Psalms (Tehilim): Psalms (Tehilim) Chapter 68

Tanach (Hebrew): Psalms (Tehilim) Chapter 68

‎1 ‏לַמְנַצֵּ֥חַ לְדָוִ֗ד מִזְמ֥וֹר שִֽׁיר׃ ‎2 ‏יָק֣וּם אֱ֭לֹהִים יָפ֣וּצוּ אוֹיְבָ֑יו וְיָנ֥וּסוּ מְ֝שַׂנְאָ֗יו מִפָּנָֽיו׃ ‎3 ‏כְּהִנְדֹּ֥ף עָשָׁ֗ן תִּ֫נְדֹּ֥ף כְּהִמֵּ֣ס דּ֭וֹנַג מִפְּנֵי־אֵ֑שׁ יֹאבְד֥וּ רְ֝שָׁעִ֗ים מִפְּנֵ֥י אֱלֹהִֽים׃ ‎4 ‏וְֽצַדִּיקִ֗ים יִשְׂמְח֣וּ יַֽ֭עַלְצוּ לִפְנֵ֥י אֱלֹהִ֗ים וְיָשִׂ֥ישׂוּ בְשִׂמְחָֽה׃ ‎5 ‏שִׁ֤ירוּ׀ לֵֽאלֹהִים֮ זַמְּר֪וּ שְׁ֫מ֥וֹ סֹ֡לּוּ לָרֹכֵ֣ב בָּ֭עֲרָבוֹת בְּיָ֥הּ שְׁמ֗וֹ וְעִלְז֥וּ לְפָנָֽיו׃ ‎6 ‏אֲבִ֣י יְ֭תוֹמִים וְדַיַּ֣ן אַלְמָנ֑וֹת אֱ֝לֹהִ֗ים בִּמְע֥וֹן קָדְשֽׁוֹ׃ ‎7 ‏אֱלֹהִ֤ים׀ מ֘וֹשִׁ֤יב יְחִידִ֨ים׀ בַּ֗יְתָה מוֹצִ֣יא אֲ֭סִירִים בַּכּוֹשָׁר֑וֹת אַ֥ךְ ס֝וֹרֲרִ֗ים שָׁכְנ֥וּ צְחִיחָֽה׃ ‎8 ‏אֱ‍ֽלֹהִ֗ים בְּ֭צֵאתְךָ לִפְנֵ֣י עַמֶּ֑ךָ בְּצַעְדְּךָ֖ בִֽישִׁימ֣וֹן סֶֽלָה׃ ‎9 ‏אֶ֤רֶץ רָעָ֨שָׁה׀ אַף־שָׁמַ֣יִם נָטְפוּ֮ מִפְּנֵ֪י אֱלֹ֫הִ֥ים זֶ֥ה סִינַ֑י מִפְּנֵ֥י אֱ֝לֹהִ֗ים אֱלֹהֵ֥י יִשְׂרָאֵֽל׃ ‎10 ‏גֶּ֣שֶׁם נְ֭דָבוֹת תָּנִ֣יף אֱלֹהִ֑ים נַחֲלָתְךָ֥ וְ֝נִלְאָ֗ה אַתָּ֥ה כֽוֹנַנְתָּֽהּ׃ ‎11 ‏חַיָּתְךָ֥ יָֽשְׁבוּ־בָ֑הּ תָּ֤כִ֥ין בְּטוֹבָתְךָ֖ לֶעָנִ֣י אֱלֹהִֽים׃ ‎12 ‏אֲדֹנָ֥י יִתֶּן־אֹ֑מֶר הַֽ֝מְבַשְּׂר֗וֹת צָבָ֥א רָֽב׃ ‎13 ‏מַלְכֵ֣י צְ֭בָאוֹת יִדֹּד֣וּן יִדֹּד֑וּן וּנְוַת בַּ֝֗יִת תְּחַלֵּ֥ק שָׁלָֽל׃ ‎14 ‏אִֽם־תִּשְׁכְּבוּן֮ בֵּ֪ין שְׁפַ֫תָּ֥יִם כַּנְפֵ֣י י֭וֹנָה נֶחְפָּ֣ה בַכֶּ֑סֶף וְ֝אֶבְרוֹתֶ֗יהָ בִּֽירַקְרַ֥ק חָרֽוּץ׃ ‎15 ‏בְּפָ֘רֵ֤שׂ שַׁדַּ֓י מְלָ֘כִ֤ים בָּ֗הּ תַּשְׁלֵ֥ג בְּצַלְמֽוֹן׃ ‎16 ‏הַר־אֱ֭לֹהִים