‎1 ‏וּבֹ֨עַז עָלָ֣ה הַשַּׁעַר֮ וַיֵּ֣שֶׁב שָׁם֒ וְהִנֵּ֨ה הַגֹּאֵ֤ל עֹבֵר֙ אֲשֶׁ֣ר דִּבֶּר־בֹּ֔עַז וַיֹּ֛אמֶר ס֥וּרָה שְׁבָה־פֹּ֖ה פְּלֹנִ֣י אַלְמֹנִ֑י וַיָּ֖סַר וַיֵּשֵֽׁב׃

‎2 ‏וַיִּקַּ֞ח עֲשָׂרָ֧ה אֲנָשִׁ֛ים מִזִּקְנֵ֥י הָעִ֖יר וַיֹּ֣אמֶר שְׁבוּ־פֹ֑ה וַיֵּשֵֽׁבוּ׃

‎3 ‏וַיֹּ֙אמֶר֙ לַגֹּאֵ֔ל חֶלְקַת֙ הַשָּׂדֶ֔ה אֲשֶׁ֥ר לְאָחִ֖ינוּ לֶאֱלִימֶ֑לֶךְ מָכְרָ֣ה נָעֳמִ֔י הַשָּׁ֖בָה מִשְּׂדֵ֥ה מוֹאָֽב׃

‎4 ‏וַאֲנִ֨י אָמַ֜רְתִּי אֶגְלֶ֧ה אָזְנְךָ֣ לֵאמֹ֗ר קְ֠נֵה נֶ֥גֶד הַֽיֹּשְׁבִים֮³ וְנֶ֣גֶד זִקְנֵ֣י עַמִּי֒ אִם־תִּגְאַל֙ גְּאָ֔ל וְאִם־לֹ֨א יִגְאַ֜ל הַגִּ֣ידָה לִּ֗י ואדע וְאֵֽדְעָה֙ כִּ֣י אֵ֤ין זוּלָֽתְךָ֙ לִגְא֔וֹל וְאָנֹכִ֖י אַחֲרֶ֑יךָ וַיֹּ֖אמֶר אָנֹכִ֥י אֶגְאָֽל׃

‎5 ‏וַיֹּ֣אמֶר בֹּ֔עַז בְּיוֹם־קְנוֹתְךָ֥ הַשָּׂדֶ֖ה מִיַּ֣ד נָעֳמִ֑י וּ֠מֵאֵת ר֣וּת הַמּוֹאֲבִיָּ֤ה אֵֽשֶׁת־הַמֵּת֙ קניתי קָנִ֔יתָה לְהָקִ֥ים שֵׁם־הַמֵּ֖ת עַל־נַחֲלָתֽוֹ׃

‎6 ‏וַיֹּ֣אמֶר הַגֹּאֵ֗ל לֹ֤א אוּכַל֙ לגאול־ לִגְאָל־ לִ֔י פֶּן־אַשְׁחִ֖ית אֶת־נַחֲלָתִ֑י גְּאַל־לְךָ֤ אַתָּה֙ אֶת־גְּאֻלָּתִ֔י כִּ֥י לֹא־אוּכַ֖ל לִגְאֹֽל׃

‎7 ‏וְזֹאת֩ לְפָנִ֨ים בְּיִשְׂרָאֵ֜ל עַל־הַגְּאוּלָּ֤ה וְעַל־הַתְּמוּרָה֙ לְקַיֵּ֣ם כָּל־דָּבָ֔ר שָׁלַ֥ף אִ֛ישׁ נַעֲל֖וֹ וְנָתַ֣ן לְרֵעֵ֑הוּ וְזֹ֥את הַתְּעוּדָ֖ה בְּיִשְׂרָאֵֽל׃

‎8 ‏וַיֹּ֧אמֶר הַגֹּאֵ֛ל לְבֹ֖עַז קְנֵה־לָ֑ךְ וַיִּשְׁלֹ֖ף נַעֲלֽוֹ׃

‎9 ‏וַיֹּאמֶר֩ בֹּ֨עַז לַזְּקֵנִ֜ים וְכָל־הָעָ֗ם עֵדִ֤ים אַתֶּם֙ הַיּ֔וֹם כִּ֤י קָנִ֙יתִי֙ אֶת־כָּל־אֲשֶׁ֣ר לֶֽאֱלִימֶ֔לֶךְ וְאֵ֛ת כָּל־אֲשֶׁ֥ר לְכִלְי֖וֹן וּמַחְל֑וֹן מִיַּ֖ד נָעֳמִֽי׃

‎10 ‏וְגַ֣ם אֶת־ר֣וּת הַמֹּאֲבִיָּה֩ אֵ֨שֶׁת מַחְל֜וֹן קָנִ֧יתִי לִ֣י לְאִשָּׁ֗ה לְהָקִ֤ים שֵׁם־הַמֵּת֙ עַל־נַ֣חֲלָת֔וֹ וְלֹא־יִכָּרֵ֧ת שֵׁם־הַמֵּ֛ת מֵעִ֥ם אֶחָ֖יו וּמִשַּׁ֣עַר מְקוֹמ֑וֹ עֵדִ֥ים אַתֶּ֖ם הַיּֽוֹם׃

‎11 ‏וַיֹּ֨אמְר֜וּ כָּל־הָעָ֧ם אֲשֶׁר־בַּשַּׁ֛עַר וְהַזְּקֵנִ֖ים עֵדִ֑ים יִתֵּן֩ יְהוָ֨ה אֶֽת־הָאִשָּׁ֜ה הַבָּאָ֣ה אֶל־בֵּיתֶ֗ךָ כְּרָחֵ֤ל׀ וּכְלֵאָה֙ אֲשֶׁ֨ר בָּנ֤וּ שְׁתֵּיהֶם֙ אֶת־בֵּ֣ית יִשְׂרָאֵ֔ל וַעֲשֵׂה־חַ֣יִל בְּאֶפְרָ֔תָה וּקְרָא־שֵׁ֖ם בְּבֵ֥ית לָֽחֶם׃

‎12 ‏וִיהִ֤י בֵֽיתְךָ֙ כְּבֵ֣ית פֶּ֔רֶץ אֲשֶׁר־יָלְדָ֥ה תָמָ֖ר לִֽיהוּדָ֑ה מִן־הַזֶּ֗רַע אֲשֶׁ֨ר יִתֵּ֤ן יְהוָה֙ לְךָ֔ מִן־הַֽנַּעֲרָ֖ה הַזֹּֽאת׃

‎13 ‏וַיִּקַּ֨ח בֹּ֤עַז אֶת־רוּת֙ וַתְּהִי־ל֣וֹ לְאִשָּׁ֔ה וַיָּבֹ֖א אֵלֶ֑יהָ וַיִּתֵּ֨ן יְהוָ֥ה לָ֛הּ הֵרָי֖וֹן וַתֵּ֥לֶד בֵּֽן׃

‎14 ‏וַתֹּאמַ֤רְנָה הַנָּשִׁים֙ אֶֽל־נָעֳמִ֔י בָּר֣וּךְ יְהוָ֔ה אֲ֠שֶׁר לֹ֣א הִשְׁבִּ֥ית לָ֛ךְ גֹּאֵ֖ל הַיּ֑וֹם וְיִקָּרֵ֥א שְׁמ֖וֹ בְּיִשְׂרָאֵֽל׃

‎15 ‏וְהָ֤יָה לָךְ֙ לְמֵשִׁ֣יב נֶ֔פֶשׁ וּלְכַלְכֵּ֖ל אֶת־שֵׂיבָתֵ֑ךְ כִּ֣י כַלָּתֵ֤ךְ אֲ‍ֽשֶׁר־אֲהֵבַ֙תֶךְ֙ יְלָדַ֔תּוּ אֲשֶׁר־הִיא֙ ט֣וֹבָה לָ֔ךְ מִשִּׁבְעָ֖ה בָּנִֽים׃

‎16 ‏וַתִּקַּ֨ח נָעֳמִ֤י אֶת־הַיֶּ֙לֶד֙ וַתְּשִׁתֵ֣הוּ בְחֵיקָ֔הּ וַתְּהִי־ל֖וֹ לְאֹמֶֽנֶת׃

‎17 ‏וַתִּקְרֶאנָה֩ ל֨וֹ הַשְּׁכֵנ֥וֹת שֵׁם֙ לֵאמֹ֔ר יֻלַּד־בֵּ֖ן לְנָעֳמִ֑י וַתִּקְרֶ֤אנָֽה שְׁמוֹ֙ עוֹבֵ֔ד ה֥וּא אֲבִי־יִשַׁ֖י אֲבִ֥י דָוִֽד׃ פ

‎18 ‏וְאֵ֙לֶּה֙ תּוֹלְד֣וֹת פָּ֔רֶץ פֶּ֖רֶץ הוֹלִ֥יד אֶת־חֶצְרֽוֹן׃

‎19 ‏וְחֶצְרוֹן֙ הוֹלִ֣יד אֶת־רָ֔ם וְרָ֖ם הוֹלִ֥יד אֶת־עַמִּֽינָדָֽב׃

‎20 ‏וְעַמִּֽינָדָב֙ הוֹלִ֣יד אֶת־נַחְשׁ֔וֹן וְנַחְשׁ֖וֹן הוֹלִ֥יד אֶת־שַׂלְמָֽה׃

‎21 ‏וְשַׂלְמוֹן֙ הוֹלִ֣יד אֶת־בֹּ֔עַז וּבֹ֖עַז הוֹלִ֥יד אֶת־עוֹבֵֽד׃

‎22 ‏וְעֹבֵד֙ הוֹלִ֣יד אֶת־יִשָׁ֔י וְיִשַׁ֖י הוֹלִ֥יד אֶת־דָּוִֽד׃

1 ûḇō‘az ‘ālâ hašš^a‘ar wayyēšeḇ šām wəhinnēh hagō’ēl ‘ōḇēr ’ăšer diber-bō‘az wayyō’mer sûrâ šəḇâ-pōh pəlōnî ’aləmōnî wayyāsar wayyēšēḇ:

2 wayyiqq^aḥ ‘ăśārâ ’ănāšîm mizziqənê hā‘îr wayyō’mer šəḇû-fōh wayyēšēḇû:

3 wayyō’mer lagō’ēl ḥeləqaṯ haśśāḏeh ’ăšer lə’āḥînû le’ĕlîmeleḵə māḵərâ nā‘ŏmî haššāḇâ miśśəḏēh mwō’āḇ:

4 wa’ănî ’āmarətî ’eḡəleh ’āzənəḵā lē’mōr qənēh neḡeḏ hayyōšəḇîm³ wəneḡeḏ ziqənê ‘ammî ’im-tiḡə’al gə’āl wə’im-lō’ yiḡə’al hagîḏâ llî wə’ēḏ^a‘ wə’ēḏə‘â kî ’ên zûlāṯəḵā liḡə’wōl wə’ānōḵî ’^aḥăreyḵā wayyō’mer ’ānōḵî ’eḡə’āl:

5 wayyō’mer bō‘az bəywōm-qənwōṯəḵā haśśāḏeh mîyaḏ nā‘ŏmî ûmē’ēṯ rûṯ hammwō’ăḇîyâ ’ēšeṯ-hammēṯ qānîṯî qānîṯâ ləhāqîm šēm-hammēṯ ‘al-n^aḥălāṯwō:

6 wayyō’mer hagō’ēl lō’ ’ûḵal liḡə’wōl- liḡə’āl- lî pen-’ašəḥîṯ ’eṯ-n^aḥălāṯî gə’al-ləḵā ’atâ ’eṯ-gə’ullāṯî kî lō’-’ûḵal liḡə’ōl:

7 wəzō’ṯ ləfānîm bəyiśərā’ēl ‘al-hagə’ûllâ wə‘al-hatəmûrâ ləqayyēm kāl-dāḇār šālaf ’îš n^a‘ălwō wənāṯan lərē‘ēhû wəzō’ṯ hatə‘ûḏâ bəyiśərā’ēl:

8 wayyō’mer hagō’ēl ləḇō‘az qənēh-lāḵə wayyišəlōf n^a‘ălwō:

9 wayyō’mer bō‘az lazzəqēnîm wəḵāl-hā‘ām ‘ēḏîm ’atem hayywōm kî qānîṯî ’eṯ-kāl-’ăšer le’ĕlîmeleḵə wə’ēṯ kāl-’ăšer ləḵiləywōn ûm^aḥəlwōn mîyaḏ nā‘ŏmî:

10 wəḡam ’eṯ-rûṯ hammō’ăḇîyâ ’ēšeṯ m^aḥəlwōn qānîṯî lî lə’iššâ ləhāqîm šēm-hammēṯ ‘al-n^aḥălāṯwō wəlō’-yikārēṯ šēm-hammēṯ mē‘im ’eḥāyw ûmišš^a‘ar məqwōmwō ‘ēḏîm ’atem hayywōm:

11 wayyō’mərû kāl-hā‘ām ’ăšer-bašš^a‘ar wəhazzəqēnîm ‘ēḏîm yitēn yəhwâ ’eṯ-hā’iššâ habā’â ’el-bêṯeḵā kərāḥēl| ûḵəlē’â ’ăšer bānû šətêhem ’eṯ-bêṯ yiśərā’ēl w^a‘ăśēh-ḥayil bə’efərāṯâ ûqərā’-šēm bəḇêṯ lāḥem:

12 wîhî ḇêṯəḵā kəḇêṯ pereṣ ’ăšer-yāləḏâ ṯāmār lîhûḏâ min-hazzer^a‘ ’ăšer yitēn yəhwâ ləḵā min-hann^a‘ărâ hazzō’ṯ:

13 wayyiqq^aḥ bō‘az ’eṯ-rûṯ watəhî-lwō lə’iššâ wayyāḇō’ ’ēleyhā wayyitēn yəhwâ lāh hērāywōn watēleḏ bēn:

14 watō’marənâ hannāšîm ’el-nā‘ŏmî bārûḵə yəhwâ ’ăšer lō’ hišəbîṯ lāḵə gō’ēl hayywōm wəyiqqārē’ šəmwō bəyiśərā’ēl:

15 wəhāyâ lāḵə ləmēšîḇ nefeš ûləḵaləkēl ’eṯ-śêḇāṯēḵə kî ḵallāṯēḵə ’ă‍šer-’ăhēḇaṯeḵə yəlāḏatû ’ăšer-hî’ ṭwōḇâ lāḵə miššiḇə‘â bānîm:

16 watiqq^aḥ nā‘ŏmî ’eṯ-hayyeleḏ watəšiṯēhû ḇəḥêqāh watəhî-lwō lə’ōmeneṯ:

17 watiqəre’nâ lwō haššəḵēnwōṯ šēm lē’mōr yullaḏ-bēn lənā‘ŏmî watiqəre’nâ šəmwō ‘wōḇēḏ hû’ ’ăḇî-yišay ’ăḇî ḏāwiḏ: f

18 wə’ēlleh twōləḏwōṯ pāreṣ pereṣ hwōlîḏ ’eṯ-ḥeṣərwōn:

19 wəḥeṣərwōn hwōlîḏ ’eṯ-rām wərām hwōlîḏ ’eṯ-‘ammînāḏāḇ:

20 wə‘ammînāḏāḇ hwōlîḏ ’eṯ-n^aḥəšwōn wən^aḥəšwōn hwōlîḏ ’eṯ-śaləmâ:

21 wəśaləmwōn hwōlîḏ ’eṯ-bō‘az ûḇō‘az hwōlîḏ ’eṯ-‘wōḇēḏ:

22 wə‘ōḇēḏ hwōlîḏ ’eṯ-yišāy wəyišay hwōlîḏ ’eṯ-dāwiḏ: