Sacred Texts  Hinduism  Index  Rig Veda Book 3 Index  Previous  Next 

Rig Veda Book 3 Hymn 67

uSo vAjena vAjini pracetA stomaM juSasva gRNato maghoni
purANI devi yuvatiH purandhiranu vrataM carasi vishvavAre
uSo devyamartyA vi bhAhi candrarathA sUnRtA IrayantI
A tvA vahantu suyamAso ashvA hiraNyavarNAM pRthupAjaso ye
uSaH pratIcI bhuvanAni vishvordhvA tiSThasyamRtasya ketuH
samAnamarthaM caraNIyamAnA cakramiva navyasyA vavRtsva
ava syUmeva cinvatI maghonyuSA yAti svasarasya patnI
svarjanantI subhagA sudaMsA AntAd divaH papratha A pRthivyAH
achA vo devImuSasaM vibhAtIM pra vo bharadhvaM namasA suvRktim
UrdhvaM madhudhA divi pAjo ashret pra rocanA ruruce raNvasandRk
RtAvarI divo arkairabodhyA revatI rodasI citramasthAt
AyatImagna uSasaM vibhAtIM vAmameSi draviNaM bhikSamANaH
Rtasya budhna uSasAmiSaNyan vRSA mahI rodasI A vivesha
mahI mitrasya varuNasya mAyA candreva bhAnuM vi dadhe purutrA

Next: Hymn 68