Sacred Texts  Bible  Index 
Polyglot  KJV  Sep:JdB  Sep:JdA  Vul 

Judges (Shoftim) Index
  Previous  Next 

Tanach (Hebrew): Judges (Shoftim) Chapter 6

1 ‏וַיַּעֲשׂ֧וּ בְנֵי־יִשְׂרָאֵ֛ל הָרַ֖ע בְּעֵינֵ֣י יְהוָ֑ה וַיִּתְּנֵ֧ם יְהוָ֛ה בְּיַד־מִדְיָ֖ן שֶׁ֥בַע שָׁנִֽים׃

2 ‏וַתָּ֥עָז יַד־מִדְיָ֖ן עַל־יִשְׂרָאֵ֑ל מִפְּנֵ֨י מִדְיָ֜ן עָשֽׂוּ לָהֶ֣ם׀ בְּנֵ֣י יִשְׂרָאֵ֗ל אֶת־הַמִּנְהָרוֹת֙ אֲשֶׁ֣ר בֶּֽהָרִ֔ים וְאֶת־הַמְּעָר֖וֹת וְאֶת־הַמְּצָדֽוֹת׃

3 ‏וְהָיָ֖ה אִם־זָרַ֣ע יִשְׂרָאֵ֑ל וְעָלָ֨ה מִדְיָ֧ן וַֽעֲמָלֵ֛ק וּבְנֵי־קֶ֖דֶם וְעָל֥וּ עָלָֽיו׃

4 ‏וַיַּחֲנ֣וּ עֲלֵיהֶ֗ם וַיַּשְׁחִ֙יתוּ֙ אֶת־יְב֣וּל הָאָ֔רֶץ עַד־בּוֹאֲךָ֖ עַזָּ֑ה וְלֹֽא־יַשְׁאִ֤ירוּ מִֽחְיָה֙ בְּיִשְׂרָאֵ֔ל וְשֶׂ֥ה וָשׁ֖וֹר וַחֲמֽוֹר׃

5 ‏כִּ֡י הֵם֩ וּמִקְנֵיהֶ֨ם יַעֲל֜וּ וְאָהֳלֵיהֶ֗ם יבאו וּבָ֤אוּ כְדֵֽי־אַרְבֶּה֙ לָרֹ֔ב וְלָהֶ֥ם וְלִגְמַלֵּיהֶ֖ם אֵ֣ין מִסְפָּ֑ר וַיָּבֹ֥אוּ בָאָ֖רֶץ לְשַׁחֲתָֽהּ׃

6 ‏וַיִּדַּ֧ל יִשְׂרָאֵ֛ל מְאֹ֖ד מִפְּנֵ֣י מִדְיָ֑ן וַיִּזְעֲק֥וּ בְנֵֽי־יִשְׂרָאֵ֖ל אֶל־יְהוָֽה׃ פ

7 ‏וַיְהִ֕י כִּֽי־זָעֲק֥וּ בְנֵֽי־יִשְׂרָאֵ֖ל אֶל־יְהוָ֑ה עַ֖ל אֹד֥וֹת מִדְיָֽן׃

8 ‏וַיִּשְׁלַ֧ח יְהוָ֛ה אִ֥ישׁ נָבִ֖יא אֶל־בְּנֵ֣י יִשְׂרָאֵ֑ל וַיֹּ֨אמֶר לָהֶ֜ם כֹּה־אָמַ֥ר יְהוָ֣ה׀ אֱלֹהֵ֣י יִשְׂרָאֵ֗ל אָנֹכִ֞י הֶעֱלֵ֤יתִי אֶתְכֶם֙ מִמִּצְרַ֔יִם וָאֹצִ֥יא אֶתְכֶ֖ם מִבֵּ֥ית עֲבָדִֽים׃

9 ‏וָאַצִּ֤ל אֶתְכֶם֙ מִיַּ֣ד מִצְרַ֔יִם וּמִיַּ֖ד כָּל־לֹחֲצֵיכֶ֑ם וָאֲגָרֵ֤שׁ אוֹתָם֙ מִפְּנֵיכֶ֔ם וָאֶתְּנָ֥ה לָכֶ֖ם אֶת־אַרְצָֽם׃

10 ‏וָאֹמְרָ֣ה לָכֶ֗ם אֲנִי֙ יְהוָ֣ה אֱלֹהֵיכֶ֔ם לֹ֤א תִֽירְאוּ֙ אֶת־אֱלֹהֵ֣י הָאֱמֹרִ֔י אֲשֶׁ֥ר אַתֶּ֖ם יוֹשְׁבִ֣ים בְּאַרְצָ֑ם וְלֹ֥א שְׁמַעְתֶּ֖ם בְּקוֹלִֽי׃ פ

11 ‏וַיָּבֹ֞א מַלְאַ֣ךְ יְהוָ֗ה וַיֵּ֙שֶׁב֙ תַּ֤חַת הָֽאֵלָה֙ אֲשֶׁ֣ר בְּעָפְרָ֔ה אֲשֶׁ֥ר לְיוֹאָ֖שׁ אֲבִ֣י הָֽעֶזְרִ֑י וְגִדְע֣וֹן בְּנ֗וֹ חֹבֵ֤ט חִטִּים֙ בַּגַּ֔ת לְהָנִ֖יס מִפְּנֵ֥י מִדְיָֽן׃

12 ‏וַיֵּרָ֥א אֵלָ֖יו מַלְאַ֣ךְ יְהוָ֑ה וַיֹּ֣אמֶר אֵלָ֔יו יְהוָ֥ה עִמְּךָ֖ גִּבּ֥וֹר הֶחָֽיִל׃

13 ‏וַיֹּ֨אמֶר אֵלָ֤יו גִּדְעוֹן֙ בִּ֣י אֲדֹנִ֔י וְיֵ֤שׁ יְהוָה֙ עִמָּ֔נוּ וְלָ֥מָּה מְצָאַ֖תְנוּ כָּל־זֹ֑את וְאַיֵּ֣ה כָֽל־נִפְלְאֹתָ֡יו אֲשֶׁר֩ סִפְּרוּ־לָ֨נוּ אֲבוֹתֵ֜ינוּ לֵאמֹ֗ר הֲלֹ֤א מִמִּצְרַ֙יִם֙ הֶעֱלָ֣נוּ יְהוָ֔ה וְעַתָּה֙ נְטָשָׁ֣נוּ יְהוָ֔ה וַֽיִּתְּנֵ֖נוּ בְּכַף־מִדְיָֽן׃

14 ‏וַיִּ֤פֶן אֵלָיו֙ יְהוָ֔ה וַיֹּ֗אמֶר לֵ֚ךְ בְּכֹחֲךָ֣ זֶ֔ה וְהוֹשַׁעְתָּ֥ אֶת־יִשְׂרָאֵ֖ל מִכַּ֣ף מִדְיָ֑ן הֲלֹ֖א שְׁלַחְתִּֽיךָ׃

15 ‏וַיֹּ֤אמֶר אֵלָיו֙ בִּ֣י אֲדֹנָ֔י בַּמָּ֥ה אוֹשִׁ֖יעַ אֶת־יִשְׂרָאֵ֑ל הִנֵּ֤ה אַלְפִּי֙ הַדַּ֣ל בִּמְנַשֶּׁ֔ה וְאָנֹכִ֥י הַצָּעִ֖יר בְּבֵ֥ית אָבִֽי׃

16 ‏וַיֹּ֤אמֶר אֵלָיו֙ יְהוָ֔ה כִּ֥י אֶהְיֶ֖ה עִמָּ֑ךְ וְהִכִּיתָ֥ אֶת־מִדְיָ֖ן כְּאִ֥ישׁ אֶחָֽד׃

17 ‏וַיֹּ֣אמֶר אֵלָ֔יו אִם־נָ֛א מָצָ֥אתִי חֵ֖ן בְּעֵינֶ֑יךָ וְעָשִׂ֤יתָ לִּי֙ א֔וֹת שָׁאַתָּ֖ה מְדַבֵּ֥ר עִמִּֽי׃

18 ‏אַל־נָ֨א תָמֻ֤שׁ מִזֶּה֙ עַד־בֹּאִ֣י אֵלֶ֔יךָ וְהֹֽצֵאתִי֙ אֶת־מִנְחָתִ֔י וְהִנַּחְתִּ֖י לְפָנֶ֑יךָ וַיֹּאמַ֕ר אָנֹכִ֥י אֵשֵׁ֖ב עַ֥ד שׁוּבֶֽךָ׃

19 ‏וְגִדְע֣וֹן בָּ֗א וַיַּ֤עַשׂ גְּדִֽי־עִזִּים֙ וְאֵיפַת־קֶ֣מַח מַצּ֔וֹת הַבָּשָׂר֙ שָׂ֣ם בַּסַּ֔ל וְהַמָּרַ֖ק שָׂ֣ם בַּפָּר֑וּר וַיּוֹצֵ֥א אֵלָ֛יו אֶל־תַּ֥חַת הָאֵלָ֖ה וַיַּגַּֽשׁ׃ ס

20 ‏וַיֹּ֨אמֶר אֵלָ֜יו מַלְאַ֣ךְ הָאֱלֹהִ֗ים קַ֣ח אֶת־הַבָּשָׂ֤ר וְאֶת־הַמַּצּוֹת֙ וְהַנַּח֙ אֶל־הַסֶּ֣לַע הַלָּ֔ז וְאֶת־הַמָּרַ֖ק שְׁפ֑וֹךְ וַיַּ֖עַשׂ כֵּֽן׃

21 ‏וַיִּשְׁלַ֞ח מַלְאַ֣ךְ יְהוָ֗ה אֶת־קְצֵ֤ה הַמִּשְׁעֶ֙נֶת֙ אֲשֶׁ֣ר בְּיָד֔וֹ וַיִּגַּ֥ע בַּבָּשָׂ֖ר וּבַמַּצּ֑וֹת וַתַּ֨עַל הָאֵ֜שׁ מִן־הַצּ֗וּר וַתֹּ֤אכַל אֶת־הַבָּשָׂר֙ וְאֶת־הַמַּצּ֔וֹת וּמַלְאַ֣ךְ יְהוָ֔ה הָלַ֖ךְ מֵעֵינָֽיו׃

22 ‏וַיַּ֣רְא גִּדְע֔וֹן כִּֽי־מַלְאַ֥ךְ יְהוָ֖ה ה֑וּא סוַיֹּ֣אמֶר גִּדְע֗וֹן אֲהָהּ֙ אֲדֹנָ֣י יְהוִ֔ה כִּֽי־עַל־כֵּ֤ן רָאִ֙יתִי֙ מַלְאַ֣ךְ יְהוָ֔ה פָּנִ֖ים אֶל־פָּנִֽים׃

23 ‏וַיֹּ֨אמֶר ל֧וֹ יְהוָ֛ה שָׁל֥וֹם לְךָ֖ אַל־תִּירָ֑א לֹ֖א תָּמֽוּת׃

24 ‏וַיִּבֶן֩ שָׁ֨ם גִּדְע֤וֹן מִזְבֵּ֙חַ֙ לַֽיהוָ֔ה וַיִּקְרָא־ל֥וֹ יְהוָ֖ה שָׁל֑וֹם עַ֚ד הַיּ֣וֹם הַזֶּ֔ה עוֹדֶ֕נּוּ בְּעָפְרָ֖ת אֲבִ֥י הָעֶזְרִֽי׃ פ

25 ‏וַיְהִי֮ בַּלַּ֣יְלָה הַהוּא֒ וַיֹּ֧אמֶר ל֣וֹ יְהוָ֗ה קַ֤ח אֶת־פַּר־הַשּׁוֹר֙ אֲשֶׁ֣ר לְאָבִ֔יךָ וּפַ֥ר הַשֵּׁנִ֖י שֶׁ֣בַע שָׁנִ֑ים וְהָרַסְתָּ֗ אֶת־מִזְבַּ֤ח הַבַּ֙עַל֙ אֲשֶׁ֣ר לְאָבִ֔יךָ וְאֶת־הָאֲשֵׁרָ֥ה אֲשֶׁר־עָלָ֖יו תִּכְרֹֽת׃

26 ‏וּבָנִ֨יתָ מִזְבֵּ֜חַ לַיהוָ֣ה אֱלֹהֶ֗יךָ עַ֣ל רֹ֧אשׁ הַמָּע֛וֹז הַזֶּ֖ה בַּמַּֽעֲרָכָ֑ה וְלָֽקַחְתָּ֙ אֶת־הַפָּ֣ר הַשֵּׁנִ֔י וְהַעֲלִ֣יתָ עוֹלָ֔ה בַּעֲצֵ֥י הָאֲשֵׁרָ֖ה אֲשֶׁ֥ר תִּכְרֹֽת׃

27 ‏וַיִּקַּ֨ח גִּדְע֜וֹן עֲשָׂרָ֤ה אֲנָשִׁים֙ מֵֽעֲבָדָ֔יו וַיַּ֕עַשׂ כַּאֲשֶׁ֛ר דִּבֶּ֥ר אֵלָ֖יו יְהוָ֑ה וַיְהִ֡י כַּאֲשֶׁ֣ר יָרֵא֩ אֶת־בֵּ֨ית אָבִ֜יו וְאֶת־אַנְשֵׁ֥י הָעִ֛יר מֵעֲשׂ֥וֹת יוֹמָ֖ם וַיַּ֥עַשׂ לָֽיְלָה׃

28 ‏וַיַּשְׁכִּ֜ימוּ אַנְשֵׁ֤י הָעִיר֙ בַּבֹּ֔קֶר וְהִנֵּ֤ה נֻתַּץ֙ מִזְבַּ֣ח הַבַּ֔עַל וְהָאֲשֵׁרָ֥ה אֲשֶׁר־עָלָ֖יו כֹּרָ֑תָה וְאֵת֙ הַפָּ֣ר הַשֵּׁנִ֔י הֹֽעֲלָ֔ה עַל־הַמִּזְבֵּ֖חַ הַבָּנֽוּי׃

29 ‏וַיֹּֽאמְרוּ֙ אִ֣ישׁ אֶל־רֵעֵ֔הוּ מִ֥י עָשָׂ֖ה הַדָּבָ֣ר הַזֶּ֑ה וַֽיִּדְרְשׁוּ֙ וַיְבַקְשׁ֔וּ וַיֹּ֣אמְר֔וּ גִּדְעוֹן֙ בֶּן־יוֹאָ֔שׁ עָשָׂ֖ה הַדָּבָ֥ר הַזֶּֽה׃

30 ‏וַיֹּ֨אמְר֜וּ אַנְשֵׁ֤י הָעִיר֙ אֶל־יוֹאָ֔שׁ הוֹצֵ֥א אֶת־בִּנְךָ֖ וְיָמֹ֑ת כִּ֤י נָתַץ֙ אֶת־מִזְבַּ֣ח הַבַּ֔עַל וְכִ֥י כָרַ֖ת הָאֲשֵׁרָ֥ה אֲשֶׁר־עָלָֽיו׃

31 ‏וַיֹּ֣אמֶר יוֹאָ֡שׁ לְכֹל֩ אֲשֶׁר־עָמְד֨וּ עָלָ֜יו הַאַתֶּ֣ם׀ תְּרִיב֣וּן לַבַּ֗עַל אִם־אַתֶּם֙ תּוֹשִׁיע֣וּן אוֹת֔וֹ אֲשֶׁ֨ר יָרִ֥יב ל֛וֹ יוּמַ֖ת עַד־הַבֹּ֑קֶר אִם־אֱלֹהִ֥ים הוּא֙ יָ֣רֶב ל֔וֹ כִּ֥י נָתַ֖ץ אֶֽת־מִזְבְּחֽוֹ׃

32 ‏וַיִּקְרָא־ל֥וֹ בַיּוֹם־הַה֖וּא יְרֻבַּ֣עַל לֵאמֹ֑ר יָ֤רֶב בּוֹ֙ הַבַּ֔עַל כִּ֥י נָתַ֖ץ אֶֽת־מִזְבְּחֽוֹ׃ פ

33 ‏וְכָל־מִדְיָ֧ן וַעֲמָלֵ֛ק וּבְנֵי־קֶ֖דֶם נֶאֶסְפ֣וּ יַחְדָּ֑ו וַיַּעַבְר֥וּ וַֽיַּחֲנ֖וּ בְּעֵ֥מֶק יִזְרְעֶֽאל׃

34 ‏וְר֣וּחַ יְהוָ֔ה לָבְשָׁ֖ה אֶת־גִּדְע֑וֹן וַיִּתְקַע֙ בַּשּׁוֹפָ֔ר וַיִּזָּעֵ֥ק אֲבִיעֶ֖זֶר אַחֲרָֽיו׃

35 ‏וּמַלְאָכִים֙ שָׁלַ֣ח בְּכָל־מְנַשֶּׁ֔ה וַיִּזָּעֵ֥ק גַּם־ה֖וּא אַחֲרָ֑יו וּמַלְאָכִ֣ים שָׁלַ֗ח בְּאָשֵׁ֤ר וּבִזְבֻלוּן֙ וּבְנַפְתָּלִ֔י וַֽיַּעֲל֖וּ לִקְרָאתָֽם׃

36 ‏וַיֹּ֥אמֶר גִּדְע֖וֹן אֶל־הָאֱלֹהִ֑ים אִם־יֶשְׁךָ֞ מוֹשִׁ֧יעַ בְּיָדִ֛י אֶת־יִשְׂרָאֵ֖ל כַּאֲשֶׁ֥ר דִּבַּֽרְתָּ׃

37 ‏הִנֵּ֣ה אָנֹכִ֗י מַצִּ֛יג אֶת־גִּזַּ֥ת הַצֶּ֖מֶר בַּגֹּ֑רֶן אִ֡ם טַל֩ יִהְיֶ֨ה עַֽל־הַגִּזָּ֜ה לְבַדָּ֗הּ וְעַל־כָּל־הָאָ֙רֶץ֙ חֹ֔רֶב וְיָדַעְתִּ֗י כִּֽי־תוֹשִׁ֧יעַ בְּיָדִ֛י אֶת־יִשְׂרָאֵ֖ל כַּאֲשֶׁ֥ר דִּבַּֽרְתָּ׃

38 ‏וַיְהִי־כֵ֕ן וַיַּשְׁכֵּם֙ מִֽמָּחֳרָ֔ת וַיָּ֖זַר אֶת־הַגִּזָּ֑ה וַיִּ֤מֶץ טַל֙ מִן־הַגִּזָּ֔ה מְל֥וֹא הַסֵּ֖פֶל מָֽיִם׃

39 ‏וַיֹּ֤אמֶר גִּדְעוֹן֙ אֶל־הָ֣אֱלֹהִ֔ים אַל־יִ֤חַר אַפְּךָ֙ בִּ֔י וַאֲדַבְּרָ֖ה אַ֣ךְ הַפָּ֑עַם אֲנַסֶּ֤ה נָּא־רַק־הַפַּ֙עַם֙ בַּגִּזָּ֔ה יְהִי־נָ֨א חֹ֤רֶב אֶל־הַגִּזָּה֙ לְבַדָּ֔הּ וְעַל־כָּל־הָאָ֖רֶץ יִֽהְיֶה־טָּֽל׃

40 ‏וַיַּ֧עַשׂ אֱלֹהִ֛ים כֵּ֖ן בַּלַּ֣יְלָה הַה֑וּא וַיְהִי־חֹ֤רֶב אֶל־הַגִּזָּה֙ לְבַדָּ֔הּ וְעַל־כָּל־הָאָ֖רֶץ הָ֥יָה טָֽל׃ פ

1 wayya‘ăśû ḇənê-yiśərā’ēl hāra‘ bə‘ênê yəhwâ wayyitənēm yəhwâ bəyaḏ-miḏəyān šeḇa‘ šānîm:

2 watā‘āz yaḏ-miḏəyān ‘al-yiśərā’ēl mipənê miḏəyān ‘āśû lâem| bənê yiśərā’ēl ’eṯ-hamminəhārwōṯ ’ăšer behārîm wə’eṯ-hammə‘ārwōṯ wə’eṯ-hamməṣāḏwōṯ:

3 wəhāyâ ’im-zāra‘ yiśərā’ēl wə‘ālâ miḏəyān wa‘ămālēq ûḇənê-qeḏem wə‘ālû ‘ālāyw:

4 wayyaḥănû ‘ălêhem wayyašəḥîṯû ’eṯ-yəḇûl hā’āreṣ ‘aḏ-bwō’ăḵā ‘azzâ wəlō’-yašə’îrû miḥəyâ bəyiśərā’ēl wəśeh wāšwōr waḥămwōr:

5 kî hēm ûmiqənêhem ya‘ălû wə’âŏlêhem yāḇō’û ûḇā’û ḵəḏê-’arəbeh lārōḇ wəlâem wəliḡəmallêhem ’ên misəpār wayyāḇō’û ḇā’āreṣ ləšaḥăṯāh:

6 wayyidal yiśərā’ēl mə’ōḏ mipənê miḏəyān wayyizə‘ăqû ḇənê-yiśərā’ēl ’el-yəhwâ: f

7 wayəhî kî-zā‘ăqû ḇənê-yiśərā’ēl ’el-yəhwâ ‘al ’ōḏwōṯ miḏəyān:

8 wayyišəlaḥ yəhwâ ’îš nāḇî’ ’el-bənê yiśərā’ēl wayyō’mer lâem kōh-’āmar yəhwâ| ’ĕlōhê yiśərā’ēl ’ānōḵî he‘ĕlêṯî ’eṯəḵem mimmiṣərayim wā’ōṣî’ ’eṯəḵem mibêṯ ‘ăḇāḏîm:

9 wā’aṣṣil ’eṯəḵem mîyaḏ miṣərayim ûmîyaḏ kāl-lōḥăṣêḵem wā’ăḡārēš ’wōṯām mipənêḵem wā’etənâ lāḵem ’eṯ-’arəṣām:

10 wā’ōmərâ lāḵem ’ănî yəhwâ ’ĕlōhêḵem lō’ ṯîrə’û ’eṯ-’ĕlōhê hā’ĕmōrî ’ăšer ’atem ywōšəḇîm bə’arəṣām wəlō’ šəma‘ətem bəqwōlî: f

11 wayyāḇō’ malə’aḵə yəhwâ wayyēšeḇ taḥaṯ hā’ēlâ ’ăšer bə‘āfərâ ’ăšer ləywō’āš ’ăḇî hā‘ezərî wəḡiḏə‘wōn bənwō ḥōḇēṭ ḥiṭṭîm bagaṯ ləhānîs mipənê miḏəyān:

12 wayyērā’ ’ēlāyw malə’aḵə yəhwâ wayyō’mer ’ēlāyw yəhwâ ‘imməḵā gibwōr heḥāyil:

13 wayyō’mer ’ēlāyw giḏə‘wōn bî ’ăḏōnî wəyēš yəhwâ ‘immānû wəlāmmâ məṣā’aṯənû kāl-zō’ṯ wə’ayyēh ḵāl-nifələ’ōṯāyw ’ăšer sipərû-lānû ’ăḇwōṯênû lē’mōr hălō’ mimmiṣərayim he‘ĕlānû yəhwâ wə‘atâ nəṭāšānû yəhwâ wayyitənēnû bəḵaf-miḏəyān:

14 wayyifen ’ēlāyw yəhwâ wayyō’mer lēḵə bəḵōḥăḵā zeh wəhwōša‘ətā ’eṯ-yiśərā’ēl mikaf miḏəyān hălō’ šəlaḥətîḵā:

15 wayyō’mer ’ēlāyw bî ’ăḏōnāy bammâ ’wōšî‘a ’eṯ-yiśərā’ēl hinnēh ’aləpî hadal bimənaššeh wə’ānōḵî haṣṣā‘îr bəḇêṯ ’āḇî:

16 wayyō’mer ’ēlāyw yəhwâ kî ’ehəyeh ‘immāḵə wəhikîṯā ’eṯ-miḏəyān kə’îš ’eḥāḏ:

17 wayyō’mer ’ēlāyw ’im-nā’ māṣā’ṯî ḥēn bə‘êneyḵā wə‘āśîṯā llî ’wōṯ šā’atâ məḏabēr ‘immî:

18 ’al-nā’ ṯāmuš mizzeh ‘aḏ-bō’î ’ēleyḵā wəhōṣē’ṯî ’eṯ-minəḥāṯî wəhinnaḥətî ləfāneyḵā wayyō’mar ’ānōḵî ’ēšēḇ ‘aḏ šûḇeḵā:

19 wəḡiḏə‘wōn bā’ wayya‘aś gəḏî-‘izzîm wə’êfaṯ-qemaḥ maṣṣwōṯ habāśār śām bassal wəhammāraq śām bapārûr wayywōṣē’ ’ēlāyw ’el-taḥaṯ hā’ēlâ wayyagaš: s

20 wayyō’mer ’ēlāyw malə’aḵə hā’ĕlōhîm qaḥ ’eṯ-habāśār wə’eṯ-hammaṣṣwōṯ wəhannaḥ ’el-hassela‘ hallāz wə’eṯ-hammāraq šəfwōḵə wayya‘aś kēn:

21 wayyišəlaḥ malə’aḵə yəhwâ ’eṯ-qəṣēh hammišə‘eneṯ ’ăšer bəyāḏwō wayyiga‘ babāśār ûḇammaṣṣwōṯ wata‘al hā’ēš min-haṣṣûr watō’ḵal ’eṯ-habāśār wə’eṯ-hammaṣṣwōṯ ûmalə’aḵə yəhwâ hālaḵə mē‘ênāyw:

22 wayyarə’ giḏə‘wōn kî-malə’aḵə yəhwâ hû’ swayyō’mer giḏə‘wōn ’ăhāh ’ăḏōnāy yəhwih kî-‘al-kēn rā’îṯî malə’aḵə yəhwâ pānîm ’el-pānîm:

23 wayyō’mer lwō yəhwâ šālwōm ləḵā ’al-tîrā’ lō’ tāmûṯ:

24 wayyiḇen šām giḏə‘wōn mizəbēḥa layhwâ wayyiqərā’-lwō yəhwâ šālwōm ‘aḏ hayywōm hazzeh ‘wōḏennû bə‘āfərāṯ ’ăḇî hā‘ezərî: f

25 wayəhî ballayəlâ hahû’ wayyō’mer lwō yəhwâ qaḥ ’eṯ-par-haššwōr ’ăšer lə’āḇîḵā ûfar haššēnî šeḇa‘ šānîm wəhārasətā ’eṯ-mizəbaḥ haba‘al ’ăšer lə’āḇîḵā wə’eṯ-hā’ăšērâ ’ăšer-‘ālāyw tiḵərōṯ:

26 ûḇānîṯā mizəbēḥa layhwâ ’ĕlōheyḵā ‘al rō’š hammā‘wōz hazzeh bamma‘ărāḵâ wəlāqaḥətā ’eṯ-hapār haššēnî wəha‘ălîṯā ‘wōlâ ba‘ăṣê hā’ăšērâ ’ăšer tiḵərōṯ:

27 wayyiqqaḥ giḏə‘wōn ‘ăśārâ ’ănāšîm mē‘ăḇāḏāyw wayya‘aś ka’ăšer diber ’ēlāyw yəhwâ wayəhî ka’ăšer yārē’ ’eṯ-bêṯ ’āḇîw wə’eṯ-’anəšê hā‘îr mē‘ăśwōṯ ywōmām wayya‘aś lāyəlâ:

28 wayyašəkîmû ’anəšê hā‘îr babōqer wəhinnēh nutaṣ mizəbaḥ haba‘al wəhā’ăšērâ ’ăšer-‘ālāyw kōrāṯâ wə’ēṯ hapār haššēnî hō‘ălâ ‘al-hammizəbēḥa habānûy:

29 wayyō’mərû ’îš ’el-rē‘ēhû mî ‘āśâ hadāḇār hazzeh wayyiḏərəšû wayəḇaqəšû wayyō’mərû giḏə‘wōn ben-ywō’āš ‘āśâ hadāḇār hazzeh:

30 wayyō’mərû ’anəšê hā‘îr ’el-ywō’āš hwōṣē’ ’eṯ-binəḵā wəyāmōṯ kî nāṯaṣ ’eṯ-mizəbaḥ haba‘al wəḵî ḵāraṯ hā’ăšērâ ’ăšer-‘ālāyw:

31 wayyō’mer ywō’āš ləḵōl ’ăšer-‘āməḏû ‘ālāyw ha’atem| tərîḇûn laba‘al ’im-’atem twōšî‘ûn ’wōṯwō ’ăšer yārîḇ lwō yûmaṯ ‘aḏ-habōqer ’im-’ĕlōhîm hû’ yāreḇ lwō kî nāṯaṣ ’eṯ-mizəbəḥwō:

32 wayyiqərā’-lwō ḇayywōm-hahû’ yəruba‘al lē’mōr yāreḇ bwō haba‘al kî nāṯaṣ ’eṯ-mizəbəḥwō: f

33 wəḵāl-miḏəyān wa‘ămālēq ûḇənê-qeḏem ne’esəfû yaḥədāw wayya‘aḇərû wayyaḥănû bə‘ēmeq yizərə‘e’l:

34 wərûḥa yəhwâ lāḇəšâ ’eṯ-giḏə‘wōn wayyiṯəqa‘ baššwōfār wayyizzā‘ēq ’ăḇî‘ezer ’aḥărāyw:

35 ûmalə’āḵîm šālaḥ bəḵāl-mənaššeh wayyizzā‘ēq gam-hû’ ’aḥărāyw ûmalə’āḵîm šālaḥ bə’āšēr ûḇizəḇulûn ûḇənafətālî wayya‘ălû liqərā’ṯām:

36 wayyō’mer giḏə‘wōn ’el-hā’ĕlōhîm ’im-yešəḵā mwōšî‘a bəyāḏî ’eṯ-yiśərā’ēl ka’ăšer dibarətā:

37 hinnēh ’ānōḵî maṣṣîḡ ’eṯ-gizzaṯ haṣṣemer bagōren ’im ṭal yihəyeh ‘al-hagizzâ ləḇadāh wə‘al-kāl-hā’āreṣ ḥōreḇ wəyāḏa‘ətî kî-ṯwōšî‘a bəyāḏî ’eṯ-yiśərā’ēl ka’ăšer dibarətā:

38 wayəhî-ḵēn wayyašəkēm mimmāḥŏrāṯ wayyāzar ’eṯ-hagizzâ wayyimeṣ ṭal min-hagizzâ məlwō’ hassēfel māyim:

39 wayyō’mer giḏə‘wōn ’el-hā’ĕlōhîm ’al-yiḥar ’apəḵā bî wa’ăḏabərâ ’aḵə hapā‘am ’ănasseh nnā’-raq-hapa‘am bagizzâ yəhî-nā’ ḥōreḇ ’el-hagizzâ ləḇadāh wə‘al-kāl-hā’āreṣ yihəyeh-ṭṭāl:

40 wayya‘aś ’ĕlōhîm kēn ballayəlâ hahû’ wayəhî-ḥōreḇ ’el-hagizzâ ləḇadāh wə‘al-kāl-hā’āreṣ hāyâ ṭāl: f


Next: Judges (Shoftim) Chapter 7