Sacred Texts  Bible  Index 
Polyglot  KJV  Sep  Vul 

Ezekiel (Yechezqel) Index
  Previous  Next 

Tanach (Hebrew): Ezekiel (Yechezqel) Chapter 24

1 ‏וַיְהִי֩ דְבַר־יְהוָ֨ה אֵלַ֜י בַּשָּׁנָ֤ה הַתְּשִׁיעִית֙ בַּחֹ֣דֶשׁ הָעֲשִׂירִ֔י בֶּעָשׂ֥וֹר לַחֹ֖דֶשׁ לֵאמֹֽר׃

2 ‏בֶּן־אָדָ֗ם כתוב־ כְּתָב־ לְךָ֙ אֶת־שֵׁ֣ם הַיּ֔וֹם אֶת־עֶ֖צֶם הַיּ֣וֹם הַזֶּ֑ה סָמַ֤ךְ מֶֽלֶךְ־בָּבֶל֙ אֶל־יְר֣וּשָׁלִַ֔ם בְּעֶ֖צֶם הַיּ֥וֹם הַזֶּֽה׃

3 ‏וּמְשֹׁ֤ל אֶל־בֵּית־הַמֶּ֙רִי֙ מָשָׁ֔ל וְאָמַרְתָּ֣ אֲלֵיהֶ֔ם כֹּ֥ה אָמַ֖ר אֲדֹנָ֣י יְהוִ֑ה שְׁפֹ֤ת הַסִּיר֙ שְׁפֹ֔ת וְגַם־יְצֹ֥ק בּ֖וֹ מָֽיִם׃

4 ‏אֱסֹ֤ף נְתָחֶ֙יהָ֙ אֵלֶ֔יהָ כָּל־נֵ֥תַח ט֖וֹב יָרֵ֣ךְ וְכָתֵ֑ף מִבְחַ֥ר עֲצָמִ֖ים מַלֵּֽא׃

5 ‏מִבְחַ֤ר הַצֹּאן֙ לָק֔וֹחַ וְגַ֛ם דּ֥וּר הָעֲצָמִ֖ים תַּחְתֶּ֑יהָ רַתַּ֣ח רְתָחֶ֔יהָ גַּם־בָּשְׁל֥וּ עֲצָמֶ֖יהָ בְּתוֹכָֽהּ׃ ס

6 ‏לָכֵ֞ן כֹּה־אָמַ֣ר׀ אֲדֹנָ֣י יְהוִֹ֗ה אוֹי֮ עִ֣יר הַדָּמִים֒ סִ֚יר אֲשֶׁ֣ר חֶלְאָתָ֣ה בָ֔הּ וְחֶ֨לְאָתָ֔הּ לֹ֥א יָצְאָ֖ה מִמֶּ֑נָּה לִנְתָחֶ֤יהָ לִנְתָחֶ֙יהָ֙ הוֹצִיאָ֔הּ לֹא־נָפַ֥ל עָלֶ֖יהָ גּוֹרָֽל׃

7 ‏כִּ֤י דָמָהּ֙ בְּתוֹכָ֣הּ הָיָ֔ה עַל־צְחִ֥יחַ סֶ֖לַע שָׂמָ֑תְהוּ לֹ֤א שְׁפָכַ֙תְהוּ֙ עַל־הָאָ֔רֶץ לְכַסּ֥וֹת עָלָ֖יו עָפָֽר׃

8 ‏לְהַעֲל֤וֹת חֵמָה֙ לִנְקֹ֣ם נָקָ֔ם נָתַ֥תִּי אֶת־דָּמָ֖הּ עַל־צְחִ֣יחַ סָ֑לַע לְבִלְתִּ֖י הִכָּסֽוֹת׃ פ

9 ‏לָכֵ֗ן כֹּ֤ה אָמַר֙ אֲדֹנָ֣י יְהוִ֔ה א֖וֹי עִ֣יר הַדָּמִ֑ים גַּם־אֲנִ֖י אַגְדִּ֥יל הַמְּדוּרָֽה׃

10 ‏הַרְבֵּ֤ה הָעֵצִים֙ הַדְלֵ֣ק הָאֵ֔שׁ הָתֵ֖ם הַבָּשָׂ֑ר וְהַרְקַח֙ הַמֶּרְקָחָ֔ה וְהָעֲצָמ֖וֹת יֵחָֽרוּ׃

11 ‏וְהַעֲמִידֶ֥הָ עַל־גֶּחָלֶ֖יהָ רֵקָ֑ה לְמַ֨עַן תֵּחַ֜ם וְחָ֣רָה נְחֻשְׁתָּ֗הּ וְנִתְּכָ֤ה בְתוֹכָהּ֙ טֻמְאָתָ֔הּ תִּתֻּ֖ם חֶלְאָתָֽהּ׃

12 ‏תְּאֻנִ֖ים הֶלְאָ֑ת וְלֹֽא־תֵצֵ֤א מִמֶּ֙נָּה֙ רַבַּ֣ת חֶלְאָתָ֔הּ בְּאֵ֖שׁ חֶלְאָתָֽהּ׃

13 ‏בְּטֻמְאָתֵ֖ךְ זִמָּ֑ה יַ֤עַן טִֽהַרְתִּיךְ֙ וְלֹ֣א טָהַ֔רְתְּ מִטֻּמְאָתֵךְ֙ לֹ֣א תִטְהֲרִי־ע֔וֹד עַד־הֲנִיחִ֥י אֶת־חֲמָתִ֖י בָּֽךְ׃

14 ‏אֲנִ֨י יְהוָ֤ה דִּבַּ֙רְתִּי֙ בָּאָ֣ה וְעָשִׂ֔יתִי לֹֽא־אֶפְרַ֥ע וְלֹא־אָח֖וּס וְלֹ֣א אֶנָּחֵ֑ם כִּדְרָכַ֤יִךְ וְכַעֲלִילוֹתַ֙יִךְ֙ שְׁפָט֔וּךְ נְאֻ֖ם אֲדֹנָ֥י יְהוִֹֽה׃ פ

15 ‏וַיְהִ֥י דְבַר־יְהוָ֖ה אֵלַ֥י לֵאמֹֽר׃

16 ‏בֶּן־אָדָ֕ם הִנְנִ֨י לֹקֵ֧חַ מִמְּךָ֛ אֶת־מַחְמַ֥ד עֵינֶ֖יךָ בְּמַגֵּפָ֑ה וְלֹ֤א תִסְפֹּד֙ וְלֹ֣א תִבְכֶּ֔ה וְל֥וֹא תָב֖וֹא דִּמְעָתֶֽךָ׃

17 ‏הֵאָנֵ֣ק׀ דֹּ֗ם מֵתִים֙ אֵ֣בֶל לֹֽא־תַֽעֲשֶׂ֔ה פְאֵֽרְךָ֙ חֲב֣וֹשׁ עָלֶ֔יךָ וּנְעָלֶ֖יךָ תָּשִׂ֣ים בְּרַגְלֶ֑יךָ וְלֹ֤א תַעְטֶה֙ עַל־שָׂפָ֔ם וְלֶ֥חֶם אֲנָשִׁ֖ים לֹ֥א תֹאכֵֽל׃

18 ‏וָאֲדַבֵּ֤ר אֶל־הָעָם֙ בַּבֹּ֔קֶר וַתָּ֥מָת אִשְׁתִּ֖י בָּעָ֑רֶב וָאַ֥עַשׂ בַּבֹּ֖קֶר כַּאֲשֶׁ֥ר צֻוֵּֽיתִי׃

19 ‏וַיֹּאמְר֥וּ אֵלַ֖י הָעָ֑ם הֲלֹֽא־תַגִּ֥יד לָ֙נוּ֙ מָה־אֵ֣לֶּה לָּ֔נוּ כִּ֥י אַתָּ֖ה עֹשֶֽׂה׃

20 ‏וָאֹמַ֖ר אֲלֵיהֶ֑ם דְּבַ֨ר־יְהוָ֔ה הָיָ֥ה אֵלַ֖י לֵאמֹֽר׃

21 ‏אֱמֹ֣ר׀ לְבֵ֣ית יִשְׂרָאֵ֗ל כֹּֽה־אָמַר֮ אֲדֹנָ֣י יְהוִה֒ הִנְנִ֨י מְחַלֵּ֤ל אֶת־מִקְדָּשִׁי֙ גְּא֣וֹן עֻזְּכֶ֔ם מַחְמַ֥ד עֵֽינֵיכֶ֖ם וּמַחְמַ֣ל נַפְשְׁכֶ֑ם וּבְנֵיכֶ֧ם וּבְנֽוֹתֵיכֶ֛ם אֲשֶׁ֥ר עֲזַבְתֶּ֖ם בַּחֶ֥רֶב יִפֹּֽלוּ׃

22 ‏וַעֲשִׂיתֶ֖ם כַּאֲשֶׁ֣ר עָשִׂ֑יתִי עַל־שָׂפָם֙ לֹ֣א תַעְט֔וּ וְלֶ֥חֶם אֲנָשִׁ֖ים לֹ֥א תֹאכֵֽלוּ׃

23 ‏וּפְאֵרֵכֶ֣ם עַל־רָאשֵׁיכֶ֗ם וְנַֽעֲלֵיכֶם֙ בְּרַגְלֵיכֶ֔ם לֹ֥א תִסְפְּד֖וּ וְלֹ֣א תִבְכּ֑וּ וּנְמַקֹּתֶם֙ בַּעֲוֹנֹ֣תֵיכֶ֔ם וּנְהַמְתֶּ֖ם אִ֥ישׁ אֶל־אָחִֽיו׃

24 ‏וְהָיָ֨ה יְחֶזְקֵ֤אל לָכֶם֙ לְמוֹפֵ֔ת כְּכֹ֥ל אֲשֶׁר־עָשָׂ֖ה תַּעֲשׂ֑וּ בְּבֹאָ֕הּ וִֽידַעְתֶּ֕ם כִּ֥י אֲנִ֖י אֲדֹנָ֥י יְהוִֽה׃ ס

25 ‏וְאַתָּ֣ה בֶן־אָדָ֔ם הֲל֗וֹא בְּי֨וֹם קַחְתִּ֤י מֵהֶם֙ אֶת־מָ֣עוּזָּ֔ם מְשׂ֖וֹשׂ תִּפְאַרְתָּ֑ם אֶת־מַחְמַ֤ד עֵֽינֵיהֶם֙ וְאֶת־מַשָּׂ֣א נַפְשָׁ֔ם בְּנֵיהֶ֖ם וּבְנוֹתֵיהֶֽם׃

26 ‏בַּיּ֣וֹם הַה֔וּא יָב֥וֹא הַפָּלִ֖יט אֵלֶ֑יךָ לְהַשְׁמָע֖וּת אָזְנָֽיִם׃

27 ‏בַּיּ֣וֹם הַה֗וּא יִפָּ֤תַח פִּ֙יךָ֙ אֶת־הַפָּלִ֔יט וּתְדַבֵּ֕ר וְלֹ֥א תֵֽאָלֵ֖ם ע֑וֹד וְהָיִ֤יתָ לָהֶם֙ לְמוֹפֵ֔ת וְיָדְע֖וּ כִּֽי־אֲנִ֥י יְהוָֽה׃ ס

1 wayəhî ḏəḇar-yəhwâ ’ēlay baššānâ hatəšî‘îṯ baḥōḏeš hā‘ăśîrî be‘āśwōr laḥōḏeš lē’mōr:

2 ben-’āḏām kəṯwōḇ- kəṯāḇ- ləḵā ’eṯ-šēm hayywōm ’eṯ-‘eṣem hayywōm hazzeh sāmaḵə meleḵə-bāḇel ’el-yərûšālaim bə‘eṣem hayywōm hazzeh:

3 ûməšōl ’el-bêṯ-hammerî māšāl wə’āmarətā ’ălêhem kōh ’āmar ’ăḏōnāy yəhwih šəfōṯ hassîr šəfōṯ wəḡam-yəṣōq bwō māyim:

4 ’ĕsōf nəṯāḥeyhā ’ēleyhā kāl-nēṯaḥ ṭwōḇ yārēḵə wəḵāṯēf miḇəḥar ‘ăṣāmîm mallē’:

5 miḇəḥar haṣṣō’n lāqwōḥa wəḡam dûr hā‘ăṣāmîm taḥəteyhā rataḥ rəṯāḥeyhā gam-bāšəlû ‘ăṣāmeyhā bəṯwōḵāh: s

6 lāḵēn kōh-’āmar| ’ăḏōnāy yəhwōih ’wōy ‘îr hadāmîm sîr ’ăšer ḥelə’āṯâ ḇāh wəḥelə’āṯāh lō’ yāṣə’â mimmennâ linəṯāḥeyhā linəṯāḥeyhā hwōṣî’āh lō’-nāfal ‘āleyhā gwōrāl:

7 kî ḏāmāh bəṯwōḵāh hāyâ ‘al-ṣəḥîḥa sela‘ śāmāṯəhû lō’ šəfāḵaṯəhû ‘al-hā’āreṣ ləḵasswōṯ ‘ālāyw ‘āfār:

8 ləha‘ălwōṯ ḥēmâ linəqōm nāqām nāṯatî ’eṯ-dāmāh ‘al-ṣəḥîḥa sāla‘ ləḇilətî hikāswōṯ: f

9 lāḵēn kōh ’āmar ’ăḏōnāy yəhwih ’wōy ‘îr hadāmîm gam-’ănî ’aḡədîl hamməḏûrâ:

10 harəbēh hā‘ēṣîm haḏəlēq hā’ēš hāṯēm habāśār wəharəqaḥ hammerəqāḥâ wəhā‘ăṣāmwōṯ yēḥārû:

11 wəha‘ămîḏehā ‘al-geḥāleyhā rēqâ ləma‘an tēḥam wəḥārâ nəḥušətāh wənitəḵâ ḇəṯwōḵāh ṭumə’āṯāh titum ḥelə’āṯāh:

12 tə’unîm helə’āṯ wəlō’-ṯēṣē’ mimmennâ rabaṯ ḥelə’āṯāh bə’ēš ḥelə’āṯāh:

13 bəṭumə’āṯēḵə zimmâ ya‘an ṭiharətîḵə wəlō’ ṭâarətə miṭṭumə’āṯēḵə lō’ ṯiṭəhărî-‘wōḏ ‘aḏ-hănîḥî ’eṯ-ḥămāṯî bāḵə:

14 ’ănî yəhwâ dibarətî bā’â wə‘āśîṯî lō’-’efəra‘ wəlō’-’āḥûs wəlō’ ’ennāḥēm kiḏərāḵayiḵə wəḵa‘ălîlwōṯayiḵə šəfāṭûḵə nə’um ’ăḏōnāy yəhwōih: f

15 wayəhî ḏəḇar-yəhwâ ’ēlay lē’mōr:

16 ben-’āḏām hinənî lōqēḥa mimməḵā ’eṯ-maḥəmaḏ ‘êneyḵā bəmagēfâ wəlō’ ṯisəpōḏ wəlō’ ṯiḇəkeh wəlwō’ ṯāḇwō’ dimə‘āṯeḵā:

17 hē’ānēq| dōm mēṯîm ’ēḇel lō’-ṯa‘ăśeh fə’ērəḵā ḥăḇwōš ‘āleyḵā ûnə‘āleyḵā tāśîm bəraḡəleyḵā wəlō’ ṯa‘əṭeh ‘al-śāfām wəleḥem ’ănāšîm lō’ ṯō’ḵēl:

18 wā’ăḏabēr ’el-hā‘ām babōqer watāmāṯ ’išətî bā‘āreḇ wā’a‘aś babōqer ka’ăšer ṣuûêṯî:

19 wayyō’mərû ’ēlay hā‘ām hălō’-ṯagîḏ lānû mâ-’ēlleh llānû kî ’atâ ‘ōśeh:

20 wā’ōmar ’ălêhem dəḇar-yəhwâ hāyâ ’ēlay lē’mōr:

21 ’ĕmōr| ləḇêṯ yiśərā’ēl kōh-’āmar ’ăḏōnāy yəhwih hinənî məḥallēl ’eṯ-miqədāšî gə’wōn ‘uzzəḵem maḥəmaḏ ‘ênêḵem ûmaḥəmal nafəšəḵem ûḇənêḵem ûḇənwōṯêḵem ’ăšer ‘ăzaḇətem baḥereḇ yipōlû:

22 wa‘ăśîṯem ka’ăšer ‘āśîṯî ‘al-śāfām lō’ ṯa‘əṭû wəleḥem ’ănāšîm lō’ ṯō’ḵēlû:

23 ûfə’ērēḵem ‘al-rā’šêḵem wəna‘ălêḵem bəraḡəlêḵem lō’ ṯisəpəḏû wəlō’ ṯiḇəkû ûnəmaqqōṯem ba‘ăwōnōṯêḵem ûnəhamətem ’îš ’el-’āḥîw:

24 wəhāyâ yəḥezəqē’l lāḵem ləmwōfēṯ kəḵōl ’ăšer-‘āśâ ta‘ăśû bəḇō’āh wîḏa‘ətem kî ’ănî ’ăḏōnāy yəhwih: s

25 wə’atâ ḇen-’āḏām hălwō’ bəywōm qaḥətî mēhem ’eṯ-mā‘ûzzām məśwōś tifə’arətām ’eṯ-maḥəmaḏ ‘ênêhem wə’eṯ-maśśā’ nafəšām bənêhem ûḇənwōṯêhem:

26 bayywōm hahû’ yāḇwō’ hapālîṭ ’ēleyḵā ləhašəmā‘ûṯ ’āzənāyim:

27 bayywōm hahû’ yipāṯaḥ pîḵā ’eṯ-hapālîṭ ûṯəḏabēr wəlō’ ṯē’ālēm ‘wōḏ wəhāyîṯā lâem ləmwōfēṯ wəyāḏə‘û kî-’ănî yəhwâ: s


Next: Ezekiel (Yechezqel) Chapter 25