The Paris Psalter: Psalm 121

Verse Indeterminate Saxon

Ic on ðyssum eom eallum bliðe,
þæt me cuðlice to acweden syndon,
and on godes hus gange syððan.
Wæron fæststealle fotas mine

5

on þinum cafertunum, þær ure cyðð wæs,
on Hierusalem geara ærest.
Hierusalem, geara ðu wære
swa swa cymlic ceaster getimbred,
þær syndon dælas on sylfre hire.

10

þær cneorisse cende wæron
cynn æfter cynne; cuðan þa drihten
and on þære gewitnesse wæran Israelas,
þe his naman neode sceoldon
him andetnes æghwær habban.

15

Oft hi þær on seldon sæton æt domum;
þu eart ðonne dema, Dauides hus,
þæt on heofenum siteþ heah gestaðelod.
Biddað eow bealde beorhtere sibbe,
ða ðe on Hierusalem gode syndan;

20

and geniht agun, þa þe neode þe
on heora lufun lustum healdað.
Si þe on þinum mægene sib mæst and fyrmest,
and on þinum torrum wese tidum genihtsum.
For mine broðru ic bidde nu,

25

and mine þa neahstan nemne swylce,
þæt we sibbe on ðe symble habbon.
And ic for mines godes huse georne þingie,
and to minum drihtne deorum sece,
þæt ic god æt him begitan mote.