‎1 ‏וַֽיְהִי֙ מֵאַ֣חֲרֵי כֵ֔ן וַיַּ֤עַשׂ לוֹ֙ אַבְשָׁל֔וֹם מֶרְכָּבָ֖ה וְסֻסִ֑ים וַחֲמִשִּׁ֥ים אִ֖ישׁ רָצִ֥ים לְפָנָֽיו׃

‎2 ‏וְהִשְׁכִּים֙ אַבְשָׁל֔וֹם וְעָמַ֕ד עַל־יַ֖ד דֶּ֣רֶךְ הַשָּׁ֑עַר וַיְהִ֡י כָּל־הָאִ֣ישׁ אֲשֶֽׁר־יִהְיֶה־לּוֹ־רִיב֩ לָב֨וֹא אֶל־הַמֶּ֜לֶךְ לַמִּשְׁפָּ֗ט וַיִּקְרָ֨א אַבְשָׁל֤וֹם אֵלָיו֙ וַיֹּ֗אמֶר אֵֽי־מִזֶּ֥ה עִיר֙ אַ֔תָּה וַיֹּ֕אמֶר מֵאַחַ֥ד שִׁבְטֵֽי־יִשְׂרָאֵ֖ל עַבְדֶּֽךָ׃

‎3 ‏וַיֹּ֤אמֶר אֵלָיו֙ אַבְשָׁל֔וֹם רְאֵ֥ה דְבָרֶ֖ךָ טוֹבִ֣ים וּנְכֹחִ֑ים וְשֹׁמֵ֥עַ אֵין־לְךָ֖ מֵאֵ֥ת הַמֶּֽלֶךְ׃

‎4 ‏וַיֹּ֙אמֶר֙ אַבְשָׁל֔וֹם מִי־יְשִׂמֵ֥נִי שֹׁפֵ֖ט בָּאָ֑רֶץ וְעָלַ֗י יָב֥וֹא כָּל־אִ֛ישׁ אֲשֶֽׁר־יִהְיֶה־לּוֹ־רִ֥יב וּמִשְׁפָּ֖ט וְהִצְדַּקְתִּֽיו׃

‎5 ‏וְהָיָה֙ בִּקְרָב־אִ֔ישׁ לְהִשְׁתַּחֲוֹ֖ת ל֑וֹ וְשָׁלַ֧ח אֶת־יָד֛וֹ וְהֶחֱזִ֥יק ל֖וֹ וְנָ֥שַׁק לֽוֹ׃

‎6 ‏וַיַּ֨עַשׂ אַבְשָׁל֜וֹם כַּדָּבָ֤ר הַזֶּה֙ לְכָל־יִשְׂרָאֵ֔ל אֲשֶׁר־יָבֹ֥אוּ לַמִּשְׁפָּ֖ט אֶל־הַמֶּ֑לֶךְ וַיְגַנֵּב֙ אַבְשָׁל֔וֹם אֶת־לֵ֖ב אַנְשֵׁ֥י יִשְׂרָאֵֽל׃ פ

‎7 ‏וַיְהִ֕י מִקֵּ֖ץ אַרְבָּעִ֣ים שָׁנָ֑ה וַיֹּ֤אמֶר אַבְשָׁלוֹם֙ אֶל־הַמֶּ֔לֶךְ אֵ֣לֲכָה נָּ֗א וַאֲשַׁלֵּ֛ם אֶת־נִדְרִ֛י אֲשֶׁר־נָדַ֥רְתִּי לַֽיהוָ֖ה בְּחֶבְרֽוֹן׃

‎8 ‏כִּי־נֵ֙דֶר֙ נָדַ֣ר עַבְדְּךָ֔ בְּשִׁבְתִּ֥י בִגְשׁ֛וּר בַּאֲרָ֖ם לֵאמֹ֑ר אִם־ישיב יָשׁ֨וֹב יְשִׁיבֵ֤נִי יְהוָה֙ יְר֣וּשָׁלִַ֔ם וְעָבַדְתִּ֖י אֶת־יְהוָֽה׃

‎9 ‏וַיֹּֽאמֶר־ל֥וֹ הַמֶּ֖לֶךְ לֵ֣ךְ בְּשָׁל֑וֹם וַיָּ֖קָם וַיֵּ֥לֶךְ חֶבְרֽוֹנָה׃ פ

‎10 ‏וַיִּשְׁלַ֤ח אַבְשָׁלוֹם֙ מְרַגְּלִ֔ים בְּכָל־שִׁבְטֵ֥י יִשְׂרָאֵ֖ל לֵאמֹ֑ר כְּשָׁמְעֲכֶם֙ אֶת־ק֣וֹל הַשֹּׁפָ֔ר וַאֲמַרְתֶּ֕ם מָלַ֥ךְ אַבְשָׁל֖וֹם בְּחֶבְרֽוֹן׃

‎11 ‏וְאֶת־אַבְשָׁל֗וֹם הָלְכ֞וּ מָאתַ֤יִם אִישׁ֙ מִיר֣וּשָׁלִַ֔ם קְרֻאִ֖ים וְהֹלְכִ֣ים לְתֻמָּ֑ם וְלֹ֥א יָדְע֖וּ כָּל־דָּבָֽר׃

‎12 ‏וַיִּשְׁלַ֣ח אַ֠בְשָׁלוֹם אֶת־אֲחִיתֹ֨פֶל הַגִּֽילֹנִ֜י יוֹעֵ֣ץ דָּוִ֗ד מֵֽעִירוֹ֙ מִגִּלֹ֔ה בְּזָבְח֖וֹ אֶת־הַזְּבָחִ֑ים וַיְהִ֤י הַקֶּ֙שֶׁר֙ אַמִּ֔ץ וְהָעָ֛ם הוֹלֵ֥ךְ וָרָ֖ב אֶת־אַבְשָׁלֽוֹם׃

‎13 ‏וַיָּבֹא֙ הַמַּגִּ֔יד אֶל־דָּוִ֖ד לֵאמֹ֑ר הָיָ֛ה לֶב־אִ֥ישׁ יִשְׂרָאֵ֖ל אַחֲרֵ֥י אַבְשָׁלֽוֹם׃

‎14 ‏וַיֹּ֣אמֶר דָּ֠וִד לְכָל־עֲבָדָ֨יו אֲשֶׁר־אִתּ֤וֹ בִירוּשָׁלִַ֙ם֙ ק֣וּמוּ וְנִבְרָ֔חָה כִּ֛י לֹא־תִֽהְיֶה־לָּ֥נוּ פְלֵיטָ֖ה מִפְּנֵ֣י אַבְשָׁל֑וֹם מַהֲר֣וּ לָלֶ֗כֶת פֶּן־יְמַהֵ֤ר וְהִשִּׂגָ֙נוּ֙ וְהִדִּ֤יחַ עָלֵ֙ינוּ֙ אֶת־הָ֣רָעָ֔ה וְהִכָּ֥ה הָעִ֖יר לְפִי־חָֽרֶב׃

‎15 ‏וַיֹּאמְר֥וּ עַבְדֵֽי־הַמֶּ֖לֶךְ אֶל־הַמֶּ֑לֶךְ כְּכֹ֧ל אֲשֶׁר־יִבְחַ֛ר אֲדֹנִ֥י הַמֶּ֖לֶךְ הִנֵּ֥ה עֲבָדֶֽיךָ׃

‎16 ‏וַיֵּצֵ֥א הַמֶּ֛לֶךְ וְכָל־בֵּית֖וֹ בְּרַגְלָ֑יו וַיַּעֲזֹ֣ב הַמֶּ֗לֶךְ אֵ֣ת עֶ֧שֶׂר נָשִׁ֛ים פִּֽלַגְשִׁ֖ים לִשְׁמֹ֥ר הַבָּֽיִת׃

‎17 ‏וַיֵּצֵ֥א הַמֶּ֛לֶךְ וְכָל־הָעָ֖ם בְּרַגְלָ֑יו וַיַּעַמְד֖וּ בֵּ֥ית הַמֶּרְחָֽק׃

‎18 ‏וְכָל־עֲבָדָיו֙ עֹבְרִ֣ים עַל־יָד֔וֹ וְכָל־הַכְּרֵתִ֖י וְכָל־הַפְּלֵתִ֑י וְכָֽל־הַגִּתִּ֞ים שֵׁשׁ־מֵא֣וֹת אִ֗ישׁ אֲשֶׁר־בָּ֤אוּ בְרַגְלוֹ֙ מִגַּ֔ת עֹבְרִ֖ים עַל־פְּנֵ֥י הַמֶּֽלֶךְ׃

‎19 ‏וַיֹּ֤אמֶר הַמֶּ֙לֶךְ֙ אֶל־אִתַּ֣י הַגִּתִּ֔י לָ֧מָּה תֵלֵ֛ךְ גַּם־אַתָּ֖ה אִתָּ֑נוּ שׁ֣וּב וְשֵׁ֤ב עִם־הַמֶּ֙לֶךְ֙ כִּֽי־נָכְרִ֣י אַ֔תָּה וְגַם־גֹּלֶ֥ה אַתָּ֖ה לִמְקוֹמֶֽךָ׃

‎20 ‏תְּמ֣וֹל׀ בּוֹאֶ֗ךָ וְהַיּ֞וֹם אנועך אֲנִֽיעֲךָ֤ עִמָּ֙נוּ֙ לָלֶ֔כֶת וַאֲנִ֣י הוֹלֵ֔ךְ עַ֥ל אֲשֶׁר־אֲנִ֖י הוֹלֵ֑ךְ שׁ֣וּב וְהָשֵׁ֧ב אֶת־אַחֶ֛יךָ עִמָּ֖ךְ חֶ֥סֶד וֶאֱמֶֽת׃

‎21 ‏וַיַּ֧עַן אִתַּ֛י אֶת־הַמֶּ֖לֶךְ וַיֹּאמַ֑ר חַי־יְהוָ֗ה וְחֵי֙ אֲדֹנִ֣י הַמֶּ֔לֶךְ כִּ֠י אִם־בִּמְק֞וֹם אֲשֶׁ֥ר יִֽהְיֶה־שָּׁ֣ם׀ אֲדֹנִ֣י הַמֶּ֗לֶךְ אִם־לְמָ֙וֶת֙ אִם־לְחַיִּ֔ים כִּי־שָׁ֖ם יִהְיֶ֥ה עַבְדֶּֽךָ׃

‎22 ‏וַיֹּ֧אמֶר דָּוִ֛ד אֶל־אִתַּ֖י לֵ֣ךְ וַעֲבֹ֑ר וַֽיַּעֲבֹ֞ר אִתַּ֤י הַגִּתִּי֙ וְכָל־אֲנָשָׁ֔יו וְכָל־הַטַּ֖ף אֲשֶׁ֥ר אִתּֽוֹ׃

‎23 ‏וְכָל־הָאָ֗רֶץ בּוֹכִים֙ ק֣וֹל גָּד֔וֹל וְכָל־הָעָ֖ם עֹֽבְרִ֑ים וְהַמֶּ֗לֶךְ עֹבֵר֙ בְּנַ֣חַל קִדְר֔וֹן וְכָל־הָעָם֙ עֹבְרִ֔ים עַל־פְּנֵי־דֶ֖רֶךְ אֶת־הַמִּדְבָּֽר׃

‎24 ‏וְהִנֵּ֨ה גַם־צָד֜וֹק וְכָֽל־הַלְוִיִּ֣ם אִתּ֗וֹ נֹֽשְׂאִים֙ אֶת־אֲרוֹן֙ בְּרִ֣ית הָאֱלֹהִ֔ים וַיַּצִּ֙קוּ֙ אֶת־אֲר֣וֹן הָאֱלֹהִ֔ים וַיַּ֖עַל אֶבְיָתָ֑ר עַד־תֹּ֥ם כָּל־הָעָ֖ם לַעֲב֥וֹר מִן־הָעִֽיר׃

‎25 ‏וַיֹּ֤אמֶר הַמֶּ֙לֶךְ֙ לְצָד֔וֹק הָשֵׁ֛ב אֶת־אֲר֥וֹן הָאֱלֹהִ֖ים הָעִ֑יר אִם־אֶמְצָ֥א חֵן֙ בְּעֵינֵ֣י יְהוָ֔ה וֶהֱשִׁבַ֕נִי וְהִרְאַ֥נִי אֹת֖וֹ וְאֶת־נָוֵֽהוּ׃

‎26 ‏וְאִם֙ כֹּ֣ה יֹאמַ֔ר לֹ֥א חָפַ֖צְתִּי בָּ֑ךְ הִנְנִ֕י יַֽעֲשֶׂה־לִּ֕י כַּאֲשֶׁ֥ר ט֖וֹב בְּעֵינָֽיו׃ ס

‎27 ‏וַיֹּ֤אמֶר הַמֶּ֙לֶךְ֙ אֶל־צָד֣וֹק הַכֹּהֵ֔ן הֲרוֹאֶ֣ה אַתָּ֔ה שֻׁ֥בָה הָעִ֖יר בְּשָׁל֑וֹם וַאֲחִימַ֨עַץ בִּנְךָ֜ וִיהוֹנָתָ֧ן בֶּן־אֶבְיָתָ֛ר שְׁנֵ֥י בְנֵיכֶ֖ם אִתְּכֶֽם׃

‎28 ‏רְאוּ֙ אָנֹכִ֣י מִתְמַהְמֵ֔הַּ בעברות בְּעַֽרְב֖וֹת הַמִּדְבָּ֑ר עַ֣ד בּ֥וֹא דָבָ֛ר מֵעִמָּכֶ֖ם לְהַגִּ֥יד לִֽי׃

‎29 ‏וַיָּ֨שֶׁב צָד֧וֹק וְאֶבְיָתָ֛ר אֶת־אֲר֥וֹן הָאֱלֹהִ֖ים יְרוּשָׁלִָ֑ם וַיֵּשְׁב֖וּ שָֽׁם׃

‎30 ‏וְדָוִ֡ד עֹלֶה֩ בְמַעֲלֵ֨ה הַזֵּיתִ֜ים עֹלֶ֣ה׀ וּבוֹכֶ֗ה וְרֹ֥אשׁ לוֹ֙ חָפ֔וּי וְה֖וּא הֹלֵ֣ךְ יָחֵ֑ף וְכָל־הָעָ֣ם אֲשֶׁר־אִתּ֗וֹ חָפוּ֙ אִ֣ישׁ רֹאשׁ֔וֹ וְעָל֥וּ עָלֹ֖ה וּבָכֹֽה׃

‎31 ‏וְדָוִד֙ הִגִּ֣יד לֵאמֹ֔ר אֲחִיתֹ֥פֶל בַּקֹּשְׁרִ֖ים עִם־אַבְשָׁל֑וֹם וַיֹּ֣אמֶר דָּוִ֔ד סַכֶּל־נָ֛א אֶת־עֲצַ֥ת אֲחִיתֹ֖פֶל יְהוָֽה׃

‎32 ‏וַיְהִ֤י דָוִד֙ בָּ֣א עַד־הָרֹ֔אשׁ אֲשֶֽׁר־יִשְׁתַּחֲוֶ֥ה שָׁ֖ם לֵאלֹהִ֑ים וְהִנֵּ֤ה לִקְרָאתוֹ֙ חוּשַׁ֣י הָאַרְכִּ֔י קָר֙וּעַ֙ כֻּתָּנְתּ֔וֹ וַאֲדָמָ֖ה עַל־רֹאשֽׁוֹ׃

‎33 ‏וַיֹּ֥אמֶר ל֖וֹ דָּוִ֑ד אִ֚ם עָבַ֣רְתָּ אִתִּ֔י וְהָיִ֥תָ עָלַ֖י לְמַשָּֽׂא׃

‎34 ‏וְאִם־הָעִ֣יר תָּשׁ֗וּב וְאָמַרְתָּ֤ לְאַבְשָׁלוֹם֙ עַבְדְּךָ֙ אֲנִ֤י הַמֶּ֙לֶךְ֙ אֶֽהְיֶ֔ה עֶ֣בֶד אָבִ֤יךָ וַֽאֲנִי֙ מֵאָ֔ז וְעַתָּ֖ה וַאֲנִ֣י עַבְדֶּ֑ךָ וְהֵפַרְתָּ֣ה לִ֔י אֵ֖ת עֲצַ֥ת אֲחִיתֹֽפֶל׃

‎35 ‏וַהֲל֤וֹא עִמְּךָ֙ שָׁ֔ם צָד֥וֹק וְאֶבְיָתָ֖ר הַכֹּהֲנִ֑ים וְהָיָ֗ה כָּל־הַדָּבָר֙ אֲשֶׁ֤ר תִּשְׁמַע֙ מִבֵּ֣ית הַמֶּ֔לֶךְ תַּגִּ֕יד לְצָד֥וֹק וּלְאֶבְיָתָ֖ר הַכֹּהֲנִֽים׃

‎36 ‏הִנֵּה־שָׁ֤ם עִמָּם֙ שְׁנֵ֣י בְנֵיהֶ֔ם אֲחִימַ֣עַץ לְצָד֔וֹק וִיהוֹנָתָ֖ן לְאֶבְיָתָ֑ר וּשְׁלַחְתֶּ֤ם בְּיָדָם֙ אֵלַ֔י כָּל־דָּבָ֖ר אֲשֶׁ֥ר תִּשְׁמָֽעוּ׃

‎37 ‏וַיָּבֹ֥א חוּשַׁ֛י רֵעֶ֥ה דָוִ֖ד הָעִ֑יר וְאַבְשָׁלֹ֔ם יָבֹ֖א יְרוּשָׁלִָֽם׃

1 wayəhî mē’^aḥărê ḵēn wayy^a‘aś lwō ’aḇəšālwōm merəkāḇâ wəsusîm w^aḥămiššîm ’îš rāṣîm ləfānāyw:

2 wəhišəkîm ’aḇəšālwōm wə‘āmaḏ ‘al-yaḏ dereḵə haššā‘ar wayəhî kāl-hā’îš ’ăšer-yihəyeh-llwō-rîḇ lāḇwō’ ’el-hammeleḵə lammišəpāṭ wayyiqərā’ ’aḇəšālwōm ’ēlāyw wayyō’mer ’ê-mizzeh ‘îr ’atâ wayyō’mer mē’^aḥaḏ šiḇəṭê-yiśərā’ēl ‘aḇədeḵā:

3 wayyō’mer ’ēlāyw ’aḇəšālwōm rə’ēh ḏəḇāreḵā ṭwōḇîm ûnəḵōḥîm wəšōmē‘a ’ên-ləḵā mē’ēṯ hammeleḵə:

4 wayyō’mer ’aḇəšālwōm mî-yəśimēnî šōfēṭ bā’āreṣ wə‘ālay yāḇwō’ kāl-’îš ’ăšer-yihəyeh-llwō-rîḇ ûmišəpāṭ wəhiṣədaqətîw:

5 wəhāyâ biqərāḇ-’îš ləhišət^aḥăwōṯ lwō wəšāl^aḥ ’eṯ-yāḏwō wəheḥĕzîq lwō wənāšaq lwō:

6 wayy^a‘aś ’aḇəšālwōm kadāḇār hazzeh ləḵāl-yiśərā’ēl ’ăšer-yāḇō’û lammišəpāṭ ’el-hammeleḵə wayəḡannēḇ ’aḇəšālwōm ’eṯ-lēḇ ’anəšê yiśərā’ēl: f

7 wayəhî miqqēṣ ’arəbā‘îm šānâ wayyō’mer ’aḇəšālwōm ’el-hammeleḵə ’ēlăḵâ nnā’ wa’ăšallēm ’eṯ-niḏərî ’ăšer-nāḏarətî layhwâ bəḥeḇərwōn:

8 kî-nēḏer nāḏar ‘aḇədəḵā bəšiḇətî ḇiḡəšûr ba’ărām lē’mōr ’im-yāšîḇ yāšwōḇ yəšîḇēnî yəhwâ yərûšālaim wə‘āḇaḏətî ’eṯ-yəhwâ:

9 wayyō’mer-lwō hammeleḵə lēḵə bəšālwōm wayyāqām wayyēleḵə ḥeḇərwōnâ: f

10 wayyišəl^aḥ ’aḇəšālwōm məragəlîm bəḵāl-šiḇəṭê yiśərā’ēl lē’mōr kəšāmə‘ăḵem ’eṯ-qwōl haššōfār wa’ămarətem mālaḵə ’aḇəšālwōm bəḥeḇərwōn:

11 wə’eṯ-’aḇəšālwōm hāləḵû mā’ṯayim ’îš mîrûšālaim qəru’îm wəhōləḵîm ləṯummām wəlō’ yāḏə‘û kāl-dāḇār:

12 wayyišəl^aḥ ’aḇəšālwōm ’eṯ-’ăḥîṯōfel hagîlōnî ywō‘ēṣ dāwiḏ mē‘îrwō migilōh bəzāḇəḥwō ’eṯ-hazzəḇāḥîm wayəhî haqqešer ’ammiṣ wəhā‘ām hwōlēḵə wārāḇ ’eṯ-’aḇəšālwōm:

13 wayyāḇō’ hammagîḏ ’el-dāwiḏ lē’mōr hāyâ leḇ-’îš yiśərā’ēl ’^aḥărê ’aḇəšālwōm:

14 wayyō’mer dāwiḏ ləḵāl-‘ăḇāḏāyw ’ăšer-’itwō ḇîrûšālaim qûmû wəniḇərāḥâ kî lō’-ṯihəyeh-llānû fəlêṭâ mipənê ’aḇəšālwōm mahărû lāleḵeṯ pen-yəmahēr wəhiśśiḡānû wəhidîḥa ‘ālênû ’eṯ-hārā‘â wəhikâ hā‘îr ləfî-ḥāreḇ:

15 wayyō’mərû ‘aḇəḏê-hammeleḵə ’el-hammeleḵə kəḵōl ’ăšer-yiḇəḥar ’ăḏōnî hammeleḵə hinnēh ‘ăḇāḏeyḵā:

16 wayyēṣē’ hammeleḵə wəḵāl-bêṯwō bəraḡəlāyw wayy^a‘ăzōḇ hammeleḵə ’ēṯ ‘eśer nāšîm pilaḡəšîm lišəmōr habāyiṯ:

17 wayyēṣē’ hammeleḵə wəḵāl-hā‘ām bəraḡəlāyw wayy^a‘aməḏû bêṯ hammerəḥāq:

18 wəḵāl-‘ăḇāḏāyw ‘ōḇərîm ‘al-yāḏwō wəḵāl-hakərēṯî wəḵāl-hapəlēṯî wəḵāl-hagitîm šēš-mē’wōṯ ’îš ’ăšer-bā’û ḇəraḡəlwō migaṯ ‘ōḇərîm ‘al-pənê hammeleḵə:

19 wayyō’mer hammeleḵə ’el-’itay hagitî lāmmâ ṯēlēḵə gam-’atâ ’itānû šûḇ wəšēḇ ‘im-hammeleḵə kî-nāḵərî ’atâ wəḡam-gōleh ’atâ liməqwōmeḵā:

20 təmwōl| bwō’eḵā wəhayywōm ’ănwō‘ăḵā ’ănî‘ăḵā ‘immānû lāleḵeṯ wa’ănî hwōlēḵə ‘al ’ăšer-’ănî hwōlēḵə šûḇ wəhāšēḇ ’eṯ-’^aḥeyḵā ‘immāḵə ḥeseḏ we’ĕmeṯ:

21 wayy^a‘an ’itay ’eṯ-hammeleḵə wayyō’mar ḥay-yəhwâ wəḥê ’ăḏōnî hammeleḵə kî ’im-biməqwōm ’ăšer yihəyeh-ššām| ’ăḏōnî hammeleḵə ’im-ləmāweṯ ’im-ləḥayyîm kî-šām yihəyeh ‘aḇədeḵā:

22 wayyō’mer dāwiḏ ’el-’itay lēḵə w^a‘ăḇōr wayy^a‘ăḇōr ’itay hagitî wəḵāl-’ănāšāyw wəḵāl-haṭṭaf ’ăšer ’itwō:

23 wəḵāl-hā’āreṣ bwōḵîm qwōl gāḏwōl wəḵāl-hā‘ām ‘ōḇərîm wəhammeleḵə ‘ōḇēr bən^aḥal qiḏərwōn wəḵāl-hā‘ām ‘ōḇərîm ‘al-pənê-ḏereḵə ’eṯ-hammiḏəbār:

24 wəhinnēh ḡam-ṣāḏwōq wəḵāl-haləwîyim ’itwō nōśə’îm ’eṯ-’ărwōn bərîṯ hā’ĕlōhîm wayyaṣṣiqû ’eṯ-’ărwōn hā’ĕlōhîm wayy^a‘al ’eḇəyāṯār ‘aḏ-tōm kāl-hā‘ām l^a‘ăḇwōr min-hā‘îr:

25 wayyō’mer hammeleḵə ləṣāḏwōq hāšēḇ ’eṯ-’ărwōn hā’ĕlōhîm hā‘îr ’im-’eməṣā’ ḥēn bə‘ênê yəhwâ wehĕšiḇanî wəhirə’anî ’ōṯwō wə’eṯ-nāwēhû:

26 wə’im kōh yō’mar lō’ ḥāfaṣətî bāḵə hinənî y^a‘ăśeh-llî ka’ăšer ṭwōḇ bə‘ênāyw: s

27 wayyō’mer hammeleḵə ’el-ṣāḏwōq hakōhēn hărwō’eh ’atâ šuḇâ hā‘îr bəšālwōm wa’ăḥîm^a‘aṣ binəḵā wîhwōnāṯān ben-’eḇəyāṯār šənê ḇənêḵem ’itəḵem:

28 rə’û ’ānōḵî miṯəmahəmēhha bə‘aḇərwōṯ bə‘arəḇwōṯ hammiḏəbār ‘aḏ bwō’ ḏāḇār mē‘immāḵem ləhagîḏ lî:

29 wayyāšeḇ ṣāḏwōq wə’eḇəyāṯār ’eṯ-’ărwōn hā’ĕlōhîm yərûšālāim wayyēšəḇû šām:

30 wəḏāwiḏ ‘ōleh ḇəm^a‘ălēh hazzêṯîm ‘ōleh| ûḇwōḵeh wərō’š lwō ḥāfûy wəhû’ hōlēḵə yāḥēf wəḵāl-hā‘ām ’ăšer-’itwō ḥāfû ’îš rō’šwō wə‘ālû ‘ālōh ûḇāḵōh:

31 wəḏāwiḏ higîḏ lē’mōr ’ăḥîṯōfel baqqōšərîm ‘im-’aḇəšālwōm wayyō’mer dāwiḏ sakel-nā’ ’eṯ-‘ăṣaṯ ’ăḥîṯōfel yəhwâ:

32 wayəhî ḏāwiḏ bā’ ‘aḏ-hārō’š ’ăšer-yišət^aḥăweh šām lē’lōhîm wəhinnēh liqərā’ṯwō ḥûšay hā’arəkî qārû‘a kutānətwō wa’ăḏāmâ ‘al-rō’šwō:

33 wayyō’mer lwō dāwiḏ ’im ‘āḇarətā ’itî wəhāyiṯā ‘ālay ləmaśśā’:

34 wə’im-hā‘îr tāšûḇ wə’āmarətā lə’aḇəšālwōm ‘aḇədəḵā ’ănî hammeleḵə ’ehəyeh ‘eḇeḏ ’āḇîḵā wa’ănî mē’āz wə‘atâ wa’ănî ‘aḇədeḵā wəhēfarətâ lî ’ēṯ ‘ăṣaṯ ’ăḥîṯōfel:

35 wahălwō’ ‘imməḵā šām ṣāḏwōq wə’eḇəyāṯār hakōhănîm wəhāyâ kāl-hadāḇār ’ăšer tišəm^a‘ mibêṯ hammeleḵə tagîḏ ləṣāḏwōq ûlə’eḇəyāṯār hakōhănîm:

36 hinnēh-šām ‘immām šənê ḇənêhem ’ăḥîm^a‘aṣ ləṣāḏwōq wîhwōnāṯān lə’eḇəyāṯār ûšəl^aḥətem bəyāḏām ’ēlay kāl-dāḇār ’ăšer tišəmā‘û:

37 wayyāḇō’ ḥûšay rē‘eh ḏāwiḏ hā‘îr wə’aḇəšālōm yāḇō’ yərûšālāim: