Sacred Texts  Bible  Index 
Polyglot  KJV  Sep  Vul 

Esther (Esther) Index
  Previous  Next 

Tanach (Hebrew): Esther (Esther) Chapter 2

1 ‏אַחַר֙ הַדְּבָרִ֣ים הָאֵ֔לֶּה כְּשֹׁ֕ךְ חֲמַ֖ת הַמֶּ֣לֶךְ אֲחַשְׁוֵר֑וֹשׁ זָכַ֤ר אֶת־וַשְׁתִּי֙ וְאֵ֣ת אֲשֶׁר־עָשָׂ֔תָה וְאֵ֥ת אֲשֶׁר־נִגְזַ֖ר עָלֶֽיהָ׃

2 ‏וַיֹּאמְר֥וּ נַעֲרֵֽי־הַמֶּ֖לֶךְ מְשָׁרְתָ֑יו יְבַקְשׁ֥וּ לַמֶּ֛לֶךְ נְעָר֥וֹת בְּתוּל֖וֹת טוֹב֥וֹת מַרְאֶֽה׃

3 ‏וְיַפְקֵ֨ד הַמֶּ֣לֶךְ פְּקִידִים֮ בְּכָל־מְדִינ֣וֹת מַלְכוּתוֹ֒ וְיִקְבְּצ֣וּ אֶת־כָּל־נַעֲרָֽה־בְ֠תוּלָה טוֹבַ֨ת מַרְאֶ֜ה אֶל־שׁוּשַׁ֤ן הַבִּירָה֙ אֶל־בֵּ֣ית הַנָּשִׁ֔ים אֶל־יַ֥ד הֵגֶ֛א סְרִ֥יס הַמֶּ֖לֶךְ שֹׁמֵ֣ר הַנָּשִׁ֑ים וְנָת֖וֹן תַּמְרוּקֵיהֶֽן׃

4 ‏וְהַֽנַּעֲרָ֗ה אֲשֶׁ֤ר תִּיטַב֙ בְּעֵינֵ֣י הַמֶּ֔לֶךְ תִּמְלֹ֖ךְ תַּ֣חַת וַשְׁתִּ֑י וַיִּיטַ֧ב הַדָּבָ֛ר בְּעֵינֵ֥י הַמֶּ֖לֶךְ וַיַּ֥עַשׂ כֵּֽן׃ ס

5 ‏אִ֣ישׁ יְהוּדִ֔י הָיָ֖ה בְּשׁוּשַׁ֣ן הַבִּירָ֑ה וּשְׁמ֣וֹ מָרְדֳּכַ֗י בֶּ֣ן יָאִ֧יר בֶּן־שִׁמְעִ֛י בֶּן־קִ֖ישׁ אִ֥ישׁ יְמִינִֽי׃

6 ‏אֲשֶׁ֤ר הָגְלָה֙ מִיר֣וּשָׁלַ֔יִם עִם־הַגֹּלָה֙ אֲשֶׁ֣ר הָגְלְתָ֔ה עִ֖ם יְכָנְיָ֣ה מֶֽלֶךְ־יְהוּדָ֑ה אֲשֶׁ֣ר הֶגְלָ֔ה נְבוּכַדְנֶאצַּ֖ר מֶ֥לֶךְ בָּבֶֽל׃

7 ‏וַיְהִ֨י אֹמֵ֜ן אֶת־הֲדַסָּ֗ה הִ֤יא אֶסְתֵּר֙ בַּת־דֹּד֔וֹ כִּ֛י אֵ֥ין לָ֖הּ אָ֣ב וָאֵ֑ם וְהַנַּעֲרָ֤ה יְפַת־תֹּ֙אַר֙ וְטוֹבַ֣ת מַרְאֶ֔ה וּבְמ֤וֹת אָבִ֙יהָ֙ וְאִמָּ֔הּ לְקָחָ֧הּ מָרְדֳּכַ֛י ל֖וֹ לְבַֽת׃

8 ‏וַיְהִ֗י בְּהִשָּׁמַ֤ע דְּבַר־הַמֶּ֙לֶךְ֙ וְדָת֔וֹ וּֽבְהִקָּבֵ֞ץ נְעָר֥וֹת רַבּ֛וֹת אֶל־שׁוּשַׁ֥ן הַבִּירָ֖ה אֶל־יַ֣ד הֵגָ֑י וַתִּלָּקַ֤ח אֶסְתֵּר֙ אֶל־בֵּ֣ית הַמֶּ֔לֶךְ אֶל־יַ֥ד הֵגַ֖י שֹׁמֵ֥ר הַנָּשִֽׁים׃

9 ‏וַתִּיטַ֨ב הַנַּעֲרָ֣ה בְעֵינָיו֮ וַתִּשָּׂ֣א חֶ֣סֶד לְפָנָיו֒ וַ֠יְבַהֵל אֶת־תַּמְרוּקֶ֤יהָ וְאֶת־מָנוֹתֶ֙הָ֙ לָתֵ֣ת לָ֔הּ וְאֵת֙ שֶׁ֣בַע הַנְּעָר֔וֹת הָרְאֻי֥וֹת לָֽתֶת־לָ֖הּ מִבֵּ֣ית הַמֶּ֑לֶךְ וַיְשַׁנֶּ֧הָ וְאֶת־נַעֲרוֹתֶ֛יהָ לְט֖וֹב בֵּ֥ית הַנָּשִֽׁים׃

10 ‏לֹא־הִגִּ֣ידָה אֶסְתֵּ֔ר אֶת־עַמָּ֖הּ וְאֶת־מֽוֹלַדְתָּ֑הּ כִּ֧י מָרְדֳּכַ֛י צִוָּ֥ה עָלֶ֖יהָ אֲשֶׁ֥ר לֹא־תַגִּֽיד׃

11 ‏וּבְכָל־י֣וֹם וָי֔וֹם מָרְדֳּכַי֙ מִתְהַלֵּ֔ךְ לִפְנֵ֖י חֲצַ֣ר בֵּית־הַנָּשִׁ֑ים לָדַ֙עַת֙ אֶת־שְׁל֣וֹם אֶסְתֵּ֔ר וּמַה־יֵּעָשֶׂ֖ה בָּֽהּ׃

12 ‏וּבְהַגִּ֡יעַ תֹּר֩ נַעֲרָ֨ה וְנַעֲרָ֜ה לָב֣וֹא׀ אֶל־הַמֶּ֣לֶךְ אֲחַשְׁוֵר֗וֹשׁ מִקֵּץ֩ הֱי֨וֹת לָ֜הּ כְּדָ֤ת הַנָּשִׁים֙ שְׁנֵ֣ים עָשָׂ֣ר חֹ֔דֶשׁ כִּ֛י כֵּ֥ן יִמְלְא֖וּ יְמֵ֣י מְרוּקֵיהֶ֑ן שִׁשָּׁ֤ה חֳדָשִׁים֙ בְּשֶׁ֣מֶן הַמֹּ֔ר וְשִׁשָּׁ֤ה חֳדָשִׁים֙ בַּבְּשָׂמִ֔ים וּבְתַמְרוּקֵ֖י הַנָּשִֽׁים׃

13 ‏וּבָזֶ֕ה הַֽנַּעֲרָ֖ה בָּאָ֣ה אֶל־הַמֶּ֑לֶךְ אֵת֩ כָּל־אֲשֶׁ֨ר תֹּאמַ֜ר יִנָּ֤תֵֽן לָהּ֙ לָב֣וֹא עִמָּ֔הּ מִבֵּ֥ית הַנָּשִׁ֖ים עַד־בֵּ֥ית הַמֶּֽלֶךְ׃

14 ‏בָּעֶ֣רֶב׀ הִ֣יא בָאָ֗ה וּ֠בַבֹּקֶר הִ֣יא שָׁבָ֞ה אֶל־בֵּ֤ית הַנָּשִׁים֙ שֵׁנִ֔י אֶל־יַ֧ד שַֽׁעֲשְׁגַ֛ז סְרִ֥יס הַמֶּ֖לֶךְ שֹׁמֵ֣ר הַפִּֽילַגְשִׁ֑ים לֹא־תָב֥וֹא עוֹד֙ אֶל־הַמֶּ֔לֶךְ כִּ֣י אִם־חָפֵ֥ץ בָּ֛הּ הַמֶּ֖לֶךְ וְנִקְרְאָ֥ה בְשֵֽׁם׃

15 ‏וּבְהַגִּ֣יעַ תֹּר־אֶסְתֵּ֣ר בַּת־אֲבִיחַ֣יִל דֹּ֣ד מָרְדֳּכַ֡י אֲשֶׁר֩ לָקַֽח־ל֨וֹ לְבַ֜ת לָב֣וֹא אֶל־הַמֶּ֗לֶךְ לֹ֤א בִקְשָׁה֙ דָּבָ֔ר כִּ֠י אִ֣ם אֶת־אֲשֶׁ֥ר יֹאמַ֛ר הֵגַ֥י סְרִיס־הַמֶּ֖לֶךְ שֹׁמֵ֣ר הַנָּשִׁ֑ים וַתְּהִ֤י אֶסְתֵּר֙ נֹשֵׂ֣את חֵ֔ן בְּעֵינֵ֖י כָּל־רֹאֶֽיהָ׃

16 ‏וַתִּלָּקַ֨ח אֶסְתֵּ֜ר אֶל־הַמֶּ֤לֶךְ אֲחַשְׁוֵרוֹשׁ֙ אֶל־בֵּ֣ית מַלְכוּת֔וֹ בַּחֹ֥דֶשׁ הָעֲשִׂירִ֖י הוּא־חֹ֣דֶשׁ טֵבֵ֑ת בִּשְׁנַת־שֶׁ֖בַע לְמַלְכוּתֽוֹ׃

17 ‏וַיֶּאֱהַ֨ב הַמֶּ֤לֶךְ אֶת־אֶסְתֵּר֙ מִכָּל־הַנָּשִׁ֔ים וַתִּשָּׂא־חֵ֥ן וָחֶ֛סֶד לְפָנָ֖יו מִכָּל־הַבְּתוּלֹ֑ת וַיָּ֤שֶׂם כֶּֽתֶר־מַלְכוּת֙ בְּרֹאשָׁ֔הּ וַיַּמְלִיכֶ֖הָ תַּ֥חַת וַשְׁתִּֽי׃

18 ‏וַיַּ֨עַשׂ הַמֶּ֜לֶךְ מִשְׁתֶּ֣ה גָד֗וֹל לְכָל־שָׂרָיו֙ וַעֲבָדָ֔יו אֵ֖ת מִשְׁתֵּ֣ה אֶסְתֵּ֑ר וַהֲנָחָ֤ה לַמְּדִינוֹת֙ עָשָׂ֔ה וַיִּתֵּ֥ן מַשְׂאֵ֖ת כְּיַ֥ד הַמֶּֽלֶךְ׃

19 ‏וּבְהִקָּבֵ֥ץ בְּתוּל֖וֹת שֵׁנִ֑ית וּמָרְדֳּכַ֖י יֹשֵׁ֥ב בְּשַֽׁעַר־הַמֶּֽלֶךְ׃

20 ‏אֵ֣ין אֶסְתֵּ֗ר מַגֶּ֤דֶת מֽוֹלַדְתָּהּ֙ וְאֶת־עַמָּ֔הּ כַּאֲשֶׁ֛ר צִוָּ֥ה עָלֶ֖יהָ מָרְדֳּכָ֑י וְאֶת־מַאֲמַ֤ר מָרְדֳּכַי֙ אֶסְתֵּ֣ר עֹשָׂ֔ה כַּאֲשֶׁ֛ר הָיְתָ֥ה בְאָמְנָ֖ה אִתּֽוֹ׃ ס

21 ‏בַּיָּמִ֣ים הָהֵ֔ם וּמָרְדֳּכַ֖י יֹשֵׁ֣ב בְּשַֽׁעַר־הַמֶּ֑לֶךְ קָצַף֩ בִּגְתָ֨ן וָתֶ֜רֶשׁ שְׁנֵֽי־סָרִיסֵ֤י הַמֶּ֙לֶךְ֙ מִשֹּׁמְרֵ֣י הַסַּ֔ף וַיְבַקְשׁוּ֙ לִשְׁלֹ֣חַ יָ֔ד בַּמֶּ֖לֶךְ אֲחַשְׁוֵֽרֹשׁ׃

22 ‏וַיִּוָּדַ֤ע הַדָּבָר֙ לְמָרְדֳּכַ֔י וַיַּגֵּ֖ד לְאֶסְתֵּ֣ר הַמַּלְכָּ֑ה וַתֹּ֧אמֶר אֶסְתֵּ֛ר לַמֶּ֖לֶךְ בְּשֵׁ֥ם מָרְדֳּכָֽי׃

23 ‏וַיְבֻקַּ֤שׁ הַדָּבָר֙ וַיִּמָּצֵ֔א וַיִּתָּל֥וּ שְׁנֵיהֶ֖ם עַל־עֵ֑ץ וַיִּכָּתֵ֗ב בְּסֵ֛פֶר דִּבְרֵ֥י הַיָּמִ֖ים לִפְנֵ֥י הַמֶּֽלֶךְ׃ פ

1 ’aḥar hadəḇārîm hā’ēlleh kəšōḵə ḥămaṯ hammeleḵə ’ăḥašəwērwōš zāḵar ’eṯ-wašətî wə’ēṯ ’ăšer-‘āśāṯâ wə’ēṯ ’ăšer-niḡəzar ‘āleyhā:

2 wayyō’mərû na‘ărê-hammeleḵə məšārəṯāyw yəḇaqəšû lammeleḵə nə‘ārwōṯ bəṯûlwōṯ ṭwōḇwōṯ marə’eh:

3 wəyafəqēḏ hammeleḵə pəqîḏîm bəḵāl-məḏînwōṯ maləḵûṯwō wəyiqəbəṣû ’eṯ-kāl-na‘ărâ-ḇəṯûlâ ṭwōḇaṯ marə’eh ’el-šûšan habîrâ ’el-bêṯ hannāšîm ’el-yaḏ hēḡe’ sərîs hammeleḵə šōmēr hannāšîm wənāṯwōn tamərûqêhen:

4 wəhanna‘ărâ ’ăšer tîṭaḇ bə‘ênê hammeleḵə timəlōḵə taḥaṯ wašətî wayyîṭaḇ hadāḇār bə‘ênê hammeleḵə wayya‘aś kēn: s

5 ’îš yəhûḏî hāyâ bəšûšan habîrâ ûšəmwō mārədŏḵay ben yā’îr ben-šimə‘î ben-qîš ’îš yəmînî:

6 ’ăšer hāḡəlâ mîrûšālayim ‘im-hagōlâ ’ăšer hāḡələṯâ ‘im yəḵānəyâ meleḵə-yəhûḏâ ’ăšer heḡəlâ nəḇûḵaḏəne’ṣṣar meleḵə bāḇel:

7 wayəhî ’ōmēn ’eṯ-hăḏassâ hî’ ’esətēr baṯ-dōḏwō kî ’ên lāh ’āḇ wā’ēm wəhanna‘ărâ yəfaṯ-tō’ar wəṭwōḇaṯ marə’eh ûḇəmwōṯ ’āḇîhā wə’immāh ləqāḥāh mārədŏḵay lwō ləḇaṯ:

8 wayəhî bəhiššāma‘ dəḇar-hammeleḵə wəḏāṯwō ûḇəhiqqāḇēṣ nə‘ārwōṯ rabwōṯ ’el-šûšan habîrâ ’el-yaḏ hēḡāy watillāqaḥ ’esətēr ’el-bêṯ hammeleḵə ’el-yaḏ hēḡay šōmēr hannāšîm:

9 watîṭaḇ hanna‘ărâ ḇə‘ênāyw watiśśā’ ḥeseḏ ləfānāyw wayəḇahēl ’eṯ-tamərûqeyhā wə’eṯ-mānwōṯehā lāṯēṯ lāh wə’ēṯ šeḇa‘ hannə‘ārwōṯ hārə’uywōṯ lāṯeṯ-lāh mibêṯ hammeleḵə wayəšannehā wə’eṯ-na‘ărwōṯeyhā ləṭwōḇ bêṯ hannāšîm:

10 lō’-higîḏâ ’esətēr ’eṯ-‘ammāh wə’eṯ-mwōlaḏətāh kî mārədŏḵay ṣiûâ ‘āleyhā ’ăšer lō’-ṯagîḏ:

11 ûḇəḵāl-ywōm wāywōm mārədŏḵay miṯəhallēḵə lifənê ḥăṣar bêṯ-hannāšîm lāḏa‘aṯ ’eṯ-šəlwōm ’esətēr ûmah-yyē‘āśeh bāh:

12 ûḇəhagî‘a tōr na‘ărâ wəna‘ărâ lāḇwō’| ’el-hammeleḵə ’ăḥašəwērwōš miqqēṣ hĕywōṯ lāh kəḏāṯ hannāšîm šənêm ‘āśār ḥōḏeš kî kēn yimələ’û yəmê mərûqêhen šiššâ ḥŏḏāšîm bəšemen hammōr wəšiššâ ḥŏḏāšîm babəśāmîm ûḇəṯamərûqê hannāšîm:

13 ûḇāzeh hanna‘ărâ bā’â ’el-hammeleḵə ’ēṯ kāl-’ăšer tō’mar yinnāṯēn lāh lāḇwō’ ‘immāh mibêṯ hannāšîm ‘aḏ-bêṯ hammeleḵə:

14 bā‘ereḇ| hî’ ḇā’â ûḇabōqer hî’ šāḇâ ’el-bêṯ hannāšîm šēnî ’el-yaḏ ša‘ăšəḡaz sərîs hammeleḵə šōmēr hapîlaḡəšîm lō’-ṯāḇwō’ ‘wōḏ ’el-hammeleḵə kî ’im-ḥāfēṣ bāh hammeleḵə wəniqərə’â ḇəšēm:

15 ûḇəhagî‘a tōr-’esətēr baṯ-’ăḇîḥayil dōḏ mārədŏḵay ’ăšer lāqaḥ-lwō ləḇaṯ lāḇwō’ ’el-hammeleḵə lō’ ḇiqəšâ dāḇār kî ’im ’eṯ-’ăšer yō’mar hēḡay sərîs-hammeleḵə šōmēr hannāšîm watəhî ’esətēr nōśē’ṯ ḥēn bə‘ênê kāl-rō’eyhā:

16 watillāqaḥ ’esətēr ’el-hammeleḵə ’ăḥašəwērwōš ’el-bêṯ maləḵûṯwō baḥōḏeš hā‘ăśîrî hû’-ḥōḏeš ṭēḇēṯ bišənaṯ-šeḇa‘ ləmaləḵûṯwō:

17 wayye’ĕhaḇ hammeleḵə ’eṯ-’esətēr mikāl-hannāšîm watiśśā’-ḥēn wāḥeseḏ ləfānāyw mikāl-habəṯûlōṯ wayyāśem keṯer-maləḵûṯ bərō’šāh wayyaməlîḵehā taḥaṯ wašətî:

18 wayya‘aś hammeleḵə mišəteh ḡāḏwōl ləḵāl-śārāyw wa‘ăḇāḏāyw ’ēṯ mišətēh ’esətēr wahănāḥâ lamməḏînwōṯ ‘āśâ wayyitēn maśə’ēṯ kəyaḏ hammeleḵə:

19 ûḇəhiqqāḇēṣ bəṯûlwōṯ šēnîṯ ûmārədŏḵay yōšēḇ bəša‘ar-hammeleḵə:

20 ’ên ’esətēr mageḏeṯ mwōlaḏətāh wə’eṯ-‘ammāh ka’ăšer ṣiûâ ‘āleyhā mārədŏḵāy wə’eṯ-ma’ămar mārədŏḵay ’esətēr ‘ōśâ ka’ăšer hāyəṯâ ḇə’āmənâ ’itwō: s

21 bayyāmîm hâēm ûmārədŏḵay yōšēḇ bəša‘ar-hammeleḵə qāṣaf biḡəṯān wāṯereš šənê-sārîsê hammeleḵə miššōmərê hassaf wayəḇaqəšû lišəlōḥa yāḏ bammeleḵə ’ăḥašəwērōš:

22 wayyiûāḏa‘ hadāḇār ləmārədŏḵay wayyagēḏ lə’esətēr hammaləkâ watō’mer ’esətēr lammeleḵə bəšēm mārədŏḵāy:

23 wayəḇuqqaš hadāḇār wayyimmāṣē’ wayyitālû šənêhem ‘al-‘ēṣ wayyikāṯēḇ bəsēfer diḇərê hayyāmîm lifənê hammeleḵə: f


Next: Esther (Esther) Chapter 3