפְּנֵ֥י הַמִּלְחָמָ֖ה אֲשֶׁ֣ר סְבָבֻ֑הוּ עַ֤ד תֵּת־יְהוָה֙ אֹתָ֔ם תַּ֖חַת כַּפּ֥וֹת רגלו רַגְלָֽי׃

‎18 ‏וְעַתָּ֕ה הֵנִ֨יחַ יְהוָ֧ה אֱלֹהַ֛י לִ֖י מִסָּבִ֑יב אֵ֣ין שָׂטָ֔ן וְאֵ֖ין פֶּ֥גַע רָֽע׃

‎19 ‏וְהִנְנִ֣י אֹמֵ֔ר לִבְנ֣וֹת בַּ֔יִת לְשֵׁ֖ם יְהוָ֣ה אֱלֹהָ֑י כַּאֲשֶׁ֣ר׀ דִּבֶּ֣ר יְהוָ֗ה אֶל־דָּוִ֤ד אָבִי֙ לֵאמֹ֔ר בִּנְךָ֗ אֲשֶׁ֨ר אֶתֵּ֤ן תַּחְתֶּ֙יךָ֙ עַל־כִּסְאֶ֔ךָ הֽוּא־יִבְנֶ֥ה הַבַּ֖יִת לִשְׁמִֽי׃

‎20 ‏וְעַתָּ֡ה צַוֵּה֩ וְיִכְרְתוּ־לִ֨י אֲרָזִ֜ים מִן־הַלְּבָנ֗וֹן וַֽעֲבָדַי֙ יִהְי֣וּ עִם־עֲבָדֶ֔יךָ וּשְׂכַ֤ר עֲבָדֶ֙יךָ֙ אֶתֵּ֣ן לְךָ֔ כְּכֹ֖ל אֲשֶׁ֣ר תֹּאמֵ֑ר כִּ֣י׀ אַתָּ֣ה יָדַ֗עְתָּ כִּ֣י אֵ֥ין בָּ֛נוּ אִ֛ישׁ יֹדֵ֥עַ לִכְרָת־עֵצִ֖ים כַּצִּדֹנִֽים׃

‎21 ‏וַיְהִ֞י כִּשְׁמֹ֧עַ חִירָ֛ם אֶת־דִּבְרֵ֥י שְׁלֹמֹ֖ה וַיִּשְׂמַ֣ח מְאֹ֑ד וַיֹּ֗אמֶר בָּר֤וּךְ יְהוָה֙ הַיּ֔וֹם אֲשֶׁ֨ר נָתַ֤ן לְדָוִד֙ בֵּ֣ן חָכָ֔ם עַל־הָעָ֥ם הָרָ֖ב הַזֶּֽה׃

‎22 ‏וַיִּשְׁלַ֤ח חִירָם֙ אֶל־שְׁלֹמֹ֣ה לֵאמֹ֔ר שָׁמַ֕עְתִּי אֵ֥ת אֲשֶׁר־שָׁלַ֖חְתָּ אֵלָ֑י אֲנִ֤י אֶֽעֱשֶׂה֙ אֶת־כָּל־חֶפְצְךָ֔ בַּעֲצֵ֥י אֲרָזִ֖ים וּבַעֲצֵ֥י בְרוֹשִֽׁים׃

‎23 ‏עֲ֠בָדַי יֹרִ֨דוּ מִן־הַלְּבָנ֜וֹן יָ֗מָּה וַ֠אֲנִי אֲשִׂימֵ֨ם דֹּבְר֤וֹת בַּיָּם֙ עַֽד־הַמָּק֞וֹם אֲשֶׁר־תִּשְׁלַ֥ח אֵלַ֛י וְנִפַּצְתִּ֥ים שָׁ֖ם וְאַתָּ֣ה תִשָּׂ֑א וְאַתָּה֙ תַּעֲשֶׂ֣ה אֶת־חֶפְצִ֔י לָתֵ֖ת לֶ֥חֶם בֵּיתִֽי׃

‎24 ‏וַיְהִ֨י חִיר֜וֹם נֹתֵ֣ן לִשְׁלֹמֹ֗ה עֲצֵ֧י אֲרָזִ֛ים וַעֲצֵ֥י בְרוֹשִׁ֖ים כָּל־חֶפְצֽוֹ׃

