‎1 ‏וַיַּקְהֵ֣ל מֹשֶׁ֗ה אֶֽת־כָּל־עֲדַ֛ת בְּנֵ֥י יִשְׂרָאֵ֖ל וַיֹּ֣אמֶר אֲלֵהֶ֑ם אֵ֚לֶּה הַדְּבָרִ֔ים אֲשֶׁר־צִוָּ֥ה יְהוָ֖ה לַעֲשֹׂ֥ת אֹתָֽם׃

‎2 ‏שֵׁ֣שֶׁת יָמִים֮ תֵּעָשֶׂ֣ה מְלָאכָה֒ וּבַיּ֣וֹם הַשְּׁבִיעִ֗י יִהְיֶ֨ה לָכֶ֥ם קֹ֛דֶשׁ שַׁבַּ֥ת שַׁבָּת֖וֹן לַיהוָ֑ה כָּל־הָעֹשֶׂ֥ה ב֛וֹ מְלָאכָ֖ה יוּמָֽת׃

‎3 ‏לֹא־תְבַעֲר֣וּ אֵ֔שׁ בְּכֹ֖ל מֹשְׁבֹֽתֵיכֶ֑ם בְּי֖וֹם הַשַּׁבָּֽת׃ פ

‎4 ‏וַיֹּ֣אמֶר מֹשֶׁ֔ה אֶל־כָּל־עֲדַ֥ת בְּנֵֽי־יִשְׂרָאֵ֖ל לֵאמֹ֑ר זֶ֣ה הַדָּבָ֔ר אֲשֶׁר־צִוָּ֥ה יְהוָ֖ה לֵאמֹֽר׃

‎5 ‏קְח֨וּ מֵֽאִתְּכֶ֤ם תְּרוּמָה֙ לַֽיהוָ֔ה כֹּ֚ל נְדִ֣יב לִבּ֔וֹ יְבִיאֶ֕הָ אֵ֖ת תְּרוּמַ֣ת יְהוָ֑ה זָהָ֥ב וָכֶ֖סֶף וּנְחֹֽשֶׁת׃

‎6 ‏וּתְכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֥שׁ וְעִזִּֽים׃

‎7 ‏וְעֹרֹ֨ת אֵילִ֧ם מְאָדָּמִ֛ים וְעֹרֹ֥ת תְּחָשִׁ֖ים וַעֲצֵ֥י שִׂטִּֽים׃¹

‎8 ‏וְשֶׁ֖מֶן לַמָּא֑וֹר וּבְשָׂמִים֙ לְשֶׁ֣מֶן הַמִּשְׁחָ֔ה וְלִקְטֹ֖רֶת הַסַּמִּֽים׃

‎9 ‏וְאַ֨בְנֵי־שֹׁ֔הַם וְאַבְנֵ֖י מִלֻּאִ֑ים לָאֵפ֖וֹד וְלַחֹֽשֶׁן׃

‎10 ‏וְכָל־חֲכַם־לֵ֖ב בָּכֶ֑ם יָבֹ֣אוּ וְיַעֲשׂ֔וּ אֵ֛ת כָּל־אֲשֶׁ֥ר צִוָּ֖ה יְהוָֽה׃

‎11 ‏אֶת־הַ֨מִּשְׁכָּ֔ן אֶֽת־אָהֳל֖וֹ וְאֶת־מִכְסֵ֑הוּ אֶת־קְרָסָיו֙ וְאֶת־קְרָשָׁ֔יו אֶת־בְּרִיחָ֕ו^q אֶת־עַמֻּדָ֖יו וְאֶת־אֲדָנָֽיו׃

‎12 ‏אֶת־הָאָרֹ֥ן וְאֶת־בַּדָּ֖יו אֶת־הַכַּפֹּ֑רֶת וְאֵ֖ת פָּרֹ֥כֶת הַמָּסָֽךְ׃

‎13 ‏אֶת־הַשֻּׁלְחָ֥ן וְאֶת־בַּדָּ֖יו וְאֶת־כָּל־כֵּלָ֑יו וְאֵ֖ת לֶ֥חֶם הַפָּנִֽים׃

‎14 ‏וְאֶת־מְנֹרַ֧ת הַמָּא֛וֹר וְאֶת־כֵּלֶ֖יהָ וְאֶת־נֵרֹתֶ֑יהָ וְאֵ֖ת שֶׁ֥מֶן הַמָּאֽוֹר׃

‎15 ‏וְאֶת־מִזְבַּ֤ח הַקְּטֹ֙רֶת֙ וְאֶת־בַּדָּ֔יו וְאֵת֙ שֶׁ֣מֶן הַמִּשְׁחָ֔ה וְאֵ֖ת קְטֹ֣רֶת הַסַּמִּ֑ים וְאֶת־מָסַ֥ךְ הַפֶּ֖תַח לְפֶ֥תַח הַמִּשְׁכָּֽן׃

‎16 ‏אֵ֣ת׀ מִזְבַּ֣ח הָעֹלָ֗ה וְאֶת־מִכְבַּ֤ר הַנְּחֹ֙שֶׁת֙ אֲשֶׁר־ל֔וֹ אֶת־בַּדָּ֖יו וְאֶת־כָּל־כֵּלָ֑יו אֶת־הַכִּיֹּ֖ר וְאֶת־כַּנּֽוֹ׃

‎17 ‏אֵ֚ת קַלְעֵ֣י הֶחָצֵ֔ר אֶת־עַמֻּדָ֖יו וְאֶת־אֲדָנֶ֑יהָ וְאֵ֕ת מָסַ֖ךְ שַׁ֥עַר הֶחָצֵֽר׃

‎18 ‏אֶת־יִתְדֹ֧ת הַמִּשְׁכָּ֛ן וְאֶת־יִתְדֹ֥ת הֶחָצֵ֖ר וְאֶת־מֵיתְרֵיהֶֽם׃

‎19 ‏אֶת־בִּגְדֵ֥י הַשְּׂרָ֖ד לְשָׁרֵ֣ת בַּקֹּ֑דֶשׁ אֶת־בִּגְדֵ֤י הַקֹּ֙דֶשׁ֙ לְאַהֲרֹ֣ן הַכֹּהֵ֔ן וְאֶת־בִּגְדֵ֥י בָנָ֖יו לְכַהֵֽן׃

‎20 ‏וַיֵּ֥צְא֛וּ³ כָּל־עֲדַ֥ת בְּנֵֽי־יִשְׂרָאֵ֖ל מִלִּפְנֵ֥י מֹשֶֽׁה׃

‎21 ‏וַיָּבֹ֕אוּ כָּל־אִ֖ישׁ אֲשֶׁר־נְשָׂא֣וֹ לִבּ֑וֹ וְכֹ֡ל אֲשֶׁר֩ נָדְבָ֨ה רוּח֜וֹ אֹת֗וֹ הֵ֠בִיאוּ אֶת־תְּרוּמַ֨ת יְהוָ֜ה לִמְלֶ֨אכֶת אֹ֤הֶל מוֹעֵד֙ וּלְכָל־עֲבֹ֣דָת֔וֹ וּלְבִגְדֵ֖י הַקֹּֽדֶשׁ׃

‎22 ‏וַיָּבֹ֥אוּ הָאֲנָשִׁ֖ים עַל־הַנָּשִׁ֑ים כֹּ֣ל׀ נְדִ֣יב לֵ֗ב הֵ֠בִיאוּ חָ֣ח וָנֶ֜זֶם וְטַבַּ֤עַת וְכוּמָז֙ כָּל־כְּלִ֣י זָהָ֔ב וְכָל־אִ֕ישׁ אֲשֶׁ֥ר הֵנִ֛יף תְּנוּפַ֥ת זָהָ֖ב לַיהוָֽה׃

‎23 ‏וְכָל־אִ֞ישׁ אֲשֶׁר־נִמְצָ֣א אִתּ֗וֹ תְּכֵ֧לֶת וְאַרְגָּמָ֛ן וְתוֹלַ֥עַת שָׁנִ֖י וְשֵׁ֣שׁ וְעִזִּ֑ים וְעֹרֹ֨ת אֵילִ֧ם מְאָדָּמִ֛ים וְעֹרֹ֥ת תְּחָשִׁ֖ים הֵבִֽיאוּ׃

‎24 ‏כָּל־מֵרִ֗ים תְּר֤וּמַת כֶּ֙סֶף֙ וּנְחֹ֔שֶׁת הֵבִ֕יאוּ אֵ֖ת תְּרוּמַ֣ת יְהוָ֑ה וְכֹ֡ל אֲשֶׁר֩ נִמְצָ֨א אִתּ֜וֹ עֲצֵ֥י שִׁטִּ֛ים לְכָל־מְלֶ֥אכֶת הָעֲבֹדָ֖ה הֵבִֽיאוּ׃

‎25 ‏וְכָל־אִשָּׁ֥ה חַכְמַת־לֵ֖ב בְּיָדֶ֣יהָ טָו֑וּ וַיָּבִ֣יאוּ מַטְוֶ֗ה אֶֽת־הַתְּכֵ֙לֶת֙ וְאֶת־הָֽאַרְגָּמָ֔ן אֶת־תּוֹלַ֥עַת הַשָּׁנִ֖י וְאֶת־הַשֵּֽׁשׁ׃

‎26 ‏וְכָל־הַ֨נָּשִׁ֔ים אֲשֶׁ֨ר נָשָׂ֥א לִבָּ֛ן אֹתָ֖נָה בְּחָכְמָ֑ה טָו֖וּ אֶת־הָעִזִּֽים׃

‎27 ‏וְהַנְּשִׂאִ֣ם הֵבִ֔יאוּ אֵ֚ת אַבְנֵ֣י הַשֹּׁ֔הַם וְאֵ֖ת אַבְנֵ֣י הַמִּלֻּאִ֑ים לָאֵפ֖וֹד וְלַחֹֽשֶׁן׃

‎28 ‏וְאֶת־הַבֹּ֖שֶׂם וְאֶת־הַשָּׁ֑מֶן לְמָא֕וֹר וּלְשֶׁ֙מֶן֙ הַמִּשְׁחָ֔ה וְלִקְטֹ֖רֶת הַסַּמִּֽים׃

‎29 ‏כָּל־אִ֣ישׁ וְאִשָּׁ֗ה אֲשֶׁ֨ר נָדַ֣ב לִבָּם֮ אֹתָם֒ לְהָבִיא֙ לְכָל־הַמְּלָאכָ֔ה אֲשֶׁ֨ר צִוָּ֧ה יְהוָ֛ה לַעֲשׂ֖וֹת בְּיַד־מֹשֶׁ֑ה הֵבִ֧יאוּ בְנֵי־יִשְׂרָאֵ֛ל נְדָבָ֖ה לַיהוָֽה׃ פ

‎30 ‏וַיֹּ֤אמֶר מֹשֶׁה֙ אֶל־בְּנֵ֣י יִשְׂרָאֵ֔ל רְא֛וּ קָרָ֥א יְהוָ֖ה בְּשֵׁ֑ם בְּצַלְאֵ֛ל בֶּן־אוּרִ֥י בֶן־ח֖וּר לְמַטֵּ֥ה יְהוּדָֽה׃

‎31 ‏וַיְמַלֵּ֥א אֹת֖וֹ ר֣וּחַ אֱלֹהִ֑ים בְּחָכְמָ֛ה בִּתְבוּנָ֥ה וּבְדַ֖עַת וּבְכָל־מְלָאכָֽה׃

‎32 ‏וְלַחְשֹׁ֖ב מַֽחַשָׁבֹ֑ת לַעֲשֹׂ֛ת בַּזָּהָ֥ב וּבַכֶּ֖סֶף וּבַנְּחֹֽשֶׁת׃

‎33 ‏וּבַחֲרֹ֥שֶׁת אֶ֛בֶן לְמַלֹּ֖את וּבַחֲרֹ֣שֶׁת עֵ֑ץ לַעֲשׂ֖וֹת בְּכָל־מְלֶ֥אכֶת מַחֲשָֽׁבֶת׃

‎34 ‏וּלְהוֹרֹ֖ת נָתַ֣ן בְּלִבּ֑וֹ ה֕וּא וְאָֽהֳלִיאָ֥ב בֶּן־אֲחִיסָמָ֖ךְ לְמַטֵּה־דָֽן׃

‎35 ‏מִלֵּ֨א אֹתָ֜ם חָכְמַת־לֵ֗ב לַעֲשׂוֹת֮ כָּל־מְלֶ֣אכֶת חָרָ֣שׁ׀ וְחֹשֵׁב֒ וְרֹקֵ֞ם בַּתְּכֵ֣לֶת וּבָֽאַרְגָּמָ֗ן בְּתוֹלַ֧עַת הַשָּׁנִ֛י וּבַשֵּׁ֖שׁ וְאֹרֵ֑ג עֹשֵׂי֙ כָּל־מְלָאכָ֔ה וְחֹשְׁבֵ֖י מַחֲשָׁבֹֽת׃

1 wayyaqəhēl mōšeh ’eṯ-kāl-‘ăḏaṯ bənê yiśərā’ēl wayyō’mer ’ălēhem ’ēlleh hadəḇārîm ’ăšer-ṣiûâ yəhwâ l^a‘ăśōṯ ’ōṯām:

2 šēšeṯ yāmîm tē‘āśeh məlā’ḵâ ûḇayywōm haššəḇî‘î yihəyeh lāḵem qōḏeš šabaṯ šabāṯwōn layhwâ kāl-hā‘ōśeh ḇwō məlā’ḵâ yûmāṯ:

3 lō’-ṯəḇ^a‘ărû ’ēš bəḵōl mōšəḇōṯêḵem bəywōm haššabāṯ: f

4 wayyō’mer mōšeh ’el-kāl-‘ăḏaṯ bənê-yiśərā’ēl lē’mōr zeh hadāḇār ’ăšer-ṣiûâ yəhwâ lē’mōr:

5 qəḥû mē’itəḵem tərûmâ layhwâ kōl nəḏîḇ libwō yəḇî’ehā ’ēṯ tərûmaṯ yəhwâ zâāḇ wāḵesef ûnəḥōšeṯ:

6 ûṯəḵēleṯ wə’arəgāmān wəṯwōl^a‘aṯ šānî wəšēš wə‘izzîm:

7 wə‘ōrōṯ ’êlim mə’ādāmîm wə‘ōrōṯ təḥāšîm w^a‘ăṣê śiṭṭîm:¹

8 wəšemen lammā’wōr ûḇəśāmîm ləšemen hammišəḥâ wəliqəṭōreṯ hassammîm:

9 wə’aḇənê-šōham wə’aḇənê millu’îm lā’ēfwōḏ wəl^aḥōšen:

10 wəḵāl-ḥăḵam-lēḇ bāḵem yāḇō’û wəy^a‘ăśû ’ēṯ kāl-’ăšer ṣiûâ yəhwâ:

11 ’eṯ-hammišəkān ’eṯ-’âŏlwō wə’eṯ-miḵəsēhû ’eṯ-qərāsāyw wə’eṯ-qərāšāyw ’eṯ-bərîḥāw^q ’eṯ-‘ammuḏāyw wə’eṯ-’ăḏānāyw:

12 ’eṯ-hā’ārōn wə’eṯ-badāyw ’eṯ-hakapōreṯ wə’ēṯ pārōḵeṯ hammāsāḵə:

13 ’eṯ-haššuləḥān wə’eṯ-badāyw wə’eṯ-kāl-kēlāyw wə’ēṯ leḥem hapānîm:

14 wə’eṯ-mənōraṯ hammā’wōr wə’eṯ-kēleyhā wə’eṯ-nērōṯeyhā wə’ēṯ šemen hammā’wōr:

15 wə’eṯ-mizəb^aḥ haqqəṭōreṯ wə’eṯ-badāyw wə’ēṯ šemen hammišəḥâ wə’ēṯ qəṭōreṯ hassammîm wə’eṯ-māsaḵə hapeṯ^aḥ ləfeṯ^aḥ hammišəkān:

16 ’ēṯ| mizəb^aḥ hā‘ōlâ wə’eṯ-miḵəbar hannəḥōšeṯ ’ăšer-lwō ’eṯ-badāyw wə’eṯ-kāl-kēlāyw ’eṯ-hakîyōr wə’eṯ-kannwō:

17 ’ēṯ qalə‘ê heḥāṣēr ’eṯ-‘ammuḏāyw wə’eṯ-’ăḏāneyhā wə’ēṯ māsaḵə š^a‘ar heḥāṣēr:

18 ’eṯ-yiṯəḏōṯ hammišəkān wə’eṯ-yiṯəḏōṯ heḥāṣēr wə’eṯ-mêṯərêhem:

19 ’eṯ-biḡəḏê haśśərāḏ ləšārēṯ baqqōḏeš ’eṯ-biḡəḏê haqqōḏeš lə’ahărōn hakōhēn wə’eṯ-biḡəḏê ḇānāyw ləḵahēn:

20 wayyēṣə’û³ kāl-‘ăḏaṯ bənê-yiśərā’ēl millifənê mōšeh:

21 wayyāḇō’û kāl-’îš ’ăšer-nəśā’wō libwō wəḵōl ’ăšer nāḏəḇâ rûḥwō ’ōṯwō hēḇî’û ’eṯ-tərûmaṯ yəhwâ liməle’ḵeṯ ’ōhel mwō‘ēḏ ûləḵāl-‘ăḇōḏāṯwō ûləḇiḡəḏê haqqōḏeš:

22 wayyāḇō’û hā’ănāšîm ‘al-hannāšîm kōl| nəḏîḇ lēḇ hēḇî’û ḥāḥ wānezem wəṭab^a‘aṯ wəḵûmāz kāl-kəlî zâāḇ wəḵāl-’îš ’ăšer hēnîf tənûfaṯ zâāḇ layhwâ:

23 wəḵāl-’îš ’ăšer-niməṣā’ ’itwō təḵēleṯ wə’arəgāmān wəṯwōl^a‘aṯ šānî wəšēš wə‘izzîm wə‘ōrōṯ ’êlim mə’ādāmîm wə‘ōrōṯ təḥāšîm hēḇî’û:

24 kāl-mērîm tərûmaṯ kesef ûnəḥōšeṯ hēḇî’û ’ēṯ tərûmaṯ yəhwâ wəḵōl ’ăšer niməṣā’ ’itwō ‘ăṣê šiṭṭîm ləḵāl-məle’ḵeṯ hā‘ăḇōḏâ hēḇî’û:

25 wəḵāl-’iššâ ḥaḵəmaṯ-lēḇ bəyāḏeyhā ṭāwû wayyāḇî’û maṭəweh ’eṯ-hatəḵēleṯ wə’eṯ-hā’arəgāmān ’eṯ-twōl^a‘aṯ haššānî wə’eṯ-haššēš:

26 wəḵāl-hannāšîm ’ăšer nāśā’ libān ’ōṯānâ bəḥāḵəmâ ṭāwû ’eṯ-hā‘izzîm:

27 wəhannəśi’im hēḇî’û ’ēṯ ’aḇənê haššōham wə’ēṯ ’aḇənê hammillu’îm lā’ēfwōḏ wəl^aḥōšen:

28 wə’eṯ-habōśem wə’eṯ-haššāmen ləmā’wōr ûləšemen hammišəḥâ wəliqəṭōreṯ hassammîm:

29 kāl-’îš wə’iššâ ’ăšer nāḏaḇ libām ’ōṯām ləhāḇî’ ləḵāl-hamməlā’ḵâ ’ăšer ṣiûâ yəhwâ l^a‘ăśwōṯ bəyaḏ-mōšeh hēḇî’û ḇənê-yiśərā’ēl nəḏāḇâ layhwâ: f

30 wayyō’mer mōšeh ’el-bənê yiśərā’ēl rə’û qārā’ yəhwâ bəšēm bəṣalə’ēl ben-’ûrî ḇen-ḥûr ləmaṭṭēh yəhûḏâ:

31 wayəmallē’ ’ōṯwō rûḥa ’ĕlōhîm bəḥāḵəmâ biṯəḇûnâ ûḇəḏ^a‘aṯ ûḇəḵāl-məlā’ḵâ:

32 wəl^aḥəšōḇ m^aḥašāḇōṯ l^a‘ăśōṯ bazzâāḇ ûḇakesef ûḇannəḥōšeṯ:

33 ûḇ^aḥărōšeṯ ’eḇen ləmallō’ṯ ûḇ^aḥărōšeṯ ‘ēṣ l^a‘ăśwōṯ bəḵāl-məle’ḵeṯ m^aḥăšāḇeṯ:

34 ûləhwōrōṯ nāṯan bəlibwō hû’ wə’âŏlî’āḇ ben-’ăḥîsāmāḵə ləmaṭṭēh-ḏān:

35 millē’ ’ōṯām ḥāḵəmaṯ-lēḇ l^a‘ăśwōṯ kāl-məle’ḵeṯ ḥārāš| wəḥōšēḇ wərōqēm batəḵēleṯ ûḇā’arəgāmān bəṯwōl^a‘aṯ haššānî ûḇaššēš wə’ōrēḡ ‘ōśê kāl-məlā’ḵâ wəḥōšəḇê m^aḥăšāḇōṯ: