Psalms (Tehilim): Psalms (Tehilim) Chapter 85

Tanach (Hebrew): Psalms (Tehilim) Chapter 85

‎1 ‏לַמְנַצֵּ֬חַ׀ לִבְנֵי־קֹ֬רַח מִזְמֽוֹר׃ ‎2 ‏רָצִ֣יתָ יְהוָ֣ה אַרְצֶ֑ךָ שַׁ֝֗בְתָּ שבות שְׁבִ֣ית יַעֲקֹֽב׃ ‎3 ‏נָ֭שָׂאתָ עֲוֹ֣ן עַמֶּ֑ךָ כִּסִּ֖יתָ כָל־חַטָּאתָ֣ם סֶֽלָה׃ ‎4 ‏אָסַ֥פְתָּ כָל־עֶבְרָתֶ֑ךָ הֱ֝שִׁיב֗וֹתָ מֵחֲר֥וֹן אַפֶּֽךָ׃ ‎5 ‏שׁ֭וּבֵנוּ אֱלֹהֵ֣י יִשְׁעֵ֑נוּ וְהָפֵ֖ר כַּֽעַסְךָ֣ עִמָּֽנוּ׃ ‎6 ‏הַלְעוֹלָ֥ם תֶּֽאֱנַף־בָּ֑נוּ תִּמְשֹׁ֥ךְ אַ֝פְּךָ֗ לְדֹ֣ר וָדֹֽר׃ ‎7 ‏הֲֽלֹא־אַ֭תָּה תָּשׁ֣וּב תְּחַיֵּ֑נוּ וְ֝עַמְּךָ֗ יִשְׂמְחוּ־בָֽךְ׃ ‎8 ‏הַרְאֵ֣נוּ יְהוָ֣ה חַסְדֶּ֑ךָ וְ֝יֶשְׁעֲךָ֗ תִּתֶּן־לָֽנוּ׃ ‎9 ‏אֶשְׁמְעָ֗ה מַה־יְדַבֵּר֮ הָאֵ֪ל׀ יְה֫וָ֥ה כִּ֤י׀ יְדַבֵּ֬ר שָׁל֗וֹם אֶל־עַמּ֥וֹ וְאֶל־חֲסִידָ֑יו וְֽאַל־יָשׁ֥וּבוּ לְכִסְלָֽה׃ ‎10 ‏אַ֤ךְ׀ קָר֣וֹב לִירֵאָ֣יו יִשְׁע֑וֹ לִשְׁכֹּ֖ן כָּב֣וֹד בְּאַרְצֵֽנוּ׃ ‎11 ‏חֶֽסֶד־וֶאֱמֶ֥ת נִפְגָּ֑שׁוּ צֶ֖דֶק וְשָׁל֣וֹם נָשָֽׁקוּ׃ ‎12 ‏אֱ֭מֶת מֵאֶ֣רֶץ תִּצְמָ֑ח וְ֝צֶ֗דֶק מִשָּׁמַ֥יִם נִשְׁקָֽף׃ ‎13 ‏גַּם־יְ֭הוָה יִתֵּ֣ן הַטּ֑וֹב וְ֝אַרְצֵ֗נוּ תִּתֵּ֥ן יְבוּלָֽהּ׃ ‎14 ‏צֶ֭דֶק לְפָנָ֣יו יְהַלֵּ֑ךְ וְיָשֵׂ֖ם לְדֶ֣רֶךְ פְּעָמָֽיו׃

1 lamənaṣṣēḥa| liḇənê-qōraḥ mizəmwōr: 2 rāṣîṯā yəhwâ ’arəṣeḵā šaḇətā šəḇûṯ šəḇîṯ ya‘ăqōḇ: 3 nāśā’ṯā ‘ăwōn ‘ammeḵā kissîṯā ḵāl-ḥaṭṭā’ṯām selâ: 4 ’āsafətā ḵāl-‘eḇərāṯeḵā hĕšîḇwōṯā mēḥărwōn ’apeḵā: 5 šûḇēnû ’ĕlōhê yišə‘ēnû wəhāfēr ka‘asəḵā ‘immānû: 6 halə‘wōlām te’ĕnaf-bānû timəšōḵə ’apəḵā ləḏōr wāḏōr: 7 hălō’-’atâ tāšûḇ təḥayyēnû wə‘amməḵā yiśəməḥû-ḇāḵə: 8 harə’ēnû yəhwâ ḥasədeḵā wəyešə‘ăḵā titen-lānû: 9 ’ešəmə‘â mah-yəḏabēr hā’ēl| yəhwâ kî| yəḏabēr šālwōm ’el-‘ammwō wə’el-ḥăsîḏāyw wə’al-yāšûḇû ləḵisəlâ: 10 ’aḵə| qārwōḇ lîrē’āyw yišə‘wō lišəkōn kāḇwōḏ bə’arəṣēnû: 11 ḥeseḏ-we’ĕmeṯ nifəgāšû ṣeḏeq wəšālwōm nāšāqû: 12 ’ĕmeṯ mē’ereṣ tiṣəmāḥ wəṣeḏeq miššāmayim nišəqāf: 13 gam-yəhwâ yitēn haṭṭwōḇ wə’arəṣēnû titēn yəḇûlāh: 14 ṣeḏeq ləfānāyw yəhallēḵə wəyāśēm ləḏereḵə pə‘āmāyw: