Sacred Texts  Bible  Index 
Polyglot  KJV  Sep  Vul 

Jeremiah (Yermiyah) Index
  Previous  Next 

Tanach (Hebrew): Jeremiah (Yermiyah) Chapter 44

1 ‏הַדָּבָר֙ אֲשֶׁ֣ר הָיָ֣ה אֶֽל־יִרְמְיָ֔הוּ אֶ֚ל כָּל־הַיְּהוּדִ֔ים הַיֹּשְׁבִ֖ים בְּאֶ֣רֶץ מִצְרָ֑יִם הַיֹּשְׁבִ֤ים בְּמִגְדֹּל֙ וּבְתַחְפַּנְחֵ֣ס וּבְנֹ֔ף וּבְאֶ֥רֶץ פַּתְר֖וֹס לֵאמֹֽר׃ ס

2 ‏כֹּה־אָמַ֞ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל אַתֶּ֣ם רְאִיתֶ֗ם אֵ֤ת כָּל־הָֽרָעָה֙ אֲשֶׁ֤ר הֵבֵ֙אתִי֙ עַל־יְר֣וּשָׁלִַ֔ם וְעַ֖ל כָּל־עָרֵ֣י יְהוּדָ֑ה וְהִנָּ֤ם חָרְבָּה֙ הַיּ֣וֹם הַזֶּ֔ה וְאֵ֥ין בָּהֶ֖ם יוֹשֵֽׁב׃

3 ‏מִפְּנֵ֣י רָעָתָ֗ם3 אֲשֶׁ֤ר עָשׂוּ֙ לְהַכְעִסֵ֔נִי לָלֶ֣כֶת לְקַטֵּ֔ר לַעֲבֹ֖ד לֵאלֹהִ֣ים אֲחֵרִ֑ים אֲשֶׁר֙ לֹ֣א יְדָע֔וּם הֵ֖מָּה אַתֶּ֥ם וַאֲבֹתֵיכֶֽם׃

4 ‏וָאֶשְׁלַ֤ח אֲלֵיכֶם֙ אֶת־כָּל־עֲבָדַ֣י הַנְּבִיאִ֔ים הַשְׁכֵּ֥ים וְשָׁלֹ֖חַ לֵאמֹ֑ר אַל־נָ֣א תַעֲשׂ֗וּ אֵ֛ת דְּבַֽר־הַתֹּעֵבָ֥ה הַזֹּ֖את אֲשֶׁ֥ר שָׂנֵֽאתִי׃

5 ‏וְלֹ֤א שָֽׁמְעוּ֙ וְלֹא־הִטּ֣וּ אֶת־אָזְנָ֔ם לָשׁ֖וּב מֵרָֽעָתָ֑ם לְבִלְתִּ֥י קַטֵּ֖ר לֵאלֹהִ֥ים אֲחֵרִֽים׃

6 ‏וַתִּתַּ֤ךְ חֲמָתִי֙ וְאַפִּ֔י וַתִּבְעַר֙ בְּעָרֵ֣י יְהוּדָ֔ה וּבְחֻצ֖וֹת יְרֽוּשָׁלִָ֑ם וַתִּהְיֶ֛ינָה לְחָרְבָּ֥ה לִשְׁמָמָ֖ה כַּיּ֥וֹם הַזֶּֽה׃ ס

7 ‏וְעַתָּ֡ה כֹּֽה־אָמַ֣ר יְהוָה֩ אֱלֹהֵ֨י צְבָא֜וֹת אֱלֹהֵ֣י יִשְׂרָאֵ֗ל לָמָה֩ אַתֶּ֨ם עֹשִׂ֜ים רָעָ֤ה גְדוֹלָה֙ אֶל־נַפְשֹׁ֣תֵכֶ֔ם לְהַכְרִ֨ית לָכֶ֧ם אִישׁ־וְאִשָּׁ֛ה עוֹלֵ֥ל וְיוֹנֵ֖ק מִתּ֣וֹךְ יְהוּדָ֑ה לְבִלְתִּ֛י הוֹתִ֥יר לָכֶ֖ם שְׁאֵרִֽית׃

8 ‏לְהַכְעִסֵ֙נִי֙ בְּמַעֲשֵׂ֣י יְדֵיכֶ֔ם לְקַטֵּ֞ר לֵאלֹהִ֤ים אֲחֵרִים֙ בְּאֶ֣רֶץ מִצְרַ֔יִם אֲשֶׁר־אַתֶּ֥ם בָּאִ֖ים לָג֣וּר שָׁ֑ם לְמַ֙עַן֙ הַכְרִ֣ית לָכֶ֔ם וּלְמַ֤עַן הֱיֽוֹתְכֶם֙ לִקְלָלָ֣ה וּלְחֶרְפָּ֔ה בְּכֹ֖ל גּוֹיֵ֥י הָאָֽרֶץ׃

9 ‏הַֽשְׁכַחְתֶּם֩ אֶת־רָע֨וֹת אֲבוֹתֵיכֶ֜ם וְאֶת־רָע֣וֹת׀ מַלְכֵ֣י יְהוּדָ֗ה וְאֵת֙ רָע֣וֹת נָשָׁ֔יו וְאֵת֙ רָעֹ֣תֵכֶ֔ם וְאֵ֖ת רָעֹ֣ת נְשֵׁיכֶ֑ם אֲשֶׁ֤ר עָשׂוּ֙ בְּאֶ֣רֶץ יְהוּדָ֔ה וּבְחֻצ֖וֹת יְרוּשָׁלִָֽם׃

10 ‏לֹ֣א דֻכְּא֔וּ עַ֖ד הַיּ֣וֹם הַזֶּ֑ה וְלֹ֣א יָרְא֗וּ וְלֹֽא־הָלְכ֤וּ בְתֽוֹרָתִי֙ וּבְחֻקֹּתַ֔י אֲשֶׁר־נָתַ֥תִּי לִפְנֵיכֶ֖ם וְלִפְנֵ֥י אֲבוֹתֵיכֶֽם׃ ס

11 ‏לָכֵ֗ן כֹּֽה־אָמַ֞ר יְהוָ֤ה צְבָאוֹת֙ אֱלֹהֵ֣י יִשְׂרָאֵ֔ל הִנְנִ֨י שָׂ֥ם פָּנַ֛י בָּכֶ֖ם לְרָעָ֑ה וּלְהַכְרִ֖ית אֶת־כָּל־יְהוּדָֽה׃

12 ‏וְלָקַחְתִּ֞י אֶת־שְׁאֵרִ֣ית יְהוּדָ֗ה אֲשֶׁר־שָׂ֨מוּ פְנֵיהֶ֜ם לָב֣וֹא אֶֽרֶץ־מִצְרַיִם֮ לָג֣וּר שָׁם֒ וְתַ֨מּוּ כֹ֜ל בְּאֶ֧רֶץ מִצְרַ֣יִם יִפֹּ֗לוּ בַּחֶ֤רֶב בָּֽרָעָב֙ יִתַּ֔מּוּ מִקָּטֹן֙ וְעַד־גָּד֔וֹל בַּחֶ֥רֶב וּבָרָעָ֖ב יָמֻ֑תוּ וְהָיוּ֙ לְאָלָ֣ה לְשַׁמָּ֔ה וְלִקְלָלָ֖ה וּלְחֶרְפָּֽה׃

13 ‏וּפָקַדְתִּ֗י עַ֤ל הַיּֽוֹשְׁבִים֙ בְּאֶ֣רֶץ מִצְרַ֔יִם כַּאֲשֶׁ֥ר פָּקַ֖דְתִּי עַל־יְרֽוּשָׁלִָ֑ם בַּחֶ֥רֶב בָּרָעָ֖ב וּבַדָּֽבֶר׃

14 ‏וְלֹ֨א יִהְיֶ֜ה פָּלִ֤יט וְשָׂרִיד֙ לִשְׁאֵרִ֣ית יְהוּדָ֔ה הַבָּאִ֥ים לָגֽוּר־שָׁ֖ם בְּאֶ֣רֶץ מִצְרָ֑יִם וְלָשׁ֣וּב׀ אֶ֣רֶץ יְהוּדָ֗ה אֲשֶׁר־הֵ֜מָּה מְנַשְּׂאִ֤ים אֶת־נַפְשָׁם֙ לָשׁוּב֙ לָשֶׁ֣בֶת שָׁ֔ם כִּ֥י לֹֽא־יָשׁ֖וּבוּ כִּ֥י אִם־פְּלֵטִֽים׃ ס

15 ‏וַיַּעֲנ֣וּ אֶֽת־יִרְמְיָ֗הוּ כָּל־הָאֲנָשִׁ֤ים הַיֹּֽדְעִים֙ כִּֽי־מְקַטְּר֤וֹת נְשֵׁיהֶם֙ לֵאלֹהִ֣ים אֲחֵרִ֔ים וְכָל־הַנָּשִׁ֥ים הָעֹמְד֖וֹת קָהָ֣ל גָּד֑וֹל וְכָל־הָעָ֛ם הַיֹּשְׁבִ֥ים בְּאֶֽרֶץ־מִצְרַ֖יִם בְּפַתְר֥וֹס לֵאמֹֽר׃

16 ‏הַדָּבָ֛ר אֲשֶׁר־דִּבַּ֥רְתָּ אֵלֵ֖ינוּ בְּשֵׁ֣ם יְהוָ֑ה אֵינֶ֥נּוּ שֹׁמְעִ֖ים אֵלֶֽיךָ׃

17 ‏כִּ֩י עָשֹׂ֨ה נַעֲשֶׂ֜ה אֶֽת־כָּל־הַדָּבָ֣ר׀ אֲשֶׁר־יָצָ֣א מִפִּ֗ינוּ לְקַטֵּ֞ר לִמְלֶ֣כֶת הַשָּׁמַיִם֮ וְהַסֵּֽיךְ־לָ֣הּ נְסָכִים֒ כַּאֲשֶׁ֨ר עָשִׂ֜ינוּ אֲנַ֤חְנוּ וַאֲבֹתֵ֙ינוּ֙ מְלָכֵ֣ינוּ וְשָׂרֵ֔ינוּ בְּעָרֵ֣י יְהוּדָ֔ה וּבְחֻצ֖וֹת יְרוּשָׁלִָ֑ם וַנִּֽשְׂבַּֽע־לֶ֙חֶם֙ וַנִּֽהְיֶ֣ה טוֹבִ֔ים וְרָעָ֖ה לֹ֥א רָאִֽינוּ׃

18 ‏וּמִן־אָ֡ז חָדַ֜לְנוּ לְקַטֵּ֨ר לִמְלֶ֧כֶת הַשָּׁמַ֛יִם וְהַסֵּֽךְ־לָ֥הּ נְסָכִ֖ים חָסַ֣רְנוּ כֹ֑ל וּבַחֶ֥רֶב וּבָרָעָ֖ב תָּֽמְנוּ׃

19 ‏וְכִֽי־אֲנַ֤חְנוּ מְקַטְּרִים֙ לִמְלֶ֣כֶת הַשָּׁמַ֔יִם וּלְהַסֵּ֥ךְ לָ֖הּ נְסָכִ֑ים הֲמִֽבַּלְעֲדֵ֣י אֲנָשֵׁ֗ינוּ עָשִׂ֨ינוּ לָ֤הּ כַּוָּנִים֙ לְהַ֣עֲצִבָ֔ה וְהַסֵּ֥ךְ לָ֖הּ נְסָכִֽים׃ פ

20 ‏וַיֹּ֥אמֶר יִרְמְיָ֖הוּ אֶל־כָּל־הָעָ֑ם עַל־הַגְּבָרִ֤ים וְעַל־הַנָּשִׁים֙ וְעַל־כָּל־הָעָ֔ם הָעֹנִ֥ים אֹת֛וֹ דָּבָ֖ר לֵאמֹֽר׃

21 ‏הֲל֣וֹא אֶת־הַקִּטֵּ֗ר אֲשֶׁ֨ר קִטַּרְתֶּ֜ם בְּעָרֵ֤י יְהוּדָה֙ וּבְחֻצ֣וֹת יְרוּשָׁלִַ֔ם אַתֶּ֧ם וַאֲבֽוֹתֵיכֶ֛ם מַלְכֵיכֶ֥ם וְשָׂרֵיכֶ֖ם וְעַ֣ם הָאָ֑רֶץ אֹתָם֙ זָכַ֣ר יְהוָ֔ה וַֽתַּעֲלֶ֖ה עַל־לִבּֽוֹ׃

22 ‏וְלֹֽא־יוּכַל֩ יְהוָ֨ה ע֜וֹד לָשֵׂ֗את מִפְּנֵי֙ רֹ֣עַ מַעַלְלֵיכֶ֔ם מִפְּנֵ֥י הַתּוֹעֵבֹ֖ת אֲשֶׁ֣ר עֲשִׂיתֶ֑ם וַתְּהִ֣י אַ֠רְצְכֶם לְחָרְבָּ֨ה וּלְשַׁמָּ֧ה וְלִקְלָלָ֛ה מֵאֵ֥ין יוֹשֵׁ֖ב כְּהַיּ֥וֹם הַזֶּֽה׃

23 ‏מִפְּנֵי֩ אֲשֶׁ֨ר קִטַּרְתֶּ֜ם וַאֲשֶׁ֧ר חֲטָאתֶ֣ם לַיהוָ֗ה וְלֹ֤א שְׁמַעְתֶּם֙ בְּק֣וֹל יְהוָ֔ה וּבְתֹרָת֧וֹ וּבְחֻקֹּתָ֛יו וּבְעֵדְוֹתָ֖יו לֹ֣א הֲלַכְתֶּ֑ם עַל־כֵּ֞ן קָרָ֥את אֶתְכֶ֛ם הָרָעָ֥ה הַזֹּ֖את כַּיּ֥וֹם הַזֶּֽה׃ ס

24 ‏וַיֹּ֤אמֶר יִרְמְיָ֙הוּ֙ אֶל־כָּל־הָעָ֔ם וְאֶ֖ל כָּל־הַנָּשִׁ֑ים שִׁמְעוּ֙ דְּבַר־יְהוָ֔ה כָּל־יְהוּדָ֕ה אֲשֶׁ֖ר בְּאֶ֥רֶץ מִצְרָֽיִם׃ ס

25 ‏כֹּֽה־אָמַ֣ר יְהוָֽה־צְבָאוֹת֩ אֱלֹהֵ֨י יִשְׂרָאֵ֜ל לֵאמֹ֗ר אַתֶּ֨ם וּנְשֵׁיכֶ֜ם וַתְּדַבֵּ֣רְנָה בְּפִיכֶם֮ וּבִידֵיכֶ֣ם מִלֵּאתֶ֣ם׀ לֵאמֹר֒ עָשֹׂ֨ה נַעֲשֶׂ֜ה אֶת־נְדָרֵ֗ינוּ אֲשֶׁ֤ר נָדַ֙רְנוּ֙ לְקַטֵּר֙ לִמְלֶ֣כֶת הַשָּׁמַ֔יִם וּלְהַסֵּ֥ךְ לָ֖הּ נְסָכִ֑ים הָקֵ֤ים תָּקִ֙ימְנָה֙ אֶת־נִדְרֵיכֶ֔ם וְעָשֹׂ֥ה תַעֲשֶׂ֖ינָה אֶת־נִדְרֵיכֶֽם׃ פ

26 ‏לָכֵן֙ שִׁמְע֣וּ דְבַר־יְהוָ֔ה כָּל־יְהוּדָ֕ה הַיֹּשְׁבִ֖ים בְּאֶ֣רֶץ מִצְרָ֑יִם הִנְנִ֨י נִשְׁבַּ֜עְתִּי בִּשְׁמִ֤י הַגָּדוֹל֙ אָמַ֣ר יְהוָ֔ה אִם־יִהְיֶה֩ ע֨וֹד שְׁמִ֜י נִקְרָ֣א׀ בְּפִ֣י׀ כָּל־אִ֣ישׁ יְהוּדָ֗ה אֹמֵ֛ר חַי־אֲדֹנָ֥י יְהוִ֖ה בְּכָל־אֶ֥רֶץ מִצְרָֽיִם׃

27 ‏הִנְנִ֨י שֹׁקֵ֧ד עֲלֵיהֶ֛ם לְרָעָ֖ה וְלֹ֣א לְטוֹבָ֑ה וְתַמּוּ֩ כָל־אִ֨ישׁ יְהוּדָ֜ה אֲשֶׁ֧ר בְּאֶֽרֶץ־מִצְרַ֛יִם בַּחֶ֥רֶב וּבָרָעָ֖ב עַד־כְּלוֹתָֽם׃

28 ‏וּפְלִיטֵ֨י חֶ֜רֶב יְשֻׁב֨וּן מִן־אֶ֧רֶץ מִצְרַ֛יִם אֶ֥רֶץ יְהוּדָ֖ה מְתֵ֣י מִסְפָּ֑ר וְֽיָדְע֞וּ כָּל־שְׁאֵרִ֣ית יְהוּדָ֗ה הַבָּאִ֤ים לְאֶֽרֶץ־מִצְרַ֙יִם֙ לָג֣וּר שָׁ֔ם דְּבַר־מִ֥י יָק֖וּם מִמֶּ֥נִּי וּמֵהֶֽם׃

29 ‏וְזֹאת־לָכֶ֤ם הָאוֹת֙ נְאֻם־יְהוָ֔ה כִּֽי־פֹקֵ֥ד אֲנִ֛י עֲלֵיכֶ֖ם בַּמָּק֣וֹם הַזֶּ֑ה לְמַ֙עַן֙ תֵּֽדְע֔וּ כִּי֩ ק֨וֹם יָק֧וּמוּ דְבָרַ֛י עֲלֵיכֶ֖ם לְרָעָֽה׃ ס

30 ‏כֹּ֣ה׀ אָמַ֣ר יְהוָ֗ה הִנְנִ֣י נֹ֠תֵן אֶת־פַּרְעֹ֨ה חָפְרַ֤ע מֶֽלֶךְ־מִצְרַ֙יִם֙ בְּיַ֣ד אֹֽיְבָ֔יו וּבְיַ֖ד מְבַקְשֵׁ֣י נַפְשׁ֑וֹ כַּאֲשֶׁ֨ר נָתַ֜תִּי אֶת־צִדְקִיָּ֣הוּ מֶֽלֶךְ־יְהוּדָ֗ה בְּיַ֨ד נְבוּכַדְרֶאצַּ֧ר מֶֽלֶךְ־בָּבֶ֛ל אֹיְב֖וֹ וּמְבַקֵּ֥שׁ נַפְשֽׁוֹ׃ ס

1 hadāḇār ’ăšer hāyâ ’el-yirəməyâû ’el kāl-hayyəhûḏîm hayyōšəḇîm bə’ereṣ miṣərāyim hayyōšəḇîm bəmiḡədōl ûḇəṯaḥəpanəḥēs ûḇənōf ûḇə’ereṣ paṯərwōs lē’mōr: s

2 kōh-’āmar yəhwâ ṣəḇā’wōṯ ’ĕlōhê yiśərā’ēl ’atem rə’îṯem ’ēṯ kāl-hārā‘â ’ăšer hēḇē’ṯî ‘al-yərûšālaim wə‘al kāl-‘ārê yəhûḏâ wəhinnām ḥārəbâ hayywōm hazzeh wə’ên bâem ywōšēḇ:

3 mipənê rā‘āṯām3 ’ăšer ‘āśû ləhaḵə‘isēnî lāleḵeṯ ləqaṭṭēr la‘ăḇōḏ lē’lōhîm ’ăḥērîm ’ăšer lō’ yəḏā‘ûm hēmmâ ’atem wa’ăḇōṯêḵem:

4 wā’ešəlaḥ ’ălêḵem ’eṯ-kāl-‘ăḇāḏay hannəḇî’îm hašəkêm wəšālōḥa lē’mōr ’al-nā’ ṯa‘ăśû ’ēṯ dəḇar-hatō‘ēḇâ hazzō’ṯ ’ăšer śānē’ṯî:

5 wəlō’ šāmə‘û wəlō’-hiṭṭû ’eṯ-’āzənām lāšûḇ mērā‘āṯām ləḇilətî qaṭṭēr lē’lōhîm ’ăḥērîm:

6 watitaḵə ḥămāṯî wə’apî watiḇə‘ar bə‘ārê yəhûḏâ ûḇəḥuṣwōṯ yərûšālāim watihəyeynâ ləḥārəbâ lišəmāmâ kayywōm hazzeh: s

7 wə‘atâ kōh-’āmar yəhwâ ’ĕlōhê ṣəḇā’wōṯ ’ĕlōhê yiśərā’ēl lāmâ ’atem ‘ōśîm rā‘â ḡəḏwōlâ ’el-nafəšōṯēḵem ləhaḵərîṯ lāḵem ’îš-wə’iššâ ‘wōlēl wəywōnēq mitwōḵə yəhûḏâ ləḇilətî hwōṯîr lāḵem šə’ērîṯ:

8 ləhaḵə‘isēnî bəma‘ăśê yəḏêḵem ləqaṭṭēr lē’lōhîm ’ăḥērîm bə’ereṣ miṣərayim ’ăšer-’atem bā’îm lāḡûr šām ləma‘an haḵərîṯ lāḵem ûləma‘an hĕywōṯəḵem liqəlālâ ûləḥerəpâ bəḵōl gwōyê hā’āreṣ:

9 hašəḵaḥətem ’eṯ-rā‘wōṯ ’ăḇwōṯêḵem wə’eṯ-rā‘wōṯ| maləḵê yəhûḏâ wə’ēṯ rā‘wōṯ nāšāyw wə’ēṯ rā‘ōṯēḵem wə’ēṯ rā‘ōṯ nəšêḵem ’ăšer ‘āśû bə’ereṣ yəhûḏâ ûḇəḥuṣwōṯ yərûšālāim:

10 lō’ ḏukə’û ‘aḏ hayywōm hazzeh wəlō’ yārə’û wəlō’-hāləḵû ḇəṯwōrāṯî ûḇəḥuqqōṯay ’ăšer-nāṯatî lifənêḵem wəlifənê ’ăḇwōṯêḵem: s

11 lāḵēn kōh-’āmar yəhwâ ṣəḇā’wōṯ ’ĕlōhê yiśərā’ēl hinənî śām pānay bāḵem lərā‘â ûləhaḵərîṯ ’eṯ-kāl-yəhûḏâ:

12 wəlāqaḥətî ’eṯ-šə’ērîṯ yəhûḏâ ’ăšer-śāmû fənêhem lāḇwō’ ’ereṣ-miṣərayim lāḡûr šām wəṯammû ḵōl bə’ereṣ miṣərayim yipōlû baḥereḇ bārā‘āḇ yitammû miqqāṭōn wə‘aḏ-gāḏwōl baḥereḇ ûḇārā‘āḇ yāmuṯû wəhāyû lə’ālâ ləšammâ wəliqəlālâ ûləḥerəpâ:

13 ûfāqaḏətî ‘al hayywōšəḇîm bə’ereṣ miṣərayim ka’ăšer pāqaḏətî ‘al-yərûšālāim baḥereḇ bārā‘āḇ ûḇadāḇer:

14 wəlō’ yihəyeh pālîṭ wəśārîḏ lišə’ērîṯ yəhûḏâ habā’îm lāḡûr-šām bə’ereṣ miṣərāyim wəlāšûḇ| ’ereṣ yəhûḏâ ’ăšer-hēmmâ mənaśśə’îm ’eṯ-nafəšām lāšûḇ lāšeḇeṯ šām kî lō’-yāšûḇû kî ’im-pəlēṭîm: s

15 wayya‘ănû ’eṯ-yirəməyâû kāl-hā’ănāšîm hayyōḏə‘îm kî-məqaṭṭərwōṯ nəšêhem lē’lōhîm ’ăḥērîm wəḵāl-hannāšîm hā‘ōməḏwōṯ qâāl gāḏwōl wəḵāl-hā‘ām hayyōšəḇîm bə’ereṣ-miṣərayim bəfaṯərwōs lē’mōr:

16 hadāḇār ’ăšer-dibarətā ’ēlênû bəšēm yəhwâ ’ênennû šōmə‘îm ’ēleyḵā:

17 kî ‘āśōh na‘ăśeh ’eṯ-kāl-hadāḇār| ’ăšer-yāṣā’ mipînû ləqaṭṭēr liməleḵeṯ haššāmayim wəhassêḵə-lāh nəsāḵîm ka’ăšer ‘āśînû ’ănaḥənû wa’ăḇōṯênû məlāḵênû wəśārênû bə‘ārê yəhûḏâ ûḇəḥuṣwōṯ yərûšālāim wanniśəba‘-leḥem wannihəyeh ṭwōḇîm wərā‘â lō’ rā’înû:

18 ûmin-’āz ḥāḏalənû ləqaṭṭēr liməleḵeṯ haššāmayim wəhassēḵə-lāh nəsāḵîm ḥāsarənû ḵōl ûḇaḥereḇ ûḇārā‘āḇ tāmənû:

19 wəḵî-’ănaḥənû məqaṭṭərîm liməleḵeṯ haššāmayim ûləhassēḵə lāh nəsāḵîm hămibalə‘ăḏê ’ănāšênû ‘āśînû lāh kaûānîm ləha‘ăṣiḇâ wəhassēḵə lāh nəsāḵîm: f

20 wayyō’mer yirəməyâû ’el-kāl-hā‘ām ‘al-hagəḇārîm wə‘al-hannāšîm wə‘al-kāl-hā‘ām hā‘ōnîm ’ōṯwō dāḇār lē’mōr:

21 hălwō’ ’eṯ-haqqiṭṭēr ’ăšer qiṭṭarətem bə‘ārê yəhûḏâ ûḇəḥuṣwōṯ yərûšālaim ’atem wa’ăḇwōṯêḵem maləḵêḵem wəśārêḵem wə‘am hā’āreṣ ’ōṯām zāḵar yəhwâ wata‘ăleh ‘al-libwō:

22 wəlō’-yûḵal yəhwâ ‘wōḏ lāśē’ṯ mipənê rō‘a ma‘aləlêḵem mipənê hatwō‘ēḇōṯ ’ăšer ‘ăśîṯem watəhî ’arəṣəḵem ləḥārəbâ ûləšammâ wəliqəlālâ mē’ên ywōšēḇ kəhayywōm hazzeh:

23 mipənê ’ăšer qiṭṭarətem wa’ăšer ḥăṭā’ṯem layhwâ wəlō’ šəma‘ətem bəqwōl yəhwâ ûḇəṯōrāṯwō ûḇəḥuqqōṯāyw ûḇə‘ēḏəwōṯāyw lō’ hălaḵətem ‘al-kēn qārā’ṯ ’eṯəḵem hārā‘â hazzō’ṯ kayywōm hazzeh: s

24 wayyō’mer yirəməyâû ’el-kāl-hā‘ām wə’el kāl-hannāšîm šimə‘û dəḇar-yəhwâ kāl-yəhûḏâ ’ăšer bə’ereṣ miṣərāyim: s

25 kōh-’āmar yəhwâ-ṣəḇā’wōṯ ’ĕlōhê yiśərā’ēl lē’mōr ’atem ûnəšêḵem watəḏabērənâ bəfîḵem ûḇîḏêḵem millē’ṯem| lē’mōr ‘āśōh na‘ăśeh ’eṯ-nəḏārênû ’ăšer nāḏarənû ləqaṭṭēr liməleḵeṯ haššāmayim ûləhassēḵə lāh nəsāḵîm hāqêm tāqîmənâ ’eṯ-niḏərêḵem wə‘āśōh ṯa‘ăśeynâ ’eṯ-niḏərêḵem: f

26 lāḵēn šimə‘û ḏəḇar-yəhwâ kāl-yəhûḏâ hayyōšəḇîm bə’ereṣ miṣərāyim hinənî nišəba‘ətî bišəmî hagāḏwōl ’āmar yəhwâ ’im-yihəyeh ‘wōḏ šəmî niqərā’| bəfî| kāl-’îš yəhûḏâ ’ōmēr ḥay-’ăḏōnāy yəhwih bəḵāl-’ereṣ miṣərāyim:

27 hinənî šōqēḏ ‘ălêhem lərā‘â wəlō’ ləṭwōḇâ wəṯammû ḵāl-’îš yəhûḏâ ’ăšer bə’ereṣ-miṣərayim baḥereḇ ûḇārā‘āḇ ‘aḏ-kəlwōṯām:

28 ûfəlîṭê ḥereḇ yəšuḇûn min-’ereṣ miṣərayim ’ereṣ yəhûḏâ məṯê misəpār wəyāḏə‘û kāl-šə’ērîṯ yəhûḏâ habā’îm lə’ereṣ-miṣərayim lāḡûr šām dəḇar-mî yāqûm mimmennî ûmēhem:

29 wəzō’ṯ-lāḵem hā’wōṯ nə’um-yəhwâ kî-fōqēḏ ’ănî ‘ălêḵem bammāqwōm hazzeh ləma‘an tēḏə‘û kî qwōm yāqûmû ḏəḇāray ‘ălêḵem lərā‘â: s

30 kōh| ’āmar yəhwâ hinənî nōṯēn ’eṯ-parə‘ōh ḥāfəra‘ meleḵə-miṣərayim bəyaḏ ’ōyəḇāyw ûḇəyaḏ məḇaqəšê nafəšwō ka’ăšer nāṯatî ’eṯ-ṣiḏəqîyâû meleḵə-yəhûḏâ bəyaḏ nəḇûḵaḏəre’ṣṣar meleḵə-bāḇel ’ōyəḇwō ûməḇaqqēš nafəšwō: s


Next: Jeremiah (Yermiyah) Chapter 45