‎1 ‏לַמְנַצֵּ֥חַ עַֽל־מָחֲלַ֗ת מַשְׂכִּ֥יל לְדָוִֽד׃

‎2 ‏אָ֘מַ֤ר נָבָ֣ל בְּ֭לִבּוֹ אֵ֣ין אֱלֹהִ֑ים הִֽ֝שְׁחִ֗יתוּ וְהִֽתְעִ֥יבוּ עָ֝֗וֶל אֵ֣ין עֹֽשֵׂה־טֽוֹב׃

‎3 ‏אֱ‍ֽלֹהִ֗ים מִשָּׁמַיִם֮ הִשְׁקִ֪יף עַֽל־בְּנֵ֫י אָדָ֥ם לִ֭רְאוֹת הֲיֵ֣שׁ מַשְׂכִּ֑יל דֹּ֝רֵ֗שׁ אֶת־אֱלֹהִֽים׃

‎4 ‏כֻּלּ֥וֹ סָג֮ יַחְדָּ֪ו נֶ֫אֱלָ֥חוּ אֵ֤ין עֹֽשֵׂה־ט֑וֹב אֵ֝֗ין גַּם־אֶחָֽד׃

‎5 ‏הֲלֹ֥א יָדְעוּ֮ פֹּ֤עֲלֵ֫י אָ֥וֶן אֹכְלֵ֣י עַ֭מִּי אָ֣כְלוּ לֶ֑חֶם אֱ֝לֹהִ֗ים לֹ֣א קָרָֽאוּ׃

‎6 ‏שָׁ֤ם׀ פָּֽחֲדוּ־פַחַד֮ לֹא־הָ֪יָה֫ פָ֥חַד כִּֽי־אֱלֹהִ֗ים פִּ֭זַּר עַצְמ֣וֹת חֹנָ֑ךְ הֱ֝בִשֹׁ֗תָה כִּֽי־אֱלֹהִ֥ים מְאָסָֽם׃

‎7 ‏מִ֥י יִתֵּ֣ן מִצִּיּוֹן֮ יְשֻׁע֪וֹת יִשְׂרָ֫אֵ֥ל בְּשׁ֣וּב אֱ֭לֹהִים שְׁב֣וּת עַמּ֑וֹ יָגֵ֥ל יַ֝עֲקֹ֗ב יִשְׂמַ֥ח יִשְׂרָאֵֽל׃

1 lamənaṣṣēḥa ‘al-māḥălaṯ maśəkîl ləḏāwiḏ:

2 ’āmar nāḇāl bəlibwō ’ên ’ĕlōhîm hišəḥîṯû wəhiṯə‘îḇû ‘āwel ’ên ‘ōśēh-ṭwōḇ:

3 ’ĕ‍lōhîm miššāmayim hišəqîf ‘al-bənê ’āḏām lirə’wōṯ hăyēš maśəkîl dōrēš ’eṯ-’ĕlōhîm:

4 kullwō sāḡ y^aḥədāw ne’ĕlāḥû ’ên ‘ōśēh-ṭwōḇ ’ên gam-’eḥāḏ:

5 hălō’ yāḏə‘û pō‘ălê ’āwen ’ōḵəlê ‘ammî ’āḵəlû leḥem ’ĕlōhîm lō’ qārā’û:

6 šām| pāḥăḏû-f^aḥaḏ lō’-hāyâ fāḥaḏ kî-’ĕlōhîm pizzar ‘aṣəmwōṯ ḥōnāḵə hĕḇišōṯâ kî-’ĕlōhîm mə’āsām:

7 mî yitēn miṣṣîywōn yəšu‘wōṯ yiśərā’ēl bəšûḇ ’ĕlōhîm šəḇûṯ ‘ammwō yāḡēl y^a‘ăqōḇ yiśəm^aḥ yiśərā’ēl: