Joshua (Yehoshua): Joshua (Yehoshua) Chapter 1

Tanach (Hebrew): Joshua (Yehoshua) Chapter 1

‎1 ‏וַיְהִ֗י אַחֲרֵ֛י מ֥וֹת מֹשֶׁ֖ה עֶ֣בֶד יְהוָ֑ה וַיֹּ֤אמֶר יְהוָה֙ אֶל־יְהוֹשֻׁ֣עַ בִּן־נ֔וּן מְשָׁרֵ֥ת מֹשֶׁ֖ה לֵאמֹֽר׃ ‎2 ‏מֹשֶׁ֥ה עַבְדִּ֖י מֵ֑ת וְעַתָּה֩ ק֨וּם עֲבֹ֜ר אֶת־הַיַּרְדֵּ֣ן הַזֶּ֗ה אַתָּה֙ וְכָל־הָעָ֣ם הַזֶּ֔ה אֶל־הָאָ֕רֶץ אֲשֶׁ֧ר אָנֹכִ֛י נֹתֵ֥ן לָהֶ֖ם לִבְנֵ֥י יִשְׂרָאֵֽל׃ ‎3 ‏כָּל־מָק֗וֹם אֲשֶׁ֨ר תִּדְרֹ֧ךְ כַּֽף־רַגְלְכֶ֛ם בּ֖וֹ לָכֶ֣ם נְתַתִּ֑יו כַּאֲשֶׁ֥ר דִּבַּ֖רְתִּי אֶל־מֹשֶֽׁה׃ ‎4 ‏מֵהַמִּדְבָּר֩ וְהַלְּבָנ֨וֹן הַזֶּ֜ה וְֽעַד־הַנָּהָ֧ר הַגָּד֣וֹל נְהַר־פְּרָ֗ת כֹּ֚ל אֶ֣רֶץ הַֽחִתִּ֔ים וְעַד־הַיָּ֥ם הַגָּד֖וֹל מְב֣וֹא הַשָּׁ֑מֶשׁ יִֽהְיֶ֖ה גְּבוּלְכֶֽם׃ ‎5 ‏לֹֽא־יִתְיַצֵּ֥ב אִישׁ֙ לְפָנֶ֔יךָ כֹּ֖ל יְמֵ֣י חַיֶּ֑יךָ כַּֽאֲשֶׁ֨ר הָיִ֤יתִי עִם־מֹשֶׁה֙ אֶהְיֶ֣ה עִמָּ֔ךְ לֹ֥א אַרְפְּךָ֖ וְלֹ֥א אֶעֶזְבֶֽךָּ׃ ‎6 ‏חֲזַ֖ק וֶאֱמָ֑ץ כִּ֣י אַתָּ֗ה תַּנְחִיל֙ אֶת־הָעָ֣ם הַזֶּ֔ה אֶת־הָאָ֕רֶץ אֲשֶׁר־נִשְׁבַּ֥עְתִּי לַאֲבוֹתָ֖ם לָתֵ֥ת לָהֶֽם׃ ‎7 ‏רַק֩ חֲזַ֨ק וֶֽאֱמַ֜ץ מְאֹ֗ד לִשְׁמֹ֤ר לַעֲשׂוֹת֙ כְּכָל־הַתּוֹרָ֗ה אֲשֶׁ֤ר צִוְּךָ֙ מֹשֶׁ֣ה עַבְדִּ֔י אַל־תָּס֥וּר מִמֶּ֖נּוּ יָמִ֣ין וּשְׂמֹ֑אול לְמַ֣עַן תַּשְׂכִּ֔יל בְּכֹ֖ל אֲשֶׁ֥ר תֵּלֵֽךְ׃ ‎8 ‏לֹֽא־יָמ֡וּשׁ סֵפֶר֩ הַתּוֹרָ֨ה הַזֶּ֜ה מִפִּ֗יךָ וְהָגִ֤יתָ בּוֹ֙ יוֹמָ֣ם וָלַ֔יְלָה לְמַ֙עַן֙ תִּשְׁמֹ֣ר לַעֲשׂ֔וֹת כְּכָל־הַכָּת֖וּב בּ֑וֹ כִּי־אָ֛ז תַּצְלִ֥יחַ אֶת־דְּרָכֶ֖ךָ וְאָ֥ז תַּשְׂכִּֽיל׃ ‎9 ‏הֲל֤וֹא צִוִּיתִ֙יךָ֙ חֲזַ֣ק וֶאֱמָ֔ץ אַֽל־תַּעֲרֹ֖ץ וְאַל־תֵּחָ֑ת כִּ֤י עִמְּךָ֙ יְהוָ֣ה אֱלֹהֶ֔יךָ בְּכֹ֖ל אֲשֶׁ֥ר תֵּלֵֽךְ׃ פ ‎10 ‏וַיְצַ֣ו יְהוֹשֻׁ֔עַ אֶת־שֹׁטְרֵ֥י הָעָ֖ם לֵאמֹֽר׃ ‎11 ‏עִבְר֣וּ׀ בְּקֶ֣רֶב הַֽמַּחֲנֶ֗ה וְצַוּ֤וּ אֶת־הָעָם֙ לֵאמֹ֔ר הָכִ֥ינוּ לָכֶ֖ם צֵידָ֑ה כִּ֞י בְּע֣וֹד׀ שְׁלֹ֣שֶׁת יָמִ֗ים אַתֶּם֙ עֹֽבְרִים֙ אֶת־הַיַּרְדֵּ֣ן הַזֶּ֔ה לָבוֹא֙ לָרֶ֣שֶׁת אֶת־הָאָ֔רֶץ אֲשֶׁר֙ יְהוָ֣ה אֱלֹֽהֵיכֶ֔ם נֹתֵ֥ן לָכֶ֖ם לְרִשְׁתָּֽהּ׃ ס ‎12 ‏וְלָרֽאוּבֵנִי֙ וְלַגָּדִ֔י וְלַחֲצִ֖י שֵׁ֣בֶט הַֽמְנַשֶּׁ֑ה אָמַ֥ר יְהוֹשֻׁ֖עַ לֵאמֹֽר׃ ‎13 ‏זָכוֹר֙ אֶת־הַדָּבָ֔ר אֲשֶׁ֨ר צִוָּ֥ה אֶתְכֶ֛ם מֹשֶׁ֥ה עֶֽבֶד־יְהוָ֖ה לֵאמֹ֑ר יְהוָ֤ה אֱלֹהֵיכֶם֙ מֵנִ֣יחַ לָכֶ֔ם וְנָתַ֥ן לָכֶ֖ם אֶת־הָאָ֥רֶץ הַזֹּֽאת׃ ‎14 ‏נְשֵׁיכֶ֣ם טַפְּכֶם֮ וּמִקְנֵיכֶם֒ יֵשְׁב֕וּ בָּאָ֕רֶץ אֲשֶׁ֨ר נָתַ֥ן לָכֶ֛ם מֹשֶׁ֖ה בְּעֵ֣בֶר הַיַּרְדֵּ֑ן וְאַתֶּם֩ תַּעַבְר֨וּ חֲמֻשִׁ֜ים לִפְנֵ֣י אֲחֵיכֶ֗ם כֹּ֚ל גִּבּוֹרֵ֣י הַחַ֔יִל וַעֲזַרְתֶּ֖ם אוֹתָֽם׃ ‎15 ‏עַ֠ד אֲשֶׁר־יָנִ֨יחַ יְהוָ֥ה׀ לַֽאֲחֵיכֶם֮ כָּכֶם֒ וְיָרְשׁ֣וּ גַם־הֵ֔מָּה אֶת־הָאָ֕רֶץ אֲשֶׁר־יְהוָ֥ה אֱלֹֽהֵיכֶ֖ם נֹתֵ֣ן לָהֶ֑ם וְשַׁבְתֶּ֞ם לְאֶ֤רֶץ יְרֻשַּׁתְכֶם֙ וִֽירִשְׁתֶּ֣ם אוֹתָ֔הּ אֲשֶׁ֣ר׀ נָתַ֣ן לָכֶ֗ם מֹשֶׁה֙ עֶ֣בֶד יְהוָ֔ה בְּעֵ֥בֶר הַיַּרְדֵּ֖ן מִזְרַ֥ח הַשָּֽׁמֶשׁ׃ ‎16 ‏וַֽיַּעֲנ֔וּ אֶת־יְהוֹשֻׁ֖עַ לֵאמֹ֑ר כֹּ֤ל אֲשֶׁר־צִוִּיתָ֙נוּ֙ נַֽעֲשֶׂ֔ה וְאֶֽל־כָּל־אֲשֶׁ֥ר תִּשְׁלָחֵ֖נוּ נֵלֵֽךְ׃ ‎17 ‏כְּכֹ֤ל אֲשֶׁר־שָׁמַ֙עְנוּ֙ אֶל־מֹשֶׁ֔ה כֵּ֖ן נִשְׁמַ֣ע אֵלֶ֑יךָ רַ֠ק יִֽהְיֶ֞ה יְהוָ֤ה אֱלֹהֶ֙יךָ֙ עִמָּ֔ךְ כַּאֲשֶׁ֥ר הָיָ֖ה עִם־מֹשֶֽׁה׃ ‎18 ‏כָּל־אִ֞ישׁ אֲשֶׁר־יַמְרֶ֣ה אֶת־פִּ֗יךָ וְלֹֽא־יִשְׁמַ֧ע אֶת־דְּבָרֶ֛יךָ לְכֹ֥ל אֲשֶׁר־תְּצַוֶּ֖נּוּ יוּמָ֑ת רַ֖ק חֲזַ֥ק וֶאֱמָֽץ׃ פ

1 wayəhî ’aḥărê mwōṯ mōšeh ‘eḇeḏ yəhwâ wayyō’mer yəhwâ ’el-yəhwōšu‘a bin-nûn məšārēṯ mōšeh lē’mōr: 2 mōšeh ‘aḇədî mēṯ wə‘atâ qûm ‘ăḇōr ’eṯ-hayyarədēn hazzeh ’atâ wəḵāl-hā‘ām hazzeh ’el-hā’āreṣ ’ăšer ’ānōḵî nōṯēn lâem liḇənê yiśərā’ēl: 3 kāl-māqwōm ’ăšer tiḏərōḵə kaf-raḡələḵem bwō lāḵem nəṯatîw ka’ăšer dibarətî ’el-mōšeh: 4 mēhammiḏəbār wəhalləḇānwōn hazzeh wə‘aḏ-hannâār hagāḏwōl nəhar-pərāṯ kōl ’ereṣ haḥitîm wə‘aḏ-hayyām hagāḏwōl məḇwō’ haššāmeš yihəyeh gəḇûləḵem: 5 lō’-yiṯəyaṣṣēḇ ’îš ləfāneyḵā kōl yəmê ḥayyeyḵā ka’ăšer hāyîṯî ‘im-mōšeh ’ehəyeh ‘immāḵə lō’ ’arəpəḵā wəlō’ ’e‘ezəḇeḵḵā: 6 ḥăzaq we’ĕmāṣ kî ’atâ tanəḥîl ’eṯ-hā‘ām hazzeh ’eṯ-hā’āreṣ ’ăšer-nišəba‘ətî la’ăḇwōṯām lāṯēṯ lâem: 7 raq ḥăzaq we’ĕmaṣ mə’ōḏ lišəmōr la‘ăśwōṯ kəḵāl-hatwōrâ ’ăšer ṣiûəḵā mōšeh ‘aḇədî ’al-tāsûr mimmennû yāmîn ûśəmō’wl ləma‘an taśəkîl bəḵōl ’ăšer tēlēḵə: 8 lō’-yāmûš sēfer hatwōrâ hazzeh mipîḵā wəhāḡîṯā bwō ywōmām wālayəlâ ləma‘an tišəmōr la‘ăśwōṯ kəḵāl-hakāṯûḇ bwō kî-’āz taṣəlîḥa ’eṯ-dərāḵeḵā wə’āz taśəkîl: 9 hălwō’ ṣiûîṯîḵā ḥăzaq we’ĕmāṣ ’al-ta‘ărōṣ wə’al-tēḥāṯ kî ‘imməḵā yəhwâ ’ĕlōheyḵā bəḵōl ’ăšer tēlēḵə: f 10 wayəṣaw yəhwōšu‘a ’eṯ-šōṭərê hā‘ām lē’mōr: 11 ‘iḇərû| bəqereḇ hammaḥăneh wəṣaûû ’eṯ-hā‘ām lē’mōr hāḵînû lāḵem ṣêḏâ kî bə‘wōḏ| šəlōšeṯ yāmîm ’atem ‘ōḇərîm ’eṯ-hayyarədēn hazzeh lāḇwō’ lārešeṯ ’eṯ-hā’āreṣ ’ăšer yəhwâ ’ĕlōhêḵem nōṯēn lāḵem lərišətāh: s 12 wəlār’ûḇēnî wəlagāḏî wəlaḥăṣî šēḇeṭ hamənaššeh ’āmar yəhwōšu‘a lē’mōr: 13 zāḵwōr ’eṯ-hadāḇār ’ăšer ṣiûâ ’eṯəḵem mōšeh ‘eḇeḏ-yəhwâ lē’mōr yəhwâ ’ĕlōhêḵem mēnîḥa lāḵem wənāṯan lāḵem ’eṯ-hā’āreṣ hazzō’ṯ: 14 nəšêḵem ṭapəḵem ûmiqənêḵem yēšəḇû bā’āreṣ ’ăšer nāṯan lāḵem mōšeh bə‘ēḇer hayyarədēn wə’atem ta‘aḇərû ḥămušîm lifənê ’ăḥêḵem kōl gibwōrê haḥayil wa‘ăzarətem ’wōṯām: 15 ‘aḏ ’ăšer-yānîḥa yəhwâ| la’ăḥêḵem kāḵem wəyārəšû ḡam-hēmmâ ’eṯ-hā’āreṣ ’ăšer-yəhwâ ’ĕlōhêḵem nōṯēn lâem wəšaḇətem lə’ereṣ yəruššaṯəḵem wîrišətem ’wōṯāh ’ăšer| nāṯan lāḵem mōšeh ‘eḇeḏ yəhwâ bə‘ēḇer hayyarədēn mizəraḥ haššāmeš: 16 wayya‘ănû ’eṯ-yəhwōšu‘a lē’mōr kōl ’ăšer-ṣiûîṯānû na‘ăśeh wə’el-kāl-’ăšer tišəlāḥēnû nēlēḵə: 17 kəḵōl ’ăšer-šāma‘ənû ’el-mōšeh kēn nišəma‘ ’ēleyḵā raq yihəyeh yəhwâ ’ĕlōheyḵā ‘immāḵə ka’ăšer hāyâ ‘im-mōšeh: 18 kāl-’îš ’ăšer-yaməreh ’eṯ-pîḵā wəlō’-yišəma‘ ’eṯ-dəḇāreyḵā ləḵōl ’ăšer-təṣaûennû yûmāṯ raq ḥăzaq we’ĕmāṣ: f