הַר־בָּשָׁ֑ן הַ֥ר גַּ֝בְנֻנִּ֗ים הַר־בָּשָֽׁן׃ ‎17 ‏לָ֤מָּה׀ תְּֽרַצְּדוּן֮ הָרִ֪ים גַּבְנֻ֫נִּ֥ים הָהָ֗ר חָמַ֣ד אֱלֹהִ֣ים לְשִׁבְתּ֑וֹ אַף־יְ֝הוָ֗ה יִשְׁכֹּ֥ן לָנֶֽצַח׃ ‎18 ‏רֶ֤כֶב אֱלֹהִ֗ים רִבֹּתַ֣יִם אַלְפֵ֣י שִׁנְאָ֑ן אֲדֹנָ֥י בָ֝֗ם סִינַ֥י בַּקֹּֽדֶשׁ׃ ‎19 ‏עָ֘לִ֤יתָ לַמָּר֨וֹם׀ שָׁ֘בִ֤יתָ שֶּׁ֗בִי לָקַ֣חְתָּ מַ֭תָּנוֹת בָּאָדָ֑ם וְאַ֥ף ס֝וֹרְרִ֗ים לִשְׁכֹּ֤ן׀ יָ֬הּ אֱלֹהִֽים׃ ‎20 ‏בָּ֤ר֣וּךְ אֲדֹנָי֮ י֤וֹם׀ י֥וֹם יַֽעֲמָס־לָ֗נוּ הָ֘אֵ֤ל יְֽשׁוּעָתֵ֬נוּ סֶֽלָה׃ ‎21 ‏הָ֤אֵ֣ל׀ לָנוּ֮ אֵ֤ל לְֽמוֹשָׁ֫ע֥וֹת וְלֵיהוִ֥ה אֲדֹנָ֑י לַ֝מָּ֗וֶת תּוֹצָאֽוֹת׃ ‎22 ‏אַךְ־אֱלֹהִ֗ים יִמְחַץ֮ רֹ֤אשׁ אֹ֫יְבָ֥יו קָדְקֹ֥ד שֵׂעָ֑ר מִ֝תְהַלֵּ֗ךְ בַּאֲשָׁמָֽיו׃ ‎23 ‏אָמַ֣ר אֲ֭דֹנָי מִבָּשָׁ֣ן אָשִׁ֑יב אָ֝שִׁ֗יב מִֽמְּצֻל֥וֹת יָֽם׃ ‎24 ‏לְמַ֤עַן׀ תִּֽמְחַ֥ץ רַגְלְךָ֗ בְּ֫דָ֥ם לְשׁ֥וֹן כְּלָבֶ֑יךָ מֵאֹיְבִ֥ים מִנֵּֽהוּ׃ ‎25 ‏רָא֣וּ הֲלִיכוֹתֶ֣יךָ אֱלֹהִ֑ים הֲלִ֘יכ֤וֹת אֵלִ֖י מַלְכִּ֣י בַקֹּֽדֶשׁ׃ ‎26 ‏קִדְּמ֣וּ שָׁ֭רִים אַחַ֣ר נֹגְנִ֑ים בְּת֥וֹךְ עֲ֝לָמ֗וֹת תּוֹפֵפֽוֹת׃ ‎27 ‏בְּֽ֭מַקְהֵלוֹת בָּרְכ֣וּ אֱלֹהִ֑ים יְ֝הוָ֗ה מִמְּק֥וֹר יִשְׂרָאֵֽל׃ ‎28 ‏שָׁ֤ם בִּנְיָמִ֨ן׀ צָעִ֡יר רֹדֵ֗ם שָׂרֵ֣י יְ֭הוּדָה רִגְמָתָ֑ם שָׂרֵ֥י זְ֝בֻל֗וּן שָׂרֵ֥י נַפְתָּלִֽי׃ ‎29 ‏צִוָּ֥ה אֱלֹהֶ֗יךָ עֻ֫זֶּ֥ךָ עוּזָּ֥ה אֱלֹהִ֑ים ז֝֗וּ פָּעַ֥לְתָּ לָּֽנוּ׃ ‎30 ‏מֵֽ֭הֵיכָלֶךָ עַל־יְרוּשָׁלִָ֑ם לְךָ֤ יוֹבִ֖ילוּ מְלָכִ֣ים שָֽׁי׃ ‎31 ‏גְּעַ֨ר חַיַּ֪ת קָנֶ֡ה עֲדַ֤ת אַבִּירִ֨ים׀ בְּעֶגְלֵ֬י עַמִּ֗ים מִתְרַפֵּ֥ס בְּרַצֵּי־כָ֑סֶף בִּזַּ֥ר עַ֝מִּ֗ים קְרָב֥וֹת יֶחְפָּֽצוּ׃ ‎32 ‏יֶאֱתָ֣יוּ חַ֭שְׁמַנִּים מִנִּ֣י מִצְרָ֑יִם כּ֥וּשׁ תָּרִ֥יץ יָ֝דָ֗יו לֵאלֹהִֽים׃ ‎33 ‏מַמְלְכ֣וֹת הָ֭אָרֶץ שִׁ֣ירוּ לֵאלֹהִ֑ים זַמְּר֖וּ אֲדֹנָ֣י סֶֽלָה׃ ‎34 ‏לָ֭רֹכֵב בִּשְׁמֵ֣י שְׁמֵי־קֶ֑דֶם הֵ֥ן יִתֵּ֥ן בְּ֝קוֹלוֹ ק֣וֹל עֹֽז׃ ‎35 ‏תְּנ֥וּ עֹ֗ז לֵֽאלֹ֫הִ֥ים עַֽל־יִשְׂרָאֵ֥ל גַּאֲוָת֑וֹ וְ֝עֻזּ֗וֹ בַּשְּׁחָקִֽים׃ ‎36 ‏נ֤וֹרָ֥א אֱלֹהִ֗ים מִֽמִּקְדָּ֫שֶׁ֥יךָ אֵ֤ל יִשְׂרָאֵ֗ל ה֤וּא נֹתֵ֨ן׀ עֹ֖ז וְתַעֲצֻמ֥וֹת לָעָ֗ם בָּר֥וּךְ אֱלֹהִֽים׃

1 lamənaṣṣēḥa ləḏāwiḏ mizəmwōr šîr: 2 yāqûm ’ĕlōhîm yāfûṣû ’wōyəḇāyw wəyānûsû məśanə’āyw mipānāyw: 3 kəhinədōf ‘āšān tinədōf kəhimmēs dwōnaḡ mipənê-’ēš yō’ḇəḏû rəšā‘îm mipənê ’ĕlōhîm: 4 wəṣadîqîm yiśəməḥû ya‘aləṣû lifənê ’ĕlōhîm wəyāśîśû ḇəśiməḥâ: 5 šîrû| lē’lōhîm zammərû šəmwō sōllû lārōḵēḇ bā‘ărāḇwōṯ bəyāh šəmwō wə‘iləzû ləfānāyw: 6 ’ăḇî yəṯwōmîm wəḏayyan ’aləmānwōṯ ’ĕlōhîm bimə‘wōn qāḏəšwō: 7 ’ĕlōhîm| mwōšîḇ yəḥîḏîm| bayəṯâ mwōṣî’ ’ăsîrîm bakwōšārwōṯ ’aḵə swōrărîm šāḵənû ṣəḥîḥâ: 8 ’ĕ‍lōhîm bəṣē’ṯəḵā lifənê ‘ammeḵā bəṣa‘ədəḵā ḇîšîmwōn selâ: 9 ’ereṣ rā‘āšâ| ’af-šāmayim nāṭəfû mipənê ’ĕlōhîm zeh sînay mipənê ’ĕlōhîm ’ĕlōhê yiśərā’ēl: 10 gešem nəḏāḇwōṯ tānîf ’ĕlōhîm naḥălāṯəḵā wənilə’â ’atâ ḵwōnanətāh: 11 ḥayyāṯəḵā yāšəḇû-ḇāh tāḵîn bəṭwōḇāṯəḵā le‘ānî ’ĕlōhîm: 12 ’ăḏōnāy yiten-’ōmer haməḇaśśərwōṯ ṣāḇā’ rāḇ: 13 maləḵê ṣəḇā’wōṯ yidōḏûn yidōḏûn ûnəwaṯ bayiṯ təḥallēq šālāl: 14 ’im-tišəkəḇûn bên šəfatāyim kanəfê ywōnâ neḥəpâ ḇakesef wə’eḇərwōṯeyhā bîraqəraq ḥārûṣ: 15 bəfārēś šaday məlāḵîm bāh tašəlēḡ bəṣaləmwōn: 16 har-’ĕlōhîm har-bāšān har gaḇənunnîm har-bāšān: 17 lāmmâ| təraṣṣəḏûn hārîm gaḇənunnîm hâār ḥāmaḏ ’ĕlōhîm ləšiḇətwō ’af-yəhwâ yišəkōn lāneṣaḥ: 18 reḵeḇ ’ĕlōhîm ribōṯayim ’aləfê šinə’ān ’ăḏōnāy ḇām sînay baqqōḏeš: 19 ‘ālîṯā lammārwōm| šāḇîṯā ššeḇî lāqaḥətā matānwōṯ bā’āḏām wə’af swōrərîm lišəkōn| yāh ’ĕlōhîm: 20 bārûḵə ’ăḏōnāy ywōm| ywōm ya‘ămās-lānû hā’ēl yəšû‘āṯēnû selâ: 21 hā’ēl| lānû ’ēl ləmwōšā‘wōṯ wəlêhwih ’ăḏōnāy lammāweṯ twōṣā’wōṯ: 22 ’aḵə-’ĕlōhîm yiməḥaṣ rō’š ’ōyəḇāyw qāḏəqōḏ śē‘ār miṯəhallēḵə ba’ăšāmāyw: 23 ’āmar ’ăḏōnāy mibāšān ’āšîḇ ’āšîḇ mimməṣulwōṯ yām: 24 ləma‘an| timəḥaṣ raḡələḵā bəḏām ləšwōn kəlāḇeyḵā mē’ōyəḇîm minnēhû: 25 rā’û hălîḵwōṯeyḵā ’ĕlōhîm hălîḵwōṯ ’ēlî maləkî ḇaqqōḏeš: 26 qidəmû šārîm ’aḥar nōḡənîm bəṯwōḵə ‘ălāmwōṯ twōfēfwōṯ: 27 bəmaqəhēlwōṯ bārəḵû ’ĕlōhîm yəhwâ mimməqwōr yiśərā’ēl: 28 šām binəyāmin| ṣā‘îr rōḏēm śārê yəhûḏâ riḡəmāṯām śārê zəḇulûn śārê nafətālî: 29 ṣiûâ ’ĕlōheyḵā ‘uzzeḵā ‘ûzzâ ’ĕlōhîm zû pā‘alətā llānû: 30 mēhêḵāleḵā ‘al-yərûšālāim ləḵā ywōḇîlû məlāḵîm šāy: 31 gə‘ar ḥayyaṯ qāneh ‘ăḏaṯ ’abîrîm| bə‘eḡəlê ‘ammîm miṯərapēs bəraṣṣê-ḵāsef bizzar ‘ammîm qərāḇwōṯ yeḥəpāṣû: 32 ye’ĕṯāyû ḥašəmannîm minnî miṣərāyim kûš tārîṣ yāḏāyw lē’lōhîm: 33 mamələḵwōṯ hā’āreṣ šîrû lē’lōhîm zammərû ’ăḏōnāy selâ: 34 lārōḵēḇ bišəmê šəmê-qeḏem hēn yitēn bəqwōlwō qwōl ‘ōz: 35 tənû ‘ōz lē’lōhîm ‘al-yiśərā’ēl ga’ăwāṯwō wə‘uzzwō baššəḥāqîm: 36 nwōrā’ ’ĕlōhîm mimmiqədāšeyḵā ’ēl yiśərā’ēl hû’ nōṯēn| ‘ōz wəṯa‘ăṣumwōṯ lā‘ām bārûḵə ’ĕlōhîm: