‎1 ‏אֲשֶׁ֨ר הָיָ֧ה דְבַר־יְהוָ֛ה אֶל־יִרְמְיָ֥הוּ הַנָּבִ֖יא עַל־הַגּוֹיִֽם׃

‎2 ‏לְמִצְרַ֗יִם עַל־חֵ֨יל פַּרְעֹ֤ה נְכוֹ֙ מֶ֣לֶךְ מִצְרַ֔יִם אֲשֶׁר־הָיָ֥ה עַל־נְהַר־פְּרָ֖ת בְּכַרְכְּמִ֑שׁ אֲשֶׁ֣ר הִכָּ֗ה נְבֽוּכַדְרֶאצַּר֙ מֶ֣לֶךְ בָּבֶ֔ל בִּשְׁנַת֙ הָֽרְבִיעִ֔ית לִיהוֹיָקִ֥ים בֶּן־יֹאשִׁיָּ֖הוּ מֶ֥לֶךְ יְהוּדָֽה׃

‎3 ‏עִרְכ֤וּ מָגֵן֙ וְצִנָּ֔ה וּגְשׁ֖וּ לַמִּלְחָמָֽה׃

‎4 ‏אִסְר֣וּ הַסּוּסִ֗ים וַֽעֲלוּ֙ הַפָּ֣רָשִׁ֔ים וְהִֽתְיַצְּב֖וּ בְּכ֥וֹבָעִ֑ים מִרְקוּ֙ הָֽרְמָחִ֔ים לִבְשׁ֖וּ הַסִּרְיֹנֹֽת׃

‎5 ‏מַדּ֣וּעַ רָאִ֗יתִי הֵ֣מָּה חַתִּים֮ נְסֹגִ֣ים אָחוֹר֒ וְגִבּוֹרֵיהֶ֣ם יֻכַּ֔תּוּ וּמָנ֥וֹס נָ֖סוּ וְלֹ֣א הִפְנ֑וּ מָג֥וֹר מִסָּבִ֖יב נְאֻם־יְהוָֽה׃

‎6 ‏אַל־יָנ֣וּס הַקַּ֔ל וְאַל־יִמָּלֵ֖ט הַגִּבּ֑וֹר צָפ֙וֹנָה֙ עַל־יַ֣ד נְהַר־פְּרָ֔ת כָּשְׁל֖וּ וְנָפָֽלוּ׃

‎7 ‏מִי־זֶ֖ה כַּיְאֹ֣ר יַֽעֲלֶ֑ה כַּנְּהָר֕וֹת יִֽתְגָּעֲשׁ֖וּ מֵימָֽיו׃

‎8 ‏מִצְרַ֙יִם֙ כַּיְאֹ֣ר יַֽעֲלֶ֔ה וְכַנְּהָר֖וֹת יִתְגֹּ֣עֲשׁוּ מָ֑יִם וַיֹּ֗אמֶר אַֽעֲלֶה֙ אֲכַסֶּה־אֶ֔רֶץ אֹבִ֥ידָה עִ֖יר וְיֹ֥שְׁבֵי בָֽהּ׃

‎9 ‏עֲל֤וּ הַסּוּסִים֙ וְהִתְהֹלְל֣וּ הָרֶ֔כֶב וְיֵצְא֖וּ הַגִּבּוֹרִ֑ים כּ֤וּשׁ וּפוּט֙ תֹּפְשֵׂ֣י מָגֵ֔ן וְלוּדִ֕ים תֹּפְשֵׂ֖י דֹּ֥רְכֵי קָֽשֶׁת׃

‎10 ‏וְֽהַיּ֨וֹם הַה֜וּא לַאדֹנָ֧י יְהוִ֣ה צְבָא֗וֹת י֤וֹם נְקָמָה֙ לְהִנָּקֵ֣ם מִצָּרָ֔יו וְאָכְלָ֥ה חֶ֙רֶב֙ וְשָׂ֣בְעָ֔ה וְרָוְתָ֖ה מִדָּמָ֑ם כִּ֣י זֶ֠בַח לַאדֹנָ֨י יְהוִ֧ה צְבָא֛וֹת בְּאֶ֥רֶץ צָפ֖וֹן אֶל־נְהַר־פְּרָֽת׃

‎11 ‏עֲלִ֤י גִלְעָד֙ וּקְחִ֣י צֳרִ֔י בְּתוּלַ֖ת בַּת־מִצְרָ֑יִם לַשָּׁוְא֙ הרביתי הִרְבֵּ֣ית רְפֻא֔וֹת תְּעָלָ֖ה אֵ֥ין לָֽךְ׃

‎12 ‏שָׁמְע֤וּ גוֹיִם֙ קְלוֹנֵ֔ךְ וְצִוְחָתֵ֖ךְ מָלְאָ֣ה הָאָ֑רֶץ כִּֽי־גִבּ֤וֹר בְּגִבּוֹר֙ כָּשָׁ֔לוּ יַחְדָּ֖יו נָפְל֥וּ שְׁנֵיהֶֽם׃ פ

‎13 ‏הַדָּבָר֙ אֲשֶׁ֣ר דִּבֶּ֣ר יְהוָ֔ה אֶֽל־יִרְמְיָ֖הוּ הַנָּבִ֑יא לָב֗וֹא נְבֽוּכַדְרֶאצַּר֙ מֶ֣לֶךְ בָּבֶ֔ל לְהַכּ֖וֹת אֶת־אֶ֥רֶץ מִצְרָֽיִם׃

‎14 ‏הַגִּ֤ידוּ בְמִצְרַ֙יִם֙ וְהַשְׁמִ֣יעוּ בְמִגְדּ֔וֹל וְהַשְׁמִ֥יעוּ בְנֹ֖ף וּבְתַחְפַּנְחֵ֑ס אִמְר֗וּ הִתְיַצֵּב֙ וְהָכֵ֣ן לָ֔ךְ כִּֽי־אָכְלָ֥ה חֶ֖רֶב סְבִיבֶֽיךָ׃

‎15 ‏מַדּ֖וּעַ נִסְחַ֣ף אַבִּירֶ֑יךָ לֹ֣א עָמַ֔ד כִּ֥י יְהוָ֖ה הֲדָפֽוֹ׃

‎16 ‏הִרְבָּ֖ה כּוֹשֵׁ֑ל גַּם־נָפַ֞ל אִ֣ישׁ אֶל־רֵעֵ֗הוּ וַיֹּֽאמְרוּ֙ ק֣וּמָה׀ וְנָשֻׁ֣בָה אֶל־עַמֵּ֗נוּ וְאֶל־אֶ֙רֶץ֙ מֽוֹלַדְתֵּ֔נוּ מִפְּנֵ֖י חֶ֥רֶב הַיּוֹנָֽה׃

‎17 ‏קָרְא֖וּ שָׁ֑ם פַּרְעֹ֤ה מֶֽלֶךְ־מִצְרַ֙יִם֙ שָׁא֔וֹן הֶעֱבִ֖יר הַמּוֹעֵֽד׃

‎18 ‏חַי־אָ֙נִי֙ נְאֻם־הַמֶּ֔לֶךְ יְהוָ֥ה צְבָא֖וֹת שְׁמ֑וֹ כִּ֚י כְּתָב֣וֹר בֶּֽהָרִ֔ים וּכְכַרְמֶ֖ל בַּיָּ֥ם יָבֽוֹא׃

‎19 ‏כְּלֵ֤י גוֹלָה֙ עֲשִׂ֣י לָ֔ךְ יוֹשֶׁ֖בֶת בַּת־מִצְרָ֑יִם כִּֽי־נֹף֙ לְשַׁמָּ֣ה תִֽהְיֶ֔ה וְנִצְּתָ֖ה מֵאֵ֥ין יוֹשֵֽׁב׃ ס

‎20 ‏עֶגְלָ֥ה יְפֵֽה־פִיָּ֖ה מִצְרָ֑יִם קֶ֥רֶץ מִצָּפ֖וֹן בָּ֥א בָֽא׃

‎21 ‏גַּם־שְׂכִרֶ֤יהָ בְקִרְבָּהּ֙ כְּעֶגְלֵ֣י מַרְבֵּ֔ק כִּֽי־גַם־הֵ֧מָּה הִפְנ֛וּ נָ֥סוּ יַחְדָּ֖יו לֹ֣א עָמָ֑דוּ כִּ֣י י֥וֹם אֵידָ֛ם בָּ֥א עֲלֵיהֶ֖ם עֵ֥ת פְּקֻדָּתָֽם׃

‎22 ‏קוֹלָ֖הּ כַּנָּחָ֣שׁ יֵלֵ֑ךְ כִּֽי־בְחַ֣יִל יֵלֵ֔כוּ וּבְקַרְדֻּמּוֹת֙ בָּ֣אוּ לָ֔הּ כְּחֹטְבֵ֖י עֵצִֽים׃

‎23 ‏כָּרְת֤וּ יַעְרָהּ֙ נְאֻם־יְהוָ֔ה כִּ֖י לֹ֣א יֵֽחָקֵ֑ר כִּ֤י רַבּוּ֙ מֵֽאַרְבֶּ֔ה וְאֵ֥ין לָהֶ֖ם מִסְפָּֽר׃

‎24 ‏הֹבִ֖ישָׁה בַּת־מִצְרָ֑יִם נִתְּנָ֖ה בְּיַ֥ד עַם־צָפֽוֹן׃

‎25 ‏אָמַר֩ יְהוָ֨ה צְבָא֜וֹת אֱלֹהֵ֣י יִשְׂרָאֵ֗ל הִנְנִ֤י פוֹקֵד֙ אֶל־אָמ֣וֹן מִנֹּ֔א וְעַל־פַּרְעֹה֙ וְעַל־מִצְרַ֔יִם וְעַל־אֱלֹהֶ֖יהָ וְעַל־מְלָכֶ֑יהָ וְעַ֨ל־פַּרְעֹ֔ה וְעַ֥ל הַבֹּטְחִ֖ים בּֽוֹ׃

‎26 ‏וּנְתַתִּ֗ים בְּיַד֙ מְבַקְשֵׁ֣י נַפְשָׁ֔ם וּבְיַ֛ד נְבֽוּכַדְרֶאצַּ֥ר מֶֽלֶךְ־בָּבֶ֖ל וּבְיַד־עֲבָדָ֑יו וְאַחֲרֵי־כֵ֛ן תִּשְׁכֹּ֥ן כִּֽימֵי־קֶ֖דֶם נְאֻם־יְהוָֽה׃ ס

‎27 ‏וְ֠אַתָּה אַל־תִּירָ֞א עַבְדִּ֤י יַֽעֲקֹב֙ וְאַל־תֵּחַ֣ת יִשְׂרָאֵ֔ל כִּ֠י הִנְנִ֤י מוֹשִֽׁעֲךָ֙ מֵֽרָח֔וֹק וְאֶֽת־זַרְעֲךָ֖ מֵאֶ֣רֶץ שִׁבְיָ֑ם וְשָׁ֧ב יַעֲק֛וֹב וְשָׁקַ֥ט וְשַׁאֲנַ֖ן וְאֵ֥ין מַחֲרִֽיד׃ ס

‎28 ‏אַ֠תָּה אַל־תִּירָ֞א עַבְדִּ֤י יַֽעֲקֹב֙ נְאֻם־יְהוָ֔ה כִּ֥י אִתְּךָ֖ אָ֑נִי כִּי֩ אֶעֱשֶׂ֨ה כָלָ֜ה בְּכָֽל־הַגּוֹיִ֣ם׀ אֲשֶׁ֧ר הִדַּחְתִּ֣יךָ שָׁ֗מָּה וְאֹֽתְךָ֙ לֹא־אֶעֱשֶׂ֣ה כָלָ֔ה וְיִסַּרְתִּ֙יךָ֙ לַמִּשְׁפָּ֔ט וְנַקֵּ֖ה לֹ֥א אֲנַקֶּֽךָּ׃ ס

1 ’ăšer hāyâ ḏəḇar-yəhwâ ’el-yirəməyâû hannāḇî’ ‘al-hagwōyim:

2 ləmiṣərayim ‘al-ḥêl parə‘ōh nəḵwō meleḵə miṣərayim ’ăšer-hāyâ ‘al-nəhar-pərāṯ bəḵarəkəmiš ’ăšer hikâ nəḇûḵaḏəre’ṣṣar meleḵə bāḇel bišənaṯ hārəḇî‘îṯ lîhwōyāqîm ben-yō’šîyâû meleḵə yəhûḏâ:

3 ‘irəḵû māḡēn wəṣinnâ ûḡəšû lammiləḥāmâ:

4 ’isərû hassûsîm w^a‘ălû hapārāšîm wəhiṯəyaṣṣəḇû bəḵwōḇā‘îm mirəqû hārəmāḥîm liḇəšû hassirəyōnōṯ:

5 madû‘a rā’îṯî hēmmâ ḥatîm nəsōḡîm ’āḥwōr wəḡibwōrêhem yukatû ûmānwōs nāsû wəlō’ hifənû māḡwōr missāḇîḇ nə’um-yəhwâ:

6 ’al-yānûs haqqal wə’al-yimmālēṭ hagibwōr ṣāfwōnâ ‘al-yaḏ nəhar-pərāṯ kāšəlû wənāfālû:

7 mî-zeh kayə’ōr y^a‘ăleh kannəhārwōṯ yiṯəgā‘ăšû mêmāyw:

8 miṣərayim kayə’ōr y^a‘ăleh wəḵannəhārwōṯ yiṯəgō‘ăšû māyim wayyō’mer ’^a‘ăleh ’ăḵasseh-’ereṣ ’ōḇîḏâ ‘îr wəyōšəḇê ḇāh:

9 ‘ălû hassûsîm wəhiṯəhōləlû hāreḵeḇ wəyēṣə’û hagibwōrîm kûš ûfûṭ tōfəśê māḡēn wəlûḏîm tōfəśê dōrəḵê qāšeṯ:

10 wəhayywōm hahû’ la’ḏōnāy yəhwih ṣəḇā’wōṯ ywōm nəqāmâ ləhinnāqēm miṣṣārāyw wə’āḵəlâ ḥereḇ wəśāḇə‘â wərāwəṯâ midāmām kî zeḇ^aḥ la’ḏōnāy yəhwih ṣəḇā’wōṯ bə’ereṣ ṣāfwōn ’el-nəhar-pərāṯ:

11 ‘ălî ḡilə‘āḏ ûqəḥî ṣŏrî bəṯûlaṯ baṯ-miṣərāyim laššāwə’ hirəbêṯî hirəbêṯ rəfu’wōṯ tə‘ālâ ’ên lāḵə:

12 šāmə‘û ḡwōyim qəlwōnēḵə wəṣiwəḥāṯēḵə mālə’â hā’āreṣ kî-ḡibwōr bəḡibwōr kāšālû y^aḥədāyw nāfəlû šənêhem: f

13 hadāḇār ’ăšer diber yəhwâ ’el-yirəməyâû hannāḇî’ lāḇwō’ nəḇûḵaḏəre’ṣṣar meleḵə bāḇel ləhakwōṯ ’eṯ-’ereṣ miṣərāyim:

14 hagîḏû ḇəmiṣərayim wəhašəmî‘û ḇəmiḡədwōl wəhašəmî‘û ḇənōf ûḇəṯ^aḥəpanəḥēs ’imərû hiṯəyaṣṣēḇ wəhāḵēn lāḵə kî-’āḵəlâ ḥereḇ səḇîḇeyḵā:

15 madû‘a nisəḥaf ’abîreyḵā lō’ ‘āmaḏ kî yəhwâ hăḏāfwō:

16 hirəbâ kwōšēl gam-nāfal ’îš ’el-rē‘ēhû wayyō’mərû qûmâ| wənāšuḇâ ’el-‘ammēnû wə’el-’ereṣ mwōlaḏətēnû mipənê ḥereḇ hayywōnâ:

17 qārə’û šām parə‘ōh meleḵə-miṣərayim šā’wōn he‘ĕḇîr hammwō‘ēḏ:

18 ḥay-’ānî nə’um-hammeleḵə yəhwâ ṣəḇā’wōṯ šəmwō kî kəṯāḇwōr behārîm ûḵəḵarəmel bayyām yāḇwō’:

19 kəlê ḡwōlâ ‘ăśî lāḵə ywōšeḇeṯ baṯ-miṣərāyim kî-nōf ləšammâ ṯihəyeh wəniṣṣəṯâ mē’ên ywōšēḇ: s

20 ‘eḡəlâ yəfēh-fîyâ miṣərāyim qereṣ miṣṣāfwōn bā’ ḇā’:

21 gam-śəḵireyhā ḇəqirəbāh kə‘eḡəlê marəbēq kî-ḡam-hēmmâ hifənû nāsû y^aḥədāyw lō’ ‘āmāḏû kî ywōm ’êḏām bā’ ‘ălêhem ‘ēṯ pəqudāṯām:

22 qwōlāh kannāḥāš yēlēḵə kî-ḇəḥayil yēlēḵû ûḇəqarədummwōṯ bā’û lāh kəḥōṭəḇê ‘ēṣîm:

23 kārəṯû y^a‘ərāh nə’um-yəhwâ kî lō’ yēḥāqēr kî rabû mē’arəbeh wə’ên lâem misəpār:

24 hōḇîšâ baṯ-miṣərāyim nitənâ bəyaḏ ‘am-ṣāfwōn:

25 ’āmar yəhwâ ṣəḇā’wōṯ ’ĕlōhê yiśərā’ēl hinənî fwōqēḏ ’el-’āmwōn minnō’ wə‘al-parə‘ōh wə‘al-miṣərayim wə‘al-’ĕlōheyhā wə‘al-məlāḵeyhā wə‘al-parə‘ōh wə‘al habōṭəḥîm bwō:

26 ûnəṯatîm bəyaḏ məḇaqəšê nafəšām ûḇəyaḏ nəḇûḵaḏəre’ṣṣar meleḵə-bāḇel ûḇəyaḏ-‘ăḇāḏāyw wə’^aḥărê-ḵēn tišəkōn kîmê-qeḏem nə’um-yəhwâ: s

27 wə’atâ ’al-tîrā’ ‘aḇədî y^a‘ăqōḇ wə’al-tēḥaṯ yiśərā’ēl kî hinənî mwōši‘ăḵā mērāḥwōq wə’eṯ-zarə‘ăḵā mē’ereṣ šiḇəyām wəšāḇ y^a‘ăqwōḇ wəšāqaṭ wəša’ănan wə’ên m^aḥărîḏ: s

28 ’atâ ’al-tîrā’ ‘aḇədî y^a‘ăqōḇ nə’um-yəhwâ kî ’itəḵā ’ānî kî ’e‘ĕśeh ḵālâ bəḵāl-hagwōyim| ’ăšer hid^aḥətîḵā šāmmâ wə’ōṯəḵā lō’-’e‘ĕśeh ḵālâ wəyissarətîḵā lammišəpāṭ wənaqqēh lō’ ’ănaqqeḵḵā: s