Sacred Texts  Bible  Index 
Polyglot  KJV  Sep  Vul 

Numbers (Bemidbar) Index
  Previous  Next 

Tanach (Hebrew): Numbers (Bemidbar) Chapter 29

1 ‏וּבַחֹ֨דֶשׁ הַשְּׁבִיעִ֜י בְּאֶחָ֣ד לַחֹ֗דֶשׁ מִֽקְרָא־קֹ֙דֶשׁ֙ יִהְיֶ֣ה לָכֶ֔ם כָּל־מְלֶ֥אכֶת עֲבֹדָ֖ה לֹ֣א תַעֲשׂ֑וּ י֥וֹם תְּרוּעָ֖ה יִהְיֶ֥ה לָכֶֽם׃

2 ‏וַעֲשִׂיתֶ֨ם עֹלָ֜ה לְרֵ֤יחַ נִיחֹ֙חַ֙ לַֽיהוָ֔ה פַּ֧ר בֶּן־בָּקָ֛ר אֶחָ֖ד אַ֣יִל אֶחָ֑ד כְּבָשִׂ֧ים בְּנֵי־שָׁנָ֛ה שִׁבְעָ֖ה תְּמִימִֽם׃

3 ‏וּמִנְחָתָ֔ם סֹ֖לֶת בְּלוּלָ֣ה בַשָּׁ֑מֶן שְׁלֹשָׁ֤ה עֶשְׂרֹנִים֙ לַפָּ֔ר שְׁנֵ֥י עֶשְׂרֹנִ֖ים לָאָֽיִל׃

4 ‏וְעִשָּׂר֣וֹן אֶחָ֔ד לַכֶּ֖בֶשׂ הָאֶחָ֑ד לְשִׁבְעַ֖ת הַכְּבָשִֽׂים׃

5 ‏וּשְׂעִיר־עִזִּ֥ים אֶחָ֖ד חַטָּ֑את לְכַפֵּ֖ר עֲלֵיכֶֽם׃

6 ‏מִלְּבַד֩ עֹלַ֨ת הַחֹ֜דֶשׁ וּמִנְחָתָ֗הּ וְעֹלַ֤ת הַתָּמִיד֙ וּמִנְחָתָ֔הּ וְנִסְכֵּיהֶ֖ם כְּמִשְׁפָּטָ֑ם לְרֵ֣יחַ נִיחֹ֔חַ אִשֶּׁ֖ה לַיהוָֽה׃ ס

7 ‏וּבֶעָשׂוֹר֩ לַחֹ֨דֶשׁ הַשְּׁבִיעִ֜י הַזֶּ֗ה מִֽקְרָא־קֹ֙דֶשׁ֙ יִהְיֶ֣ה לָכֶ֔ם וְעִנִּיתֶ֖ם אֶת־נַפְשֹׁתֵיכֶ֑ם כָּל־מְלָאכָ֖ה לֹ֥א תַעֲשֽׂוּ׃

8 ‏וְהִקְרַבְתֶּ֨ם עֹלָ֤ה לַֽיהוָה֙ רֵ֣יחַ נִיחֹ֔חַ פַּ֧ר בֶּן־בָּקָ֛ר אֶחָ֖ד אַ֣יִל אֶחָ֑ד כְּבָשִׂ֤ים בְּנֵֽי־שָׁנָה֙ שִׁבְעָ֔ה תְּמִימִ֖ם יִהְי֥וּ לָכֶֽם׃

9 ‏וּמִנְחָתָ֔ם סֹ֖לֶת בְּלוּלָ֣ה בַשָּׁ֑מֶן שְׁלֹשָׁ֤ה עֶשְׂרֹנִים֙ לַפָּ֔ר שְׁנֵי֙ עֶשְׂרֹנִ֔ים לָאַ֖יִל הָאֶחָֽד׃

10 ‏עִשָּׂרוֹן֙ עִשָּׂר֔וֹן לַכֶּ֖בֶשׂ הָאֶחָ֑ד לְשִׁבְעַ֖ת הַכְּבָשִֽׂים׃

11 ‏שְׂעִיר־עִזִּ֥ים אֶחָ֖ד חַטָּ֑את מִלְּבַ֞ד חַטַּ֤את הַכִּפֻּרִים֙ וְעֹלַ֣ת הַתָּמִ֔יד וּמִנְחָתָ֖הּ וְנִסְכֵּיהֶֽם׃ פ

12 ‏וּבַחֲמִשָּׁה֩ עָשָׂ֨ר י֜וֹם לַחֹ֣דֶשׁ הַשְּׁבִיעִ֗י מִֽקְרָא־קֹ֙דֶשׁ֙ יִהְיֶ֣ה לָכֶ֔ם כָּל־מְלֶ֥אכֶת עֲבֹדָ֖ה לֹ֣א תַעֲשׂ֑וּ וְחַגֹּתֶ֥ם חַ֛ג לַיהוָ֖ה שִׁבְעַ֥ת יָמִֽים׃

13 ‏וְהִקְרַבְתֶּ֨ם עֹלָ֜ה אִשֵּׁ֨ה רֵ֤יחַ נִיחֹ֙חַ֙ לַֽיהוָ֔ה פָּרִ֧ים בְּנֵי־בָקָ֛ר שְׁלֹשָׁ֥ה עָשָׂ֖ר אֵילִ֣ם שְׁנָ֑יִם כְּבָשִׂ֧ים בְּנֵֽי־שָׁנָ֛ה אַרְבָּעָ֥ה עָשָׂ֖ר תְּמִימִ֥ם יִהְיֽוּ׃

14 ‏וּמִנְחָתָ֔ם סֹ֖לֶת בְּלוּלָ֣ה בַשָּׁ֑מֶן שְׁלֹשָׁ֨ה עֶשְׂרֹנִ֜ים לַפָּ֣ר הָֽאֶחָ֗ד לִשְׁלֹשָׁ֤ה עָשָׂר֙ פָּרִ֔ים שְׁנֵ֤י עֶשְׂרֹנִים֙ לָאַ֣יִל הָֽאֶחָ֔ד לִשְׁנֵ֖י הָאֵילִֽם׃

15 ‏וְעִשָּׂרוֹׅן֙4 עִשָּׂר֔וֹן לַכֶּ֖בֶשׂ הָאֶחָ֑ד לְאַרְבָּעָ֥ה עָשָׂ֖ר כְּבָשִֽׂים׃

16 ‏וּשְׂעִיר־עִזִּ֥ים אֶחָ֖ד חַטָּ֑את מִלְּבַד֙ עֹלַ֣ת הַתָּמִ֔יד מִנְחָתָ֖הּ וְנִסְכָּֽהּ׃ ס

17 ‏וּבַיּ֣וֹם הַשֵּׁנִ֗י פָּרִ֧ים בְּנֵי־בָקָ֛ר שְׁנֵ֥ים עָשָׂ֖ר אֵילִ֣ם שְׁנָ֑יִם כְּבָשִׂ֧ים בְּנֵי־שָׁנָ֛ה אַרְבָּעָ֥ה עָשָׂ֖ר תְּמִימִֽם׃

18 ‏וּמִנְחָתָ֣ם וְנִסְכֵּיהֶ֡ם לַ֠פָּרִים לָאֵילִ֧ם וְלַכְּבָשִׂ֛ים בְּמִסְפָּרָ֖ם כַּמִּשְׁפָּֽט׃

19 ‏וּשְׂעִיר־עִזִּ֥ים אֶחָ֖ד חַטָּ֑את מִלְּבַד֙ עֹלַ֣ת הַתָּמִ֔יד וּמִנְחָתָ֖הּ וְנִסְכֵּיהֶֽם׃ ס

20 ‏וּבַיּ֧וֹם הַשְּׁלִישִׁ֛י פָּרִ֥ים עַשְׁתֵּי־עָשָׂ֖ר אֵילִ֣ם שְׁנָ֑יִם כְּבָשִׂ֧ים בְּנֵי־שָׁנָ֛ה אַרְבָּעָ֥ה עָשָׂ֖ר תְּמִימִֽם׃

21 ‏וּמִנְחָתָ֣ם וְנִסְכֵּיהֶ֡ם לַ֠פָּרִים לָאֵילִ֧ם וְלַכְּבָשִׂ֛ים בְּמִסְפָּרָ֖ם כַּמִּשְׁפָּֽט׃

22 ‏וּשְׂעִ֥יר חַטָּ֖את אֶחָ֑ד מִלְּבַד֙ עֹלַ֣ת הַתָּמִ֔יד וּמִנְחָתָ֖הּ וְנִסְכָּֽהּ׃ ס

23 ‏וּבַיּ֧וֹם הָרְבִיעִ֛י פָּרִ֥ים עֲשָׂרָ֖ה אֵילִ֣ם שְׁנָ֑יִם כְּבָשִׂ֧ים בְּנֵֽי־שָׁנָ֛ה אַרְבָּעָ֥ה עָשָׂ֖ר תְּמִימִֽם׃

24 ‏מִנְחָתָ֣ם וְנִסְכֵּיהֶ֡ם לַ֠פָּרִים לָאֵילִ֧ם וְלַכְּבָשִׂ֛ים בְּמִסְפָּרָ֖ם כַּמִּשְׁפָּֽט׃

25 ‏וּשְׂעִיר־עִזִּ֥ים אֶחָ֖ד חַטָּ֑את מִלְּבַד֙ עֹלַ֣ת הַתָּמִ֔יד מִנְחָתָ֖הּ וְנִסְכָּֽהּ׃ ס

26 ‏וּבַיּ֧וֹם הַחֲמִישִׁ֛י פָּרִ֥ים תִּשְׁעָ֖ה אֵילִ֣ם שְׁנָ֑יִם כְּבָשִׂ֧ים בְּנֵֽי־שָׁנָ֛ה אַרְבָּעָ֥ה עָשָׂ֖ר תְּמִימִֽם׃

27 ‏וּמִנְחָתָ֣ם וְנִסְכֵּיהֶ֡ם לַ֠פָּרִים לָאֵילִ֧ם וְלַכְּבָשִׂ֛ים בְּמִסְפָּרָ֖ם כַּמִּשְׁפָּֽט׃

28 ‏וּשְׂעִ֥יר חַטָּ֖את אֶחָ֑ד מִלְּבַד֙ עֹלַ֣ת הַתָּמִ֔יד וּמִנְחָתָ֖הּ וְנִסְכָּֽהּ׃ ס

29 ‏וּבַיּ֧וֹם הַשִּׁשִּׁ֛י פָּרִ֥ים שְׁמֹנָ֖ה אֵילִ֣ם שְׁנָ֑יִם כְּבָשִׂ֧ים בְּנֵי־שָׁנָ֛ה אַרְבָּעָ֥ה עָשָׂ֖ר תְּמִימִֽם׃

30 ‏וּמִנְחָתָ֣ם וְנִסְכֵּיהֶ֡ם לַ֠פָּרִים לָאֵילִ֧ם וְלַכְּבָשִׂ֛ים בְּמִסְפָּרָ֖ם כַּמִּשְׁפָּֽט׃

31 ‏וּשְׂעִ֥יר חַטָּ֖את אֶחָ֑ד מִלְּבַד֙ עֹלַ֣ת הַתָּמִ֔יד מִנְחָתָ֖הּ וּנְסָכֶֽיהָ׃ פ

32 ‏וּבַיּ֧וֹם הַשְּׁבִיעִ֛י פָּרִ֥ים שִׁבְעָ֖ה אֵילִ֣ם שְׁנָ֑יִם כְּבָשִׂ֧ים בְּנֵי־שָׁנָ֛ה אַרְבָּעָ֥ה עָשָׂ֖ר תְּמִימִֽם׃

33 ‏וּמִנְחָתָ֣ם וְנִסְכֵּהֶ֡ם לַ֠פָּרִים לָאֵילִ֧ם וְלַכְּבָשִׂ֛ים בְּמִסְפָּרָ֖ם כְּמִשְׁפָּטָֽם׃

34 ‏וּשְׂעִ֥יר חַטָּ֖את אֶחָ֑ד מִלְּבַד֙ עֹלַ֣ת הַתָּמִ֔יד מִנְחָתָ֖הּ וְנִסְכָּֽהּ׃ פ

35 ‏בַּיּוֹם֙ הַשְּׁמִינִ֔י עֲצֶ֖רֶת תִּהְיֶ֣ה לָכֶ֑ם כָּל־מְלֶ֥אכֶת עֲבֹדָ֖ה לֹ֥א תַעֲשֽׂוּ׃

36 ‏וְהִקְרַבְתֶּ֨ם עֹלָ֜ה אִשֵּׁ֨ה רֵ֤יחַ נִיחֹ֙חַ֙ לַֽיהוָ֔ה פַּ֥ר אֶחָ֖ד אַ֣יִל אֶחָ֑ד כְּבָשִׂ֧ים בְּנֵי־שָׁנָ֛ה שִׁבְעָ֖ה תְּמִימִֽם׃

37 ‏מִנְחָתָ֣ם וְנִסְכֵּיהֶ֗ם לַפָּ֨ר לָאַ֧יִל וְלַכְּבָשִׂ֛ים בְּמִסְפָּרָ֖ם כַּמִּשְׁפָּֽט׃

38 ‏וּשְׂעִ֥יר חַטָּ֖את אֶחָ֑ד מִלְּבַד֙ עֹלַ֣ת הַתָּמִ֔יד וּמִנְחָתָ֖הּ וְנִסְכָּֽהּ׃

39 ‏אֵ֛לֶּה תַּעֲשׂ֥וּ לַיהוָ֖ה בְּמוֹעֲדֵיכֶ֑ם לְבַ֨ד מִנִּדְרֵיכֶ֜ם וְנִדְבֹתֵיכֶ֗ם לְעֹלֹֽתֵיכֶם֙ וּלְמִנְחֹ֣תֵיכֶ֔ם וּלְנִסְכֵּיכֶ֖ם וּלְשַׁלְמֵיכֶֽם׃

1 ûḇaḥōḏeš haššəḇî‘î bə’eḥāḏ laḥōḏeš miqərā’-qōḏeš yihəyeh lāḵem kāl-məle’ḵeṯ ‘ăḇōḏâ lō’ ṯa‘ăśû ywōm tərû‘â yihəyeh lāḵem:

2 wa‘ăśîṯem ‘ōlâ lərêḥa nîḥōḥa layhwâ par ben-bāqār ’eḥāḏ ’ayil ’eḥāḏ kəḇāśîm bənê-šānâ šiḇə‘â təmîmim:

3 ûminəḥāṯām sōleṯ bəlûlâ ḇaššāmen šəlōšâ ‘eśərōnîm lapār šənê ‘eśərōnîm lā’āyil:

4 wə‘iśśārwōn ’eḥāḏ lakeḇeś hā’eḥāḏ ləšiḇə‘aṯ hakəḇāśîm:

5 ûśə‘îr-‘izzîm ’eḥāḏ ḥaṭṭā’ṯ ləḵapēr ‘ălêḵem:

6 milləḇaḏ ‘ōlaṯ haḥōḏeš ûminəḥāṯāh wə‘ōlaṯ hatāmîḏ ûminəḥāṯāh wənisəkêhem kəmišəpāṭām lərêḥa nîḥōḥa ’iššeh layhwâ: s

7 ûḇe‘āśwōr laḥōḏeš haššəḇî‘î hazzeh miqərā’-qōḏeš yihəyeh lāḵem wə‘innîṯem ’eṯ-nafəšōṯêḵem kāl-məlā’ḵâ lō’ ṯa‘ăśû:

8 wəhiqəraḇətem ‘ōlâ layhwâ rêḥa nîḥōḥa par ben-bāqār ’eḥāḏ ’ayil ’eḥāḏ kəḇāśîm bənê-šānâ šiḇə‘â təmîmim yihəyû lāḵem:

9 ûminəḥāṯām sōleṯ bəlûlâ ḇaššāmen šəlōšâ ‘eśərōnîm lapār šənê ‘eśərōnîm lā’ayil hā’eḥāḏ:

10 ‘iśśārwōn ‘iśśārwōn lakeḇeś hā’eḥāḏ ləšiḇə‘aṯ hakəḇāśîm:

11 śə‘îr-‘izzîm ’eḥāḏ ḥaṭṭā’ṯ milləḇaḏ ḥaṭṭa’ṯ hakipurîm wə‘ōlaṯ hatāmîḏ ûminəḥāṯāh wənisəkêhem: f

12 ûḇaḥămiššâ ‘āśār ywōm laḥōḏeš haššəḇî‘î miqərā’-qōḏeš yihəyeh lāḵem kāl-məle’ḵeṯ ‘ăḇōḏâ lō’ ṯa‘ăśû wəḥagōṯem ḥaḡ layhwâ šiḇə‘aṯ yāmîm:

13 wəhiqəraḇətem ‘ōlâ ’iššēh rêḥa nîḥōḥa layhwâ pārîm bənê-ḇāqār šəlōšâ ‘āśār ’êlim šənāyim kəḇāśîm bənê-šānâ ’arəbā‘â ‘āśār təmîmim yihəyû:

14 ûminəḥāṯām sōleṯ bəlûlâ ḇaššāmen šəlōšâ ‘eśərōnîm lapār hā’eḥāḏ lišəlōšâ ‘āśār pārîm šənê ‘eśərōnîm lā’ayil hā’eḥāḏ lišənê hā’êlim:

15 wə‘iśśārwōׅn4 ‘iśśārwōn lakeḇeś hā’eḥāḏ lə’arəbā‘â ‘āśār kəḇāśîm:

16 ûśə‘îr-‘izzîm ’eḥāḏ ḥaṭṭā’ṯ milləḇaḏ ‘ōlaṯ hatāmîḏ minəḥāṯāh wənisəkāh: s

17 ûḇayywōm haššēnî pārîm bənê-ḇāqār šənêm ‘āśār ’êlim šənāyim kəḇāśîm bənê-šānâ ’arəbā‘â ‘āśār təmîmim:

18 ûminəḥāṯām wənisəkêhem lapārîm lā’êlim wəlakəḇāśîm bəmisəpārām kammišəpāṭ:

19 ûśə‘îr-‘izzîm ’eḥāḏ ḥaṭṭā’ṯ milləḇaḏ ‘ōlaṯ hatāmîḏ ûminəḥāṯāh wənisəkêhem: s

20 ûḇayywōm haššəlîšî pārîm ‘ašətê-‘āśār ’êlim šənāyim kəḇāśîm bənê-šānâ ’arəbā‘â ‘āśār təmîmim:

21 ûminəḥāṯām wənisəkêhem lapārîm lā’êlim wəlakəḇāśîm bəmisəpārām kammišəpāṭ:

22 ûśə‘îr ḥaṭṭā’ṯ ’eḥāḏ milləḇaḏ ‘ōlaṯ hatāmîḏ ûminəḥāṯāh wənisəkāh: s

23 ûḇayywōm hārəḇî‘î pārîm ‘ăśārâ ’êlim šənāyim kəḇāśîm bənê-šānâ ’arəbā‘â ‘āśār təmîmim:

24 minəḥāṯām wənisəkêhem lapārîm lā’êlim wəlakəḇāśîm bəmisəpārām kammišəpāṭ:

25 ûśə‘îr-‘izzîm ’eḥāḏ ḥaṭṭā’ṯ milləḇaḏ ‘ōlaṯ hatāmîḏ minəḥāṯāh wənisəkāh: s

26 ûḇayywōm haḥămîšî pārîm tišə‘â ’êlim šənāyim kəḇāśîm bənê-šānâ ’arəbā‘â ‘āśār təmîmim:

27 ûminəḥāṯām wənisəkêhem lapārîm lā’êlim wəlakəḇāśîm bəmisəpārām kammišəpāṭ:

28 ûśə‘îr ḥaṭṭā’ṯ ’eḥāḏ milləḇaḏ ‘ōlaṯ hatāmîḏ ûminəḥāṯāh wənisəkāh: s

29 ûḇayywōm haššiššî pārîm šəmōnâ ’êlim šənāyim kəḇāśîm bənê-šānâ ’arəbā‘â ‘āśār təmîmim:

30 ûminəḥāṯām wənisəkêhem lapārîm lā’êlim wəlakəḇāśîm bəmisəpārām kammišəpāṭ:

31 ûśə‘îr ḥaṭṭā’ṯ ’eḥāḏ milləḇaḏ ‘ōlaṯ hatāmîḏ minəḥāṯāh ûnəsāḵeyhā: f

32 ûḇayywōm haššəḇî‘î pārîm šiḇə‘â ’êlim šənāyim kəḇāśîm bənê-šānâ ’arəbā‘â ‘āśār təmîmim:

33 ûminəḥāṯām wənisəkēhem lapārîm lā’êlim wəlakəḇāśîm bəmisəpārām kəmišəpāṭām:

34 ûśə‘îr ḥaṭṭā’ṯ ’eḥāḏ milləḇaḏ ‘ōlaṯ hatāmîḏ minəḥāṯāh wənisəkāh: f

35 bayywōm haššəmînî ‘ăṣereṯ tihəyeh lāḵem kāl-məle’ḵeṯ ‘ăḇōḏâ lō’ ṯa‘ăśû:

36 wəhiqəraḇətem ‘ōlâ ’iššēh rêḥa nîḥōḥa layhwâ par ’eḥāḏ ’ayil ’eḥāḏ kəḇāśîm bənê-šānâ šiḇə‘â təmîmim:

37 minəḥāṯām wənisəkêhem lapār lā’ayil wəlakəḇāśîm bəmisəpārām kammišəpāṭ:

38 ûśə‘îr ḥaṭṭā’ṯ ’eḥāḏ milləḇaḏ ‘ōlaṯ hatāmîḏ ûminəḥāṯāh wənisəkāh:

39 ’ēlleh ta‘ăśû layhwâ bəmwō‘ăḏêḵem ləḇaḏ minniḏərêḵem wəniḏəḇōṯêḵem lə‘ōlōṯêḵem ûləminəḥōṯêḵem ûlənisəkêḵem ûləšaləmêḵem:


Next: Numbers (Bemidbar) Chapter 30