The Paris Psalter: Psalm 111

Verse Indeterminate Saxon

Eadig byð se wer se þe him ege drihtnes
on ferhðcleofan fæste gestandeð,
and his bebod healdeð bealde mid willan.
He on eorðan byð eadig and spedig,

5

and his cneorisse byð cyn gebletsad.
Him wuldur and wela wunað æt huse,
byð his soþfæstnys swylce mære,
þenden þysse worulde wunaþ ænig dæl.
Leoht wæs on leodum leofum acyðed,

10

þam þe on ðystrum þrage lifdan
and hiora heortan heoldan mid rihte;
milde is on mode mihtig dryhten,
and he ys soðfæst symble æt þearfe.
Glæd man gleawhydig, god and mildheort,

15

seteð soðne dom þurh his sylfes word,
se on ecnysse eadig standeð.
Byð on eceum gemynde æghwylc þæra
þe his soðe and riht symble healdeð,
ne him on hlyste mycelum ondrædeð

20

awiht on ealdre yfeles syððan.
Byð his heorte gearo hyhte to drihtne
getrymed and getyhted, þæt him teonan ne mæg
fæcne ætfæstan feonda ænig,
ac he ealle forsyhð æghwær georne.

25

Se þe his æhta ealle tostredeð
and þearfendum þa gedæleð,
his soðfæstnyss wunað symble oð ende;
byð his horn wended her on wuldur.
Swa þæt synfull gesyhð, sona yrsað,

30

toþum torn þolað, teonum grimetað,
þearle þindeð, oþþæt þonne byð,
þæt fyrenfulra lust fæcne forweorðeð.