‎1 ‏וַיֹּ֥אמֶר מֹשֶׁ֖ה אֶל־בְּנֵ֣י יִשְׂרָאֵ֑ל כְּכֹ֛ל אֲשֶׁר־צִוָּ֥ה יְהוָ֖ה אֶת־מֹשֶֽׁה׃ פ

‎2 ‏וַיְדַבֵּ֤ר מֹשֶׁה֙ אֶל־רָאשֵׁ֣י הַמַּטּ֔וֹת לִבְנֵ֥י יִשְׂרָאֵ֖ל לֵאמֹ֑ר זֶ֣ה הַדָּבָ֔ר אֲשֶׁ֖ר צִוָּ֥ה יְהוָֽה׃

‎3 ‏אִישׁ֩ כִּֽי־יִדֹּ֨ר נֶ֜דֶר לַֽיהוָ֗ה אֽוֹ־הִשָּׁ֤בַע שְׁבֻעָה֙ לֶאְסֹ֤ר אִסָּר֙ עַל־נַפְשׁ֔וֹ לֹ֥א יַחֵ֖ל דְּבָר֑וֹ כְּכָל־הַיֹּצֵ֥א מִפִּ֖יו יַעֲשֶֽׂה׃

‎4 ‏וְאִשָּׁ֕ה כִּֽי־תִדֹּ֥ר נֶ֖דֶר לַיהוָ֑ה וְאָסְרָ֥ה אִסָּ֛ר בְּבֵ֥ית אָבִ֖יהָ בִּנְעֻרֶֽיהָ׃

‎5 ‏וְשָׁמַ֨ע אָבִ֜יהָ אֶת־נִדְרָ֗הּ וֶֽאֱסָרָהּ֙ אֲשֶׁ֣ר אָֽסְרָ֣ה עַל־נַפְשָׁ֔הּ וְהֶחֱרִ֥ישׁ לָ֖הּ אָבִ֑יהָ וְקָ֙מוּ֙ כָּל־נְדָרֶ֔יהָ וְכָל־אִסָּ֛ר אֲשֶׁר־אָסְרָ֥ה עַל־נַפְשָׁ֖הּ יָקֽוּם׃

‎6 ‏וְאִם־הֵנִ֨יא אָבִ֣יהָ אֹתָהּ֮ בְּי֣וֹם שָׁמְעוֹ֒ כָּל־נְדָרֶ֗יהָ וֶֽאֱסָרֶ֛יהָ אֲשֶׁר־אָסְרָ֥ה עַל־נַפְשָׁ֖הּ לֹ֣א יָק֑וּם וַֽיהוָה֙ יִֽסְלַח־לָ֔הּ כִּי־הֵנִ֥יא אָבִ֖יהָ אֹתָֽהּ׃

‎7 ‏וְאִם־הָי֤וֹ תִֽהְיֶה֙ לְאִ֔ישׁ וּנְדָרֶ֖יהָ עָלֶ֑יהָ א֚וֹ מִבְטָ֣א שְׂפָתֶ֔יהָ אֲשֶׁ֥ר אָסְרָ֖ה עַל־נַפְשָֽׁהּ׃

‎8 ‏וְשָׁמַ֥ע אִישָׁ֛הּ בְּי֥וֹם שָׁמְע֖וֹ וְהֶחֱרִ֣ישׁ לָ֑הּ וְקָ֣מוּ נְדָרֶ֗יהָ וֶֽאֱסָרֶ֛הָ אֲשֶׁר־אָסְרָ֥ה עַל־נַפְשָׁ֖הּ יָקֻֽמוּ׃

‎9 ‏וְ֠אִם בְּי֨וֹם שְׁמֹ֣עַ אִישָׁהּ֮ יָנִ֣יא אוֹתָהּ֒ וְהֵפֵ֗ר אֶת־נִדְרָהּ֙ אֲשֶׁ֣ר עָלֶ֔יהָ וְאֵת֙ מִבְטָ֣א שְׂפָתֶ֔יהָ אֲשֶׁ֥ר אָסְרָ֖ה עַל־נַפְשָׁ֑הּ וַיהוָ֖ה יִֽסְלַֽח־לָֽהּ׃

‎10 ‏וְנֵ֥דֶר אַלְמָנָ֖ה וּגְרוּשָׁ֑ה כֹּ֛ל אֲשֶׁר־אָסְרָ֥ה עַל־נַפְשָׁ֖הּ יָק֥וּם עָלֶֽיהָ׃

‎11 ‏וְאִם־בֵּ֥ית אִישָׁ֖הּ נָדָ֑רָה אֽוֹ־אָסְרָ֥ה אִסָּ֛ר עַל־נַפְשָׁ֖הּ בִּשְׁבֻעָֽה׃

‎12 ‏וְשָׁמַ֤ע אִישָׁהּ֙ וְהֶחֱרִ֣שׁ לָ֔הּ לֹ֥א הֵנִ֖יא אֹתָ֑הּ וְקָ֙מוּ֙ כָּל־נְדָרֶ֔יהָ וְכָל־אִסָּ֛ר אֲשֶׁר־אָסְרָ֥ה עַל־נַפְשָׁ֖הּ יָקֽוּם׃

‎13 ‏וְאִם־הָפֵר֩ יָפֵ֨ר אֹתָ֥ם׀ אִישָׁהּ֮ בְּי֣וֹם שָׁמְעוֹ֒ כָּל־מוֹצָ֨א שְׂפָתֶ֧יהָ לִנְדָרֶ֛יהָ וּלְאִסַּ֥ר נַפְשָׁ֖הּ לֹ֣א יָק֑וּם אִישָׁ֣הּ הֲפֵרָ֔ם וַיהוָ֖ה יִֽסְלַֽח־לָֽהּ׃

‎14 ‏כָּל־נֵ֛דֶר וְכָל־שְׁבֻעַ֥ת אִסָּ֖ר לְעַנֹּ֣ת נָ֑פֶשׁ אִישָׁ֥הּ יְקִימֶ֖נּוּ וְאִישָׁ֥הּ יְפֵרֶֽנּוּ׃

‎15 ‏וְאִם־הַחֲרֵשׁ֩ יַחֲרִ֨ישׁ לָ֥הּ אִישָׁהּ֮ מִיּ֣וֹם אֶל־יוֹם֒ וְהֵקִים֙ אֶת־כָּל־נְדָרֶ֔יהָ א֥וֹ אֶת־כָּל־אֱסָרֶ֖יהָ אֲשֶׁ֣ר עָלֶ֑יהָ הֵקִ֣ים אֹתָ֔ם כִּי־הֶחֱרִ֥שׁ לָ֖הּ בְּי֥וֹם שָׁמְעֽוֹ׃

‎16 ‏וְאִם־הָפֵ֥ר יָפֵ֛ר אֹתָ֖ם אַחֲרֵ֣י שָׁמְע֑וֹ וְנָשָׂ֖א אֶת־עֲוֹנָֽהּ׃

‎17 ‏אֵ֣לֶּה הַֽחֻקִּ֗ים אֲשֶׁ֨ר צִוָּ֤ה יְהוָה֙ אֶת־מֹשֶׁ֔ה בֵּ֥ין אִ֖ישׁ לְאִשְׁתּ֑וֹ בֵּֽין־אָ֣ב לְבִתּ֔וֹ בִּנְעֻרֶ֖יהָ בֵּ֥ית אָבִֽיהָ׃ פ

1 wayyō’mer mōšeh ’el-bənê yiśərā’ēl kəḵōl ’ăšer-ṣiûâ yəhwâ ’eṯ-mōšeh: f

2 wayəḏabēr mōšeh ’el-rā’šê hammaṭṭwōṯ liḇənê yiśərā’ēl lē’mōr zeh hadāḇār ’ăšer ṣiûâ yəhwâ:

3 ’îš kî-yidōr neḏer layhwâ ’wō-hiššāḇ^a‘ šəḇu‘â le’əsōr ’issār ‘al-nafəšwō lō’ y^aḥēl dəḇārwō kəḵāl-hayyōṣē’ mipîw y^a‘ăśeh:

4 wə’iššâ kî-ṯidōr neḏer layhwâ wə’āsərâ ’issār bəḇêṯ ’āḇîhā binə‘ureyhā:

5 wəšām^a‘ ’āḇîhā ’eṯ-niḏərāh we’ĕsārāh ’ăšer ’āsərâ ‘al-nafəšāh wəheḥĕrîš lāh ’āḇîhā wəqāmû kāl-nəḏāreyhā wəḵāl-’issār ’ăšer-’āsərâ ‘al-nafəšāh yāqûm:

6 wə’im-hēnî’ ’āḇîhā ’ōṯāh bəywōm šāmə‘wō kāl-nəḏāreyhā we’ĕsāreyhā ’ăšer-’āsərâ ‘al-nafəšāh lō’ yāqûm wayhwâ yisəl^aḥ-lāh kî-hēnî’ ’āḇîhā ’ōṯāh:

7 wə’im-hāywō ṯihəyeh lə’îš ûnəḏāreyhā ‘āleyhā ’wō miḇəṭā’ śəfāṯeyhā ’ăšer ’āsərâ ‘al-nafəšāh:

8 wəšām^a‘ ’îšāh bəywōm šāmə‘wō wəheḥĕrîš lāh wəqāmû nəḏāreyhā we’ĕsārehā ’ăšer-’āsərâ ‘al-nafəšāh yāqumû:

9 wə’im bəywōm šəmō‘a ’îšāh yānî’ ’wōṯāh wəhēfēr ’eṯ-niḏərāh ’ăšer ‘āleyhā wə’ēṯ miḇəṭā’ śəfāṯeyhā ’ăšer ’āsərâ ‘al-nafəšāh wayhwâ yisəl^aḥ-lāh:

10 wənēḏer ’aləmānâ ûḡərûšâ kōl ’ăšer-’āsərâ ‘al-nafəšāh yāqûm ‘āleyhā:

11 wə’im-bêṯ ’îšāh nāḏārâ ’wō-’āsərâ ’issār ‘al-nafəšāh bišəḇu‘â:

12 wəšām^a‘ ’îšāh wəheḥĕriš lāh lō’ hēnî’ ’ōṯāh wəqāmû kāl-nəḏāreyhā wəḵāl-’issār ’ăšer-’āsərâ ‘al-nafəšāh yāqûm:

13 wə’im-hāfēr yāfēr ’ōṯām| ’îšāh bəywōm šāmə‘wō kāl-mwōṣā’ śəfāṯeyhā linəḏāreyhā ûlə’issar nafəšāh lō’ yāqûm ’îšāh hăfērām wayhwâ yisəl^aḥ-lāh:

14 kāl-nēḏer wəḵāl-šəḇu‘aṯ ’issār lə‘annōṯ nāfeš ’îšāh yəqîmennû wə’îšāh yəfērennû:

15 wə’im-h^aḥărēš y^aḥărîš lāh ’îšāh mîywōm ’el-ywōm wəhēqîm ’eṯ-kāl-nəḏāreyhā ’wō ’eṯ-kāl-’ĕsāreyhā ’ăšer ‘āleyhā hēqîm ’ōṯām kî-heḥĕriš lāh bəywōm šāmə‘wō:

16 wə’im-hāfēr yāfēr ’ōṯām ’^aḥărê šāmə‘wō wənāśā’ ’eṯ-‘ăwōnāh:

17 ’ēlleh h^aḥuqqîm ’ăšer ṣiûâ yəhwâ ’eṯ-mōšeh bên ’îš lə’išətwō bên-’āḇ ləḇitwō binə‘ureyhā bêṯ ’āḇîhā: f