‎1 ‏וְאֶת־בֵּיתוֹ֙ בָּנָ֣ה שְׁלֹמֹ֔ה שְׁלֹ֥שׁ עֶשְׂרֵ֖ה שָׁנָ֑ה וַיְכַ֖ל אֶת־כָּל־בֵּיתֽוֹ׃

‎2 ‏וַיִּ֜בֶן אֶת־בֵּ֣ית׀ יַ֣עַר הַלְּבָנ֗וֹן מֵאָ֨ה אַמָּ֤ה אָרְכּוֹ֙ וַחֲמִשִּׁ֤ים אַמָּה֙ רָחְבּ֔וֹ וּשְׁלֹשִׁ֥ים אַמָּ֖ה קוֹמָת֑וֹ עַ֗ל אַרְבָּעָה֙ טוּרֵי֙ עַמּוּדֵ֣י אֲרָזִ֔ים וּכְרֻת֥וֹת אֲרָזִ֖ים עַל־הָעַמּוּדִֽים׃

‎3 ‏וְסָפֻ֣ן בָּאֶ֗רֶז מִמַּ֙עַל֙ עַל־הַצְּלָעֹת֙ אֲשֶׁ֣ר עַל־הָֽעַמּוּדִ֔ים אַרְבָּעִ֖ים וַחֲמִשָּׁ֑ה חֲמִשָּׁ֥ה עָשָׂ֖ר הַטּֽוּר׃

‎4 ‏וּשְׁקֻפִ֖ים שְׁלֹשָׁ֣ה טוּרִ֑ים וּמֶחֱזָ֥ה אֶל־מֶחֱזָ֖ה שָׁלֹ֥שׁ פְּעָמִֽים׃

‎5 ‏וְכָל־הַפְּתָחִ֥ים וְהַמְּזוּז֖וֹת רְבֻעִ֣ים שָׁ֑קֶף וּמ֧וּל מֶחֱזָ֛ה אֶל־מֶחֱזָ֖ה שָׁלֹ֥שׁ פְּעָמִֽים׃

‎6 ‏וְאֵ֨ת אוּלָ֤ם הָֽעַמּוּדִים֙ עָשָׂ֔ה חֲמִשִּׁ֤ים אַמָּה֙ אָרְכּ֔וֹ וּשְׁלֹשִׁ֥ים אַמָּ֖ה רָחְבּ֑וֹ וְאוּלָם֙ עַל־פְּנֵיהֶ֔ם וְעַמֻּדִ֥ים וְעָ֖ב עַל־פְּנֵיהֶֽם׃

‎7 ‏וְאוּלָ֤ם הַכִּסֵּא֙ אֲשֶׁ֣ר יִשְׁפָּט־שָׁ֔ם אֻלָ֥ם הַמִּשְׁפָּ֖ט עָשָׂ֑ה וְסָפ֣וּן בָּאֶ֔רֶז מֵהַקַּרְקַ֖ע עַד־הַקַּרְקָֽע׃

‎8 ‏וּבֵיתוֹ֩ אֲשֶׁר־יֵ֨שֶׁב שָׁ֜ם חָצֵ֣ר הָאַחֶ֗רֶת מִבֵּית֙ לָֽאוּלָ֔ם כַּמַּֽעֲשֶׂ֥ה הַזֶּ֖ה הָיָ֑ה וּבַ֜יִת יַעֲשֶׂ֤ה לְבַת־פַּרְעֹה֙ אֲשֶׁ֣ר לָקַ֣ח שְׁלֹמֹ֔ה כָּאוּלָ֖ם הַזֶּֽה׃

‎9 ‏כָּל־אֵ֜לֶּה אֲבָנִ֤ים יְקָרֹת֙ כְּמִדֹּ֣ת גָּזִ֔ית מְגֹרָר֥וֹת בַּמְּגֵרָ֖ה מִבַּ֣יִת וּמִח֑וּץ וּמִמַּסָּד֙ עַד־הַטְּפָח֔וֹת וּמִח֖וּץ עַד־הֶחָצֵ֥ר הַגְּדוֹלָֽה׃

‎10 ‏וּמְיֻסָּ֕ד אֲבָנִ֥ים יְקָר֖וֹת אֲבָנִ֣ים גְּדֹל֑וֹת אַבְנֵי֙ עֶ֣שֶׂר אַמּ֔וֹת וְאַבְנֵ֖י שְׁמֹנֶ֥ה אַמּֽוֹת׃

‎11 ‏וּמִלְמַ֗עְלָה אֲבָנִ֧ים יְקָר֛וֹת כְּמִדּ֥וֹת גָּזִ֖ית וָאָֽרֶז׃

‎12 ‏וְחָצֵ֨ר הַגְּדוֹלָ֜ה סָבִ֗יב שְׁלֹשָׁה֙ טוּרִ֣ים גָּזִ֔ית וְט֖וּר כְּרֻתֹ֣ת אֲרָזִ֑ים וְלַחֲצַ֧ר בֵּית־יְהוָ֛ה הַפְּנִימִ֖ית וּלְאֻלָ֥ם הַבָּֽיִת׃ פ

‎13 ‏וַיִּשְׁלַח֙ הַמֶּ֣לֶךְ שְׁלֹמֹ֔ה וַיִּקַּ֥ח אֶת־חִירָ֖ם מִצֹּֽר׃

‎14 ‏בֶּן־אִשָּׁה֩ אַלְמָנָ֨ה ה֜וּא מִמַּטֵּ֣ה נַפְתָּלִ֗י וְאָבִ֣יו אִישׁ־צֹרִי֮ חֹרֵ֣שׁ נְחֹשֶׁת֒ וַ֠יִּמָּלֵא אֶת־הַחָכְמָ֤ה וְאֶת־הַתְּבוּנָה֙ וְאֶת־הַדַּ֔עַת לַעֲשׂ֥וֹת כָּל־מְלָאכָ֖ה בַּנְּחֹ֑שֶׁת וַיָּבוֹא֙ אֶל־הַמֶּ֣לֶךְ שְׁלֹמֹ֔ה וַיַּ֖עַשׂ אֶת־כָּל־מְלַאכְתּֽוֹ׃

‎15 ‏וַיָּ֛צַר אֶת־שְׁנֵ֥י הָעַמּוּדִ֖ים נְחֹ֑שֶׁת שְׁמֹנֶ֨ה עֶשְׂרֵ֜ה אַמָּ֗ה קוֹמַת֙ הָעַמּ֣וּד הָאֶחָ֔ד וְחוּט֙ שְׁתֵּים־עֶשְׂרֵ֣ה אַמָּ֔ה יָסֹ֖ב אֶת־הָעַמּ֥וּד הַשֵּׁנִֽי׃

‎16 ‏וּשְׁתֵּ֨י כֹתָרֹ֜ת עָשָׂ֗ה לָתֵ֛ת עַל־רָאשֵׁ֥י הָֽעַמּוּדִ֖ים מֻצַ֣ק נְחֹ֑שֶׁת חָמֵ֣שׁ אַמּ֗וֹת קוֹמַת֙ הַכֹּתֶ֣רֶת הָאֶחָ֔ת וְחָמֵ֣שׁ אַמּ֔וֹת קוֹמַ֖ת הַכֹּתֶ֥רֶת הַשֵּׁנִֽית׃

‎17 ‏שְׂבָכִ֞ים מַעֲשֵׂ֣ה שְׂבָכָ֗ה גְּדִלִים֙ מַעֲשֵׂ֣ה שַׁרְשְׁר֔וֹת לַכֹּ֣תָרֹ֔ת אֲשֶׁ֖ר עַל־רֹ֣אשׁ הָעַמּוּדִ֑ים שִׁבְעָה֙ לַכֹּתֶ֣רֶת הָאֶחָ֔ת וְשִׁבְעָ֖ה לַכֹּתֶ֥רֶת הַשֵּׁנִֽית׃

‎18 ‏וַיַּ֖עַשׂ אֶת־הָעַמּוּדִ֑ים וּשְׁנֵי֩ טוּרִ֨ים סָבִ֜יב עַל־הַשְּׂבָכָ֣ה הָאֶחָ֗ת לְכַסּ֤וֹת אֶת־הַכֹּֽתָרֹת֙ אֲשֶׁר֙ עַל־רֹ֣אשׁ הָֽרִמֹּנִ֔ים וְכֵ֣ן עָשָׂ֔ה לַכֹּתֶ֖רֶת הַשֵּׁנִֽית׃

‎19 ‏וְכֹֽתָרֹ֗ת אֲשֶׁר֙ עַל־רֹ֣אשׁ הָעַמּוּדִ֔ים מַעֲשֵׂ֖ה שׁוּשַׁ֣ן בָּֽאוּלָ֑ם אַרְבַּ֖ע אַמּֽוֹת׃

‎20 ‏וְכֹתָרֹ֗ת עַל־שְׁנֵי֙ הָֽעַמּוּדִ֔ים גַּם־מִמַּ֙עַל֙ מִלְּעֻמַּ֣ת הַבֶּ֔טֶן אֲשֶׁ֖ר לְעֵ֣בֶר שבכה הַשְּׂבָכָ֑ה וְהָרִמּוֹנִ֤ים מָאתַ֙יִם֙ טֻרִ֣ים סָבִ֔יב עַ֖ל הַכֹּתֶ֥רֶת הַשֵּׁנִֽית׃

‎21 ‏וַיָּ֙קֶם֙ אֶת־הָֽעַמֻּדִ֔ים לְאֻלָ֖ם הַֽהֵיכָ֑ל וַיָּ֜קֶם אֶת־הָעַמּ֣וּד הַיְמָנִ֗י וַיִּקְרָ֤א אֶת־שְׁמוֹ֙ יָכִ֔ין וַיָּ֙קֶם֙ אֶת־הָעַמּ֣וּד הַשְּׂמָאלִ֔י וַיִּקְרָ֥א אֶת־שְׁמ֖וֹ בֹּֽעַז׃

‎22 ‏וְעַ֛ל רֹ֥אשׁ הָעַמּוּדִ֖ים מַעֲשֵׂ֣ה שׁוֹשָׁ֑ן וַתִּתֹּ֖ם מְלֶ֥אכֶת הָעַמּוּדִֽים׃

‎23 ‏וַיַּ֥עַשׂ אֶת־הַיָּ֖ם מוּצָ֑ק עֶ֣שֶׂר בָּ֠אַמָּה מִשְּׂפָת֨וֹ עַד־שְׂפָת֜וֹ עָגֹ֣ל׀ סָבִ֗יב וְחָמֵ֤שׁ בָּֽאַמָּה֙ קוֹמָת֔וֹ וקוה וְקָו֙ שְׁלֹשִׁ֣ים בָּֽאַמָּ֔ה יָסֹ֥ב אֹת֖וֹ סָבִֽיב׃

‎24 ‏וּפְקָעִים֩ מִתַּ֨חַת לִשְׂפָת֤וֹ׀ סָבִיב֙ סֹבְבִ֣ים אֹת֔וֹ עֶ֚שֶׂר בָּֽאַמָּ֔ה מַקִּפִ֥ים אֶת־הַיָּ֖ם סָבִ֑יב שְׁנֵ֤י טוּרִים֙ הַפְּקָעִ֔ים יְצֻקִ֖ים בִּיצֻקָתֽוֹ׃

‎25 ‏עֹמֵ֞ד עַל־שְׁנֵ֧י עָשָׂ֣ר בָּקָ֗ר שְׁלֹשָׁ֣ה פֹנִ֣ים׀ צָפ֡וֹנָה וּשְׁלֹשָׁה֩ פֹנִ֨ים׀ יָ֜מָּה וּשְׁלֹשָׁ֣ה׀ פֹּנִ֣ים נֶ֗גְבָּה וּשְׁלֹשָׁה֙ פֹּנִ֣ים מִזְרָ֔חָה וְהַיָּ֥ם עֲלֵיהֶ֖ם מִלְמָ֑עְלָה וְכָל־אֲחֹֽרֵיהֶ֖ם בָּֽיְתָה׃

‎26 ‏וְעָבְי֣וֹ טֶ֔פַח וּשְׂפָת֛וֹ כְּמַעֲשֵׂ֥ה שְׂפַת־כּ֖וֹס פֶּ֣רַח שׁוֹשָׁ֑ן אַלְפַּ֥יִם בַּ֖ת יָכִֽיל׃ פ

‎27 ‏וַיַּ֧עַשׂ אֶת־הַמְּכֹנ֛וֹת עֶ֖שֶׂר נְחֹ֑שֶׁת אַרְבַּ֣ע בָּאַמָּ֗ה אֹ֚רֶךְ הַמְּכוֹנָ֣ה הָֽאֶחָ֔ת וְאַרְבַּ֤ע בָּֽאַמָּה֙ רָחְבָּ֔הּ וְשָׁלֹ֥שׁ בָּאַמָּ֖ה קוֹמָתָֽהּ׃

‎28 ‏וְזֶ֛ה מַעֲשֵׂ֥ה הַמְּכוֹנָ֖ה מִסְגְּרֹ֣ת לָהֶ֑ם וּמִסְגְּרֹ֖ת בֵּ֥ין הַשְׁלַבִּֽים׃

‎29 ‏וְעַֽל־הַמִּסְגְּר֞וֹת אֲשֶׁ֣ר׀ בֵּ֣ין הַשְׁלַבִּ֗ים אֲרָי֤וֹת׀ בָּקָר֙ וּכְרוּבִ֔ים וְעַל־הַשְׁלַבִּ֖ים כֵּ֣ן מִמָּ֑עַל וּמִתַּ֙חַת֙ לַאֲרָי֣וֹת וְלַבָּקָ֔ר לֹי֖וֹת מַעֲשֵׂ֥ה מוֹרָֽד׃

‎30 ‏וְאַרְבָּעָה֩ אוֹפַנֵּ֨י נְחֹ֜שֶׁת לַמְּכוֹנָ֤ה הָֽאַחַת֙ וְסַרְנֵ֣י נְחֹ֔שֶׁת וְאַרְבָּעָ֥ה פַעֲמֹתָ֖יו כְּתֵפֹ֣ת לָהֶ֑ם מִתַּ֤חַת לַכִּיֹּר֙ הַכְּתֵפֹ֣ת יְצֻק֔וֹת מֵעֵ֥בֶר אִ֖ישׁ לֹיֽוֹת׃

‎31 ‏וּ֠פִיהוּ מִבֵּ֨ית לַכֹּתֶ֤רֶת וָמַ֙עְלָה֙ בָּֽאַמָּ֔ה וּפִ֙יהָ֙ עָגֹ֣ל מַעֲשֵׂה־כֵ֔ן אַמָּ֖ה וַחֲצִ֣י הָֽאַמָּ֑ה וְגַם־עַל־פִּ֙יהָ֙ מִקְלָע֔וֹת וּמִסְגְּרֹתֵיהֶ֥ם מְרֻבָּע֖וֹת לֹ֥א עֲגֻלּֽוֹת׃

‎32 ‏וְאַרְבַּ֣עַת הָאֽוֹפַנִּ֗ים לְמִתַּ֙חַת֙ לַֽמִּסְגְּר֔וֹת וִיד֥וֹת הָאֽוֹפַנִּ֖ים בַּמְּכוֹנָ֑ה וְקוֹמַת֙ הָאוֹפַ֣ן הָאֶחָ֔ד אַמָּ֖ה וַחֲצִ֥י הָאַמָּֽה׃

‎33 ‏וּמַֽעֲשֵׂה֙ הָא֣וֹפַנִּ֔ים כְּמַעֲשֵׂ֖ה אוֹפַ֣ן הַמֶּרְכָּבָ֑ה יְדוֹתָ֣ם וְגַבֵּיהֶ֗ם וְחִשֻּׁקֵיהֶ֛ם וְחִשֻּׁרֵיהֶ֖ם הַכֹּ֥ל מוּצָֽק׃

‎34 ‏וְאַרְבַּ֣ע כְּתֵפ֔וֹת אֶ֚ל אַרְבַּ֣ע פִּנּ֔וֹת הַמְּכֹנָ֖ה הָֽאֶחָ֑ת מִן־הַמְּכֹנָ֖ה כְּתֵפֶֽיהָ׃

‎35 ‏וּבְרֹ֣אשׁ הַמְּכוֹנָ֗ה חֲצִ֧י הָאַמָּ֛ה קוֹמָ֖ה עָגֹ֣ל׀ סָבִ֑יב וְעַ֨ל רֹ֤אשׁ הַמְּכֹנָה֙ יְדֹתֶ֔יהָ וּמִסְגְּרֹתֶ֖יהָ מִמֶּֽנָּה׃

‎36 ‏וַיְפַתַּ֤ח עַל־הַלֻּחֹת֙ יְדֹתֶ֔יהָ וְעַל֙ ומסגרתיה מִסְגְּרֹתֶ֔יהָ כְּרוּבִ֖ים אֲרָי֣וֹת וְתִמֹרֹ֑ת כְּמַֽעַר־אִ֥ישׁ וְלֹי֖וֹת סָבִֽיב׃

‎37 ‏כָּזֹ֣את עָשָׂ֔ה אֵ֖ת עֶ֣שֶׂר הַמְּכֹנ֑וֹת מוּצָ֨ק אֶחָ֜ד מִדָּ֥ה אַחַ֛ת קֶ֥צֶב אֶחָ֖ד לְכֻלָּֽהְנָה׃ ס

‎38 ‏וַיַּ֛עַשׂ עֲשָׂרָ֥ה כִיֹּר֖וֹת נְחֹ֑שֶׁת אַרְבָּעִ֨ים בַּ֜ת יָכִ֣יל׀ הַכִּיּ֣וֹר הָאֶחָ֗ד אַרְבַּ֤ע בָּֽאַמָּה֙ הַכִּיּ֣וֹר הָאֶחָ֔ד כִּיּ֤וֹר אֶחָד֙ עַל־הַמְּכוֹנָ֣ה הָאַחַ֔ת לְעֶ֖שֶׂר הַמְּכֹנֽוֹת׃

‎39 ‏וַיִּתֵּן֙ אֶת־הַמְּכֹנ֔וֹת חָמֵ֞שׁ עַל־כֶּ֤תֶף הַבַּ֙יִת֙ מִיָּמִ֔ין וְחָמֵ֛שׁ עַל־כֶּ֥תֶף הַבַּ֖יִת מִשְּׂמֹאל֑וֹ וְאֶת־הַיָּ֗ם נָתַ֞ן מִכֶּ֨תֶף הַבַּ֧יִת הַיְמָנִ֛ית קֵ֖דְמָה מִמּ֥וּל נֶֽגֶב׃ ס

‎40 ‏וַיַּ֣עַשׂ חִיר֔וֹם אֶת־הַ֨כִּיֹּר֔וֹת וְאֶת־הַיָּעִ֖ים וְאֶת־הַמִּזְרָק֑וֹת וַיְכַ֣ל חִירָ֗ם לַֽעֲשׂוֹת֙ אֶת־כָּל־הַמְּלָאכָ֔ה אֲשֶׁ֥ר עָשָׂ֛ה לַמֶּ֥לֶךְ שְׁלֹמֹ֖ה בֵּ֥ית יְהוָֽה׃

‎41 ‏עַמֻּדִ֣ים שְׁנַ֔יִם וְגֻלֹּ֧ת הַכֹּתָרֹ֛ת אֲשֶׁר־עַל־רֹ֥אשׁ הָֽעַמֻּדִ֖ים שְׁתָּ֑יִם וְהַשְּׂבָכ֣וֹת שְׁתַּ֔יִם לְכַסּ֗וֹת אֶת־שְׁתֵּי֙ גֻּלֹּ֣ת הַכֹּֽתָרֹ֔ת אֲשֶׁ֖ר עַל־רֹ֥אשׁ הָעַמּוּדִֽים׃

‎42 ‏וְאֶת־הָרִמֹּנִ֛ים אַרְבַּ֥ע מֵא֖וֹת לִשְׁתֵּ֣י הַשְּׂבָכ֑וֹת שְׁנֵֽי־טוּרִ֤ים רִמֹּנִים֙ לַשְּׂבָכָ֣ה הָֽאֶחָ֔ת לְכַסּ֗וֹת אֶת־שְׁתֵּי֙ גֻּלֹּ֣ת הַכֹּֽתָרֹ֔ת אֲשֶׁ֖ר עַל־פְּנֵ֥י הָעַמּוּדִֽים׃

‎43 ‏וְאֶת־הַמְּכֹנ֖וֹת עָ֑שֶׂר וְאֶת־הַכִּיֹּרֹ֥ת עֲשָׂרָ֖ה עַל־הַמְּכֹנֽוֹת׃

‎44 ‏וְאֶת־הַיָּ֖ם הָאֶחָ֑ד וְאֶת־הַבָּקָ֥ר שְׁנֵים־עָשָׂ֖ר תַּ֥חַת הַיָּֽם׃

‎45 ‏וְאֶת־הַסִּיר֨וֹת וְאֶת־הַיָּעִ֜ים וְאֶת־הַמִּזְרָק֗וֹת וְאֵת֙ כָּל־הַכֵּלִ֣ים האהל הָאֵ֔לֶּה^a אֲשֶׁ֨ר עָשָׂ֥ה חִירָ֛ם לַמֶּ֥לֶךְ שְׁלֹמֹ֖ה בֵּ֣ית יְהוָ֑ה נְחֹ֖שֶׁת מְמֹרָֽט׃

‎46 ‏בְּכִכַּ֤ר הַיַּרְדֵּן֙ יְצָקָ֣ם הַמֶּ֔לֶךְ בְּמַעֲבֵ֖ה הָאֲדָמָ֑ה בֵּ֥ין סֻכּ֖וֹת וּבֵ֥ין צָרְתָֽן׃

‎47 ‏וַיַּנַּ֤ח שְׁלֹמֹה֙ אֶת־כָּל־הַכֵּלִ֔ים מֵרֹ֖ב מְאֹ֣ד מְאֹ֑ד לֹ֥א נֶחְקַ֖ר מִשְׁקַ֥ל הַנְּחֹֽשֶׁת׃

‎48 ‏וַיַּ֣עַשׂ שְׁלֹמֹ֔ה אֵ֚ת כָּל־הַכֵּלִ֔ים אֲשֶׁ֖ר בֵּ֣ית יְהוָ֑ה אֵ֚ת מִזְבַּ֣ח הַזָּהָ֔ב וְאֶת־הַשֻּׁלְחָ֗ן אֲשֶׁ֥ר עָלָ֛יו לֶ֥חֶם הַפָּנִ֖ים זָהָֽב׃

‎49 ‏וְאֶת־הַ֠מְּנֹרוֹת חָמֵ֨שׁ מִיָּמִ֜ין וְחָמֵ֧שׁ מִשְּׂמֹ֛אול לִפְנֵ֥י הַדְּבִ֖יר זָהָ֣ב סָג֑וּר וְהַפֶּ֧רַח וְהַנֵּרֹ֛ת וְהַמֶּלְקַחַ֖יִם זָהָֽב׃

‎50 ‏וְ֠הַסִּפּוֹת וְהַֽמְזַמְּר֧וֹת וְהַמִּזְרָק֛וֹת וְהַכַּפּ֥וֹת וְהַמַּחְתּ֖וֹת זָהָ֣ב סָג֑וּר וְהַפֹּת֡וֹת לְדַלְתוֹת֩ הַבַּ֨יִת הַפְּנִימִ֜י לְקֹ֣דֶשׁ הַקֳּדָשִׁ֗ים לְדַלְתֵ֥י הַבַּ֛יִת לַהֵיכָ֖ל זָהָֽב׃ פ

‎51 ‏וַתִּשְׁלַם֙ כָּל־הַמְּלָאכָ֔ה אֲשֶׁ֥ר עָשָׂ֛ה הַמֶּ֥לֶךְ שְׁלֹמֹ֖ה בֵּ֣ית יְהוָ֑ה וַיָּבֵ֨א שְׁלֹמֹ֜ה אֶת־קָדְשֵׁ֣י׀ דָּוִ֣ד אָבִ֗יו אֶת־הַכֶּ֤סֶף וְאֶת־הַזָּהָב֙ וְאֶת־הַכֵּלִ֔ים נָתַ֕ן בְּאֹצְר֖וֹת בֵּ֥ית יְהוָֽה׃ פ

1 wə’eṯ-bêṯwō bānâ šəlōmōh šəlōš ‘eśərēh šānâ wayəḵal ’eṯ-kāl-bêṯwō:

2 wayyiḇen ’eṯ-bêṯ| y^a‘ar halləḇānwōn mē’â ’ammâ ’ārəkwō w^aḥămiššîm ’ammâ rāḥəbwō ûšəlōšîm ’ammâ qwōmāṯwō ‘al ’arəbā‘â ṭûrê ‘ammûḏê ’ărāzîm ûḵəruṯwōṯ ’ărāzîm ‘al-hā‘ammûḏîm:

3 wəsāfun bā’erez mimm^a‘al ‘al-haṣṣəlā‘ōṯ ’ăšer ‘al-hā‘ammûḏîm ’arəbā‘îm w^aḥămiššâ ḥămiššâ ‘āśār haṭṭûr:

4 ûšəqufîm šəlōšâ ṭûrîm ûmeḥĕzâ ’el-meḥĕzâ šālōš pə‘āmîm:

5 wəḵāl-hapəṯāḥîm wəhamməzûzwōṯ rəḇu‘îm šāqef ûmûl meḥĕzâ ’el-meḥĕzâ šālōš pə‘āmîm:

6 wə’ēṯ ’ûlām hā‘ammûḏîm ‘āśâ ḥămiššîm ’ammâ ’ārəkwō ûšəlōšîm ’ammâ rāḥəbwō wə’ûlām ‘al-pənêhem wə‘ammuḏîm wə‘āḇ ‘al-pənêhem:

7 wə’ûlām hakissē’ ’ăšer yišəpāṭ-šām ’ulām hammišəpāṭ ‘āśâ wəsāfûn bā’erez mēhaqqarəq^a‘ ‘aḏ-haqqarəqā‘:

8 ûḇêṯwō ’ăšer-yēšeḇ šām ḥāṣēr hā’^aḥereṯ mibêṯ lā’ûlām kamm^a‘ăśeh hazzeh hāyâ ûḇayiṯ y^a‘ăśeh ləḇaṯ-parə‘ōh ’ăšer lāq^aḥ šəlōmōh kā’ûlām hazzeh:

9 kāl-’ēlleh ’ăḇānîm yəqārōṯ kəmidōṯ gāzîṯ məḡōrārwōṯ bamməḡērâ mibayiṯ ûmiḥûṣ ûmimmassāḏ ‘aḏ-haṭṭəfāḥwōṯ ûmiḥûṣ ‘aḏ-heḥāṣēr hagəḏwōlâ:

10 ûməyussāḏ ’ăḇānîm yəqārwōṯ ’ăḇānîm gəḏōlwōṯ ’aḇənê ‘eśer ’ammwōṯ wə’aḇənê šəmōneh ’ammwōṯ:

11 ûmiləm^a‘əlâ ’ăḇānîm yəqārwōṯ kəmidwōṯ gāzîṯ wā’ārez:

12 wəḥāṣēr hagəḏwōlâ sāḇîḇ šəlōšâ ṭûrîm gāzîṯ wəṭûr kəruṯōṯ ’ărāzîm wəl^aḥăṣar bêṯ-yəhwâ hapənîmîṯ ûlə’ulām habāyiṯ: f

13 wayyišəl^aḥ hammeleḵə šəlōmōh wayyiqq^aḥ ’eṯ-ḥîrām miṣṣōr:

14 ben-’iššâ ’aləmānâ hû’ mimmaṭṭēh nafətālî wə’āḇîw ’îš-ṣōrî ḥōrēš nəḥōšeṯ wayyimmālē’ ’eṯ-h^aḥāḵəmâ wə’eṯ-hatəḇûnâ wə’eṯ-had^a‘aṯ l^a‘ăśwōṯ kāl-məlā’ḵâ bannəḥōšeṯ wayyāḇwō’ ’el-hammeleḵə šəlōmōh wayy^a‘aś ’eṯ-kāl-məla’ḵətwō:

15 wayyāṣar ’eṯ-šənê hā‘ammûḏîm nəḥōšeṯ šəmōneh ‘eśərēh ’ammâ qwōmaṯ hā‘ammûḏ hā’eḥāḏ wəḥûṭ šətêm-‘eśərēh ’ammâ yāsōḇ ’eṯ-hā‘ammûḏ haššēnî:

16 ûšətê ḵōṯārōṯ ‘āśâ lāṯēṯ ‘al-rā’šê hā‘ammûḏîm muṣaq nəḥōšeṯ ḥāmēš ’ammwōṯ qwōmaṯ hakōṯereṯ hā’eḥāṯ wəḥāmēš ’ammwōṯ qwōmaṯ hakōṯereṯ haššēnîṯ:

17 śəḇāḵîm m^a‘ăśēh śəḇāḵâ gəḏilîm m^a‘ăśēh šarəšərwōṯ lakōṯārōṯ ’ăšer ‘al-rō’š hā‘ammûḏîm šiḇə‘â lakōṯereṯ hā’eḥāṯ wəšiḇə‘â lakōṯereṯ haššēnîṯ:

18 wayy^a‘aś ’eṯ-hā‘ammûḏîm ûšənê ṭûrîm sāḇîḇ ‘al-haśśəḇāḵâ hā’eḥāṯ ləḵasswōṯ ’eṯ-hakōṯārōṯ ’ăšer ‘al-rō’š hārimmōnîm wəḵēn ‘āśâ lakōṯereṯ haššēnîṯ:

19 wəḵōṯārōṯ ’ăšer ‘al-rō’š hā‘ammûḏîm m^a‘ăśēh šûšan bā’ûlām ’arəb^a‘ ’ammwōṯ:

20 wəḵōṯārōṯ ‘al-šənê hā‘ammûḏîm gam-mimm^a‘al millə‘ummaṯ habeṭen ’ăšer lə‘ēḇer śəḇāḵâ haśśəḇāḵâ wəhārimmwōnîm mā’ṯayim ṭurîm sāḇîḇ ‘al hakōṯereṯ haššēnîṯ:

21 wayyāqem ’eṯ-hā‘ammuḏîm lə’ulām hahêḵāl wayyāqem ’eṯ-hā‘ammûḏ hayəmānî wayyiqərā’ ’eṯ-šəmwō yāḵîn wayyāqem ’eṯ-hā‘ammûḏ haśśəmā’lî wayyiqərā’ ’eṯ-šəmwō bō‘az:

22 wə‘al rō’š hā‘ammûḏîm m^a‘ăśēh šwōšān watitōm məle’ḵeṯ hā‘ammûḏîm:

23 wayy^a‘aś ’eṯ-hayyām mûṣāq ‘eśer bā’ammâ miśśəfāṯwō ‘aḏ-śəfāṯwō ‘āḡōl| sāḇîḇ wəḥāmēš bā’ammâ qwōmāṯwō ûqəwēh wəqāw šəlōšîm bā’ammâ yāsōḇ ’ōṯwō sāḇîḇ:

24 ûfəqā‘îm mit^aḥaṯ liśəfāṯwō| sāḇîḇ sōḇəḇîm ’ōṯwō ‘eśer bā’ammâ maqqifîm ’eṯ-hayyām sāḇîḇ šənê ṭûrîm hapəqā‘îm yəṣuqîm bîṣuqāṯwō:

25 ‘ōmēḏ ‘al-šənê ‘āśār bāqār šəlōšâ fōnîm| ṣāfwōnâ ûšəlōšâ fōnîm| yāmmâ ûšəlōšâ| pōnîm neḡəbâ ûšəlōšâ pōnîm mizərāḥâ wəhayyām ‘ălêhem miləmā‘əlâ wəḵāl-’ăḥōrêhem bāyəṯâ:

26 wə‘āḇəywō ṭef^aḥ ûśəfāṯwō kəm^a‘ăśēh śəfaṯ-kwōs per^aḥ šwōšān ’aləpayim baṯ yāḵîl: f

27 wayy^a‘aś ’eṯ-hamməḵōnwōṯ ‘eśer nəḥōšeṯ ’arəb^a‘ bā’ammâ ’ōreḵə hamməḵwōnâ hā’eḥāṯ wə’arəb^a‘ bā’ammâ rāḥəbāh wəšālōš bā’ammâ qwōmāṯāh:

28 wəzeh m^a‘ăśēh hamməḵwōnâ misəgərōṯ lâem ûmisəgərōṯ bên hašəlabîm:

29 wə‘al-hammisəgərwōṯ ’ăšer| bên hašəlabîm ’ărāywōṯ| bāqār ûḵərûḇîm wə‘al-hašəlabîm kēn mimmā‘al ûmit^aḥaṯ la’ărāywōṯ wəlabāqār lōywōṯ m^a‘ăśēh mwōrāḏ:

30 wə’arəbā‘â ’wōfannê nəḥōšeṯ lamməḵwōnâ hā’^aḥaṯ wəsarənê nəḥōšeṯ wə’arəbā‘â f^a‘ămōṯāyw kəṯēfōṯ lâem mit^aḥaṯ lakîyōr hakəṯēfōṯ yəṣuqwōṯ mē‘ēḇer ’îš lōywōṯ:

31 ûfîhû mibêṯ lakōṯereṯ wām^a‘əlâ bā’ammâ ûfîhā ‘āḡōl m^a‘ăśēh-ḵēn ’ammâ w^aḥăṣî hā’ammâ wəḡam-‘al-pîhā miqəlā‘wōṯ ûmisəgərōṯêhem mərubā‘wōṯ lō’ ‘ăḡullwōṯ:

32 wə’arəb^a‘aṯ hā’wōfannîm ləmit^aḥaṯ lammisəgərwōṯ wîḏwōṯ hā’wōfannîm bamməḵwōnâ wəqwōmaṯ hā’wōfan hā’eḥāḏ ’ammâ w^aḥăṣî hā’ammâ:

33 ûm^a‘ăśēh hā’wōfannîm kəm^a‘ăśēh ’wōfan hammerəkāḇâ yəḏwōṯām wəḡabêhem wəḥiššuqêhem wəḥiššurêhem hakōl mûṣāq:

34 wə’arəb^a‘ kəṯēfwōṯ ’el ’arəb^a‘ pinnwōṯ hamməḵōnâ hā’eḥāṯ min-hamməḵōnâ kəṯēfeyhā:

35 ûḇərō’š hamməḵwōnâ ḥăṣî hā’ammâ qwōmâ ‘āḡōl| sāḇîḇ wə‘al rō’š hamməḵōnâ yəḏōṯeyhā ûmisəgərōṯeyhā mimmennâ:

36 wayəfat^aḥ ‘al-halluḥōṯ yəḏōṯeyhā wə‘al ûmisəgərōṯeyhā misəgərōṯeyhā kərûḇîm ’ărāywōṯ wəṯimōrōṯ kəm^a‘ar-’îš wəlōywōṯ sāḇîḇ:

37 kāzō’ṯ ‘āśâ ’ēṯ ‘eśer hamməḵōnwōṯ mûṣāq ’eḥāḏ midâ ’^aḥaṯ qeṣeḇ ’eḥāḏ ləḵullâənâ: s

38 wayy^a‘aś ‘ăśārâ ḵîyōrwōṯ nəḥōšeṯ ’arəbā‘îm baṯ yāḵîl| hakîywōr hā’eḥāḏ ’arəb^a‘ bā’ammâ hakîywōr hā’eḥāḏ kîywōr ’eḥāḏ ‘al-hamməḵwōnâ hā’^aḥaṯ lə‘eśer hamməḵōnwōṯ:

39 wayyitēn ’eṯ-hamməḵōnwōṯ ḥāmēš ‘al-keṯef habayiṯ mîyāmîn wəḥāmēš ‘al-keṯef habayiṯ miśśəmō’lwō wə’eṯ-hayyām nāṯan mikeṯef habayiṯ hayəmānîṯ qēḏəmâ mimmûl neḡeḇ: s

40 wayy^a‘aś ḥîrwōm ’eṯ-hakîyōrwōṯ wə’eṯ-hayyā‘îm wə’eṯ-hammizərāqwōṯ wayəḵal ḥîrām l^a‘ăśwōṯ ’eṯ-kāl-hamməlā’ḵâ ’ăšer ‘āśâ lammeleḵə šəlōmōh bêṯ yəhwâ:

41 ‘ammuḏîm šənayim wəḡullōṯ hakōṯārōṯ ’ăšer-‘al-rō’š hā‘ammuḏîm šətāyim wəhaśśəḇāḵwōṯ šətayim ləḵasswōṯ ’eṯ-šətê gullōṯ hakōṯārōṯ ’ăšer ‘al-rō’š hā‘ammûḏîm:

42 wə’eṯ-hārimmōnîm ’arəb^a‘ mē’wōṯ lišətê haśśəḇāḵwōṯ šənê-ṭûrîm rimmōnîm laśśəḇāḵâ hā’eḥāṯ ləḵasswōṯ ’eṯ-šətê gullōṯ hakōṯārōṯ ’ăšer ‘al-pənê hā‘ammûḏîm:

43 wə’eṯ-hamməḵōnwōṯ ‘āśer wə’eṯ-hakîyōrōṯ ‘ăśārâ ‘al-hamməḵōnwōṯ:

44 wə’eṯ-hayyām hā’eḥāḏ wə’eṯ-habāqār šənêm-‘āśār t^aḥaṯ hayyām:

45 wə’eṯ-hassîrwōṯ wə’eṯ-hayyā‘îm wə’eṯ-hammizərāqwōṯ wə’ēṯ kāl-hakēlîm hā’ōhel hā’ēlleh^a ’ăšer ‘āśâ ḥîrām lammeleḵə šəlōmōh bêṯ yəhwâ nəḥōšeṯ məmōrāṭ:

46 bəḵikar hayyarədēn yəṣāqām hammeleḵə bəm^a‘ăḇēh hā’ăḏāmâ bên sukwōṯ ûḇên ṣārəṯān:

47 wayyann^aḥ šəlōmōh ’eṯ-kāl-hakēlîm mērōḇ mə’ōḏ mə’ōḏ lō’ neḥəqar mišəqal hannəḥōšeṯ:

48 wayy^a‘aś šəlōmōh ’ēṯ kāl-hakēlîm ’ăšer bêṯ yəhwâ ’ēṯ mizəb^aḥ hazzâāḇ wə’eṯ-haššuləḥān ’ăšer ‘ālāyw leḥem hapānîm zâāḇ:

49 wə’eṯ-hammənōrwōṯ ḥāmēš mîyāmîn wəḥāmēš miśśəmō’wl lifənê hadəḇîr zâāḇ sāḡûr wəhaper^aḥ wəhannērōṯ wəhammeləq^aḥayim zâāḇ:

50 wəhassipwōṯ wəhaməzammərwōṯ wəhammizərāqwōṯ wəhakapwōṯ wəhamm^aḥətwōṯ zâāḇ sāḡûr wəhapōṯwōṯ ləḏaləṯwōṯ habayiṯ hapənîmî ləqōḏeš haqqŏḏāšîm ləḏaləṯê habayiṯ lahêḵāl zâāḇ: f

51 watišəlam kāl-hamməlā’ḵâ ’ăšer ‘āśâ hammeleḵə šəlōmōh bêṯ yəhwâ wayyāḇē’ šəlōmōh ’eṯ-qāḏəšê| dāwiḏ ’āḇîw ’eṯ-hakesef wə’eṯ-hazzâāḇ wə’eṯ-hakēlîm nāṯan bə’ōṣərwōṯ bêṯ yəhwâ: f