‎1 ‏יְחִזְקִיָּ֣הוּ מָלַ֗ךְ בֶּן־עֶשְׂרִ֤ים וְחָמֵשׁ֙ שָׁנָ֔ה וְעֶשְׂרִ֤ים וָתֵ֙שַׁע֙ שָׁנָ֔ה מָלַ֖ךְ בִּירוּשָׁלִָ֑ם וְשֵׁ֣ם אִמּ֔וֹ אֲבִיָּ֖ה בַּת־זְכַרְיָֽהוּ׃

‎2 ‏וַיַּ֥עַשׂ הַיָּשָׁ֖ר בְּעֵינֵ֣י יְהוָ֑ה כְּכֹ֥ל אֲשֶׁר־עָשָׂ֖ה דָּוִ֥יד אָבִֽיו׃

‎3 ‏ה֣וּא בַשָּׁנָה֩ הָרִאשׁוֹנָ֨ה לְמָלְכ֜וֹ בַּחֹ֣דֶשׁ הָרִאשׁ֗וֹן פָּתַ֛ח אֶת־דַּלְת֥וֹת בֵּית־יְהוָ֖ה וַֽיְחַזְּקֵֽם׃

‎4 ‏וַיָּבֵ֥א אֶת־הַכֹּהֲנִ֖ים וְאֶת־הַלְוִיִּ֑ם וַיַּֽאַסְפֵ֖ם לִרְח֥וֹב הַמִּזְרָֽח׃

‎5 ‏וַיֹּ֥אמֶר לָהֶ֖ם שְׁמָע֣וּנִי הַלְוִיִּ֑ם עַתָּ֣ה הִֽתְקַדְּשׁ֗וּ וְקַדְּשׁוּ֙ אֶת־בֵּ֤ית יְהוָה֙ אֱלֹהֵ֣י אֲבֹתֵיכֶ֔ם וְהוֹצִ֥יאוּ אֶת־הַנִּדָּ֖ה מִן־הַקֹּֽדֶשׁ׃

‎6 ‏כִּֽי־מָעֲל֣וּ אֲבֹתֵ֗ינוּ וְעָשׂ֥וּ הָרַ֛ע בְּעֵינֵ֥י יְהוָֽה־אֱלֹהֵ֖ינוּ וַיַּֽעַזְבֻ֑הוּ וַיַּסֵּ֧בּוּ פְנֵיהֶ֛ם מִמִּשְׁכַּ֥ן יְהוָ֖ה וַיִּתְּנוּ־עֹֽרֶף׃

‎7 ‏גַּ֣ם סָֽגְר֞וּ דַּלְת֣וֹת הָאוּלָ֗ם וַיְכַבּוּ֙ אֶת־הַנֵּר֔וֹת וּקְטֹ֖רֶת לֹ֣א הִקְטִ֑ירוּ וְעֹלָה֙ לֹא־הֶעֱל֣וּ בַקֹּ֔דֶשׁ לֵאלֹהֵ֖י יִשְׂרָאֵֽל׃

‎8 ‏וַיְהִי֙ קֶ֣צֶף יְהוָ֔ה עַל־יְהוּדָ֖ה וִירוּשָׁלִָ֑ם וַיִּתְּנֵ֤ם לזועה לְזַֽעֲוָה֙ לְשַׁמָּ֣ה וְלִשְׁרֵקָ֔ה כַּאֲשֶׁ֛ר אַתֶּ֥ם רֹאִ֖ים בְּעֵינֵיכֶֽם׃

‎9 ‏וְהִנֵּ֛ה נָפְל֥וּ אֲבוֹתֵ֖ינוּ בֶּחָ֑רֶב וּבָנֵ֨ינוּ וּבְנוֹתֵ֧ינוּ וְנָשֵׁ֛ינוּ בַּשְּׁבִ֖י עַל־זֹֽאת׃

‎10 ‏עַתָּה֙ עִם־לְבָבִ֔י לִכְר֣וֹת בְּרִ֔ית לַיהוָ֖ה אֱלֹהֵ֣י יִשְׂרָאֵ֑ל וְיָשֹׁ֥ב מִמֶּ֖נּוּ חֲר֥וֹן אַפּֽוֹ׃

‎11 ‏בָּנַ֕י עַתָּ֖ה אַל־תִּשָּׁל֑וּ כִּֽי־בָכֶ֞ם בָּחַ֣ר יְהוָ֗ה לַעֲמֹ֤ד לְפָנָיו֙ לְשָׁ֣רְת֔וֹ וְלִהְי֥וֹת ל֖וֹ מְשָׁרְתִ֥ים וּמַקְטִרִֽים׃ ס

‎12 ‏וַיָּקֻ֣מוּ הַ֠לְוִיִּם מַ֣חַת בֶּן־עֲמָשַׂ֞י וְיוֹאֵ֣ל בֶּן־עֲזַרְיָהוּ֮ מִן־בְּנֵ֣י הַקְּהָתִי֒ וּמִן־בְּנֵ֣י מְרָרִ֔י קִ֚ישׁ בֶּן־עַבְדִּ֔י וַעֲזַרְיָ֖הוּ בֶּן־יְהַלֶּלְאֵ֑ל וּמִן־הַגֵּ֣רְשֻׁנִּ֔י יוֹאָח֙ בֶּן־זִמָּ֔ה וְעֵ֖דֶן בֶּן־יוֹאָֽח׃

‎13 ‏וּמִן־בְּנֵי֙ אֱלִ֣יצָפָ֔ן שִׁמְרִ֖י ויעואל וִיעִיאֵ֑ל וּמִן־בְּנֵ֣י אָסָ֔ף זְכַרְיָ֖הוּ וּמַתַּנְיָֽהוּ׃ ס

‎14 ‏וּמִן־בְּנֵ֥י הֵימָ֖ן יחואל יְחִיאֵ֣ל וְשִׁמְעִ֑י סוּמִן־בְּנֵ֣י יְדוּת֔וּן שְׁמַֽעְיָ֖ה וְעֻזִּיאֵֽל׃

‎15 ‏וַיַּֽאַסְפ֤וּ אֶת־אֲחֵיהֶם֙ וַיִּֽתְקַדְּשׁ֔וּ וַיָּבֹ֥אוּ כְמִצְוַת־הַמֶּ֖לֶךְ בְּדִבְרֵ֣י יְהוָ֑ה לְטַהֵ֖ר בֵּ֥ית יְהוָֽה׃

‎16 ‏וַיָּבֹ֣אוּ הַ֠כֹּהֲנִים לִפְנִ֣ימָה בֵית־יְהוָה֮ לְטַהֵר֒ וַיּוֹצִ֗יאוּ אֵ֤ת כָּל־הַטֻּמְאָה֙ אֲשֶׁ֤ר מָֽצְאוּ֙ בְּהֵיכַ֣ל יְהוָ֔ה לַחֲצַ֖ר בֵּ֣ית יְהוָ֑ה וַֽיְקַבְּלוּ֙ הַלְוִיִּ֔ם לְהוֹצִ֥יא לְנַֽחַל־קִדְר֖וֹן חֽוּצָה׃

‎17 ‏וַ֠יָּחֵלּוּ בְּאֶחָ֞ד לַחֹ֣דֶשׁ הָרִאשׁוֹן֮ לְקַדֵּשׁ֒ וּבְי֧וֹם שְׁמוֹנָ֣ה לַחֹ֗דֶשׁ בָּ֚אוּ לְאוּלָ֣ם יְהוָ֔ה וַיְקַדְּשׁ֥וּ אֶת־בֵּית־יְהוָ֖ה לְיָמִ֣ים שְׁמוֹנָ֑ה וּבְי֨וֹם שִׁשָּׁ֥ה עָשָׂ֛ר לַחֹ֥דֶשׁ הָרִאשׁ֖וֹן כִּלּֽוּ׃ ס

‎18 ‏וַיָּב֤וֹאוּ פְנִ֙ימָה֙ אֶל־חִזְקִיָּ֣הוּ הַמֶּ֔לֶךְ וַיֹּ֣אמְר֔וּ טִהַ֖רְנוּ אֶת־כָּל־בֵּ֣ית יְהוָ֑ה אֶת־מִזְבַּ֤ח הָעוֹלָה֙ וְאֶת־כָּל־כֵּלָ֔יו וְאֶת־שֻׁלְחַ֥ן הַֽמַּעֲרֶ֖כֶת וְאֶת־כָּל־כֵּלָֽיו׃

‎19 ‏וְאֵ֣ת כָּל־הַכֵּלִ֗ים אֲשֶׁ֣ר הִזְנִיחַ֩ הַמֶּ֨לֶךְ אָחָ֧ז בְּמַלְכוּת֛וֹ בְּמַעֲל֖וֹ הֵכַ֣נּוּ וְהִקְדָּ֑שְׁנוּ וְהִנָּ֕ם לִפְנֵ֖י מִזְבַּ֥ח יְהוָֽה׃ ס

‎20 ‏וַיַּשְׁכֵּם֙ יְחִזְקִיָּ֣הוּ הַמֶּ֔לֶךְ וַיֶּאֱסֹ֕ף אֵ֖ת שָׂרֵ֣י הָעִ֑יר וַיַּ֖עַל בֵּ֥ית יְהוָֽה׃

‎21 ‏וַיָּבִ֣יאוּ פָרִים־שִׁבְעָה֩ וְאֵילִ֨ים שִׁבְעָ֜ה וּכְבָשִׂ֣ים שִׁבְעָ֗ה וּצְפִירֵ֨י עִזִּ֤ים שִׁבְעָה֙ לְחַטָּ֔את עַל־הַמַּמְלָכָ֥ה וְעַל־הַמִּקְדָּ֖שׁ וְעַל־יְהוּדָ֑ה וַיֹּ֗אמֶר לִבְנֵ֤י אַהֲרֹן֙ הַכֹּ֣הֲנִ֔ים לְהַעֲל֖וֹת עַל־מִזְבַּ֥ח יְהוָֽה׃

‎22 ‏וַֽיִּשְׁחֲטוּ֙ הַבָּקָ֔ר וַיְקַבְּל֤וּ הַכֹּֽהֲנִים֙ אֶת־הַדָּ֔ם וַֽיִּזְרְק֖וּ הַמִּזְבֵּ֑חָה וַיִּשְׁחֲט֣וּ הָאֵלִ֗ים וַיִּזְרְק֤וּ הַדָּם֙ הַמִּזְבֵּ֔חָה וַֽיִּשְׁחֲטוּ֙ הַכְּבָשִׂ֔ים וַיִּזְרְק֥וּ הַדָּ֖ם הַמִּזְבֵּֽחָה׃

‎23 ‏וַיַּגִּ֙ישׁוּ֙ אֶת־שְׂעִירֵ֣י הַֽחַטָּ֔את לִפְנֵ֥י הַמֶּ֖לֶךְ וְהַקָּהָ֑ל וַיִּסְמְכ֥וּ יְדֵיהֶ֖ם עֲלֵיהֶֽם׃

‎24 ‏וַיִּשְׁחָטוּם֙ הַכֹּ֣הֲנִ֔ים וַֽיְחַטְּא֤וּ אֶת־דָּמָם֙ הַמִּזְבֵּ֔חָה לְכַפֵּ֖ר עַל־כָּל־יִשְׂרָאֵ֑ל כִּ֤י לְכָל־יִשְׂרָאֵל֙ אָמַ֣ר הַמֶּ֔לֶךְ הָעוֹלָ֖ה וְהַחַטָּֽאת׃

‎25 ‏וַיַּֽעֲמֵ֨ד אֶת־הַלְוִיִּ֜ם בֵּ֣ית יְהוָ֗ה בִּמְצִלְתַּ֙יִם֙ בִּנְבָלִ֣ים וּבְכִנֹּר֔וֹת בְּמִצְוַ֥ת דָּוִ֛יד וְגָ֥ד חֹזֵֽה־הַמֶּ֖לֶךְ וְנָתָ֣ן הַנָּבִ֑יא כִּ֧י בְיַד־יְהוָ֛ה הַמִּצְוָ֖ה בְּיַד־נְבִיאָֽיו׃ ס

‎26 ‏וַיַּֽעַמְד֤וּ הַלְוִיִּם֙ בִּכְלֵ֣י דָוִ֔יד וְהַכֹּהֲנִ֖ים בַּחֲצֹצְרֽוֹת׃ ס

‎27 ‏וַיֹּ֙אמֶר֙ חִזְקִיָּ֔הוּ לְהַעֲל֥וֹת הָעֹלָ֖ה לְהַמִּזְבֵּ֑חַ וּבְעֵ֞ת הֵחֵ֣ל הָֽעוֹלָ֗ה הֵחֵ֤ל שִׁיר־יְהוָה֙ וְהַחֲצֹ֣צְר֔וֹת וְעַ֨ל־יְדֵ֔י כְּלֵ֖י דָּוִ֥יד מֶֽלֶךְ־יִשְׂרָאֵֽל׃

‎28 ‏וְכָל־הַקָּהָל֙ מִֽשְׁתַּחֲוִ֔ים וְהַשִּׁ֣יר מְשׁוֹרֵ֔ר וְהַחֲצֹצְר֖וֹת מחצצרים מַחְצְרִ֑ים^y הַכֹּ֕ל עַ֖ד לִכְל֥וֹת הָעֹלָֽה׃

‎29 ‏וּכְכַלּ֖וֹת לְהַעֲל֑וֹת כָּרְע֗וּ הַמֶּ֛לֶךְ וְכָֽל־הַנִּמְצְאִ֥ים אִתּ֖וֹ וַיִּֽשְׁתַּחֲוֽוּ׃

‎30 ‏וַ֠יֹּאמֶר יְחִזְקִיָּ֨הוּ הַמֶּ֤לֶךְ וְהַשָּׂרִים֙ לַלְוִיִּ֔ם לְהַלֵּל֙ לַֽיהוָ֔ה בְּדִבְרֵ֥י דָוִ֖יד וְאָסָ֣ף הַחֹזֶ֑ה וַֽיְהַלְלוּ֙ עַד־לְשִׂמְחָ֔ה וַֽיִּקְּד֖וּ וַיִּֽשְׁתַּחֲוֽוּ׃ פ

‎31 ‏וַיַּ֨עַן יְחִזְקִיָּ֜הוּ וַיֹּ֗אמֶר עַתָּ֨ה מִלֵּאתֶ֤ם יֶדְכֶם֙ לַיהוָ֔ה גֹּ֧שׁוּ וְהָבִ֛יאוּ זְבָחִ֥ים וְתוֹד֖וֹת לְבֵ֣ית יְהוָ֑ה וַיָּבִ֤יאוּ הַקָּהָל֙ זְבָחִ֣ים וְתוֹד֔וֹת וְכָל־נְדִ֥יב לֵ֖ב עֹלֽוֹת׃

‎32 ‏וַיְהִ֞י מִסְפַּ֣ר הָעֹלָה֮ אֲשֶׁ֣ר הֵבִ֣יאוּ הַקָּהָל֒ בָּקָ֣ר שִׁבְעִ֔ים אֵילִ֥ים מֵאָ֖ה כְּבָשִׂ֣ים מָאתָ֑יִם לְעֹלָ֥ה לַיהוָ֖ה כָּל־אֵֽלֶּה׃

‎33 ‏וְֽהַקֳּדָשִׁ֑ים בָּקָר֙ שֵׁ֣שׁ מֵא֔וֹת וְצֹ֖אן שְׁלֹ֥שֶׁת אֲלָפִֽים׃

‎34 ‏רַ֤ק הַכֹּֽהֲנִים֙ הָי֣וּ לִמְעָ֔ט וְלֹ֣א יָֽכְל֔וּ לְהַפְשִׁ֖יט אֶת־כָּל־הָעֹל֑וֹת וַֽיְּחַזְּק֞וּם אֲחֵיהֶ֣ם הַלְוִיִּ֗ם עַד־כְּל֤וֹת הַמְּלָאכָה֙ וְעַ֣ד יִתְקַדְּשׁ֣וּ הַכֹּֽהֲנִ֔ים כִּ֤י הַלְוִיִּם֙ יִשְׁרֵ֣י לֵבָ֔ב לְהִתְקַדֵּ֖שׁ מֵֽהַכֹּהֲנִֽים׃

‎35 ‏וְגַם־עֹלָ֨ה לָרֹ֜ב בְּחֶלְבֵ֧י הַשְּׁלָמִ֛ים וּבַנְּסָכִ֖ים לָעֹלָ֑ה וַתִּכּ֖וֹן עֲבוֹדַ֥ת בֵּית־יְהוָֽה׃

‎36 ‏וַיִּשְׂמַ֤ח יְחִזְקִיָּ֙הוּ֙ וְכָל־הָעָ֔ם עַ֛ל הַהֵכִ֥ין הָאֱלֹהִ֖ים לָעָ֑ם כִּ֥י בְּפִתְאֹ֖ם הָיָ֥ה הַדָּבָֽר׃ פ

1 yəḥizəqîyâû mālaḵə ben-‘eśərîm wəḥāmēš šānâ wə‘eśərîm wāṯēš^a‘ šānâ mālaḵə bîrûšālāim wəšēm ’immwō ’ăḇîyâ baṯ-zəḵarəyâû:

2 wayy^a‘aś hayyāšār bə‘ênê yəhwâ kəḵōl ’ăšer-‘āśâ dāwîḏ ’āḇîw:

3 hû’ ḇaššānâ hāri’šwōnâ ləmāləḵwō b^aḥōḏeš hāri’šwōn pāṯ^aḥ ’eṯ-daləṯwōṯ bêṯ-yəhwâ wayəḥazzəqēm:

4 wayyāḇē’ ’eṯ-hakōhănîm wə’eṯ-haləwîyim wayya’asəfēm lirəḥwōḇ hammizərāḥ:

5 wayyō’mer lâem šəmā‘ûnî haləwîyim ‘atâ hiṯəqadəšû wəqadəšû ’eṯ-bêṯ yəhwâ ’ĕlōhê ’ăḇōṯêḵem wəhwōṣî’û ’eṯ-hannidâ min-haqqōḏeš:

6 kî-mā‘ălû ’ăḇōṯênû wə‘āśû hār^a‘ bə‘ênê yəhwâ-’ĕlōhênû wayy^a‘azəḇuhû wayyassēbû fənêhem mimmišəkan yəhwâ wayyitənû-‘ōref:

7 gam sāḡərû daləṯwōṯ hā’ûlām wayəḵabû ’eṯ-hannērwōṯ ûqəṭōreṯ lō’ hiqəṭîrû wə‘ōlâ lō’-he‘ĕlû ḇaqqōḏeš lē’lōhê yiśərā’ēl:

8 wayəhî qeṣef yəhwâ ‘al-yəhûḏâ wîrûšālāim wayyitənēm lizəwā‘â ləz^a‘ăwâ ləšammâ wəlišərēqâ ka’ăšer ’atem rō’îm bə‘ênêḵem:

9 wəhinnēh nāfəlû ’ăḇwōṯênû beḥāreḇ ûḇānênû ûḇənwōṯênû wənāšênû baššəḇî ‘al-zō’ṯ:

10 ‘atâ ‘im-ləḇāḇî liḵərwōṯ bərîṯ layhwâ ’ĕlōhê yiśərā’ēl wəyāšōḇ mimmennû ḥărwōn ’apwō:

11 bānay ‘atâ ’al-tiššālû kî-ḇāḵem bāḥar yəhwâ l^a‘ămōḏ ləfānāyw ləšārəṯwō wəlihəywōṯ lwō məšārəṯîm ûmaqəṭirîm: s

12 wayyāqumû haləwîyim m^aḥaṯ ben-‘ămāśay wəywō’ēl ben-‘ăzarəyâû min-bənê haqqəhāṯî ûmin-bənê mərārî qîš ben-‘aḇədî w^a‘ăzarəyâû ben-yəhallelə’ēl ûmin-hagērəšunnî ywō’āḥ ben-zimmâ wə‘ēḏen ben-ywō’āḥ:

13 ûmin-bənê ’ĕlîṣāfān šimərî wî‘û’ēl wî‘î’ēl ûmin-bənê ’āsāf zəḵarəyâû ûmatanəyâû: s

14 ûmin-bənê hêmān yəḥû’ēl yəḥî’ēl wəšimə‘î sûmin-bənê yəḏûṯûn šəm^a‘əyâ wə‘uzzî’ēl:

15 wayya’asəfû ’eṯ-’ăḥêhem wayyiṯəqadəšû wayyāḇō’û ḵəmiṣəwaṯ-hammeleḵə bəḏiḇərê yəhwâ ləṭahēr bêṯ yəhwâ:

16 wayyāḇō’û hakōhănîm lifənîmâ ḇêṯ-yəhwâ ləṭahēr wayywōṣî’û ’ēṯ kāl-haṭṭumə’â ’ăšer māṣə’û bəhêḵal yəhwâ l^aḥăṣar bêṯ yəhwâ wayəqabəlû haləwîyim ləhwōṣî’ lən^aḥal-qiḏərwōn ḥûṣâ:

17 wayyāḥēllû bə’eḥāḏ l^aḥōḏeš hāri’šwōn ləqadēš ûḇəywōm šəmwōnâ l^aḥōḏeš bā’û lə’ûlām yəhwâ wayəqadəšû ’eṯ-bêṯ-yəhwâ ləyāmîm šəmwōnâ ûḇəywōm šiššâ ‘āśār l^aḥōḏeš hāri’šwōn killû: s

18 wayyāḇwō’û fənîmâ ’el-ḥizəqîyâû hammeleḵə wayyō’mərû ṭiharənû ’eṯ-kāl-bêṯ yəhwâ ’eṯ-mizəb^aḥ hā‘wōlâ wə’eṯ-kāl-kēlāyw wə’eṯ-šuləḥan hamm^a‘ăreḵeṯ wə’eṯ-kāl-kēlāyw:

19 wə’ēṯ kāl-hakēlîm ’ăšer hizənîḥa hammeleḵə ’āḥāz bəmaləḵûṯwō bəm^a‘ălwō hēḵannû wəhiqədāšənû wəhinnām lifənê mizəb^aḥ yəhwâ: s

20 wayyašəkēm yəḥizəqîyâû hammeleḵə wayye’ĕsōf ’ēṯ śārê hā‘îr wayy^a‘al bêṯ yəhwâ:

21 wayyāḇî’û fārîm-šiḇə‘â wə’êlîm šiḇə‘â ûḵəḇāśîm šiḇə‘â ûṣəfîrê ‘izzîm šiḇə‘â ləḥaṭṭā’ṯ ‘al-hammaməlāḵâ wə‘al-hammiqədāš wə‘al-yəhûḏâ wayyō’mer liḇənê ’ahărōn hakōhănîm ləh^a‘ălwōṯ ‘al-mizəb^aḥ yəhwâ:

22 wayyišəḥăṭû habāqār wayəqabəlû hakōhănîm ’eṯ-hadām wayyizərəqû hammizəbēḥâ wayyišəḥăṭû hā’ēlîm wayyizərəqû hadām hammizəbēḥâ wayyišəḥăṭû hakəḇāśîm wayyizərəqû hadām hammizəbēḥâ:

23 wayyagîšû ’eṯ-śə‘îrê h^aḥaṭṭā’ṯ lifənê hammeleḵə wəhaqqâāl wayyisəməḵû yəḏêhem ‘ălêhem:

24 wayyišəḥāṭûm hakōhănîm wayəḥaṭṭə’û ’eṯ-dāmām hammizəbēḥâ ləḵapēr ‘al-kāl-yiśərā’ēl kî ləḵāl-yiśərā’ēl ’āmar hammeleḵə hā‘wōlâ wəh^aḥaṭṭā’ṯ:

25 wayy^a‘ămēḏ ’eṯ-haləwîyim bêṯ yəhwâ biməṣilətayim binəḇālîm ûḇəḵinnōrwōṯ bəmiṣəwaṯ dāwîḏ wəḡāḏ ḥōzēh-hammeleḵə wənāṯān hannāḇî’ kî ḇəyaḏ-yəhwâ hammiṣəwâ bəyaḏ-nəḇî’āyw: s

26 wayy^a‘aməḏû haləwîyim biḵəlê ḏāwîḏ wəhakōhănîm b^aḥăṣōṣərwōṯ: s

27 wayyō’mer ḥizəqîyâû ləh^a‘ălwōṯ hā‘ōlâ ləhammizəbēḥa ûḇə‘ēṯ hēḥēl hā‘wōlâ hēḥēl šîr-yəhwâ wəh^aḥăṣōṣərwōṯ wə‘al-yəḏê kəlê dāwîḏ meleḵə-yiśərā’ēl:

28 wəḵāl-haqqâāl mišət^aḥăwîm wəhaššîr məšwōrēr wəh^aḥăṣōṣərwōṯ m^aḥăṣōṣərîm m^aḥəṣərîm^y hakōl ‘aḏ liḵəlwōṯ hā‘ōlâ:

29 ûḵəḵallwōṯ ləh^a‘ălwōṯ kārə‘û hammeleḵə wəḵāl-hanniməṣə’îm ’itwō wayyišət^aḥăwû:

30 wayyō’mer yəḥizəqîyâû hammeleḵə wəhaśśārîm laləwîyim ləhallēl layhwâ bəḏiḇərê ḏāwîḏ wə’āsāf h^aḥōzeh wayəhaləlû ‘aḏ-ləśiməḥâ wayyiqqəḏû wayyišət^aḥăwû: f

31 wayy^a‘an yəḥizəqîyâû wayyō’mer ‘atâ millē’ṯem yeḏəḵem layhwâ gōšû wəhāḇî’û zəḇāḥîm wəṯwōḏwōṯ ləḇêṯ yəhwâ wayyāḇî’û haqqâāl zəḇāḥîm wəṯwōḏwōṯ wəḵāl-nəḏîḇ lēḇ ‘ōlwōṯ:

32 wayəhî misəpar hā‘ōlâ ’ăšer hēḇî’û haqqâāl bāqār šiḇə‘îm ’êlîm mē’â kəḇāśîm mā’ṯāyim lə‘ōlâ layhwâ kāl-’ēlleh:

33 wəhaqqŏḏāšîm bāqār šēš mē’wōṯ wəṣō’n šəlōšeṯ ’ălāfîm:

34 raq hakōhănîm hāyû limə‘āṭ wəlō’ yāḵəlû ləhafəšîṭ ’eṯ-kāl-hā‘ōlwōṯ wayyəḥazzəqûm ’ăḥêhem haləwîyim ‘aḏ-kəlwōṯ hamməlā’ḵâ wə‘aḏ yiṯəqadəšû hakōhănîm kî haləwîyim yišərê lēḇāḇ ləhiṯəqadēš mēhakōhănîm:

35 wəḡam-‘ōlâ lārōḇ bəḥeləḇê haššəlāmîm ûḇannəsāḵîm lā‘ōlâ watikwōn ‘ăḇwōḏaṯ bêṯ-yəhwâ:

36 wayyiśəm^aḥ yəḥizəqîyâû wəḵāl-hā‘ām ‘al hahēḵîn hā’ĕlōhîm lā‘ām kî bəfiṯə’ōm hāyâ hadāḇār: f