‎1 ‏וַיֹּסִ֙פוּ֙ בְּנֵ֣י יִשְׂרָאֵ֔ל לַעֲשׂ֥וֹת הָרַ֖ע בְּעֵינֵ֣י יְהוָ֑ה וַיִּתְּנֵ֧ם יְהוָ֛ה בְּיַד־פְּלִשְׁתִּ֖ים אַרְבָּעִ֥ים שָׁנָֽה׃ פ

‎2 ‏וַיְהִי֩ אִ֨ישׁ אֶחָ֧ד מִצָּרְעָ֛ה מִמִּשְׁפַּ֥חַת הַדָּנִ֖י וּשְׁמ֣וֹ מָנ֑וֹחַ וְאִשְׁתּ֥וֹ עֲקָרָ֖ה וְלֹ֥א יָלָֽדָה׃

‎3 ‏וַיֵּרָ֥א מַלְאַךְ־יְהוָ֖ה אֶל־הָאִשָּׁ֑ה וַיֹּ֣אמֶר אֵלֶ֗יהָ הִנֵּה־נָ֤א אַתְּ־עֲקָרָה֙ וְלֹ֣א יָלַ֔דְתְּ וְהָרִ֖ית וְיָלַ֥דְתְּ בֵּֽן׃

‎4 ‏וְעַתָּה֙ הִשָּׁ֣מְרִי נָ֔א וְאַל־תִּשְׁתִּ֖י יַ֣יִן וְשֵׁכָ֑ר וְאַל־תֹּאכְלִ֖י כָּל־טָמֵֽא׃

‎5 ‏כִּי֩ הִנָּ֨ךְ הָרָ֜ה וְיֹלַ֣דְתְּ בֵּ֗ן וּמוֹרָה֙ לֹא־יַעֲלֶ֣ה עַל־רֹאשׁ֔וֹ כִּֽי־נְזִ֧יר אֱלֹהִ֛ים יִהְיֶ֥ה הַנַּ֖עַר מִן־הַבָּ֑טֶן וְה֗וּא יָחֵ֛ל לְהוֹשִׁ֥יעַ אֶת־יִשְׂרָאֵ֖ל מִיַּ֥ד פְּלִשְׁתִּֽים׃

‎6 ‏וַתָּבֹ֣א הָאִשָּׁ֗ה וַתֹּ֣אמֶר לְאִישָׁהּ֮ לֵאמֹר֒ אִ֤ישׁ הָאֱלֹהִים֙ בָּ֣א אֵלַ֔י וּמַרְאֵ֕הוּ כְּמַרְאֵ֛ה מַלְאַ֥ךְ הָאֱלֹהִ֖ים נוֹרָ֣א מְאֹ֑ד וְלֹ֤א שְׁאִלְתִּ֙יהוּ֙ אֵֽי־מִזֶּ֣ה ה֔וּא וְאֶת־שְׁמ֖וֹ לֹֽא־הִגִּ֥יד לִֽי׃

‎7 ‏וַיֹּ֣אמֶר לִ֔י הִנָּ֥ךְ הָרָ֖ה וְיֹלַ֣דְתְּ בֵּ֑ן וְעַתָּ֞ה אַל־תִּשְׁתִּ֣י׀ יַ֣יִן וְשֵׁכָ֗ר וְאַל־תֹּֽאכְלִי֙ כָּל־טֻמְאָ֔ה כִּֽי־נְזִ֤יר אֱלֹהִים֙ יִהְיֶ֣ה הַנַּ֔עַר מִן־הַבֶּ֖טֶן עַד־י֥וֹם מוֹתֽוֹ׃ פ

‎8 ‏וַיֶּעְתַּ֥ר מָנ֛וֹחַ אֶל־יְהוָ֖ה וַיֹּאמַ֑ר בִּ֣י אֲדוֹנָ֔י אִ֣ישׁ הָאֱלֹהִ֞ים אֲשֶׁ֣ר שָׁלַ֗חְתָּ יָבוֹא־נָ֥א עוֹד֙ אֵלֵ֔ינוּ וְיוֹרֵ֕נוּ מַֽה־נַּעֲשֶׂ֖ה לַנַּ֥עַר הַיּוּלָּֽד׃

‎9 ‏וַיִּשְׁמַ֥ע הָאֱלֹהִ֖ים בְּק֣וֹל מָנ֑וֹחַ וַיָּבֹ֣א מַלְאַךְ֩ הָאֱלֹהִ֨ים ע֜וֹד אֶל־הָאִשָּׁ֗ה וְהִיא֙ יוֹשֶׁ֣בֶת בַּשָּׂדֶ֔ה וּמָנ֥וֹחַ אִישָׁ֖הּ אֵ֥ין עִמָּֽהּ׃

‎10 ‏וַתְּמַהֵר֙ הָֽאִשָּׁ֔ה וַתָּ֖רָץ וַתַּגֵּ֣ד לְאִישָׁ֑הּ וַתֹּ֣אמֶר אֵלָ֔יו הִנֵּ֨ה נִרְאָ֤ה אֵלַי֙ הָאִ֔ישׁ אֲשֶׁר־בָּ֥א בַיּ֖וֹם אֵלָֽי׃

‎11 ‏וַיָּ֛קָם וַיֵּ֥לֶךְ מָנ֖וֹחַ אַחֲרֵ֣י אִשְׁתּ֑וֹ וַיָּבֹא֙ אֶל־הָאִ֔ישׁ וַיֹּ֣אמֶר ל֗וֹ הַאַתָּ֥ה הָאִ֛ישׁ אֲשֶׁר־דִּבַּ֥רְתָּ אֶל־הָאִשָּׁ֖ה וַיֹּ֥אמֶר אָֽנִי׃

‎12 ‏וַיֹּ֣אמֶר מָנ֔וֹחַ עַתָּ֖ה יָבֹ֣א דְבָרֶ֑יךָ מַה־יִּֽהְיֶ֥ה מִשְׁפַּט־הַנַּ֖עַר וּמַעֲשֵֽׂהוּ׃

‎13 ‏וַיֹּ֛אמֶר מַלְאַ֥ךְ יְהוָ֖ה אֶל־מָנ֑וֹחַ מִכֹּ֛ל אֲשֶׁר־אָמַ֥רְתִּי אֶל־הָאִשָּׁ֖ה תִּשָּׁמֵֽר׃

‎14 ‏מִכֹּ֣ל אֲשֶׁר־יֵצֵא֩ מִגֶּ֨פֶן הַיַּ֜יִן לֹ֣א תֹאכַ֗ל וְיַ֤יִן וְשֵׁכָר֙ אַל־תֵּ֔שְׁתְּ וְכָל־טֻמְאָ֖ה אַל־תֹּאכַ֑ל כֹּ֥ל אֲשֶׁר־צִוִּיתִ֖יהָ תִּשְׁמֹֽר׃

‎15 ‏וַיֹּ֥אמֶר מָנ֖וֹחַ אֶל־מַלְאַ֣ךְ יְהוָ֑ה נַעְצְרָה־נָּ֣א אוֹתָ֔ךְ וְנַעֲשֶׂ֥ה לְפָנֶ֖יךָ גְּדִ֥י עִזִּֽים׃

‎16 ‏וַיֹּאמֶר֩ מַלְאַ֨ךְ יְהוָ֜ה אֶל־מָנ֗וֹחַ אִם־תַּעְצְרֵ֙נִי֙ לֹא־אֹכַ֣ל בְּלַחְמֶ֔ךָ וְאִם־תַּעֲשֶׂ֣ה עֹלָ֔ה לַיהוָ֖ה תַּעֲלֶ֑נָּה כִּ֚י לֹא־יָדַ֣ע מָנ֔וֹחַ כִּֽי־מַלְאַ֥ךְ יְהוָ֖ה הֽוּא׃

‎17 ‏וַיֹּ֧אמֶר מָנ֛וֹחַ אֶל־מַלְאַ֥ךְ יְהוָ֖ה מִ֣י שְׁמֶ֑ךָ כִּֽי־יָבֹ֥א דבריך דְבָרְךָ֖ וְכִבַּדְנֽוּךָ׃

‎18 ‏וַיֹּ֤אמֶר לוֹ֙ מַלְאַ֣ךְ יְהוָ֔ה לָ֥מָּה זֶּ֖ה תִּשְׁאַ֣ל לִשְׁמִ֑י וְהוּא־פֶֽלִאי׃ ס

‎19 ‏וַיִּקַּ֨ח מָנ֜וֹחַ אֶת־גְּדִ֤י הָעִזִּים֙ וְאֶת־הַמִּנְחָ֔ה וַיַּ֥עַל עַל־הַצּ֖וּר לַֽיהוָ֑ה וּמַפְלִ֣א לַעֲשׂ֔וֹת וּמָנ֥וֹחַ וְאִשְׁתּ֖וֹ רֹאִֽים׃

‎20 ‏וַיְהִי֩ בַעֲל֨וֹת הַלַּ֜הַב מֵעַ֤ל הַמִּזְבֵּ֙חַ֙ הַשָּׁמַ֔יְמָה וַיַּ֥עַל מַלְאַךְ־יְהוָ֖ה בְּלַ֣הַב הַמִּזְבֵּ֑חַ וּמָנ֤וֹחַ וְאִשְׁתּוֹ֙ רֹאִ֔ים וַיִּפְּל֥וּ עַל־פְּנֵיהֶ֖ם אָֽרְצָה׃

‎21 ‏וְלֹא־יָ֤סַף עוֹד֙ מַלְאַ֣ךְ יְהוָ֔ה לְהֵרָאֹ֖ה אֶל־מָנ֣וֹחַ וְאֶל־אִשְׁתּ֑וֹ אָ֚ז יָדַ֣ע מָנ֔וֹחַ כִּֽי־מַלְאַ֥ךְ יְהוָ֖ה הֽוּא׃

‎22 ‏וַיֹּ֧אמֶר מָנ֛וֹחַ אֶל־אִשְׁתּ֖וֹ מ֣וֹת נָמ֑וּת כִּ֥י אֱלֹהִ֖ים רָאִֽינוּ׃

‎23 ‏וַתֹּ֧אמֶר ל֣וֹ אִשְׁתּ֗וֹ לוּ֩ חָפֵ֨ץ יְהוָ֤ה לַהֲמִיתֵ֙נוּ֙ לֹֽא־לָקַ֤ח מִיָּדֵ֙נוּ֙ עֹלָ֣ה וּמִנְחָ֔ה וְלֹ֥א הֶרְאָ֖נוּ אֶת־כָּל־אֵ֑לֶּה וְכָעֵ֕ת לֹ֥א הִשְׁמִיעָ֖נוּ כָּזֹֽאת׃

‎24 ‏וַתֵּ֤לֶד הָֽאִשָּׁה֙ בֵּ֔ן וַתִּקְרָ֥א אֶת־שְׁמ֖וֹ שִׁמְשׁ֑וֹן וַיִּגְדַּ֣ל הַנַּ֔עַר וַֽיְבָרְכֵ֖הוּ יְהוָֽה׃

‎25 ‏וַתָּ֙חֶל֙ ר֣וּחַ יְהוָ֔ה לְפַעֲמ֖וֹ בְּמַחֲנֵה־דָ֑ן בֵּ֥ין צָרְעָ֖ה וּבֵ֥ין אֶשְׁתָּאֹֽל׃ פ

1 wayyōsifû bənê yiśərā’ēl l^a‘ăśwōṯ hār^a‘ bə‘ênê yəhwâ wayyitənēm yəhwâ bəyaḏ-pəlišətîm ’arəbā‘îm šānâ: f

2 wayəhî ’îš ’eḥāḏ miṣṣārə‘â mimmišəp^aḥaṯ hadānî ûšəmwō mānwōḥa wə’išətwō ‘ăqārâ wəlō’ yālāḏâ:

3 wayyērā’ malə’aḵə-yəhwâ ’el-hā’iššâ wayyō’mer ’ēleyhā hinnēh-nā’ ’atə-‘ăqārâ wəlō’ yālaḏətə wəhārîṯ wəyālaḏətə bēn:

4 wə‘atâ hiššāmərî nā’ wə’al-tišətî yayin wəšēḵār wə’al-tō’ḵəlî kāl-ṭāmē’:

5 kî hinnāḵə hārâ wəyōlaḏətə bēn ûmwōrâ lō’-y^a‘ăleh ‘al-rō’šwō kî-nəzîr ’ĕlōhîm yihəyeh hann^a‘ar min-habāṭen wəhû’ yāḥēl ləhwōšî‘a ’eṯ-yiśərā’ēl mîyaḏ pəlišətîm:

6 watāḇō’ hā’iššâ watō’mer lə’îšāh lē’mōr ’îš hā’ĕlōhîm bā’ ’ēlay ûmarə’ēhû kəmarə’ēh malə’aḵə hā’ĕlōhîm nwōrā’ mə’ōḏ wəlō’ šə’ilətîhû ’ê-mizzeh hû’ wə’eṯ-šəmwō lō’-higîḏ lî:

7 wayyō’mer lî hinnāḵə hārâ wəyōlaḏətə bēn wə‘atâ ’al-tišətî| yayin wəšēḵār wə’al-tō’ḵəlî kāl-ṭumə’â kî-nəzîr ’ĕlōhîm yihəyeh hann^a‘ar min-habeṭen ‘aḏ-ywōm mwōṯwō: f

8 wayye‘ətar mānwōḥa ’el-yəhwâ wayyō’mar bî ’ăḏwōnāy ’îš hā’ĕlōhîm ’ăšer šāl^aḥətā yāḇwō’-nā’ ‘wōḏ ’ēlênû wəywōrēnû mah-nn^a‘ăśeh lann^a‘ar hayyûllāḏ:

9 wayyišəm^a‘ hā’ĕlōhîm bəqwōl mānwōḥa wayyāḇō’ malə’aḵə hā’ĕlōhîm ‘wōḏ ’el-hā’iššâ wəhî’ ywōšeḇeṯ baśśāḏeh ûmānwōḥa ’îšāh ’ên ‘immāh:

10 watəmahēr hā’iššâ watārāṣ watagēḏ lə’îšāh watō’mer ’ēlāyw hinnēh nirə’â ’ēlay hā’îš ’ăšer-bā’ ḇayywōm ’ēlāy:

11 wayyāqām wayyēleḵə mānwōḥa ’^aḥărê ’išətwō wayyāḇō’ ’el-hā’îš wayyō’mer lwō ha’atâ hā’îš ’ăšer-dibarətā ’el-hā’iššâ wayyō’mer ’ānî:

12 wayyō’mer mānwōḥa ‘atâ yāḇō’ ḏəḇāreyḵā mah-yyihəyeh mišəpaṭ-hann^a‘ar ûm^a‘ăśēhû:

13 wayyō’mer malə’aḵə yəhwâ ’el-mānwōḥa mikōl ’ăšer-’āmarətî ’el-hā’iššâ tiššāmēr:

14 mikōl ’ăšer-yēṣē’ migefen hayyayin lō’ ṯō’ḵal wəyayin wəšēḵār ’al-tēšətə wəḵāl-ṭumə’â ’al-tō’ḵal kōl ’ăšer-ṣiûîṯîhā tišəmōr:

15 wayyō’mer mānwōḥa ’el-malə’aḵə yəhwâ n^a‘əṣərâ-nnā’ ’wōṯāḵə wən^a‘ăśeh ləfāneyḵā gəḏî ‘izzîm:

16 wayyō’mer malə’aḵə yəhwâ ’el-mānwōḥa ’im-t^a‘əṣərēnî lō’-’ōḵal bəl^aḥəmeḵā wə’im-t^a‘ăśeh ‘ōlâ layhwâ t^a‘ălennâ kî lō’-yāḏ^a‘ mānwōḥa kî-malə’aḵə yəhwâ hû’:

17 wayyō’mer mānwōḥa ’el-malə’aḵə yəhwâ mî šəmeḵā kî-yāḇō’ ḏəḇāreyḵā ḏəḇārəḵā wəḵibaḏənûḵā:

18 wayyō’mer lwō malə’aḵə yəhwâ lāmmâ zzeh tišə’al lišəmî wəhû’-feli’y: s

19 wayyiqq^aḥ mānwōḥa ’eṯ-gəḏî hā‘izzîm wə’eṯ-hamminəḥâ wayy^a‘al ‘al-haṣṣûr layhwâ ûmafəli’ l^a‘ăśwōṯ ûmānwōḥa wə’išətwō rō’îm:

20 wayəhî ḇ^a‘ălwōṯ hallahaḇ mē‘al hammizəbēḥa haššāmayəmâ wayy^a‘al malə’aḵə-yəhwâ bəlahaḇ hammizəbēḥa ûmānwōḥa wə’išətwō rō’îm wayyipəlû ‘al-pənêhem ’ārəṣâ:

21 wəlō’-yāsaf ‘wōḏ malə’aḵə yəhwâ ləhērā’ōh ’el-mānwōḥa wə’el-’išətwō ’āz yāḏ^a‘ mānwōḥa kî-malə’aḵə yəhwâ hû’:

22 wayyō’mer mānwōḥa ’el-’išətwō mwōṯ nāmûṯ kî ’ĕlōhîm rā’înû:

23 watō’mer lwō ’išətwō lû ḥāfēṣ yəhwâ lahămîṯēnû lō’-lāq^aḥ mîyāḏēnû ‘ōlâ ûminəḥâ wəlō’ herə’ānû ’eṯ-kāl-’ēlleh wəḵā‘ēṯ lō’ hišəmî‘ānû kāzō’ṯ:

24 watēleḏ hā’iššâ bēn watiqərā’ ’eṯ-šəmwō šiməšwōn wayyiḡədal hann^a‘ar wayəḇārəḵēhû yəhwâ:

25 watāḥel rûḥa yəhwâ ləf^a‘ămwō bəm^aḥănēh-ḏān bên ṣārə‘â ûḇên ’ešətā’ōl: f