The Paris Psalter: Psalm 124

Verse Indeterminate Saxon

þa þe on drihten heora dædum getreowað,
hi beoð on Sionbeorge swyþe gelice;
ne mæg hine on ealdre ænig onhreran
þe eardfæst byð on Hierusalem.

5

Hi synd mundbeorgas micle ymbutan;
haldeð heora ymbhwyrft ece drihten
of ðisson nu awa to worulde.
Næfre forlæteð lifes drihten
firenfulra tan furðor gangan,

10

þonne he soðfæstra settan wylle.
Ne he soðfæste swylce læteð,
þæt hi to unrihte ahwær willen
handum ræcean, ac he him hraþe gyldeð;
do þu, drihten, wel þam þe gedefe her

15

hiora heortan riht healdað mid gode.
þa ðe gearwe beoð to gramum bendum,
eft hi gelædeð ece drihten
mid þæm þe unriht æghwær wyrceað;
sibb si Israhelum symble ofer ealle.