‎25 ‏וּשְׁלֹמֹה֩ נָתַ֨ן לְחִירָ֜ם עֶשְׂרִים֩ אֶ֨לֶף כֹּ֤ר חִטִּים֙ מַכֹּ֣לֶת לְבֵית֔וֹ וְעֶשְׂרִ֥ים כֹּ֖ר שֶׁ֣מֶן כָּתִ֑ית כֹּֽה־יִתֵּ֧ן שְׁלֹמֹ֛ה לְחִירָ֖ם שָׁנָ֥ה בְשָׁנָֽה׃ פ

‎26 ‏וַיהוָ֗ה נָתַ֤ן חָכְמָה֙ לִשְׁלֹמֹ֔ה כַּאֲשֶׁ֖ר דִּבֶּר־ל֑וֹ וַיְהִ֣י שָׁלֹ֗ם בֵּ֤ין חִירָם֙ וּבֵ֣ין שְׁלֹמֹ֔ה וַיִּכְרְת֥וּ בְרִ֖ית שְׁנֵיהֶֽם׃

‎27 ‏וַיַּ֨עַל הַמֶּ֧לֶךְ שְׁלֹמֹ֛ה מַ֖ס מִכָּל־יִשְׂרָאֵ֑ל וַיְהִ֣י הַמַּ֔ס שְׁלֹשִׁ֥ים אֶ֖לֶף אִֽישׁ׃

‎28 ‏וַיִּשְׁלָחֵ֣ם לְבָנ֗וֹנָה עֲשֶׂ֨רֶת אֲלָפִ֤ים בַּחֹ֙דֶשׁ֙ חֲלִיפ֔וֹת חֹ֚דֶשׁ יִהְי֣וּ בַלְּבָנ֔וֹן שְׁנַ֥יִם חֳדָשִׁ֖ים בְּבֵית֑וֹ וַאֲדֹנִירָ֖ם עַל־הַמַּֽס׃ ס

‎29 ‏וַיְהִ֧י לִשְׁלֹמֹ֛ה שִׁבְעִ֥ים אֶ֖לֶף נֹשֵׂ֣א סַבָּ֑ל וּשְׁמֹנִ֥ים אֶ֖לֶף חֹצֵ֥ב בָּהָֽר׃

‎30 ‏לְ֠בַד מִשָּׂרֵ֨י הַנִּצָּבִ֤ים לִשְׁלֹמֹה֙ אֲשֶׁ֣ר עַל־הַמְּלָאכָ֔ה שְׁלֹ֥שֶׁת אֲלָפִ֖ים וּשְׁלֹ֣שׁ מֵא֑וֹת הָרֹדִ֣ים בָּעָ֔ם הָעֹשִׂ֖ים בַּמְּלָאכָֽה׃

‎31 ‏וַיְצַ֣ו הַמֶּ֡לֶךְ וַיַּסִּעוּ֩ אֲבָנִ֨ים גְּדֹל֜וֹת אֲבָנִ֧ים יְקָר֛וֹת לְיַסֵּ֥ד הַבָּ֖יִת אַבְנֵ֥י גָזִֽית׃

‎32 ‏וַֽיִּפְסְל֞וּ בֹּנֵ֧י שְׁלֹמֹ֛ה וּבֹנֵ֥י חִיר֖וֹם וְהַגִּבְלִ֑ים וַיָּכִ֛ינוּ הָעֵצִ֥ים וְהָאֲבָנִ֖ים לִבְנ֥וֹת הַבָּֽיִת׃ פ

1 ûšəlōmōh hāyâ mwōšēl bəḵāl-hammaməlāḵwōṯ min-hannâār ’ereṣ pəlišətîm wə‘aḏ gəḇûl miṣərāyim magišîm minəḥâ wə‘ōḇəḏîm ’eṯ-šəlōmōh kāl-yəmê ḥayyāyw: f

2 wayəhî leḥem-šəlōmōh ləywōm ’eḥāḏ šəlōšîm kōr sōleṯ wəšiššîm kōr qām^aḥ:

3 ‘ăśārâ ḇāqār bəri’îm wə‘eśərîm bāqār rə‘î ûmē’â ṣō’n ləḇaḏ mē’ayyāl ûṣəḇî wəy^aḥəmûr ûḇarəburîm ’ăḇûsîm:

4 kî-hû’ rōḏeh| bəḵāl-‘ēḇer hannâār mitifəs^aḥ wə‘aḏ-‘azzâ bəḵāl-maləḵê ‘ēḇer hannâār wəšālwōm hāyâ lwō mikāl-‘ăḇārāyw missāḇîḇ:

5 wayyēšeḇ yəhûḏâ wəyiśərā’ēl lāḇeṭ^aḥ ’îš t^aḥaṯ gafənwō wəṯ^aḥaṯ tə’ēnāṯwō midān wə‘aḏ-bə’ēr šāḇ^a‘ kōl yəmê šəlōmōh: s

6 wayəhî lišəlōmōh ’arəbā‘îm ’elef ’urəwōṯ sûsîm ləmerəkāḇwō ûšənêm-‘āśār ’elef pārāšîm:

7 wəḵiləkəlû hanniṣṣāḇîm hā’ēlleh ’eṯ-hammeleḵə šəlōmōh wə’ēṯ kāl-haqqārēḇ ’el-šuləḥan hammeleḵə-šəlōmōh ’îš ḥāḏəšwō lō’ yə‘adərû dāḇār:

8 wəhaśśə‘ōrîm wəhateḇen lassûsîm wəlārāḵeš yāḇi’û ’el-hammāqwōm ’ăšer yihəyeh-ššām ’îš kəmišəpāṭwō: s

9 wayyitēn ’ĕlōhîm ḥāḵəmâ lišəlōmōh ûṯəḇûnâ harəbēh mə’ōḏ wərōḥaḇ lēḇ k^aḥwōl ’ăšer ‘al-śəfaṯ hayyām:

10 watēreḇ ḥāḵəmaṯ šəlōmōh mēḥāḵəmaṯ kāl-bənê-qeḏem ûmikōl ḥāḵəmaṯ miṣərāyim:

11 wayyeḥəkam mikāl-hā’āḏām mē’êṯān hā’ezərāḥî wəhêmān wəḵaləkōl wəḏarəd^a‘ bənê māḥwōl wayəhî-šəmwō ḇəḵāl-hagwōyim sāḇîḇ:

12 wayəḏabēr šəlōšeṯ ’ălāfîm māšāl wayəhî šîrwō ḥămiššâ wā’ālef:

13 wayəḏabēr ‘al-hā‘ēṣîm min-hā’erez ’ăšer balləḇānwōn wə‘aḏ hā’ēzwōḇ ’ăšer yōṣē’ baqqîr wayəḏabēr ‘al-habəhēmâ wə‘al-hā‘wōf wə‘al-hāremeś wə‘al-hadāḡîm:

14 wayyāḇō’û mikāl-hā‘ammîm lišəmō‘a ’ēṯ ḥāḵəmaṯ šəlōmōh mē’ēṯ kāl-maləḵê hā’āreṣ ’ăšer šāmə‘û ’eṯ-ḥāḵəmāṯwō: s

15 wayyišəl^aḥ ḥîrām meleḵə-ṣwōr ’eṯ-‘ăḇāḏāyw ’el-šəlōmōh kî šām^a‘ kî ’ōṯwō māšəḥû ləmeleḵə t^aḥaṯ ’āḇîhû kî ’ōhēḇ hāyâ ḥîrām ləḏāwiḏ kāl-hayyāmîm: s

16 wayyišəl^aḥ šəlōmōh ’el-ḥîrām lē’mōr:

17 ’atâ yāḏ^a‘ətā ’eṯ-dāwiḏ ’āḇî kî lō’ yāḵōl liḇənwōṯ bayiṯ ləšēm yəhwâ ’ĕlōhāyw mipənê hammiləḥāmâ ’ăšer səḇāḇuhû ‘aḏ tēṯ-yəhwâ ’ōṯām t^aḥaṯ kapwōṯ raḡəlāw raḡəlāy:

18 wə‘atâ hēnîḥa yəhwâ ’ĕlōhay lî missāḇîḇ ’ên śāṭān wə’ên peḡ^a‘ rā‘:

19 wəhinənî ’ōmēr liḇənwōṯ bayiṯ ləšēm yəhwâ ’ĕlōhāy ka’ăšer| diber yəhwâ ’el-dāwiḏ ’āḇî lē’mōr binəḵā ’ăšer ’etēn t^aḥəteyḵā ‘al-kisə’eḵā hû’-yiḇəneh habayiṯ lišəmî:

20 wə‘atâ ṣaûēh wəyiḵərəṯû-lî ’ărāzîm min-halləḇānwōn w^a‘ăḇāḏay yihəyû ‘im-‘ăḇāḏeyḵā ûśəḵar ‘ăḇāḏeyḵā ’etēn ləḵā kəḵōl ’ăšer tō’mēr kî| ’atâ yāḏ^a‘ətā kî ’ên bānû ’îš yōḏē‘a liḵərāṯ-‘ēṣîm kaṣṣiḏōnîm:

21 wayəhî kišəmō‘a ḥîrām ’eṯ-diḇərê šəlōmōh wayyiśəm^aḥ mə’ōḏ wayyō’mer bārûḵə yəhwâ hayywōm ’ăšer nāṯan ləḏāwiḏ bēn ḥāḵām ‘al-hā‘ām hārāḇ hazzeh:

22 wayyišəl^aḥ ḥîrām ’el-šəlōmōh lē’mōr šām^a‘ətî ’ēṯ ’ăšer-šāl^aḥətā ’ēlāy ’ănî ’e‘ĕśeh ’eṯ-kāl-ḥefəṣəḵā b^a‘ăṣê ’ărāzîm ûḇ^a‘ăṣê ḇərwōšîm:

23 ‘ăḇāḏay yōriḏû min-halləḇānwōn yāmmâ wa’ănî ’ăśîmēm dōḇərwōṯ bayyām ‘aḏ-hammāqwōm ’ăšer-tišəl^aḥ ’ēlay wənipaṣətîm šām wə’atâ ṯiśśā’ wə’atâ t^a‘ăśeh ’eṯ-ḥefəṣî lāṯēṯ leḥem bêṯî:

24 wayəhî ḥîrwōm nōṯēn lišəlōmōh ‘ăṣê ’ărāzîm w^a‘ăṣê ḇərwōšîm kāl-ḥefəṣwō:

25 ûšəlōmōh nāṯan ləḥîrām ‘eśərîm ’elef kōr ḥiṭṭîm makōleṯ ləḇêṯwō wə‘eśərîm kōr šemen kāṯîṯ kōh-yitēn šəlōmōh ləḥîrām šānâ ḇəšānâ: f

26 wayhwâ nāṯan ḥāḵəmâ lišəlōmōh ka’ăšer diber-lwō wayəhî šālōm bên ḥîrām ûḇên šəlōmōh wayyiḵərəṯû ḇərîṯ šənêhem:

27 wayy^a‘al hammeleḵə šəlōmōh mas mikāl-yiśərā’ēl wayəhî hammas šəlōšîm ’elef ’îš:

28 wayyišəlāḥēm ləḇānwōnâ ‘ăśereṯ ’ălāfîm b^aḥōḏeš ḥălîfwōṯ ḥōḏeš yihəyû ḇalləḇānwōn šənayim ḥŏḏāšîm bəḇêṯwō wa’ăḏōnîrām ‘al-hammas: s

29 wayəhî lišəlōmōh šiḇə‘îm ’elef nōśē’ sabāl ûšəmōnîm ’elef ḥōṣēḇ bâār:

30 ləḇaḏ miśśārê hanniṣṣāḇîm lišəlōmōh ’ăšer ‘al-hamməlā’ḵâ šəlōšeṯ ’ălāfîm ûšəlōš mē’wōṯ hārōḏîm bā‘ām hā‘ōśîm bamməlā’ḵâ:

31 wayəṣaw hammeleḵə wayyassi‘û ’ăḇānîm gəḏōlwōṯ ’ăḇānîm yəqārwōṯ ləyassēḏ habāyiṯ ’aḇənê ḡāzîṯ:

32 wayyifəsəlû bōnê šəlōmōh ûḇōnê ḥîrwōm wəhagiḇəlîm wayyāḵînû hā‘ēṣîm wəhā’ăḇānîm liḇənwōṯ habāyiṯ: f