‎1 ‏וַיִּקְחוּ֙ עַם־הָאָ֔רֶץ אֶת־יְהוֹאָחָ֖ז בֶּן־יֹאשִׁיָּ֑הוּ וַיַּמְלִיכֻ֥הוּ תַֽחַת־אָבִ֖יו בִּירוּשָׁלִָֽם׃

‎2 ‏בֶּן־שָׁל֧וֹשׁ וְעֶשְׂרִ֛ים שָׁנָ֖ה יוֹאָחָ֣ז בְּמָלְכ֑וֹ וּשְׁלֹשָׁ֣ה חֳדָשִׁ֔ים מָלַ֖ךְ בִּירוּשָׁלִָֽם׃

‎3 ‏וַיְסִירֵ֥הוּ מֶֽלֶךְ־מִצְרַ֖יִם בִּֽירוּשָׁלִָ֑ם וַֽיַּעֲנֹשׁ֙ אֶת־הָאָ֔רֶץ מֵאָ֥ה כִכַּר־כֶּ֖סֶף וְכִכַּ֥ר זָהָֽב׃

‎4 ‏וַיַּמְלֵ֨ךְ מֶֽלֶךְ־מִצְרַ֜יִם אֶת־אֶלְיָקִ֣ים אָחִ֗יו עַל־יְהוּדָה֙ וִיר֣וּשָׁלִַ֔ם וַיַּסֵּ֥ב אֶת־שְׁמ֖וֹ יְהוֹיָקִ֑ים וְאֶת־יוֹאָחָ֤ז אָחִיו֙ לָקַ֣ח נְכ֔וֹ וַיְבִיאֵ֖הוּ מִצְרָֽיְמָה׃ פ

‎5 ‏בֶּן־עֶשְׂרִ֨ים וְחָמֵ֤שׁ שָׁנָה֙ יְהוֹיָקִ֣ים בְּמָלְכ֔וֹ וְאַחַ֤ת עֶשְׂרֵה֙ שָׁנָ֔ה מָלַ֖ךְ בִּירוּשָׁלִָ֑ם וַיַּ֣עַשׂ הָרַ֔ע בְּעֵינֵ֖י יְהוָ֥ה אֱלֹהָֽיו׃

‎6 ‏עָלָ֣יו עָלָ֔ה נְבוּכַדְנֶאצַּ֖ר מֶ֣לֶךְ בָּבֶ֑ל וַיַּֽאַסְרֵ֙הוּ֙ בַּֽנְחֻשְׁתַּ֔יִם לְהֹלִיכ֖וֹ בָּבֶֽלָה׃

‎7 ‏וּמִכְּלֵי֙ בֵּ֣ית יְהוָ֔ה הֵבִ֥יא נְבוּכַדְנֶאצַּ֖ר לְבָבֶ֑ל וַיִּתְּנֵ֥ם בְּהֵיכָל֖וֹ בְּבָבֶֽל׃

‎8 ‏וְיֶתֶר֩ דִּבְרֵ֨י יְהֽוֹיָקִ֜ים וְתֹֽעֲבֹתָ֤יו אֲשֶׁר־עָשָׂה֙ וְהַנִּמְצָ֣א עָלָ֔יו הִנָּ֣ם כְּתוּבִ֗ים עַל־סֵ֛פֶר מַלְכֵ֥י יִשְׂרָאֵ֖ל וִֽיהוּדָ֑ה וַיִּמְלֹ֛ךְ יְהוֹיָכִ֥ין בְּנ֖וֹ תַּחְתָּֽיו׃ פ

‎9 ‏בֶּן־שְׁמוֹנֶ֤ה שָׁנִים֙ יְהוֹיָכִ֣ין בְּמָלְכ֔וֹ וּשְׁלֹשָׁ֤ה חֳדָשִׁים֙ וַעֲשֶׂ֣רֶת יָמִ֔ים מָלַ֖ךְ בִּירוּשָׁלִָ֑ם וַיַּ֥עַשׂ הָרַ֖ע בְּעֵינֵ֥י יְהוָֽה׃

‎10 ‏וְלִתְשׁוּבַ֣ת הַשָּׁנָ֗ה שָׁלַח֙ הַמֶּ֣לֶךְ נְבֽוּכַדְנֶאצַּ֔ר וַיְבִאֵ֣הוּ בָבֶ֔לָה עִם־כְּלֵ֖י חֶמְדַּ֣ת בֵּית־יְהוָ֑ה וַיַּמְלֵךְ֙ אֶת־צִדְקִיָּ֣הוּ אָחִ֔יו עַל־יְהוּדָ֖ה וִֽירוּשָׁלִָֽם׃ פ

‎11 ‏בֶּן־עֶשְׂרִ֧ים וְאַחַ֛ת שָׁנָ֖ה צִדְקִיָּ֣הוּ בְמָלְכ֑וֹ וְאַחַ֤ת עֶשְׂרֵה֙ שָׁנָ֔ה מָלַ֖ךְ בִּירוּשָׁלִָֽם׃

‎12 ‏וַיַּ֣עַשׂ הָרַ֔ע בְּעֵינֵ֖י יְהוָ֣ה אֱלֹהָ֑יו לֹ֣א נִכְנַ֗ע מִלִּפְנֵ֛י יִרְמְיָ֥הוּ הַנָּבִ֖יא מִפִּ֥י יְהוָֽה׃

‎13 ‏וְ֠גַם בַּמֶּ֤לֶךְ נְבֽוּכַדְנֶאצַּר֙ מָרָ֔ד אֲשֶׁ֥ר הִשְׁבִּיע֖וֹ בֵּֽאלֹהִ֑ים וַיֶּ֤קֶשׁ אֶת־עָרְפּוֹ֙ וַיְאַמֵּ֣ץ אֶת־לְבָב֔וֹ מִשּׁ֕וּב אֶל־יְהוָ֖ה אֱלֹהֵ֥י יִשְׂרָאֵֽל׃

‎14 ‏גַּ֠ם כָּל־שָׂרֵ֨י הַכֹּהֲנִ֤ים וְהָעָם֙ הִרְבּ֣וּ למעול־ לִמְעָל־ מַ֔עַל⁹ כְּכֹ֖ל תֹּעֲב֣וֹת הַגּוֹיִ֑ם וַֽיְטַמְּאוּ֙ אֶת־בֵּ֣ית יְהוָ֔ה אֲשֶׁ֥ר הִקְדִּ֖ישׁ בִּירוּשָׁלִָֽם׃

‎15 ‏וַיִּשְׁלַ֡ח יְהוָה֩ אֱלֹהֵ֨י אֲבוֹתֵיהֶ֧ם עֲלֵיהֶ֛ם בְּיַ֥ד מַלְאָכָ֖יו הַשְׁכֵּ֣ם וְשָׁל֑וֹחַ כִּֽי־חָמַ֥ל עַל־עַמּ֖וֹ וְעַל־מְעוֹנֽוֹ׃

‎16 ‏וַיִּֽהְי֤וּ מַלְעִבִים֙ בְּמַלְאֲכֵ֣י הָאֱלֹהִ֔ים וּבוֹזִ֣ים דְּבָרָ֔יו וּמִֽתַּעְתְּעִ֖ים בִּנְבִאָ֑יו עַ֠ד עֲל֧וֹת חֲמַת־יְהוָ֛ה בְּעַמּ֖וֹ עַד־לְאֵ֥ין מַרְפֵּֽא׃

‎17 ‏וַיַּ֨עַל עֲלֵיהֶ֜ם אֶת־מֶ֣לֶךְ כשדיים כַּשְׂדִּ֗ים וַיַּהֲרֹ֨ג בַּחוּרֵיהֶ֤ם בַּחֶ֙רֶב֙ בְּבֵ֣ית מִקְדָּשָׁ֔ם וְלֹ֥א חָמַ֛ל עַל־בָּח֥וּר וּבְתוּלָ֖ה זָקֵ֣ן וְיָשֵׁ֑שׁ הַכֹּ֖ל נָתַ֥ן בְּיָדֽוֹ׃

‎18 ‏וְ֠כֹל כְּלֵ֞י בֵּ֤ית הָאֱלֹהִים֙ הַגְּדֹלִ֣ים וְהַקְּטַנִּ֔ים וְאֹֽצְרוֹת֙ בֵּ֣ית יְהוָ֔ה וְאֹצְר֥וֹת הַמֶּ֖לֶךְ וְשָׂרָ֑יו הַכֹּ֖ל הֵבִ֥יא בָבֶֽל׃

‎19 ‏וַֽיִּשְׂרְפוּ֙ אֶת־בֵּ֣ית הָאֱלֹהִ֔ים וַֽיְנַתְּצ֔וּ אֵ֖ת חוֹמַ֣ת יְרוּשָׁלִָ֑ם וְכָל־אַרְמְנוֹתֶ֙יהָ֙ שָׂרְפ֣וּ בָאֵ֔שׁ וְכָל־כְּלֵ֥י מַחֲמַדֶּ֖יהָ לְהַשְׁחִֽית׃ ס

‎20 ‏וַיֶּ֛גֶל הַשְּׁאֵרִ֥ית מִן־הַחֶ֖רֶב אֶל־בָּבֶ֑ל וַֽיִּהְיוּ־ל֤וֹ וּלְבָנָיו֙ לַעֲבָדִ֔ים עַד־מְלֹ֖ךְ מַלְכ֥וּת פָּרָֽס׃

‎21 ‏לְמַלֹּ֤אות דְּבַר־יְהוָה֙ בְּפִ֣י יִרְמְיָ֔הוּ עַד־רָצְתָ֥ה הָאָ֖רֶץ אֶת־שַׁבְּתוֹתֶ֑יהָ כָּל־יְמֵ֤י הָשַּׁמָּה֙ שָׁבָ֔תָה לְמַלֹּ֖אות שִׁבְעִ֥ים שָׁנָֽה׃ פ

‎22 ‏וּבִשְׁנַ֣ת אַחַ֗ת לְכ֙וֹרֶשׁ֙ מֶ֣לֶךְ פָּרַ֔ס לִכְל֥וֹת דְּבַר־יְהוָ֖ה בְּפִ֣י יִרְמְיָ֑הוּ הֵעִ֣יר יְהוָ֗ה אֶת־ר֙וּחַ֙ כּ֣וֹרֶשׁ מֶֽלֶךְ־פָּרַ֔ס וַיַּֽעֲבֶר־קוֹל֙ בְּכָל־מַלְכוּת֔וֹ וְגַם־בְּמִכְתָּ֖ב לֵאמֹֽר׃ ס

‎23 ‏כֹּה־אָמַ֞ר כּ֣וֹרֶשׁ׀ מֶ֣לֶךְ פָּרַ֗ס כָּל־מַמְלְכ֤וֹת הָאָ֙רֶץ֙ נָ֣תַן לִ֗י יְהוָה֙ אֱלֹהֵ֣י הַשָּׁמַ֔יִם וְהֽוּא־פָקַ֤ד עָלַי֙ לִבְנֽוֹת־ל֣וֹ בַ֔יִת בִּירוּשָׁלִַ֖ם אֲשֶׁ֣ר בִּֽיהוּדָ֑ה מִֽי־בָכֶ֣ם מִכָּל־עַמּ֗וֹ יְהוָ֧ה אֱלֹהָ֛יו עִמּ֖וֹ וְיָֽעַל׃

1 wayyiqəḥû ‘am-hā’āreṣ ’eṯ-yəhwō’āḥāz ben-yō’šîyâû wayyaməlîḵuhû ṯ^aḥaṯ-’āḇîw bîrûšālāim:

2 ben-šālwōš wə‘eśərîm šānâ ywō’āḥāz bəmāləḵwō ûšəlōšâ ḥŏḏāšîm mālaḵə bîrûšālāim:

3 wayəsîrēhû meleḵə-miṣərayim bîrûšālāim wayy^a‘ănōš ’eṯ-hā’āreṣ mē’â ḵikar-kesef wəḵikar zâāḇ:

4 wayyaməlēḵə meleḵə-miṣərayim ’eṯ-’eləyāqîm ’āḥîw ‘al-yəhûḏâ wîrûšālaim wayyassēḇ ’eṯ-šəmwō yəhwōyāqîm wə’eṯ-ywō’āḥāz ’āḥîw lāq^aḥ nəḵwō wayəḇî’ēhû miṣərāyəmâ: f

5 ben-‘eśərîm wəḥāmēš šānâ yəhwōyāqîm bəmāləḵwō wə’^aḥaṯ ‘eśərēh šānâ mālaḵə bîrûšālāim wayy^a‘aś hār^a‘ bə‘ênê yəhwâ ’ĕlōhāyw:

6 ‘ālāyw ‘ālâ nəḇûḵaḏəne’ṣṣar meleḵə bāḇel wayya’asərēhû banəḥušətayim ləhōlîḵwō bāḇelâ:

7 ûmikəlê bêṯ yəhwâ hēḇî’ nəḇûḵaḏəne’ṣṣar ləḇāḇel wayyitənēm bəhêḵālwō bəḇāḇel:

8 wəyeṯer diḇərê yəhwōyāqîm wəṯō‘ăḇōṯāyw ’ăšer-‘āśâ wəhanniməṣā’ ‘ālāyw hinnām kəṯûḇîm ‘al-sēfer maləḵê yiśərā’ēl wîhûḏâ wayyiməlōḵə yəhwōyāḵîn bənwō t^aḥətāyw: f

9 ben-šəmwōneh šānîm yəhwōyāḵîn bəmāləḵwō ûšəlōšâ ḥŏḏāšîm w^a‘ăśereṯ yāmîm mālaḵə bîrûšālāim wayy^a‘aś hār^a‘ bə‘ênê yəhwâ:

10 wəliṯəšûḇaṯ haššānâ šāl^aḥ hammeleḵə nəḇûḵaḏəne’ṣṣar wayəḇi’ēhû ḇāḇelâ ‘im-kəlê ḥemədaṯ bêṯ-yəhwâ wayyaməlēḵə ’eṯ-ṣiḏəqîyâû ’āḥîw ‘al-yəhûḏâ wîrûšālāim: f

11 ben-‘eśərîm wə’^aḥaṯ šānâ ṣiḏəqîyâû ḇəmāləḵwō wə’^aḥaṯ ‘eśərēh šānâ mālaḵə bîrûšālāim:

12 wayy^a‘aś hār^a‘ bə‘ênê yəhwâ ’ĕlōhāyw lō’ niḵən^a‘ millifənê yirəməyâû hannāḇî’ mipî yəhwâ:

13 wəḡam bammeleḵə nəḇûḵaḏəne’ṣṣar mārāḏ ’ăšer hišəbî‘wō bē’lōhîm wayyeqeš ’eṯ-‘ārəpwō wayə’ammēṣ ’eṯ-ləḇāḇwō miššûḇ ’el-yəhwâ ’ĕlōhê yiśərā’ēl:

14 gam kāl-śārê hakōhănîm wəhā‘ām hirəbû limə‘wōl- limə‘āl- m^a‘al⁹ kəḵōl tō‘ăḇwōṯ hagwōyim wayəṭammə’û ’eṯ-bêṯ yəhwâ ’ăšer hiqədîš bîrûšālāim:

15 wayyišəl^aḥ yəhwâ ’ĕlōhê ’ăḇwōṯêhem ‘ălêhem bəyaḏ malə’āḵāyw hašəkēm wəšālwōḥa kî-ḥāmal ‘al-‘ammwō wə‘al-mə‘wōnwō:

16 wayyihəyû malə‘iḇîm bəmalə’ăḵê hā’ĕlōhîm ûḇwōzîm dəḇārāyw ûmit^a‘ətə‘îm binəḇi’āyw ‘aḏ ‘ălwōṯ ḥămaṯ-yəhwâ bə‘ammwō ‘aḏ-lə’ên marəpē’:

17 wayy^a‘al ‘ălêhem ’eṯ-meleḵə kaśədîyîm kaśədîm wayyahărōḡ b^aḥûrêhem b^aḥereḇ bəḇêṯ miqədāšām wəlō’ ḥāmal ‘al-bāḥûr ûḇəṯûlâ zāqēn wəyāšēš hakōl nāṯan bəyāḏwō:

18 wəḵōl kəlê bêṯ hā’ĕlōhîm hagəḏōlîm wəhaqqəṭannîm wə’ōṣərwōṯ bêṯ yəhwâ wə’ōṣərwōṯ hammeleḵə wəśārāyw hakōl hēḇî’ ḇāḇel:

19 wayyiśərəfû ’eṯ-bêṯ hā’ĕlōhîm wayənatəṣû ’ēṯ ḥwōmaṯ yərûšālāim wəḵāl-’arəmənwōṯeyhā śārəfû ḇā’ēš wəḵāl-kəlê m^aḥămadeyhā ləhašəḥîṯ: s

20 wayyeḡel haššə’ērîṯ min-h^aḥereḇ ’el-bāḇel wayyihəyû-lwō ûləḇānāyw l^a‘ăḇāḏîm ‘aḏ-məlōḵə maləḵûṯ pārās:

21 ləmallō’wṯ dəḇar-yəhwâ bəfî yirəməyâû ‘aḏ-rāṣəṯâ hā’āreṣ ’eṯ-šabəṯwōṯeyhā kāl-yəmê hāššammâ šāḇāṯâ ləmallō’wṯ šiḇə‘îm šānâ: f

22 ûḇišənaṯ ’^aḥaṯ ləḵwōreš meleḵə pāras liḵəlwōṯ dəḇar-yəhwâ bəfî yirəməyâû hē‘îr yəhwâ ’eṯ-rûḥa kwōreš meleḵə-pāras wayy^a‘ăḇer-qwōl bəḵāl-maləḵûṯwō wəḡam-bəmiḵətāḇ lē’mōr: s

23 kōh-’āmar kwōreš| meleḵə pāras kāl-mamələḵwōṯ hā’āreṣ nāṯan lî yəhwâ ’ĕlōhê haššāmayim wəhû’-fāqaḏ ‘ālay liḇənwōṯ-lwō ḇayiṯ bîrûšālaim ’ăšer bîhûḏâ mî-ḇāḵem mikāl-‘ammwō yəhwâ ’ĕlōhāyw ‘immwō wəyā‘al: