Ezekiel (Yechezqel): Ezekiel (Yechezqel) Chapter 19

Tanach (Hebrew): Ezekiel (Yechezqel) Chapter 19

‎1 ‏וְאַתָּה֙ שָׂ֣א קִינָ֔ה אֶל־נְשִׂיאֵ֖י יִשְׂרָאֵֽל׃ ‎2 ‏וְאָמַרְתָּ֗ מָ֤ה אִמְּךָ֙ לְבִיָּ֔א בֵּ֥ין אֲרָי֖וֹת רָבָ֑צָה בְּת֥וֹךְ כְּפִרִ֖ים רִבְּתָ֥ה גוּרֶֽיהָ׃ ‎3 ‏וַתַּ֛עַל אֶחָ֥ד מִגֻּרֶ֖יהָ כְּפִ֣יר הָיָ֑ה וַיִּלְמַ֥ד לִטְרָף־טֶ֖רֶף אָדָ֥ם אָכָֽל׃ ‎4 ‏וַיִּשְׁמְע֥וּ אֵלָ֛יו גּוֹיִ֖ם בְּשַׁחְתָּ֣ם נִתְפָּ֑שׂ וַיְבִאֻ֥הוּ בַֽחַחִ֖ים אֶל־אֶ֥רֶץ מִצְרָֽיִם׃ ‎5 ‏וַתֵּ֙רֶא֙ כִּ֣י נֽוֹחֲלָ֔ה אָבְדָ֖ה תִּקְוָתָ֑הּ וַתִּקַּ֛ח אֶחָ֥ד מִגֻּרֶ֖יהָ כְּפִ֥יר שָׂמָֽתְהוּ׃ ‎6 ‏וַיִּתְהַלֵּ֥ךְ בְּתוֹךְ־אֲרָי֖וֹת כְּפִ֣יר הָיָ֑ה וַיִּלְמַ֥ד לִטְרָף־טֶ֖רֶף אָדָ֥ם אָכָֽל׃ ‎7 ‏וַיֵּ֙דַע֙ אַלְמְנוֹתָ֔יו וְעָרֵיהֶ֖ם הֶחֱרִ֑יב וַתֵּ֤שַׁם אֶ֙רֶץ֙ וּמְלֹאָ֔הּ מִקּ֖וֹל שַׁאֲגָתֽוֹ׃ ‎8 ‏וַיִּתְּנ֨וּ עָלָ֥יו גּוֹיִ֛ם סָבִ֖יב מִמְּדִינ֑וֹת וַֽיִּפְרְשׂ֥וּ עָלָ֛יו רִשְׁתָּ֖ם בְּשַׁחְתָּ֥ם נִתְפָּֽשׂ׃ ‎9 ‏וַֽיִּתְּנֻ֤הוּ בַסּוּגַר֙ בַּֽחַחִ֔ים וַיְבִאֻ֖הוּ אֶל־מֶ֣לֶךְ בָּבֶ֑ל יְבִאֻ֙הוּ֙ בַּמְּצֹד֔וֹת לְמַ֗עַן לֹא־יִשָּׁמַ֥ע קוֹל֛וֹ ע֖וֹד אֶל־הָרֵ֥י יִשְׂרָאֵֽל׃ פ ‎10 ‏אִמְּךָ֥ כַגֶּ֛פֶן בְּדָמְךָ֖ עַל־מַ֣יִם שְׁתוּלָ֑ה פֹּֽרִיָּה֙ וַֽעֲנֵפָ֔ה הָיְתָ֖ה מִמַּ֥יִם רַבִּֽים׃ ‎11 ‏וַיִּֽהְיוּ־לָ֞הּ מַטּ֣וֹת עֹ֗ז אֶל־שִׁבְטֵי֙ מֹֽשְׁלִ֔ים וַתִּגְבַּ֥הּ קֽוֹמָת֖וֹ עַל־בֵּ֣ין עֲבֹתִ֑ים וַיֵּרָ֣א בְגָבְה֔וֹ בְּרֹ֖ב דָּלִיֹּתָֽיו׃ ‎12 ‏וַתֻּתַּ֤שׁ בְּחֵמָה֙ לָאָ֣רֶץ הֻשְׁלָ֔כָה וְר֥וּחַ הַקָּדִ֖ים הוֹבִ֣ישׁ פִּרְיָ֑הּ הִתְפָּרְק֧וּ וְיָבֵ֛שׁוּ מַטֵּ֥ה עֻזָּ֖הּ אֵ֥שׁ אֲכָלָֽתְהוּ׃ ‎13 ‏וְעַתָּ֖ה שְׁתוּלָ֣ה בַמִּדְבָּ֑ר בְּאֶ֖רֶץ צִיָּ֥ה וְצָמָֽא׃ ‎14 ‏וַתֵּצֵ֨א אֵ֜שׁ מִמַּטֵּ֤ה בַדֶּ֙יהָ֙ פִּרְיָ֣הּ אָכָ֔לָה וְלֹא־הָ֥יָה בָ֛הּ מַטֵּה־עֹ֖ז שֵׁ֣בֶט לִמְשׁ֑וֹל קִ֥ינָה הִ֖יא וַתְּהִ֥י לְקִינָֽה׃ פ

1 wə’atâ śā’ qînâ ’el-nəśî’ê yiśərā’ēl: 2 wə’āmarətā mâ ’imməḵā ləḇîyā’ bên ’ărāywōṯ rāḇāṣâ bəṯwōḵə kəfirîm ribəṯâ ḡûreyhā: 3 wata‘al ’eḥāḏ migureyhā kəfîr hāyâ wayyiləmaḏ liṭərāf-ṭeref ’āḏām ’āḵāl: 4 wayyišəmə‘û ’ēlāyw gwōyim bəšaḥətām niṯəpāś wayəḇi’uhû ḇaḥaḥîm ’el-’ereṣ miṣərāyim: 5 watēre’ kî nwōḥălâ ’āḇəḏâ tiqəwāṯāh watiqqaḥ ’eḥāḏ migureyhā kəfîr śāmāṯəhû: 6 wayyiṯəhallēḵə bəṯwōḵə-’ărāywōṯ kəfîr hāyâ wayyiləmaḏ liṭərāf-ṭeref ’āḏām ’āḵāl: 7 wayyēḏa‘ ’aləmənwōṯāyw wə‘ārêhem heḥĕrîḇ watēšam ’ereṣ ûməlō’āh miqqwōl ša’ăḡāṯwō: 8 wayyitənû ‘ālāyw gwōyim sāḇîḇ mimməḏînwōṯ wayyifərəśû ‘ālāyw rišətām bəšaḥətām niṯəpāś: 9 wayyitənuhû ḇassûḡar baḥaḥîm wayəḇi’uhû ’el-meleḵə bāḇel yəḇi’uhû bamməṣōḏwōṯ ləma‘an lō’-yiššāma‘ qwōlwō ‘wōḏ ’el-hārê yiśərā’ēl: f 10 ’imməḵā ḵagefen bəḏāməḵā ‘al-mayim šəṯûlâ pōrîyâ wa‘ănēfâ hāyəṯâ mimmayim rabîm: 11 wayyihəyû-lāh maṭṭwōṯ ‘ōz ’el-šiḇəṭê mōšəlîm watiḡəbah qwōmāṯwō ‘al-bên ‘ăḇōṯîm wayyērā’ ḇəḡāḇəhwō bərōḇ dālîyōṯāyw: 12 watutaš bəḥēmâ lā’āreṣ hušəlāḵâ wərûḥa haqqāḏîm hwōḇîš pirəyāh hiṯəpārəqû wəyāḇēšû maṭṭēh ‘uzzāh ’ēš ’ăḵālāṯəhû: 13 wə‘atâ šəṯûlâ ḇammiḏəbār bə’ereṣ ṣîyâ wəṣāmā’: 14 watēṣē’ ’ēš mimmaṭṭēh ḇadeyhā pirəyāh ’āḵālâ wəlō’-hāyâ ḇāh maṭṭēh-‘ōz šēḇeṭ liməšwōl qînâ hî’ watəhî ləqînâ: f