Leviticus (Vayikra): Leviticus (Vayikra) Chapter 2

Tanach (Hebrew): Leviticus (Vayikra) Chapter 2

‎1 ‏וְנֶ֗פֶשׁ כִּֽי־תַקְרִ֞יב קָרְבַּ֤ן מִנְחָה֙ לַֽיהוָ֔ה סֹ֖לֶת יִהְיֶ֣ה קָרְבָּנ֑וֹ וְיָצַ֤ק עָלֶ֙יהָ֙ שֶׁ֔מֶן וְנָתַ֥ן עָלֶ֖יהָ לְבֹנָֽה׃ ‎2 ‏וֶֽהֱבִיאָ֗הּ אֶל־בְּנֵ֣י אַהֲרֹן֮ הַכֹּהֲנִים֒ וְקָמַ֨ץ מִשָּׁ֜ם מְלֹ֣א קֻמְצ֗וֹ מִסָּלְתָּהּ֙ וּמִשַּׁמְנָ֔הּ עַ֖ל כָּל־לְבֹנָתָ֑הּ וְהִקְטִ֨יר הַכֹּהֵ֜ן אֶת־אַזְכָּרָתָהּ֙ הַמִּזְבֵּ֔חָה אִשֵּׁ֛ה רֵ֥יחַ נִיחֹ֖חַ לַיהוָֽה׃ ‎3 ‏וְהַנּוֹתֶ֙רֶת֙ מִן־הַמִּנְחָ֔ה לְאַהֲרֹ֖ן וּלְבָנָ֑יו קֹ֥דֶשׁ קָֽדָשִׁ֖ים מֵאִשֵּׁ֥י יְהוָֽה׃ ס ‎4 ‏וְכִ֥י תַקְרִ֛ב קָרְבַּ֥ן מִנְחָ֖ה מַאֲפֵ֣ה תַנּ֑וּר סֹ֣לֶת חַלּ֤וֹת מַצֹּת֙ בְּלוּלֹ֣ת בַּשֶּׁ֔מֶן וּרְקִיקֵ֥י מַצּ֖וֹת מְשֻׁחִ֥ים בַּשָּֽׁמֶן׃ ס ‎5 ‏וְאִם־מִנְחָ֥ה עַל־הַֽמַּחֲבַ֖ת קָרְבָּנֶ֑ךָ סֹ֛לֶת בְּלוּלָ֥ה בַשֶּׁ֖מֶן מַצָּ֥ה תִהְיֶֽה׃ ‎6 ‏פָּת֤וֹת אֹתָהּ֙ פִּתִּ֔ים וְיָצַקְתָּ֥ עָלֶ֖יהָ שָׁ֑מֶן מִנְחָ֖ה הִֽוא׃ ס ‎7 ‏וְאִם־מִנְחַ֥ת מַרְחֶ֖שֶׁת קָרְבָּנֶ֑ךָ סֹ֥לֶת בַּשֶּׁ֖מֶן תֵּעָשֶֽׂה׃ ‎8 ‏וְהֵבֵאתָ֣ אֶת־הַמִּנְחָ֗ה אֲשֶׁ֧ר יֵעָשֶׂ֛ה מֵאֵ֖לֶּה לַיהוָ֑ה וְהִקְרִיבָהּ֙ אֶל־הַכֹּהֵ֔ן וְהִגִּישָׁ֖הּ אֶל־הַמִּזְבֵּֽחַ׃ ‎9 ‏וְהֵרִ֨ים הַכֹּהֵ֤ן מִן־הַמִּנְחָה֙ אֶת־אַזְכָּ֣רָתָ֔הּ וְהִקְטִ֖יר הַמִּזְבֵּ֑חָה אִשֵּׁ֛ה רֵ֥יחַ נִיחֹ֖חַ לַיהוָֽה׃ ‎10 ‏וְהַנּוֹתֶ֙רֶת֙ מִן־הַמִּנְחָ֔ה לְאַהֲרֹ֖ן וּלְבָנָ֑יו קֹ֥דֶשׁ קָֽדָשִׁ֖ים מֵאִשֵּׁ֥י יְהוָֽה׃ ‎11 ‏כָּל־הַמִּנְחָ֗ה אֲשֶׁ֤ר תַּקְרִ֙יבוּ֙ לַיהוָ֔ה לֹ֥א תֵעָשֶׂ֖ה חָמֵ֑ץ כִּ֤י כָל־שְׂאֹר֙ וְכָל־דְּבַ֔שׁ לֹֽא־תַקְטִ֧ירוּ מִמֶּ֛נּוּ אִשֶּׁ֖ה לַֽיהוָֽה׃ ‎12 ‏קָרְבַּ֥ן רֵאשִׁ֛ית תַּקְרִ֥יבוּ אֹתָ֖ם לַיהוָ֑ה וְאֶל־הַמִּזְבֵּ֥חַ לֹא־יַעֲל֖וּ לְרֵ֥יחַ נִיחֹֽחַ׃ ‎13 ‏וְכָל־קָרְבַּ֣ן מִנְחָתְךָ֮ בַּמֶּ֣לַח תִּמְלָח֒ וְלֹ֣א תַשְׁבִּ֗ית מֶ֚לַח בְּרִ֣ית אֱלֹהֶ֔יךָ מֵעַ֖ל מִנְחָתֶ֑ךָ עַ֥ל כָּל־קָרְבָּנְךָ֖ תַּקְרִ֥יב מֶֽלַח׃ ס ‎14 ‏וְאִם־תַּקְרִ֛יב מִנְחַ֥ת בִּכּוּרִ֖ים לַיהוָ֑ה אָבִ֞יב קָל֤וּי בָּאֵשׁ֙ גֶּ֣רֶשׂ כַּרְמֶ֔ל תַּקְרִ֕יב אֵ֖ת מִנְחַ֥ת בִּכּוּרֶֽיךָ׃ ‎15 ‏וְנָתַתָּ֤ עָלֶ֙יהָ֙ שֶׁ֔מֶן וְשַׂמְתָּ֥ עָלֶ֖יהָ לְבֹנָ֑ה מִנְחָ֖ה הִֽוא׃ ‎16 ‏וְהִקְטִ֨יר הַכֹּהֵ֜ן אֶת־אַזְכָּרָתָ֗הּ מִגִּרְשָׂהּ֙ וּמִשַּׁמְנָ֔הּ עַ֖ל כָּל־לְבֹנָתָ֑הּ אִשֶּׁ֖ה לַיהוָֽה׃ פ

1 wənefeš kî-ṯaqərîḇ qārəban minəḥâ layhwâ sōleṯ yihəyeh qārəbānwō wəyāṣaq ‘āleyhā šemen wənāṯan ‘āleyhā ləḇōnâ: 2 wehĕḇî’āh ’el-bənê ’ahărōn hakōhănîm wəqāmaṣ miššām məlō’ quməṣwō missālətāh ûmiššamənāh ‘al kāl-ləḇōnāṯāh wəhiqəṭîr hakōhēn ’eṯ-’azəkārāṯāh hammizəbēḥâ ’iššēh rêḥa nîḥōḥa layhwâ: 3 wəhannwōṯereṯ min-hamminəḥâ lə’ahărōn ûləḇānāyw qōḏeš qāḏāšîm mē’iššê yəhwâ: s 4 wəḵî ṯaqəriḇ qārəban minəḥâ ma’ăfēh ṯannûr sōleṯ ḥallwōṯ maṣṣōṯ bəlûlōṯ baššemen ûrəqîqê maṣṣwōṯ məšuḥîm baššāmen: s 5 wə’im-minəḥâ ‘al-hammaḥăḇaṯ qārəbāneḵā sōleṯ bəlûlâ ḇaššemen maṣṣâ ṯihəyeh: 6 pāṯwōṯ ’ōṯāh pitîm wəyāṣaqətā ‘āleyhā šāmen minəḥâ hiw’: s 7 wə’im-minəḥaṯ marəḥešeṯ qārəbāneḵā sōleṯ baššemen tē‘āśeh: 8 wəhēḇē’ṯā ’eṯ-hamminəḥâ ’ăšer yē‘āśeh mē’ēlleh layhwâ wəhiqərîḇāh ’el-hakōhēn wəhigîšāh ’el-hammizəbēḥa: 9 wəhērîm hakōhēn min-hamminəḥâ ’eṯ-’azəkārāṯāh wəhiqəṭîr hammizəbēḥâ ’iššēh rêḥa nîḥōḥa layhwâ: 10 wəhannwōṯereṯ min-hamminəḥâ lə’ahărōn ûləḇānāyw qōḏeš qāḏāšîm mē’iššê yəhwâ: 11 kāl-hamminəḥâ ’ăšer taqərîḇû layhwâ lō’ ṯē‘āśeh ḥāmēṣ kî ḵāl-śə’ōr wəḵāl-dəḇaš lō’-ṯaqəṭîrû mimmennû ’iššeh layhwâ: 12 qārəban rē’šîṯ taqərîḇû ’ōṯām layhwâ wə’el-hammizəbēḥa lō’-ya‘ălû lərêḥa nîḥōḥa: 13 wəḵāl-qārəban minəḥāṯəḵā bammelaḥ timəlāḥ wəlō’ ṯašəbîṯ melaḥ bərîṯ ’ĕlōheyḵā mē‘al minəḥāṯeḵā ‘al kāl-qārəbānəḵā taqərîḇ melaḥ: s 14 wə’im-taqərîḇ minəḥaṯ bikûrîm layhwâ ’āḇîḇ qālûy bā’ēš gereś karəmel taqərîḇ ’ēṯ minəḥaṯ bikûreyḵā: 15 wənāṯatā ‘āleyhā šemen wəśamətā ‘āleyhā ləḇōnâ minəḥâ hiw’: 16 wəhiqəṭîr hakōhēn ’eṯ-’azəkārāṯāh migirəśāh ûmiššamənāh ‘al kāl-ləḇōnāṯāh ’iššeh layhwâ: f