‎1 ‏וַיִּשְׁלַ֧ח יְהוָ֛ה אֶת־נָתָ֖ן אֶל־דָּוִ֑ד וַיָּבֹ֣א אֵלָ֗יו וַיֹּ֤אמֶר לוֹ֙ שְׁנֵ֣י אֲנָשִׁ֗ים הָיוּ֙ בְּעִ֣יר אֶחָ֔ת אֶחָ֥ד עָשִׁ֖יר וְאֶחָ֥ד רָֽאשׁ׃

‎2 ‏לְעָשִׁ֗יר הָיָ֛ה צֹ֥אן וּבָקָ֖ר הַרְבֵּ֥ה מְאֹֽד׃

‎3 ‏וְלָרָ֣שׁ אֵֽין־כֹּ֗ל כִּי֩ אִם־כִּבְשָׂ֨ה אַחַ֤ת קְטַנָּה֙ אֲשֶׁ֣ר קָנָ֔ה וַיְחַיֶּ֕הָ וַתִּגְדַּ֥ל עִמּ֛וֹ וְעִם־בָּנָ֖יו יַחְדָּ֑ו מִפִּתּ֨וֹ תֹאכַ֜ל וּמִכֹּס֤וֹ תִשְׁתֶּה֙ וּבְחֵיק֣וֹ תִשְׁכָּ֔ב וַתְּהִי־ל֖וֹ כְּבַֽת׃

‎4 ‏וַיָּ֣בֹא הֵלֶךְ֮ לְאִ֣ישׁ הֶֽעָשִׁיר֒ וַיַּחְמֹ֗ל לָקַ֤חַת מִצֹּאנוֹ֙ וּמִבְּקָר֔וֹ לַעֲשׂ֕וֹת לָאֹרֵ֖חַ הַבָּא־ל֑וֹ וַיִּקַּ֗ח אֶת־כִּבְשַׂת֙ הָאִ֣ישׁ הָרָ֔אשׁ וַֽיַּעֲשֶׂ֔הָ לָאִ֖ישׁ הַבָּ֥א אֵלָֽיו׃

‎5 ‏וַיִּֽחַר־אַ֥ף דָּוִ֛ד בָּאִ֖ישׁ מְאֹ֑ד וַיֹּ֙אמֶר֙ אֶל־נָתָ֔ן חַי־יְהוָ֕ה כִּ֣י בֶן־מָ֔וֶת הָאִ֖ישׁ הָעֹשֶׂ֥ה זֹֽאת׃

‎6 ‏וְאֶת־הַכִּבְשָׂ֖ה יְשַׁלֵּ֣ם אַרְבַּעְתָּ֑יִם עֵ֗קֶב אֲשֶׁ֤ר עָשָׂה֙ אֶת־הַדָּבָ֣ר הַזֶּ֔ה וְעַ֖ל אֲשֶׁ֥ר לֹֽא־חָמָֽל׃

‎7 ‏וַיֹּ֧אמֶר נָתָ֛ן אֶל־דָּוִ֖ד אַתָּ֣ה הָאִ֑ישׁ כֹּה־אָמַ֨ר יְהוָ֜ה אֱלֹהֵ֣י יִשְׂרָאֵ֗ל אָנֹכִ֞י מְשַׁחְתִּ֤יךָֽ לְמֶ֙לֶךְ֙ עַל־יִשְׂרָאֵ֔ל וְאָנֹכִ֥י הִצַּלְתִּ֖יךָ מִיַּ֥ד שָׁאֽוּל׃

‎8 ‏וָאֶתְּנָ֨ה לְךָ֜ אֶת־בֵּ֣ית אֲדֹנֶ֗יךָ וְאֶת־נְשֵׁ֤י אֲדֹנֶ֙יךָ֙ בְּחֵיקֶ֔ךָ וָאֶתְּנָ֣ה לְךָ֔ אֶת־בֵּ֥ית יִשְׂרָאֵ֖ל וִֽיהוּדָ֑ה וְאִ֨ם־מְעָ֔ט וְאֹסִ֥פָה לְּךָ֖ כָּהֵ֥נָּה וְכָהֵֽנָּה׃

‎9 ‏מַדּ֜וּעַ בָּזִ֣יתָ׀ אֶת־דְּבַ֣ר יְהוָ֗ה לַעֲשׂ֣וֹת הָרַע֮ בעינו בְּעֵינַי֒ אֵ֣ת אוּרִיָּ֤ה הַֽחִתִּי֙ הִכִּ֣יתָ בַחֶ֔רֶב וְאֶ֨ת־אִשְׁתּ֔וֹ לָקַ֥חְתָּ לְּךָ֖ לְאִשָּׁ֑ה וְאֹת֣וֹ הָרַ֔גְתָּ בְּחֶ֖רֶב בְּנֵ֥י עַמּֽוֹן׃

‎10 ‏וְעַתָּ֗ה לֹא־תָס֥וּר חֶ֛רֶב מִבֵּיתְךָ֖ עַד־עוֹלָ֑ם עֵ֚קֶב כִּ֣י בְזִתָ֔נִי וַתִּקַּ֗ח אֶת־אֵ֙שֶׁת֙ אוּרִיָּ֣ה הַחִתִּ֔י לִהְי֥וֹת לְךָ֖ לְאִשָּֽׁה׃ ס

‎11 ‏כֹּ֣ה׀ אָמַ֣ר יְהוָ֗ה הִנְנִי֩ מֵקִ֨ים עָלֶ֤יךָ רָעָה֙ מִבֵּיתֶ֔ךָ וְלָקַחְתִּ֤י אֶת־נָשֶׁ֙יךָ֙ לְעֵינֶ֔יךָ וְנָתַתִּ֖י לְרֵעֶ֑יךָ וְשָׁכַב֙ עִם־נָשֶׁ֔יךָ לְעֵינֵ֖י הַשֶּׁ֥מֶשׁ הַזֹּֽאת׃

‎12 ‏כִּ֥י אַתָּ֖ה עָשִׂ֣יתָ בַסָּ֑תֶר וַאֲנִ֗י אֶעֱשֶׂה֙ אֶת־הַדָּבָ֣ר הַזֶּ֔ה נֶ֥גֶד כָּל־יִשְׂרָאֵ֖ל וְנֶ֥גֶד הַשָּֽׁמֶשׁ׃ ס

‎13 ‏וַיֹּ֤אמֶר דָּוִד֙ אֶל־נָתָ֔ן חָטָ֖אתִי לַֽיהוָ֑ה סוַיֹּ֨אמֶר נָתָ֜ן אֶל־דָּוִ֗ד גַּם־יְהוָ֛ה הֶעֱבִ֥יר חַטָּאתְךָ֖ לֹ֥א תָמֽוּת׃

‎14 ‏אֶ֗פֶס כִּֽי־נִאֵ֤ץ נִאַ֙צְתָּ֙ אֶת־אֹיְבֵ֣י יְהוָ֔ה בַּדָּבָ֖ר הַזֶּ֑ה גַּ֗ם הַבֵּ֛ן הַיִּלּ֥וֹד לְךָ֖ מ֥וֹת יָמֽוּת׃

‎15 ‏וַיֵּ֥לֶךְ נָתָ֖ן אֶל־בֵּית֑וֹ וַיִּגֹּ֣ף יְהוָ֗ה אֶת־הַיֶּ֜לֶד אֲשֶׁ֨ר יָלְדָ֧ה אֵֽשֶׁת־אוּרִיָּ֛ה לְדָוִ֖ד וַיֵּאָנַֽשׁ׃

‎16 ‏וַיְבַקֵּ֥שׁ דָּוִ֛ד אֶת־הָאֱלֹהִ֖ים בְּעַ֣ד הַנָּ֑עַר וַיָּ֤צָם דָּוִד֙ צ֔וֹם וּבָ֥א וְלָ֖ן וְשָׁכַ֥ב אָֽרְצָה׃

‎17 ‏וַיָּקֻ֜מוּ זִקְנֵ֤י בֵיתוֹ֙ עָלָ֔יו לַהֲקִימ֖וֹ מִן־הָאָ֑רֶץ וְלֹ֣א אָבָ֔ה וְלֹֽא־בָרָ֥א אִתָּ֖ם לָֽחֶם׃

‎18 ‏וַיְהִ֛י בַּיּ֥וֹם הַשְּׁבִיעִ֖י וַיָּ֣מָת הַיָּ֑לֶד וַיִּֽרְאוּ֩ עַבְדֵ֨י דָוִ֜ד לְהַגִּ֥יד ל֣וֹ׀ כִּי־מֵ֣ת הַיֶּ֗לֶד כִּ֤י אָֽמְרוּ֙ הִנֵּה֩ בִהְי֨וֹת הַיֶּ֜לֶד חַ֗י דִּבַּ֤רְנוּ אֵלָיו֙ וְלֹא־שָׁמַ֣ע בְּקוֹלֵ֔נוּ וְאֵ֨יךְ נֹאמַ֥ר אֵלָ֛יו מֵ֥ת הַיֶּ֖לֶד וְעָשָׂ֥ה רָעָֽה׃

‎19 ‏וַיַּ֣רְא דָּוִ֗ד כִּ֤י עֲבָדָיו֙ מִֽתְלַחֲשִׁ֔ים וַיָּ֥בֶן דָּוִ֖ד כִּ֣י מֵ֣ת הַיָּ֑לֶד וַיֹּ֨אמֶר דָּוִ֧ד אֶל־עֲבָדָ֛יו הֲמֵ֥ת הַיֶּ֖לֶד וַיֹּ֥אמְרוּ מֵֽת׃

‎20 ‏וַיָּקָם֩ דָּוִ֨ד מֵהָאָ֜רֶץ וַיִּרְחַ֣ץ וַיָּ֗סֶךְ וַיְחַלֵּף֙ שמלתו שִׂמְלֹתָ֔יו וַיָּבֹ֥א בֵית־יְהוָ֖ה וַיִּשְׁתָּ֑חוּ וַיָּבֹא֙ אֶל־בֵּית֔וֹ וַיִּשְׁאַ֕ל וַיָּשִׂ֥ימוּ ל֛וֹ לֶ֖חֶם וַיֹּאכַֽל׃

‎21 ‏וַיֹּאמְר֤וּ עֲבָדָיו֙ אֵלָ֔יו מָֽה־הַדָּבָ֥ר הַזֶּ֖ה אֲשֶׁ֣ר עָשִׂ֑יתָה בַּעֲב֞וּר הַיֶּ֤לֶד חַי֙ צַ֣מְתָּ וַתֵּ֔בְךְּ וְכַֽאֲשֶׁר֙ מֵ֣ת הַיֶּ֔לֶד קַ֖מְתָּ וַתֹּ֥אכַל לָֽחֶם׃

‎22 ‏וַיֹּ֕אמֶר בְּעוֹד֙ הַיֶּ֣לֶד חַ֔י צַ֖מְתִּי וָֽאֶבְכֶּ֑ה כִּ֤י אָמַ֙רְתִּי֙ מִ֣י יוֹדֵ֔עַ יחנני וְחַנַּ֥נִי יְהוָ֖ה וְחַ֥י הַיָּֽלֶד׃

‎23 ‏וְעַתָּ֣ה׀ מֵ֗ת לָ֤מָּה זֶּה֙ אֲנִ֣י צָ֔ם הַאוּכַ֥ל לַהֲשִׁיב֖וֹ ע֑וֹד אֲנִי֙ הֹלֵ֣ךְ אֵלָ֔יו וְה֖וּא לֹֽא־יָשׁ֥וּב אֵלָֽי׃

‎24 ‏וַיְנַחֵ֣ם דָּוִ֗ד אֵ֚ת בַּת־שֶׁ֣בַע אִשְׁתּ֔וֹ וַיָּבֹ֥א אֵלֶ֖יהָ וַיִּשְׁכַּ֣ב עִמָּ֑הּ וַתֵּ֣לֶד בֵּ֗ן ויקרא וַתִּקְרָ֤א אֶת־שְׁמוֹ֙ שְׁלֹמֹ֔ה וַיהוָ֖ה אֲהֵבֽוֹ׃

‎25 ‏וַיִּשְׁלַ֗ח בְּיַד֙ נָתָ֣ן הַנָּבִ֔יא וַיִּקְרָ֥א אֶת־שְׁמ֖וֹ יְדִ֣ידְיָ֑הּ בַּעֲב֖וּר יְהוָֽה׃ פ

‎26 ‏וַיִּלָּ֣חֶם יוֹאָ֔ב בְּרַבַּ֖ת בְּנֵ֣י עַמּ֑וֹן וַיִּלְכֹּ֖ד אֶת־עִ֥יר הַמְּלוּכָֽה׃

‎27 ‏וַיִּשְׁלַ֥ח יוֹאָ֛ב מַלְאָכִ֖ים אֶל־דָּוִ֑ד וַיֹּ֙אמֶר֙ נִלְחַ֣מְתִּי בְרַבָּ֔ה גַּם־לָכַ֖דְתִּי אֶת־עִ֥יר הַמָּֽיִם׃

‎28 ‏וְעַתָּ֗ה אֱסֹף֙ אֶת־יֶ֣תֶר הָעָ֔ם וַחֲנֵ֥ה עַל־הָעִ֖יר וְלָכְדָ֑הּ פֶּן־אֶלְכֹּ֤ד אֲנִי֙ אֶת־הָעִ֔יר וְנִקְרָ֥א שְׁמִ֖י עָלֶֽיהָ׃

‎29 ‏וַיֶּאֱסֹ֥ף דָּוִ֛ד אֶת־כָּל־הָעָ֖ם וַיֵּ֣לֶךְ רַבָּ֑תָה וַיִּלָּ֥חֶם בָּ֖הּ וַֽיִּלְכְּדָֽהּ׃

‎30 ‏וַיִּקַּ֣ח אֶת־עֲטֶֽרֶת־מַלְכָּם֩ מֵעַ֨ל רֹאשׁ֜וֹ וּמִשְׁקָלָ֨הּ כִּכַּ֤ר זָהָב֙ וְאֶ֣בֶן יְקָרָ֔ה וַתְּהִ֖י עַל־רֹ֣אשׁ דָּוִ֑ד וּשְׁלַ֥ל הָעִ֛יר הוֹצִ֖יא הַרְבֵּ֥ה מְאֹֽד׃

‎31 ‏וְאֶת־הָעָ֨ם אֲשֶׁר־בָּ֜הּ הוֹצִ֗יא וַיָּ֣שֶׂם בַּ֠מְּגֵרָה וּבַחֲרִצֵ֨י הַבַּרְזֶ֜ל וּֽבְמַגְזְרֹ֣ת הַבַּרְזֶ֗ל וְהֶעֱבִ֤יר אוֹתָם֙ במלכן בַּמַּלְבֵּ֔ן וְכֵ֣ן יַעֲשֶׂ֔ה לְכֹ֖ל עָרֵ֣י בְנֵֽי־עַמּ֑וֹן וַיָּ֧שָׁב דָּוִ֛ד וְכָל־הָעָ֖ם יְרוּשָׁלִָֽם׃ פ

1 wayyišəl^aḥ yəhwâ ’eṯ-nāṯān ’el-dāwiḏ wayyāḇō’ ’ēlāyw wayyō’mer lwō šənê ’ănāšîm hāyû bə‘îr ’eḥāṯ ’eḥāḏ ‘āšîr wə’eḥāḏ rā’š:

2 lə‘āšîr hāyâ ṣō’n ûḇāqār harəbēh mə’ōḏ:

3 wəlārāš ’ên-kōl kî ’im-kiḇəśâ ’^aḥaṯ qəṭannâ ’ăšer qānâ wayəḥayyehā watiḡədal ‘immwō wə‘im-bānāyw y^aḥədāw mipitwō ṯō’ḵal ûmikōswō ṯišəteh ûḇəḥêqwō ṯišəkāḇ watəhî-lwō kəḇaṯ:

4 wayyāḇō’ hēleḵə lə’îš he‘āšîr wayy^aḥəmōl lāq^aḥaṯ miṣṣō’nwō ûmibəqārwō l^a‘ăśwōṯ lā’ōrēḥa habā’-lwō wayyiqq^aḥ ’eṯ-kiḇəśaṯ hā’îš hārā’š wayy^a‘ăśehā lā’îš habā’ ’ēlāyw:

5 wayyiḥar-’af dāwiḏ bā’îš mə’ōḏ wayyō’mer ’el-nāṯān ḥay-yəhwâ kî ḇen-māweṯ hā’îš hā‘ōśeh zō’ṯ:

6 wə’eṯ-hakiḇəśâ yəšallēm ’arəb^a‘ətāyim ‘ēqeḇ ’ăšer ‘āśâ ’eṯ-hadāḇār hazzeh wə‘al ’ăšer lō’-ḥāmāl:

7 wayyō’mer nāṯān ’el-dāwiḏ ’atâ hā’îš kōh-’āmar yəhwâ ’ĕlōhê yiśərā’ēl ’ānōḵî məš^aḥətîḵā ləmeleḵə ‘al-yiśərā’ēl wə’ānōḵî hiṣṣalətîḵā mîyaḏ šā’ûl:

8 wā’etənâ ləḵā ’eṯ-bêṯ ’ăḏōneyḵā wə’eṯ-nəšê ’ăḏōneyḵā bəḥêqeḵā wā’etənâ ləḵā ’eṯ-bêṯ yiśərā’ēl wîhûḏâ wə’im-mə‘āṭ wə’ōsifâ lləḵā kâēnnâ wəḵâēnnâ:

9 madû‘a bāzîṯā| ’eṯ-dəḇar yəhwâ l^a‘ăśwōṯ hār^a‘ bə‘ênāw bə‘ênay ’ēṯ ’ûrîyâ h^aḥitî hikîṯā ḇ^aḥereḇ wə’eṯ-’išətwō lāq^aḥətā lləḵā lə’iššâ wə’ōṯwō hāraḡətā bəḥereḇ bənê ‘ammwōn:

10 wə‘atâ lō’-ṯāsûr ḥereḇ mibêṯəḵā ‘aḏ-‘wōlām ‘ēqeḇ kî ḇəziṯānî watiqq^aḥ ’eṯ-’ēšeṯ ’ûrîyâ h^aḥitî lihəywōṯ ləḵā lə’iššâ: s

11 kōh| ’āmar yəhwâ hinənî mēqîm ‘āleyḵā rā‘â mibêṯeḵā wəlāq^aḥətî ’eṯ-nāšeyḵā lə‘êneyḵā wənāṯatî lərē‘eyḵā wəšāḵaḇ ‘im-nāšeyḵā lə‘ênê haššemeš hazzō’ṯ:

12 kî ’atâ ‘āśîṯā ḇassāṯer wa’ănî ’e‘ĕśeh ’eṯ-hadāḇār hazzeh neḡeḏ kāl-yiśərā’ēl wəneḡeḏ haššāmeš: s

13 wayyō’mer dāwiḏ ’el-nāṯān ḥāṭā’ṯî layhwâ swayyō’mer nāṯān ’el-dāwiḏ gam-yəhwâ he‘ĕḇîr ḥaṭṭā’ṯəḵā lō’ ṯāmûṯ:

14 ’efes kî-ni’ēṣ ni’aṣətā ’eṯ-’ōyəḇê yəhwâ badāḇār hazzeh gam habēn hayyillwōḏ ləḵā mwōṯ yāmûṯ:

15 wayyēleḵə nāṯān ’el-bêṯwō wayyigōf yəhwâ ’eṯ-hayyeleḏ ’ăšer yāləḏâ ’ēšeṯ-’ûrîyâ ləḏāwiḏ wayyē’ānaš:

16 wayəḇaqqēš dāwiḏ ’eṯ-hā’ĕlōhîm bə‘aḏ hannā‘ar wayyāṣām dāwiḏ ṣwōm ûḇā’ wəlān wəšāḵaḇ ’ārəṣâ:

17 wayyāqumû ziqənê ḇêṯwō ‘ālāyw lahăqîmwō min-hā’āreṣ wəlō’ ’āḇâ wəlō’-ḇārā’ ’itām lāḥem:

18 wayəhî bayywōm haššəḇî‘î wayyāmāṯ hayyāleḏ wayyirə’û ‘aḇəḏê ḏāwiḏ ləhagîḏ lwō| kî-mēṯ hayyeleḏ kî ’āmərû hinnēh ḇihəywōṯ hayyeleḏ ḥay dibarənû ’ēlāyw wəlō’-šām^a‘ bəqwōlēnû wə’êḵə nō’mar ’ēlāyw mēṯ hayyeleḏ wə‘āśâ rā‘â:

19 wayyarə’ dāwiḏ kî ‘ăḇāḏāyw miṯəl^aḥăšîm wayyāḇen dāwiḏ kî mēṯ hayyāleḏ wayyō’mer dāwiḏ ’el-‘ăḇāḏāyw hămēṯ hayyeleḏ wayyō’mərû mēṯ:

20 wayyāqām dāwiḏ mēhā’āreṣ wayyirəḥaṣ wayyāseḵə wayəḥallēf śiməlāṯwō śiməlōṯāyw wayyāḇō’ ḇêṯ-yəhwâ wayyišətāḥû wayyāḇō’ ’el-bêṯwō wayyišə’al wayyāśîmû lwō leḥem wayyō’ḵal:

21 wayyō’mərû ‘ăḇāḏāyw ’ēlāyw mâ-hadāḇār hazzeh ’ăšer ‘āśîṯâ b^a‘ăḇûr hayyeleḏ ḥay ṣamətā watēḇəḵḵə wəḵa’ăšer mēṯ hayyeleḏ qamətā watō’ḵal lāḥem:

22 wayyō’mer bə‘wōḏ hayyeleḏ ḥay ṣamətî wā’eḇəkeh kî ’āmarətî mî ywōḏē‘a yəḥānnanî wəḥannanî yəhwâ wəḥay hayyāleḏ:

23 wə‘atâ| mēṯ lāmmâ zzeh ’ănî ṣām ha’ûḵal lahăšîḇwō ‘wōḏ ’ănî hōlēḵə ’ēlāyw wəhû’ lō’-yāšûḇ ’ēlāy:

24 wayən^aḥēm dāwiḏ ’ēṯ baṯ-šeḇ^a‘ ’išətwō wayyāḇō’ ’ēleyhā wayyišəkaḇ ‘immāh watēleḏ bēn wayyiqərā’ watiqərā’ ’eṯ-šəmwō šəlōmōh wayhwâ ’ăhēḇwō:

25 wayyišəl^aḥ bəyaḏ nāṯān hannāḇî’ wayyiqərā’ ’eṯ-šəmwō yəḏîḏəyāh b^a‘ăḇûr yəhwâ: f

26 wayyillāḥem ywō’āḇ bərabaṯ bənê ‘ammwōn wayyiləkōḏ ’eṯ-‘îr hamməlûḵâ:

27 wayyišəl^aḥ ywō’āḇ malə’āḵîm ’el-dāwiḏ wayyō’mer niləḥamətî ḇərabâ gam-lāḵaḏətî ’eṯ-‘îr hammāyim:

28 wə‘atâ ’ĕsōf ’eṯ-yeṯer hā‘ām w^aḥănēh ‘al-hā‘îr wəlāḵəḏāh pen-’eləkōḏ ’ănî ’eṯ-hā‘îr wəniqərā’ šəmî ‘āleyhā:

29 wayye’ĕsōf dāwiḏ ’eṯ-kāl-hā‘ām wayyēleḵə rabāṯâ wayyillāḥem bāh wayyiləkəḏāh:

30 wayyiqq^aḥ ’eṯ-‘ăṭereṯ-maləkām mē‘al rō’šwō ûmišəqālāh kikar zâāḇ wə’eḇen yəqārâ watəhî ‘al-rō’š dāwiḏ ûšəlal hā‘îr hwōṣî’ harəbēh mə’ōḏ:

31 wə’eṯ-hā‘ām ’ăšer-bāh hwōṣî’ wayyāśem bamməḡērâ ûḇ^aḥăriṣê habarəzel ûḇəmaḡəzərōṯ habarəzel wəhe‘ĕḇîr ’wōṯām bammaləkēn bammaləbēn wəḵēn y^a‘ăśeh ləḵōl ‘ārê ḇənê-‘ammwōn wayyāšāḇ dāwiḏ wəḵāl-hā‘ām yərûšālāim: f