‎1 ‏וַנֵּ֣פֶן וַנַּ֔עַל דֶּ֖רֶךְ הַבָּשָׁ֑ן וַיֵּצֵ֣א עוֹג֩ מֶֽלֶךְ־הַבָּשָׁ֨ן לִקְרָאתֵ֜נוּ ה֧וּא וְכָל־עַמּ֛וֹ לַמִּלְחָמָ֖ה אֶדְרֶֽעִי׃

‎2 ‏וַיֹּ֨אמֶר יְהוָ֤ה אֵלַי֙ אַל־תִּירָ֣א אֹת֔וֹ כִּ֣י בְיָדְךָ֞ נָתַ֧תִּי אֹת֛וֹ וְאֶת־כָּל־עַמּ֖וֹ וְאֶת־אַרְצ֑וֹ וְעָשִׂ֣יתָ לּ֔וֹ כַּאֲשֶׁ֣ר עָשִׂ֗יתָ לְסִיחֹן֙ מֶ֣לֶךְ הָֽאֱמֹרִ֔י אֲשֶׁ֥ר יוֹשֵׁ֖ב בְּחֶשְׁבּֽוֹן׃

‎3 ‏וַיִּתֵּן֩ יְהוָ֨ה אֱלֹהֵ֜ינוּ בְּיָדֵ֗נוּ גַּ֛ם אֶת־ע֥וֹג מֶֽלֶךְ־הַבָּשָׁ֖ן וְאֶת־כָּל־עַמּ֑וֹ וַנַּכֵּ֕הוּ עַד־בִּלְתִּ֥י הִשְׁאִֽיר־ל֖וֹ שָׂרִֽיד׃

‎4 ‏וַנִּלְכֹּ֤ד אֶת־כָּל־עָרָיו֙ בָּעֵ֣ת הַהִ֔וא לֹ֤א הָֽיְתָה֙ קִרְיָ֔ה אֲשֶׁ֥ר לֹא־לָקַ֖חְנוּ מֵֽאִתָּ֑ם שִׁשִּׁ֥ים עִיר֙ כָּל־חֶ֣בֶל אַרְגֹּ֔ב מַמְלֶ֥כֶת ע֖וֹג בַּבָּשָֽׁן׃

‎5 ‏כָּל־אֵ֜לֶּה עָרִ֧ים בְּצֻר֛וֹת חוֹמָ֥ה גְבֹהָ֖ה דְּלָתַ֣יִם וּבְרִ֑יחַ לְבַ֛ד מֵעָרֵ֥י הַפְּרָזִ֖י הַרְבֵּ֥ה מְאֹֽד׃

‎6 ‏וַנַּחֲרֵ֣ם אוֹתָ֔ם כַּאֲשֶׁ֣ר עָשִׂ֔ינוּ לְסִיחֹ֖ן מֶ֣לֶךְ חֶשְׁבּ֑וֹן הַחֲרֵם֙ כָּל־עִ֣יר מְתִ֔ם הַנָּשִׁ֖ים וְהַטָּֽף׃

‎7 ‏וְכָל־הַבְּהֵמָ֛ה וּשְׁלַ֥ל הֶעָרִ֖ים בַּזּ֥וֹנוּ לָֽנוּ׃

‎8 ‏וַנִּקַּ֞ח בָּעֵ֤ת הַהִוא֙ אֶת־הָאָ֔רֶץ מִיַּ֗ד שְׁנֵי֙ מַלְכֵ֣י הָאֱמֹרִ֔י אֲשֶׁ֖ר בְּעֵ֣בֶר הַיַּרְדֵּ֑ן מִנַּ֥חַל אַרְנֹ֖ן עַד־הַ֥ר חֶרְמֽוֹן׃

‎9 ‏צִידֹנִ֛ים יִקְרְא֥וּ לְחֶרְמ֖וֹן שִׂרְיֹ֑ן וְהָ֣אֱמֹרִ֔י יִקְרְאוּ־ל֖וֹ שְׂנִֽיר׃

‎10 ‏כֹּ֣ל׀ עָרֵ֣י הַמִּישֹׁ֗ר וְכָל־הַגִּלְעָד֙ וְכָל־הַבָּשָׁ֔ן עַד־סַלְכָ֖ה וְאֶדְרֶ֑עִי עָרֵ֛י מַמְלֶ֥כֶת ע֖וֹג בַּבָּשָֽׁן׃

‎11 ‏כִּ֣י רַק־ע֞וֹג מֶ֣לֶךְ הַבָּשָׁ֗ן נִשְׁאַר֮ מִיֶּ֣תֶר הָרְפָאִים֒ הִנֵּ֤ה עַרְשׂוֹ֙ עֶ֣רֶשׂ בַּרְזֶ֔ל הֲלֹ֣ה הִ֔וא בְּרַבַּ֖ת בְּנֵ֣י עַמּ֑וֹן תֵּ֧שַׁע אַמּ֣וֹת אָרְכָּ֗הּ וְאַרְבַּ֥ע אַמּ֛וֹת רָחְבָּ֖הּ בְּאַמַּת־אִֽישׁ׃

‎12 ‏וְאֶת־הָאָ֧רֶץ הַזֹּ֛את יָרַ֖שְׁנוּ בָּעֵ֣ת הַהִ֑וא מֵעֲרֹעֵ֞ר אֲשֶׁר־עַל־נַ֣חַל אַרְנֹ֗ן וַחֲצִ֤י הַֽר־הַגִּלְעָד֙ וְעָרָ֔יו נָתַ֕תִּי לָרֻֽאוּבֵנִ֖י¹ וְלַגָּדִֽי׃

‎13 ‏וְיֶ֨תֶר הַגִּלְעָ֤ד וְכָל־הַבָּשָׁן֙ מַמְלֶ֣כֶת ע֔וֹג נָתַ֕תִּי לַחֲצִ֖י שֵׁ֣בֶט הַֽמְנַשֶּׁ֑ה כֹּ֣ל חֶ֤בֶל הָֽאַרְגֹּב֙ לְכָל־הַבָּשָׁ֔ן הַה֥וּא יִקָּרֵ֖א אֶ֥רֶץ רְפָאִֽים׃

‎14 ‏יָאִ֣יר בֶּן־מְנַשֶּׁ֗ה לָקַח֙ אֶת־כָּל־חֶ֣בֶל אַרְגֹּ֔ב עַד־גְּב֥וּל הַגְּשׁוּרִ֖י וְהַמַּֽעֲכָתִ֑י וַיִּקְרָא֩ אֹתָ֨ם עַל־שְׁמ֤וֹ אֶת־הַבָּשָׁן֙ חַוֹּ֣ת יָאִ֔יר עַ֖ד הַיּ֥וֹם הַזֶּֽה׃

‎15 ‏וּלְמָכִ֖יר נָתַ֥תִּי אֶת־הַגִּלְעָֽד׃

‎16 ‏וְלָרֻאוּבֵנִ֨י¹ וְלַגָּדִ֜י נָתַ֤תִּי מִן־הַגִּלְעָד֙ וְעַד־נַ֣חַל אַרְנֹ֔ן תּ֥וֹךְ הַנַּ֖חַל וּגְבֻ֑ל וְעַד֙ יַבֹּ֣ק הַנַּ֔חַל גְּב֖וּל בְּנֵ֥י עַמּֽוֹן׃

‎17 ‏וְהָֽעֲרָבָ֖ה וְהַיַּרְדֵּ֣ן וּגְבֻ֑ל מִכִּנֶּ֗רֶת וְעַ֨ד יָ֤ם הָֽעֲרָבָה֙ יָ֣ם הַמֶּ֔לַח תַּ֛חַת אַשְׁדֹּ֥ת הַפִּסְגָּ֖ה מִזְרָֽחָה׃

‎18 ‏וָאֲצַ֣ו אֶתְכֶ֔ם בָּעֵ֥ת הַהִ֖וא לֵאמֹ֑ר יְהוָ֣ה אֱלֹהֵיכֶ֗ם נָתַ֨ן לָכֶ֜ם אֶת־הָאָ֤רֶץ הַזֹּאת֙ לְרִשְׁתָּ֔הּ חֲלוּצִ֣ים תַּֽעַבְר֗וּ לִפְנֵ֛י אֲחֵיכֶ֥ם בְּנֵֽי־יִשְׂרָאֵ֖ל כָּל־בְּנֵי־חָֽיִל׃

‎19 ‏רַ֠ק נְשֵׁיכֶ֣ם וְטַפְּכֶם֮ וּמִקְנֵכֶם֒ יָדַ֕עְתִּי כִּֽי־מִקְנֶ֥ה רַ֖ב לָכֶ֑ם יֵֽשְׁבוּ֙ בְּעָ֣רֵיכֶ֔ם אֲשֶׁ֥ר נָתַ֖תִּי לָכֶֽם׃

‎20 ‏עַ֠ד אֲשֶׁר־יָנִ֨יחַ יְהוָ֥ה׀ לַֽאֲחֵיכֶם֮ כָּכֶם֒ וְיָרְשׁ֣וּ גַם־הֵ֔ם אֶת־הָאָ֕רֶץ אֲשֶׁ֨ר יְהוָ֧ה אֱלֹהֵיכֶ֛ם נֹתֵ֥ן לָהֶ֖ם בְּעֵ֣בֶר הַיַּרְדֵּ֑ן וְשַׁבְתֶּ֗ם אִ֚ישׁ לִֽירֻשָּׁת֔וֹ אֲשֶׁ֥ר נָתַ֖תִּי לָכֶֽם׃

‎21 ‏וְאֶת־יְהוֹשׁ֣וּעַ צִוֵּ֔יתִי בָּעֵ֥ת הַהִ֖וא לֵאמֹ֑ר עֵינֶ֣יךָ הָרֹאֹ֗ת אֵת֩ כָּל־אֲשֶׁ֨ר עָשָׂ֜ה יְהוָ֤ה אֱלֹהֵיכֶם֙ לִשְׁנֵי֙ הַמְּלָכִ֣ים הָאֵ֔לֶּה כֵּֽן־יַעֲשֶׂ֤ה יְהוָה֙ לְכָל־הַמַּמְלָכ֔וֹת אֲשֶׁ֥ר אַתָּ֖ה עֹבֵ֥ר שָֽׁמָּה׃

‎22 ‏לֹ֖א תִּֽירָא֑וּם כִּ֚י יְהוָ֣ה אֱלֹֽהֵיכֶ֔ם ה֖וּא הַנִּלְחָ֥ם לָכֶֽם׃ ס

‎23 ‏וָאֶתְחַנַּ֖ן אֶל־יְהוָ֑ה בָּעֵ֥ת הַהִ֖וא לֵאמֹֽר׃

‎24 ‏אֲדֹנָ֣י יְהוִ֗ה אַתָּ֤ה הַֽחִלּ֙וֹתָ֙ לְהַרְא֣וֹת אֶֽת־עַבְדְּךָ֔ אֶ֨ת־גָּדְלְךָ֔ וְאֶת־יָדְךָ֖ הַחֲזָקָ֑ה אֲשֶׁ֤ר מִי־אֵל֙ בַּשָּׁמַ֣יִם וּבָאָ֔רֶץ אֲשֶׁר־יַעֲשֶׂ֥ה כְמַעֲשֶׂ֖יךָ וְכִגְבוּרֹתֶֽךָ׃

‎25 ‏אֶעְבְּרָה־נָּ֗א וְאֶרְאֶה֙ אֶת־הָאָ֣רֶץ הַטּוֹבָ֔ה אֲשֶׁ֖ר בְּעֵ֣בֶר הַיַּרְדֵּ֑ן הָהָ֥ר הַטּ֛וֹב הַזֶּ֖ה וְהַלְּבָנֽוֹן׃

‎26 ‏וַיִּתְעַבֵּ֨ר יְהוָ֥ה בִּי֙ לְמַ֣עַנְכֶ֔ם וְלֹ֥א שָׁמַ֖ע אֵלָ֑י וַיֹּ֨אמֶר יְהוָ֤ה אֵלַי֙ רַב־לָ֔ךְ אַל־תּ֗וֹסֶף דַּבֵּ֥ר אֵלַ֛י ע֖וֹד בַּדָּבָ֥ר הַזֶּֽה׃

‎27 ‏עֲלֵ֣ה׀ רֹ֣אשׁ הַפִּסְגָּ֗ה וְשָׂ֥א עֵינֶ֛יךָ יָ֧מָּה וְצָפֹ֛נָה וְתֵימָ֥נָה וּמִזְרָ֖חָה וּרְאֵ֣ה בְעֵינֶ֑יךָ כִּי־לֹ֥א תַעֲבֹ֖ר אֶת־הַיַּרְדֵּ֥ן הַזֶּֽה׃

‎28 ‏וְצַ֥ו אֶת־יְהוֹשֻׁ֖עַ וְחַזְּקֵ֣הוּ וְאַמְּצֵ֑הוּ כִּי־ה֣וּא יַעֲבֹ֗ר לִפְנֵי֙ הָעָ֣ם הַזֶּ֔ה וְהוּא֙ יַנְחִ֣יל אוֹתָ֔ם אֶת־הָאָ֖רֶץ אֲשֶׁ֥ר תִּרְאֶֽה׃

‎29 ‏וַנֵּ֣שֶׁב בַּגָּ֔יְא מ֖וּל בֵּ֥ית פְּעֽוֹר׃ פ

1 wannēfen wann^a‘al dereḵə habāšān wayyēṣē’ ‘wōḡ meleḵə-habāšān liqərā’ṯēnû hû’ wəḵāl-‘ammwō lammiləḥāmâ ’eḏəre‘î:

2 wayyō’mer yəhwâ ’ēlay ’al-tîrā’ ’ōṯwō kî ḇəyāḏəḵā nāṯatî ’ōṯwō wə’eṯ-kāl-‘ammwō wə’eṯ-’arəṣwō wə‘āśîṯā llwō ka’ăšer ‘āśîṯā ləsîḥōn meleḵə hā’ĕmōrî ’ăšer ywōšēḇ bəḥešəbwōn:

3 wayyitēn yəhwâ ’ĕlōhênû bəyāḏēnû gam ’eṯ-‘wōḡ meleḵə-habāšān wə’eṯ-kāl-‘ammwō wannakēhû ‘aḏ-bilətî hišə’îr-lwō śārîḏ:

4 wanniləkōḏ ’eṯ-kāl-‘ārāyw bā‘ēṯ hahiw’ lō’ hāyəṯâ qirəyâ ’ăšer lō’-lāq^aḥənû mē’itām šiššîm ‘îr kāl-ḥeḇel ’arəgōḇ maməleḵeṯ ‘wōḡ babāšān:

5 kāl-’ēlleh ‘ārîm bəṣurwōṯ ḥwōmâ ḡəḇōhâ dəlāṯayim ûḇərîḥa ləḇaḏ mē‘ārê hapərāzî harəbēh mə’ōḏ:

6 wann^aḥărēm ’wōṯām ka’ăšer ‘āśînû ləsîḥōn meleḵə ḥešəbwōn h^aḥărēm kāl-‘îr məṯim hannāšîm wəhaṭṭāf:

7 wəḵāl-habəhēmâ ûšəlal he‘ārîm bazzwōnû lānû:

8 wanniqq^aḥ bā‘ēṯ hahiw’ ’eṯ-hā’āreṣ mîyaḏ šənê maləḵê hā’ĕmōrî ’ăšer bə‘ēḇer hayyarədēn minn^aḥal ’arənōn ‘aḏ-har ḥerəmwōn:

9 ṣîḏōnîm yiqərə’û ləḥerəmwōn śirəyōn wəhā’ĕmōrî yiqərə’û-lwō śənîr:

10 kōl| ‘ārê hammîšōr wəḵāl-hagilə‘āḏ wəḵāl-habāšān ‘aḏ-saləḵâ wə’eḏəre‘î ‘ārê maməleḵeṯ ‘wōḡ babāšān:

11 kî raq-‘wōḡ meleḵə habāšān nišə’ar mîyeṯer hārəfā’îm hinnēh ‘arəśwō ‘ereś barəzel hălōh hiw’ bərabaṯ bənê ‘ammwōn tēš^a‘ ’ammwōṯ ’ārəkāh wə’arəb^a‘ ’ammwōṯ rāḥəbāh bə’ammaṯ-’îš:

12 wə’eṯ-hā’āreṣ hazzō’ṯ yārašənû bā‘ēṯ hahiw’ mē‘ărō‘ēr ’ăšer-‘al-n^aḥal ’arənōn w^aḥăṣî har-hagilə‘āḏ wə‘ārāyw nāṯatî lāru’ûḇēnî¹ wəlagāḏî:

13 wəyeṯer hagilə‘āḏ wəḵāl-habāšān maməleḵeṯ ‘wōḡ nāṯatî l^aḥăṣî šēḇeṭ hamənaššeh kōl ḥeḇel hā’arəgōḇ ləḵāl-habāšān hahû’ yiqqārē’ ’ereṣ rəfā’îm:

14 yā’îr ben-mənaššeh lāq^aḥ ’eṯ-kāl-ḥeḇel ’arəgōḇ ‘aḏ-gəḇûl hagəšûrî wəhamm^a‘ăḵāṯî wayyiqərā’ ’ōṯām ‘al-šəmwō ’eṯ-habāšān ḥaûōṯ yā’îr ‘aḏ hayywōm hazzeh:

15 ûləmāḵîr nāṯatî ’eṯ-hagilə‘āḏ:

16 wəlāru’ûḇēnî¹ wəlagāḏî nāṯatî min-hagilə‘āḏ wə‘aḏ-n^aḥal ’arənōn twōḵə hann^aḥal ûḡəḇul wə‘aḏ yabōq hann^aḥal gəḇûl bənê ‘ammwōn:

17 wəhā‘ărāḇâ wəhayyarədēn ûḡəḇul mikinnereṯ wə‘aḏ yām hā‘ărāḇâ yām hammel^aḥ t^aḥaṯ ’ašədōṯ hapisəgâ mizərāḥâ:

18 wā’ăṣaw ’eṯəḵem bā‘ēṯ hahiw’ lē’mōr yəhwâ ’ĕlōhêḵem nāṯan lāḵem ’eṯ-hā’āreṣ hazzō’ṯ lərišətāh ḥălûṣîm t^a‘aḇərû lifənê ’ăḥêḵem bənê-yiśərā’ēl kāl-bənê-ḥāyil:

19 raq nəšêḵem wəṭapəḵem ûmiqənēḵem yāḏ^a‘ətî kî-miqəneh raḇ lāḵem yēšəḇû bə‘ārêḵem ’ăšer nāṯatî lāḵem:

20 ‘aḏ ’ăšer-yānîḥa yəhwâ| la’ăḥêḵem kāḵem wəyārəšû ḡam-hēm ’eṯ-hā’āreṣ ’ăšer yəhwâ ’ĕlōhêḵem nōṯēn lâem bə‘ēḇer hayyarədēn wəšaḇətem ’îš lîruššāṯwō ’ăšer nāṯatî lāḵem:

21 wə’eṯ-yəhwōšû‘a ṣiûêṯî bā‘ēṯ hahiw’ lē’mōr ‘êneyḵā hārō’ōṯ ’ēṯ kāl-’ăšer ‘āśâ yəhwâ ’ĕlōhêḵem lišənê hamməlāḵîm hā’ēlleh kēn-y^a‘ăśeh yəhwâ ləḵāl-hammaməlāḵwōṯ ’ăšer ’atâ ‘ōḇēr šāmmâ:

22 lō’ tîrā’ûm kî yəhwâ ’ĕlōhêḵem hû’ hanniləḥām lāḵem: s

23 wā’eṯəḥannan ’el-yəhwâ bā‘ēṯ hahiw’ lē’mōr:

24 ’ăḏōnāy yəhwih ’atâ h^aḥillwōṯā ləharə’wōṯ ’eṯ-‘aḇədəḵā ’eṯ-gāḏələḵā wə’eṯ-yāḏəḵā h^aḥăzāqâ ’ăšer mî-’ēl baššāmayim ûḇā’āreṣ ’ăšer-y^a‘ăśeh ḵəm^a‘ăśeyḵā wəḵiḡəḇûrōṯeḵā:

25 ’e‘əbərâ-nnā’ wə’erə’eh ’eṯ-hā’āreṣ haṭṭwōḇâ ’ăšer bə‘ēḇer hayyarədēn hâār haṭṭwōḇ hazzeh wəhalləḇānwōn:

26 wayyiṯə‘abēr yəhwâ bî ləm^a‘anəḵem wəlō’ šām^a‘ ’ēlāy wayyō’mer yəhwâ ’ēlay raḇ-lāḵə ’al-twōsef dabēr ’ēlay ‘wōḏ badāḇār hazzeh:

27 ‘ălēh| rō’š hapisəgâ wəśā’ ‘êneyḵā yāmmâ wəṣāfōnâ wəṯêmānâ ûmizərāḥâ ûrə’ēh ḇə‘êneyḵā kî-lō’ ṯ^a‘ăḇōr ’eṯ-hayyarədēn hazzeh:

28 wəṣaw ’eṯ-yəhwōšu‘a wəḥazzəqēhû wə’amməṣēhû kî-hû’ y^a‘ăḇōr lifənê hā‘ām hazzeh wəhû’ yanəḥîl ’wōṯām ’eṯ-hā’āreṣ ’ăšer tirə’eh:

29 wannēšeḇ bagāyə’ mûl bêṯ pə‘wōr: f