Sacred Texts  Bible  Index 
Polyglot  KJV  Sep  Vul 

Exodus (Shemot) Index
  Previous  Next 

Tanach (Hebrew): Exodus (Shemot) Chapter 14

1 ‏וַיְדַבֵּ֥ר יְהוָֹ֖ה אֶל־מֹשֶׁ֥ה לֵּאמֹֽר׃

2 ‏דַּבֵּר֮ אֶל־בְּנֵ֣י יִשְׂרָאֵל֒ וְיָשֻׁ֗בוּ וְיַחֲנוּ֙ לִפְנֵי֙ פִּ֣י הַחִירֹ֔ת בֵּ֥ין מִגְדֹּ֖ל וּבֵ֣ין הַיָּ֑ם לִפְנֵי֙ בַּ֣עַל צְפֹ֔ן נִכְח֥וֹ תַחֲנ֖וּ עַל־הַיָּֽם׃

3 ‏וְאָמַ֤ר פַּרְעֹה֙ לִבְנֵ֣י יִשְׂרָאֵ֔ל נְבֻכִ֥ים הֵ֖ם בָּאָ֑רֶץ סָגַ֥ר עֲלֵיהֶ֖ם הַמִּדְבָּֽר׃

4 ‏וְחִזַּקְתִּ֣י אֶת־לֵב־פַּרְעֹה֮ וְרָדַ֣ף אַחֲרֵיהֶם֒ וְאִכָּבְדָ֤ה בְּפַרְעֹה֙ וּבְכָל־חֵיל֔וֹ וְיָדְע֥וּ מִצְרַ֖יִם כִּֽי־אֲנִ֣י יְהוָ֑ה וַיַּֽעֲשׂוּ־כֵֽן׃

5 ‏וַיֻּגַּד֙ לְמֶ֣לֶךְ מִצְרַ֔יִם כִּ֥י בָרַ֖ח הָעָ֑ם וַ֠יֵּהָפֵךְ לְבַ֨ב פַּרְעֹ֤ה וַעֲבָדָיו֙ אֶל־הָעָ֔ם וַיֹּֽאמרוּ֙3 מַה־זֹּ֣את עָשִׂ֔ינוּ כִּֽי־שִׁלַּ֥חְנוּ אֶת־יִשְׂרָאֵ֖ל מֵעָבְדֵֽנוּ׃

6 ‏וַיֶּאְסֹ֖ר אֶת־רִכְבּ֑וֹ וְאֶת־עַמּ֖וֹ לָקַ֥ח עִמּֽוֹ׃

7 ‏וַיִּקַּ֗ח שֵׁשׁ־מֵא֥וֹת רֶ֙כֶב֙ בָּח֔וּר וְכֹ֖ל רֶ֣כֶב מִצְרָ֑יִם וְשָׁלִשִׁ֖ם עַל־כֻּלּֽוֹ׃

8 ‏וַיְחַזֵּ֣ק יְהוָֹ֗ה אֶת־לֵ֤ב פַּרְעֹה֙ מֶ֣לֶךְ מִצְרַ֔יִם וַיִּרְדֹּ֕ף אַחֲרֵ֖י בְּנֵ֣י יִשְׂרָאֵ֑ל וּבְנֵ֣י יִשְׂרָאֵ֔ל יֹצְאִ֖ים בְּיָ֥ד רָמָֽה׃

9 ‏וַיִּרְדְּפ֨וּ מִצְרַ֜יִם אַחֲרֵיהֶ֗ם וַיַּשִּׂ֤יגוּ אוֹתָם֙ חֹנִ֣ים עַל־הַיָּ֔ם כָּל־סוּס֙ רֶ֣כֶב פַּרְעֹ֔ה וּפָרָשָׁ֖יו וְחֵיל֑וֹ עַל־פִּי֙ הַֽחִירֹ֔ת לִפְנֵ֖י בַּ֥עַל צְפֹֽן׃

10 ‏וּפַרְעֹ֖ה הִקְרִ֑יב וַיִּשְׂאוּ֩ בְנֵֽי־יִשְׂרָאֵ֨ל אֶת־עֵינֵיהֶ֜ם וְהִנֵּ֥ה מִצְרַ֣יִם׀ נֹסֵ֣עַ אַחֲרֵיהֶ֗ם וַיִּֽירְאוּ֙ מְאֹ֔ד וַיִּצְעֲק֥וּ בְנֵֽי־יִשְׂרָאֵ֖ל אֶל־יְהוָֽה׃

11 ‏וַיֹּאמְרוּ֮ אֶל־מֹשֶׁה֒ הַֽמִבְּלִ֤י אֵין־קְבָרִים֙ בְּמִצְרַ֔יִם לְקַחְתָּ֖נוּ לָמ֣וּת בַּמִּדְבָּ֑ר מַה־זֹּאת֙ עָשִׂ֣יתָ לָּ֔נוּ לְהוֹצִיאָ֖נוּ מִמִּצְרָֽיִם׃

12 ‏הֲלֹא־זֶ֣ה הַדָּבָ֗ר אֲשֶׁר֩ דִּבַּ֨רְנוּ אֵלֶ֤יךָ בְמִצְרַ֙יִם֙ לֵאמֹ֔ר חֲדַ֥ל מִמֶּ֖נּוּ וְנַֽעַבְדָ֣ה אֶת־מִצְרָ֑יִם כִּ֣י ט֥וֹב לָ֙נוּ֙ עֲבֹ֣ד אֶת־מִצְרַ֔יִם מִמֻּתֵ֖נוּ בַּמִּדְבָּֽר׃

13 ‏וַיֹּ֨אמֶר מֹשֶׁ֣ה אֶל־הָעָם֮ אַל־תִּירָאוּ֒ הִֽתְיַצְב֗וּ וּרְאוּ֙ אֶת־יְשׁוּעַ֣ת יְהוָ֔ה אֲשֶׁר־יַעֲשֶׂ֥ה לָכֶ֖ם הַיּ֑וֹם כִּ֗י אֲשֶׁ֨ר רְאִיתֶ֤ם אֶת־מִצְרַ֙יִם֙ הַיּ֔וֹם לֹ֥א תֹסִ֛יפוּ לִרְאֹתָ֥ם ע֖וֹד עַד־עוֹלָֽם׃

14 ‏יְהוָ֖ה יִלָּחֵ֣ם לָכֶ֑ם וְאַתֶּ֖ם תַּחֲרִישֽׁוּן׃ פ

15 ‏וַיֹּ֤אמֶר יְהוָה֙ אֶל־מֹשֶׁ֔ה מַה־תִּצְעַ֖ק אֵלָ֑י דַּבֵּ֥ר אֶל־בְּנֵי־יִשְׂרָאֵ֖ל וְיִסָּֽעוּ׃

16 ‏וְאַתָּ֞ה הָרֵ֣ם אֶֽת־מַטְּךָ֗ וּנְטֵ֧ה אֶת־יָדְךָ֛ עַל־הַיָּ֖ם וּבְקָעֵ֑הוּ וְיָבֹ֧אוּ בְנֵֽי־יִשְׂרָאֵ֛ל בְּת֥וֹךְ הַיָּ֖ם בַּיַּבָּשָֽׁה׃

17 ‏וַאֲנִ֗י הִנְנִ֤י מְחַזֵּק֙ אֶת־לֵ֣ב מִצְרַ֔יִם וְיָבֹ֖אוּ אַחֲרֵיהֶ֑ם וְאִכָּבְדָ֤ה בְּפַרְעֹה֙ וּבְכָל־חֵיל֔וֹ בְּרִכְבּ֖וֹ וּבְפָרָשָֽׁיו׃

18 ‏וְיָדְע֥וּ מִצְרַ֖יִם כִּי־אֲנִ֣י יְהוָ֑ה בְּהִכָּבְדִ֣י בְּפַרְעֹ֔ה בְּרִכְבּ֖וֹ וּבְפָרָשָֽׁיו׃

19 ‏וַיִּסַּ֞ע מַלְאַ֣ךְ הָאֱלֹהִ֗ים הַהֹלֵךְ֙ לִפְנֵי֙ מַחֲנֵ֣ה יִשְׂרָאֵ֔ל וַיֵּ֖לֶךְ מֵאַחֲרֵיהֶ֑ם וַיִּסַּ֞ע עַמּ֤וּד הֶֽעָנָן֙ מִפְּנֵיהֶ֔ם וַיַּֽעֲמֹ֖ד מֵאַחֲרֵיהֶֽם׃

20 ‏וַיָּבֹ֞א בֵּ֣ין׀ מַחֲנֵ֣ה מִצְרַ֗יִם וּבֵין֙ מַחֲנֵ֣ה יִשְׂרָאֵ֔ל וַיְהִ֤י הֶֽעָנָן֙ וְהַחֹ֔שֶׁךְ וַיָּ֖אֶר אֶת־הַלָּ֑יְלָה וְלֹא־קָרַ֥ב זֶ֛ה אֶל־זֶ֖ה כָּל־הַלָּֽיְלָה׃

21 ‏וַיֵּ֨ט מֹשֶׁ֣ה אֶת־יָדוֹ֮ עַל־הַיָּם֒ וַיּ֣וֹלֶךְ יְהוָ֣ה׀ אֶת־הַ֠יָּם בְּר֨וּחַ קָדִ֤ים עַזָּה֙ כָּל־הַלַּ֔יְלָה וַיָּ֥שֶׂם אֶת־הַיָּ֖ם לֶחָרָבָ֑ה וַיִּבָּקְע֖וּ הַמָּֽיִם׃

22 ‏וַיָּבֹ֧אוּ בְנֵֽי־יִשְׂרָאֵ֛ל בְּת֥וֹךְ הַיָּ֖ם בַּיַּבָּשָׁ֑ה וְהַמַּ֤יִם לָהֶם֙ חֹמָ֔ה מִֽימִינָ֖ם וּמִשְּׂמֹאלָֽם׃

23 ‏וַיִּרְדְּפ֤וּ מִצְרַ֙יִם֙ וַיָּבֹ֣אוּ אַחֲרֵיהֶ֔ם כֹּ֚ל ס֣וּס פַּרְעֹ֔ה רִכְבּ֖וֹ וּפָרָשָׁ֑יו אֶל־תּ֖וֹךְ הַיָּֽם׃

24 ‏וַֽיְהִי֙ בְּאַשְׁמֹ֣רֶת הַבֹּ֔קֶר וַיַּשְׁקֵ֤ף יְהוָה֙ אֶל־מַחֲנֵ֣ה מִצְרַ֔יִם בְּעַמּ֥וּד אֵ֖שׁ וְעָנָ֑ן וַיָּ֕הָם אֵ֖ת מַחֲנֵ֥ה מִצְרָֽיִם׃

25 ‏וַיָּ֗סַר אֵ֚ת אֹפַ֣ן מַרְכְּבֹתָ֔יו וַֽיְנַהֲגֵ֖הוּ בִּכְבֵדֻ֑ת וַיֹּ֣אמֶר מִצְרַ֗יִם אָנ֙וּסָה֙ מִפְּנֵ֣י יִשְׂרָאֵ֔ל כִּ֣י יְהוָ֔ה נִלְחָ֥ם לָהֶ֖ם בְּמִצְרָֽיִם2 פ

26 ‏וַיֹּ֤אמֶר יְהוָה֙ אֶל־מֹשֶׁ֔ה נְטֵ֥ה אֶת־יָדְךָ֖ עַל־הַיָּ֑ם וְיָשֻׁ֤בוּ הַמַּ֙יִם֙ עַל־מִצְרַ֔יִם עַל־רִכְבּ֖וֹ וְעַל־פָּרָשָֽׁיו׃

27 ‏וַיֵּט֩ מֹשֶׁ֨ה אֶת־יָד֜וֹ עַל־הַיָּ֗ם וַיָּ֨שָׁב הַיָּ֜ם לִפְנ֥וֹת בֹּ֙קֶר֙ לְאֵ֣יתָנ֔וֹ וּמִצְרַ֖יִם נָסִ֣ים לִקְרָאת֑וֹ וַיְנַעֵ֧ר יְהוָ֛ה אֶת־מִצְרַ֖יִם בְּת֥וֹךְ הַיָּֽם׃

28 ‏וַיָּשֻׁ֣בוּ הַמַּ֗יִם וַיְכַסּ֤וּ אֶת־הָרֶ֙כֶב֙ וְאֶת־הַפָּ֣רָשִׁ֔ים לְכֹל֙ חֵ֣יל פַּרְעֹ֔ה הַבָּאִ֥ים אַחֲרֵיהֶ֖ם בַּיָּ֑ם לֹֽא־נִשְׁאַ֥ר בָּהֶ֖ם עַד־אֶחָֽד׃

29 ‏וּבְנֵ֧י יִשְׂרָאֵ֛ל הָלְכ֥וּ בַיַּבָּשָׁ֖ה בְּת֣וֹךְ הַיָּ֑ם וְהַמַּ֤יִם לָהֶם֙ חֹמָ֔ה מִֽימִינָ֖ם וּמִשְּׂמֹאלָֽם2

30 ‏וַיּ֨וֹשַׁע יְהוָ֜ה בַּיּ֥וֹם הַה֛וּא אֶת־יִשְׂרָאֵ֖ל מִיַּ֣ד מִצְרָ֑יִם וַיַּ֤רְא יִשְׂרָאֵל֙ אֶת־מִצְרַ֔יִם מֵ֖ת עַל־שְׂפַ֥ת הַיָּֽם׃

31 ‏וַיַּ֨רְא יִשְׂרָאֵ֜ל אֶת־הַיָּ֣ד הַגְּדֹלָ֗ה אֲשֶׁ֨ר עָשָׂ֤ה יְהוָה֙ בְּמִצְרַ֔יִם וַיִּֽירְא֥וּ הָעָ֖ם אֶת־יְהוָ֑ה וַיַּֽאֲמִ֙ינוּ֙ בַּֽיהוָ֔ה וּבְמֹשֶׁ֖ה עַבְדּֽוֹ׃ פ

1 wayəḏabēr yəhwōâ ’el-mōšeh llē’mōr:

2 dabēr ’el-bənê yiśərā’ēl wəyāšuḇû wəyaḥănû lifənê pî haḥîrōṯ bên miḡədōl ûḇên hayyām lifənê ba‘al ṣəfōn niḵəḥwō ṯaḥănû ‘al-hayyām:

3 wə’āmar parə‘ōh liḇənê yiśərā’ēl nəḇuḵîm hēm bā’āreṣ sāḡar ‘ălêhem hammiḏəbār:

4 wəḥizzaqətî ’eṯ-lēḇ-parə‘ōh wərāḏaf ’aḥărêhem wə’ikāḇəḏâ bəfarə‘ōh ûḇəḵāl-ḥêlwō wəyāḏə‘û miṣərayim kî-’ănî yəhwâ wayya‘ăśû-ḵēn:

5 wayyugaḏ ləmeleḵə miṣərayim kî ḇāraḥ hā‘ām wayyēhāfēḵə ləḇaḇ parə‘ōh wa‘ăḇāḏāyw ’el-hā‘ām wayyō’mrû3 mah-zzō’ṯ ‘āśînû kî-šillaḥənû ’eṯ-yiśərā’ēl mē‘āḇəḏēnû:

6 wayye’əsōr ’eṯ-riḵəbwō wə’eṯ-‘ammwō lāqaḥ ‘immwō:

7 wayyiqqaḥ šēš-mē’wōṯ reḵeḇ bāḥûr wəḵōl reḵeḇ miṣərāyim wəšālišim ‘al-kullwō:

8 wayəḥazzēq yəhwōâ ’eṯ-lēḇ parə‘ōh meleḵə miṣərayim wayyirədōf ’aḥărê bənê yiśərā’ēl ûḇənê yiśərā’ēl yōṣə’îm bəyāḏ rāmâ:

9 wayyirədəfû miṣərayim ’aḥărêhem wayyaśśîḡû ’wōṯām ḥōnîm ‘al-hayyām kāl-sûs reḵeḇ parə‘ōh ûfārāšāyw wəḥêlwō ‘al-pî haḥîrōṯ lifənê ba‘al ṣəfōn:

10 ûfarə‘ōh hiqərîḇ wayyiśə’û ḇənê-yiśərā’ēl ’eṯ-‘ênêhem wəhinnēh miṣərayim| nōsē‘a ’aḥărêhem wayyîrə’û mə’ōḏ wayyiṣə‘ăqû ḇənê-yiśərā’ēl ’el-yəhwâ:

11 wayyō’mərû ’el-mōšeh hamibəlî ’ên-qəḇārîm bəmiṣərayim ləqaḥətānû lāmûṯ bammiḏəbār mah-zzō’ṯ ‘āśîṯā llānû ləhwōṣî’ānû mimmiṣərāyim:

12 hălō’-zeh hadāḇār ’ăšer dibarənû ’ēleyḵā ḇəmiṣərayim lē’mōr ḥăḏal mimmennû wəna‘aḇəḏâ ’eṯ-miṣərāyim kî ṭwōḇ lānû ‘ăḇōḏ ’eṯ-miṣərayim mimmuṯēnû bammiḏəbār:

13 wayyō’mer mōšeh ’el-hā‘ām ’al-tîrā’û hiṯəyaṣəḇû ûrə’û ’eṯ-yəšû‘aṯ yəhwâ ’ăšer-ya‘ăśeh lāḵem hayywōm kî ’ăšer rə’îṯem ’eṯ-miṣərayim hayywōm lō’ ṯōsîfû lirə’ōṯām ‘wōḏ ‘aḏ-‘wōlām:

14 yəhwâ yillāḥēm lāḵem wə’atem taḥărîšûn: f

15 wayyō’mer yəhwâ ’el-mōšeh mah-tiṣə‘aq ’ēlāy dabēr ’el-bənê-yiśərā’ēl wəyissā‘û:

16 wə’atâ hārēm ’eṯ-maṭṭəḵā ûnəṭēh ’eṯ-yāḏəḵā ‘al-hayyām ûḇəqā‘ēhû wəyāḇō’û ḇənê-yiśərā’ēl bəṯwōḵə hayyām bayyabāšâ:

17 wa’ănî hinənî məḥazzēq ’eṯ-lēḇ miṣərayim wəyāḇō’û ’aḥărêhem wə’ikāḇəḏâ bəfarə‘ōh ûḇəḵāl-ḥêlwō bəriḵəbwō ûḇəfārāšāyw:

18 wəyāḏə‘û miṣərayim kî-’ănî yəhwâ bəhikāḇəḏî bəfarə‘ōh bəriḵəbwō ûḇəfārāšāyw:

19 wayyissa‘ malə’aḵə hā’ĕlōhîm hahōlēḵə lifənê maḥănēh yiśərā’ēl wayyēleḵə mē’aḥărêhem wayyissa‘ ‘ammûḏ he‘ānān mipənêhem wayya‘ămōḏ mē’aḥărêhem:

20 wayyāḇō’ bên| maḥănēh miṣərayim ûḇên maḥănēh yiśərā’ēl wayəhî he‘ānān wəhaḥōšeḵə wayyā’er ’eṯ-hallāyəlâ wəlō’-qāraḇ zeh ’el-zeh kāl-hallāyəlâ:

21 wayyēṭ mōšeh ’eṯ-yāḏwō ‘al-hayyām wayywōleḵə yəhwâ| ’eṯ-hayyām bərûḥa qāḏîm ‘azzâ kāl-hallayəlâ wayyāśem ’eṯ-hayyām leḥārāḇâ wayyibāqə‘û hammāyim:

22 wayyāḇō’û ḇənê-yiśərā’ēl bəṯwōḵə hayyām bayyabāšâ wəhammayim lâem ḥōmâ mîmînām ûmiśśəmō’lām:

23 wayyirədəfû miṣərayim wayyāḇō’û ’aḥărêhem kōl sûs parə‘ōh riḵəbwō ûfārāšāyw ’el-twōḵə hayyām:

24 wayəhî bə’ašəmōreṯ habōqer wayyašəqēf yəhwâ ’el-maḥănēh miṣərayim bə‘ammûḏ ’ēš wə‘ānān wayyâām ’ēṯ maḥănēh miṣərāyim:

25 wayyāsar ’ēṯ ’ōfan marəkəḇōṯāyw wayənahăḡēhû biḵəḇēḏuṯ wayyō’mer miṣərayim ’ānûsâ mipənê yiśərā’ēl kî yəhwâ niləḥām lâem bəmiṣərāyim2 f

26 wayyō’mer yəhwâ ’el-mōšeh nəṭēh ’eṯ-yāḏəḵā ‘al-hayyām wəyāšuḇû hammayim ‘al-miṣərayim ‘al-riḵəbwō wə‘al-pārāšāyw:

27 wayyēṭ mōšeh ’eṯ-yāḏwō ‘al-hayyām wayyāšāḇ hayyām lifənwōṯ bōqer lə’êṯānwō ûmiṣərayim nāsîm liqərā’ṯwō wayəna‘ēr yəhwâ ’eṯ-miṣərayim bəṯwōḵə hayyām:

28 wayyāšuḇû hammayim wayəḵassû ’eṯ-hāreḵeḇ wə’eṯ-hapārāšîm ləḵōl ḥêl parə‘ōh habā’îm ’aḥărêhem bayyām lō’-nišə’ar bâem ‘aḏ-’eḥāḏ:

29 ûḇənê yiśərā’ēl hāləḵû ḇayyabāšâ bəṯwōḵə hayyām wəhammayim lâem ḥōmâ mîmînām ûmiśśəmō’lām2

30 wayywōša‘ yəhwâ bayywōm hahû’ ’eṯ-yiśərā’ēl mîyaḏ miṣərāyim wayyarə’ yiśərā’ēl ’eṯ-miṣərayim mēṯ ‘al-śəfaṯ hayyām:

31 wayyarə’ yiśərā’ēl ’eṯ-hayyāḏ hagəḏōlâ ’ăšer ‘āśâ yəhwâ bəmiṣərayim wayyîrə’û hā‘ām ’eṯ-yəhwâ wayya’ămînû bayhwâ ûḇəmōšeh ‘aḇədwō: f


Next: Exodus (Shemot) Chapter 15